ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಘೋಷಿಸಿದ ವಿವಾದಾತ್ಮಕ ಬೌಲರ್ ಮೊಹಮ್ಮದ್ ಆಮಿರ್
ಪಾಕಿಸ್ತಾನದ ವಿವಾದಾತ್ಮಕ ವೇಗದ ಬೌಲರ್ ಮೊಹಮ್ಮದ್ ಆಮಿರ್ ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ವಿದಾಯ ಘೋಷಿಸಿದ್ದಾರೆ. ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯ ಧೋರಣೆಗಳಿಂದ ಬೇಸತ್ತು ಅವರು ಕ್ರೀಡೆಗೆ ಗುಡ್ಬೈ ಹೇಳುವ ನಿರ್ಧಾರ ತೆಗೆದುಕೊಂಡರೆಂದು ಹೇಳಲಾಗುತ್ತಿದೆ.
Updated on:Dec 17, 2020 | 8:21 PM
ಕ್ರೀಡೆ ಯಾವುದೇ ಆಗಿರಲಿ, 28ರ ವಯಸ್ಸು ಒಬ್ಬ ಕ್ರೀಡಾಪಟುಗೆ ಅವನು ಪ್ರತಿನಿಧಿಸುವ ಆಟದಲ್ಲಿ ಉತ್ತುಂಗವನ್ನು ತಲುಪಿರುವ ಇಲ್ಲವೇ ತಲುಪಬಹುದಾದ ಸಮಯ. ಆದರೆ ಪಾಕಿಸ್ತಾನದ ವಿವಾದಾತ್ಮಕ ವೇಗದ ಬೌಲರ್ ಮೊಹಮ್ಮದ್ ಆಮಿರ್ ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ಆ ಚಿಕ್ಕ ವಯಸ್ಸಿನಲ್ಲೇ ಕ್ರಿಕೆಟ್ಗೆ ವಿದಾಯ ಹೇಳಿದ್ದಾರೆ. ಪಾಕಿಸ್ತಾನ ಕ್ರಿಕೆಟ್ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ವಾಸಿಮ್ ಖಾನ್ ಪತ್ರಿಕಾ ಪ್ರಕಟಣೆಯೊಂದನ್ನು ಬಿಡುಗಡೆ ಮಾಡಿ ಆಮಿರ್ ರಿಟೈರ್ಮೆಂಟ್ ಘೋಷಿಸಿರುವುದನ್ನು ಖಚಿತಪಡಿಸಿದ್ದಾರೆ.
30 ಟೆಸ್ಟ್, 61 ಒಂದು ದಿನದ ಅಂತರರಾಷ್ಟ್ರೀಯ ಮತ್ತು 50ಟಿ20ಐ ಪಂದ್ಯಗಳಲ್ಲಿ ಪಾಕಿಸ್ತಾನವನ್ನು ಪ್ರತಿನಿಧಿಸಿದ ಆಮಿರ್ ಒಟ್ಟು 259 ವಿಕೆಟ್ಗಳನ್ನು ಪಡೆದಿದ್ದಾರೆ. ತನ್ನ 17ನೇ ವಯಸ್ಸಿನಲ್ಲೇ ರಾಷ್ಟ್ರೀಯ ತಂಡಕ್ಕೆ ಕಾಲಿಟ್ಟ ಆಮಿರ್ರನ್ನು ಆ ದೇಶದ ಸರ್ವಶ್ರೇಷ್ಠ ವೇಗದ ಬೌಲರ್ ಎಂದು ಗುರುತಿಸಿಕೊಂಡಿರುವ ವಾಸಿಮ್ ಅಕ್ರಮ್ ಅವರ ಉತ್ತರಾಧಿಕಾರಿಯೆಂದು ಪರಿಗಣಿಸಿಲಾಗಿತ್ತು.
ಅಕ್ರಮ್ರಂಥ ವ್ಯಕ್ತಿತ್ವವನ್ನು ಆಮಿರ್ ಮೈಗೂಡಿಸಿಕೊಂಡಿದ್ದರೆ ಅವರಿಗೂ ಆ ಲೆಜೆಂಡ್ಗೆ ಸಿಗುವಷ್ಟೇ ಗೌರವ ದಕ್ಕುತ್ತಿತ್ತು. ಆದರೆ, ಹುಡುಗು ಬುದ್ಧಿ ಅವರನ್ನು ಯಾಮಾರಿಸಿತು. ಪಾಕಿಸ್ತಾನದ 2010ರ ಇಂಗ್ಲೆಂಡ್ ಪ್ರವಾಸದಲ್ಲಿ ಸ್ಪಾಟ್ ಫಿಕ್ಸಿಂಗ್ ಪ್ರಕರಣವೊಂದರಲ್ಲಿ ಸಿಕ್ಕಿಬಿದ್ದ ಆಮಿರ್ 5ವರ್ಷಗಳ ಅವಧಿಗೆ ನಿಷೇಧಕ್ಕೊಳಗಾದರು. ಅವರೊಂದಿಗೆ ಪ್ರಕರಣದಲ್ಲಿ ಭಾಗಿಯಾಗಿದ್ದ ಪಾಕಿಸ್ತಾನದ ಆರಂಭ ಆಟಗಾರ ಸಲ್ಮಾನ್ ಬಟ್ ಮತ್ತು ಇನ್ನೊಬ್ಬ ವೇಗದ ಬೌಲರ್ ಮೊಹಮ್ಮದ್ ಆಸಿಫ್ರನ್ನು ಸಹ 5 ವರ್ಷಗಳ ಕಾಲ ಕ್ರಿಕೆಟ್ ಆಡದಂತೆ ನಿಷೇಧಿಸಲಾಗಿತ್ತು.
ಪಿಸಿಬಿಯ ಸಿಇಒ ವಾಸಿಮ್ ಖಾನ್
ದೇಶೀಯ ಕ್ರಿಕೆಟ್ನಲ್ಲಿ ಪಾಕಿಸ್ತಾನ ನ್ಯಾಶನಲ್ ಬ್ಯಾಂಕ್ ಪರ 2009 ರಲ್ಲಿ ಆಡಲಾರಂಭಿಸಿದ ಆಮಿರ್ ತಮ್ಮ ವೇಗ, ನಿಖರತೆ ಮತ್ತು ವಿಕೆಟ್ ಪಡೆಯುವ ಸಾಮರ್ಥ್ಯದಿಂದ ಕೂಡಲೇ ರಾಷ್ಟ್ರೀಯ ಆಯ್ಕೆ ಸಮಿತಿಯ ಗಮನ ಸೆಳೆದರು. ಅವರನ್ನು 2009ರ ಟಿ20ವಿಶ್ವಕಪ್ ಟೂರ್ನಿಗೆ ಪಾಕಿಸ್ತಾನ ತಂಡದಲ್ಲಿ ಅವಕಾಶ ಕಲ್ಪಿಸಲಾಯಿತು. ಆ ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ ಉತ್ಕೃಷ್ಟ ಬೌಲಿಂಗ್ ಪ್ರದರ್ಶನ ನೀಡಿದ ಆಮಿರ್ ಪಾಕಿಸ್ತಾನ ಪ್ರಶಸ್ತಿ ಗೆಲ್ಲುವಲ್ಲಿ ನಿರ್ಣಾಯಕ ಪಾತ್ರ ನಿರ್ವಹಿಸಿದರು.
ಹುಡುಗು ಬುದ್ಧಿ ಅವರ ಉಜ್ವಲ ಭವಿಷ್ಯವನ್ನು 2010ರಲ್ಲಿ ಮೊಟಕುಗೊಳಿಸಿತು. ನಿಷೇದಕ್ಕೊಳಗಾದರೂ ಟೀಮಿಗೆ ವಾಪಸ್ಸಾಗುವ ಛಲತೊಟ್ಟಿದ್ದ ಆಮಿರ್, 2015ರಲ್ಲಿ ತಮ್ಮಾಸೆಯನ್ನು ಈಡೇರಿಸಿಕೊಂಡರು. 2017 ಚಾಂಪಿಯನ್ಸ್ ಟ್ರೋಫಿಯಲ್ಲಿ ಅವರ ಆಸಾಧಾರಣ ಬೌಲಿಂಗ್ ಪ್ರದರ್ಶನದಿಂದ ಪಾಕಿಸ್ತಾನ ಚಾಂಪಿಯನ್ ಪಟ್ಟ ಧರಿಸಿತು. 2019 ರ ಐಸಿಸಿ ವಿಶ್ವಕಪ್ನಲ್ಲಿ ಆಮಿರ್ ಪಾಕಿಸ್ತಾನದ ಪರ ಅತಿಹೆಚ್ಚು ವಿಕೆಟ್ ಪಡೆದರು.
ಮೊಹಮ್ಮದ್ ಆಸಿಫ್
ಬಿಳಿಚೆಂಡಿನ ಕ್ರಿಕೆಟ್ ಮೇಲೆ ಹೆಚ್ಚು ಗಮನ ಹರಿಸುವುದಕ್ಕೋಸ್ಕರ ಆಮಿರ್ 2017ರಲ್ಲಿ ಟೆಸ್ಟ್ ಕ್ರಿಕೆಟ್ಗೆ ವಿದಾಯ ಹೇಳಿದರು. ಅವರ ಈ ನಿರ್ಧಾರ ಆಗ ಪಾಕ್ ಟೀಮಿನ ಕೋಚ್ ಅಗಿದ್ ಮಾಜಿ ವೇಗದ ಬೌಲರ್ ವಕಾರ್ ಯೂನಿಸ್ ಅವರನ್ನು ಕೆರಳಿಸಿತ್ತು.
ಪಾಕಿಸ್ತಾನದ ಕ್ರಿಕೆಟ್ ವಲಯಗಳಲ್ಲಿ ಆಮಿರ್ ರೆಟೈರ್ಮೆಂಟ್ ನಿರ್ಧಾರ ತಾತ್ಕಾಲಿಕ ಎನ್ನಲಾಗುತ್ತಿದೆ. ಮೂಲಗಳ ಪ್ರಕಾರ ಅವರ ಮನವೊಲಿಸುವ ಪ್ರಯತ್ನಗಳು ನಡೆಯುತ್ತಿವೆ.
Published On - 7:27 pm, Thu, 17 December 20
