Daily Devotional: ರಾತ್ರಿ ಹೊತ್ತು ಕನ್ನಡಿ ನೋಡಬಾರದು ಏಕೆ ಗೊತ್ತಾ? ವಾಸ್ತು ತಜ್ಞರ ಸಲಹೆ ಇಲ್ಲಿದೆ

ಖ್ಯಾತ ಜ್ಯೋತಿಷಿ ಮತ್ತು ವಾಸ್ತು ಶಾಸ್ತ್ರಜ್ಞರಾದ ಡಾ. ಬಸವರಾಜ್ ಗುರೂಜಿಯವರು ತಮ್ಮ ನಿತ್ಯ ಭಕ್ತಿ ಕಾರ್ಯಕ್ರಮದಲ್ಲಿ ಕನ್ನಡಿ ನೋಡುವಿಕೆಯ ಮಹತ್ವ, ಅದಕ್ಕೆ ಸಂಬಂಧಿಸಿದ ನಿಯಮಗಳು ಮತ್ತು ಸನಾತನ ಸಂಪ್ರದಾಯಗಳ ಕುರಿತು ಮಾಹಿತಿ ನೀಡಿದ್ದಾರೆ. ತಮ್ಮ ಮುಖವನ್ನು ಸುಂದರವಾಗಿ ಕಾಣಲು ಮತ್ತು ಅಂದಗೊಳಿಸಲು ಜನರು ಕನ್ನಡಿಯನ್ನು ಉಪಯೋಗಿಸುತ್ತಾರೆ. ಆದರೆ ಕನ್ನಡಿ ನೋಡುವಿಕೆಗೂ ಕೆಲವು ನೀತಿ-ನಿಬಂಧನೆಗಳು ಇರುತ್ತವೆ ಎಂದು ಗುರೂಜಿ ವಿವರಿಸಿದ್ದಾರೆ.

ನಮ್ಮ ಸುತ್ತಲಿನ ಪ್ರಕೃತಿಯಲ್ಲಿ ಸತ್ವ, ರಜೋ ಮತ್ತು ತಮೋ ಎಂಬ ಮೂರು ಶಕ್ತಿಗಳು ಇರುತ್ತವೆ. ಈ ಶಕ್ತಿಗಳ ಪ್ರಭಾವವು ದಿನದ ವಿವಿಧ ಸಮಯಗಳಲ್ಲಿ ಭಿನ್ನವಾಗಿರುತ್ತದೆ. ಪದೇಪದೇ ಕನ್ನಡಿ ನೋಡುವುದು ಅಶುಭ ಎಂದು ಹಿರಿಯರು ಹೇಳುತ್ತಿದ್ದರು. ವಿಶೇಷವಾಗಿ ರಾತ್ರಿಯ ಸಮಯದಲ್ಲಿ ಕನ್ನಡಿ ನೋಡುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿತ್ತು. ವಿದ್ಯುತ್ ಇರದ ಹಿಂದಿನ ಕಾಲದಲ್ಲೂ ನಮ್ಮ ಪೂರ್ವಿಕರು ರಾತ್ರಿ ಹೊತ್ತು ಕನ್ನಡಿ ನೋಡಬೇಡಿ ಎಂದು ಹೇಳುತ್ತಿದ್ದರು. ಈ ನಿಯಮವು ಪುರುಷರು ಮತ್ತು ಸ್ತ್ರೀಯರು ಇಬ್ಬರಿಗೂ ಅನ್ವಯಿಸುತ್ತದೆ.

ವಿಡಿಯೋ ಇಲ್ಲಿದೆ ನೋಡಿ:

ಕನ್ನಡಿಯನ್ನು ಯಾವಾಗ ನೋಡಬೇಕು? ಬೆಳಗಿನ ಜಾವ ಎದ್ದ ತಕ್ಷಣ ಕನ್ನಡಿ ನೋಡಬಾರದು. ಬದಲಿಗೆ, ನಿತ್ಯ ಪೂಜೆ-ಪುನಸ್ಕಾರಗಳನ್ನು ಮುಗಿಸಿದ ನಂತರ, ದೈವಿ ಲಾಂಛನಗಳಾದ ವಿಭೂತಿ, ಕುಂಕುಮ ಧರಿಸಿದ ನಂತರ ಕನ್ನಡಿ ನೋಡಬಹುದು. ಆದಾಗ್ಯೂ, ಮಧ್ಯಾಹ್ನ 12 ರಿಂದ 3 ಗಂಟೆಯ ಅವಧಿಯಲ್ಲಿ ಕನ್ನಡಿ ನೋಡುವುದನ್ನು ಕಡ್ಡಾಯವಾಗಿ ತಪ್ಪಿಸಬೇಕು. ಈ ಸಮಯದಲ್ಲಿ ತಮೋಗುಣಗಳು ಪ್ರಬಲವಾಗಿರುತ್ತವೆ, ಇದು ಕೋಪ, ಆವೇಶ ಮತ್ತು ಮನಸ್ಸಿನ ವಿಕಾರತೆಗೆ ಕಾರಣವಾಗಬಹುದು. ಆದರೆ, ಸಂಜೆ 3 ರಿಂದ 6 ಗಂಟೆಯ ಅವಧಿಯಲ್ಲಿ (ಸಂಧ್ಯಾಕಾಲ) ಕನ್ನಡಿ ನೋಡಬಹುದು. ಹಳ್ಳಿಗಳಲ್ಲಿ ಅನೇಕರು ಈ ಸಮಯದಲ್ಲಿ ಮುಖ ತೊಳೆದು ವಿಭೂತಿ ಇಟ್ಟುಕೊಳ್ಳುವ ಪದ್ಧತಿ ಈಗಲೂ ಇದೆ.

ಇದನ್ನೂ ಓದಿ: ಮನೆಯಲ್ಲಿ ಮೆಟ್ಟಿಲು ನಿರ್ಮಿಸುವಾಗ ಈ ವಾಸ್ತು ನಿಯಮ ನಿರ್ಲಕ್ಷ್ಯಿಸದಿರಿ

ರಾತ್ರಿ ವೇಳೆ ಕನ್ನಡಿ ನೋಡದಿರಲು ಪ್ರಮುಖ ಕಾರಣವೆಂದರೆ, ರಾತ್ರಿಯು ತಮೋಗುಣದ ಪ್ರತೀಕ. ಕತ್ತಲು ಮತ್ತು ರಾತ್ರಿಯ ವಾತಾವರಣವು ರಜೋಗುಣ ಮತ್ತು ತಮೋಗುಣಗಳಿಂದ ಕೂಡಿರುತ್ತದೆ, ಇದು ಅಪಾಯಕಾರಿ ಎಂದು ಪರಿಗಣಿಸಲಾಗಿದೆ. ಈ ಸಮಯದಲ್ಲಿ ಕನ್ನಡಿಯನ್ನು ನೋಡಿದರೆ, ನಕಾರಾತ್ಮಕ ಶಕ್ತಿಗಳು ನಮ್ಮ ದೇಹವನ್ನು ಪ್ರವೇಶಿಸುವ ಸಾಧ್ಯತೆಯಿರುತ್ತದೆ. ಇದು ಕುಟುಂಬದಲ್ಲಿ ನೆಮ್ಮದಿ ಹಾಳಾಗಲು, ದಂಪತಿಗಳ ನಡುವೆ ಸಾಮರಸ್ಯದ ಕೊರತೆಗೆ, ಒಡಹುಟ್ಟಿದವರ ನಡುವೆ ಭಿನ್ನಾಭಿಪ್ರಾಯಗಳಿಗೆ ಮತ್ತು ಮಾನಸಿಕ ವಿಕಾರತೆಗೆ ಕಾರಣವಾಗಬಹುದು ಎಂದು ಗುರೂಜಿ ವಿವರಿಸಿದ್ದಾರೆ.

ಬ್ರಾಹ್ಮಿ ಮುಹೂರ್ತ ಮತ್ತು ಸಂಧ್ಯಾಕಾಲದಲ್ಲಿ ವಾತಾವರಣದಲ್ಲಿ ಸತ್ವಗುಣದ ಲಹರಿಗಳು ಇರುತ್ತವೆ, ಹಾಗಾಗಿ ಬೆಳಗಿನ ಪೂಜೆ, ವ್ಯಾಯಾಮ, ವಾಯುವಿಹಾರ ಶುಭಕರ. ಆದರೆ ರಾತ್ರಿ ಹೊತ್ತು ಕನ್ನಡಿ ನೋಡುವ ಅಭ್ಯಾಸವು “ರಾಕ್ಷಸಿ ಗುಣಗಳನ್ನು” ಆಕರ್ಷಿಸಬಹುದು ಎಂದು ನಂಬಲಾಗಿದೆ. ಇವೆಲ್ಲವೂ ನಮ್ಮ ಸನಾತನ ಪದ್ಧತಿಗಳು ಮತ್ತು ನಂಬಿಕೆಗಳ ಆಧಾರದ ಮೇಲೆ ನಿಂತಿವೆ ಎಂದು ಗುರೂಜಿ ಸ್ಪಷ್ಟಪಡಿಸಿದ್ದಾರೆ.

ಮತ್ತಷ್ಟು ಆಧ್ಯಾತ್ಮಿಕ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ