Abu Dhabi T10 League: 30 ಎಸೆತಗಳಲ್ಲಿ 83 ರನ್​: ಟಿ10 ಲೀಗ್​ನಲ್ಲಿ ಪಾಕ್ ಆಟಗಾರನ ಸಿಡಿಲಬ್ಬರ

Abu Dhabi T10 League: ಅಬುಧಾಬಿಯಲ್ಲಿ ನಡೆಯುತ್ತಿರುವ ಟಿ10 ಲೀಗ್​ನಲ್ಲಿ ಪಾಕ್ ಆಟಗಾರ ಇಫ್ತಿಕಾರ್ ಅಹ್ಮದ್ ತೂಫಾನ್ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಡೆಲ್ಲಿ ಬುಲ್ಸ್ ವಿರುದ್ಧ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಬಾಂಗ್ಲಾ ಟೈಗರ್ಸ್ ನಾಯಕ ಶಕೀಬ್ ಅಲ್ ಹಸನ್ ಬ್ಯಾಟಿಂಗ್ ಆಯ್ದುಕೊಂಡರು. ಅದರಂತೆ ಬಾಂಗ್ಲಾ ಪರ ಹಝ್ರತುಲ್ಲಾ ಝಝೈ ಹಾಗೂ ಜೋ ಕ್ಲಾರ್ಕ್​ ಇನಿಂಗ್ಸ್ ಆರಂಭಿಸಿದ್ದರು. ಆದರೆ ಈ ಆರಂಭಿಕರಿಂದ ನಿರೀಕ್ಷಿತ ಆಟ ಮೂಡಿಬಂದಿರಲಿಲ್ಲ. ತಂಡದ ಮೊತ್ತ 38 ಆಗುವಷ್ಟರಲ್ಲಿ ಇಬ್ಬರು ಪೆವಿಲಿಯನ್​ ಕಡೆ ಮುಖ ಮಾಡಿದ್ದರು. ಈ ವೇಳೆ ನಾಲ್ಕನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಇಫ್ತಿಕಾರ್ ಅಹ್ಮದ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದರು. ಆರಂಭದಿಂದಲೇ ಡೆಲ್ಲಿ ಬುಲ್ಸ್ ಬೌಲರ್​ಗಳ ಬೆಂಡೆತ್ತಿದ ಇಫ್ತಿಕಾರ್ 8 ಭರ್ಜರಿ ಸಿಕ್ಸ್​ ಹಾಗೂ 5 ಫೋರ್​ಗಳನ್ನು ಬಾರಿಸಿದರು.

ಪರಿಣಾಮ ಕೇವಲ 30 ಎಸೆತಗಳಲ್ಲಿ ಇಫ್ತಿಕಾರ್ ಅಹ್ಮದ್ ಬ್ಯಾಟ್​ನಿಂದ 83 ರನ್​ಗಳು ಮೂಡಿಬಂತು. ಈ ಭರ್ಜರಿ ಬ್ಯಾಟಿಂಗ್ ನೆರವಿನಿಂದ ಬಾಂಗ್ಲಾ ಟೈಗರ್ಸ್ ತಂಡವು ನಿಗದಿತ 10 ಓವರ್​ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 133 ರನ್​ ಕಲೆಹಾಕಿತು.

60 ಎಸೆತಗಳಲ್ಲಿ 134 ರನ್​ಗಳ ಬೃಹತ್ ಟಾರ್ಗೆಟ್ ಪಡೆದ ಡೆಲ್ಲಿ ಬುಲ್ಸ್ ಉತ್ತಮ ಆರಂಭ ಪಡೆದಿರಲಿಲ್ಲ. ಆರಂಭಿಕರಾದ ಟಾಮ್ ಬ್ಯಾಂಟನ್ (4) ಹಾಗೂ ರಿಲೀ ರೊಸ್ಸೊ (15) ಬೇಗನೆ ನಿರ್ಗಮಿಸಿದರು. ಇನ್ನು ಜೋರ್ಡನ್ ಕೋಕ್ಸ್ 34 ರನ್​ಗಳ ಕಾಣಿಕೆ ನೀಡಿದರು.

ಆದರೆ ನಾಲ್ಕನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಟಿಮ್ ಡೇವಿಡ್ ಇಡೀ ಪಂದ್ಯದ ಚಿತ್ರಣ ಬದಲಿಸುವ ಸೂಚನೆ ನೀಡಿದರು. ಸ್ಪೋಟಕ ಇನಿಂಗ್ಸ್ ಆಡಿದ ಡೇವಿಡ್ 6 ಭರ್ಜರಿ ಸಿಕ್ಸ್​ನೊಂದಿಗೆ ಕೇವಲ 20 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಆದರೆ ಅಂತಿಮ ಹಂತದಲ್ಲಿ ಉತ್ತಮ ದಾಳಿ ಸಂಘಟಿಸಿದ ಬಾಂಗ್ಲಾ ಟೈಗರ್ಸ್ ತಂಡವು 12 ರನ್​ಗಳಿಂದ ರೋಚಕ ಜಯ ಸಾಧಿಸುವಲ್ಲಿ ಯಶಸ್ವಿಯಾದರು.

ಬಾಂಗ್ಲಾ ಟೈಗರ್ಸ್​ ಪ್ಲೇಯಿಂಗ್ 11: ಹಝ್ರತುಲ್ಲಾ ಝಝೈ , ಜೋ ಕ್ಲಾರ್ಕ್ (ವಿಕೆಟ್ ಕೀಪರ್) , ಇಫ್ತಿಕಾರ್ ಅಹ್ಮದ್ , ಎವಿನ್ ಲೆವಿಸ್ , ಕಾಲಿನ್ ಮುನ್ರೋ , ಶಕೀಬ್ ಅಲ್ ಹಸನ್ (ನಾಯಕ) , ಉಮೈರ್ ಅಲಿ , ಬೆನ್ನಿ ಹೋವೆಲ್ , ರೋಹನ್ ಮುಸ್ತಫಾ , ಮೊಹಮ್ಮದ್ ಅಮೀರ್ , ಲ್ಯೂಕ್ ಫ್ಲೆಚರ್

ಡೆಲ್ಲಿ ಬುಲ್ಸ್ ಪ್ಲೇಯಿಂಗ್ 11: ಟಾಮ್ ಬ್ಯಾಂಟನ್ (ವಿಕೆಟ್ ಕೀಪರ್) , ರಿಲಿ ರೊಸ್ಸೊ , ಟಿಮ್ ಡೇವಿಡ್ , ಡ್ವೇನ್ ಬ್ರಾವೋ (ನಾಯಕ) , ಕೀಮೋ ಪಾಲ್ , ರಿಚರ್ಡ್ ಗ್ಲೀಸನ್ , ಇಮಾದ್ ವಾಸಿಮ್ , ಜೋರ್ಡಾನ್ ಕೊಕ್ಸ್ , ಹರ್ಭಜನ್ ಸಿಂಗ್ , ಶಿರಾಜ್ ಅಹ್ಮದ್ , ಆಸಿಫ್ ಖಾನ್