IND vs SL: ಕೊಹ್ಲಿ ಆಟವನ್ನು ಇನ್​ಸ್ಟಾಗ್ರಾಂ ಪೋಸ್ಟ್​ನಲ್ಲಿ ಮನಸಾರೆ ಹೊಗಳಿದ ಮಡದಿ ಅನುಷ್ಕಾ..!

ಶ್ರೀಲಂಕಾ ವಿರುದ್ಧದ (India Vs Sri Lanka) ಮೂರನೇ ಏಕದಿನ ಪಂದ್ಯದಲ್ಲಿ 166 ರನ್‌ಗಳ ಅಬ್ಬರದ ಶತಕ ಸಿಡಿಸಿದ ವಿರಾಟ್ ಕೊಹ್ಲಿ (Virat Kohli) ವಿಶ್ವ ಕ್ರಿಕೆಟ್​ನಲ್ಲಿ ಹಲವು ದಾಖಲೆ ಬರೆದಿದ್ದಾರೆ. ಕೊಹ್ಲಿಯ ಅಬ್ಬರದ ಇನ್ನಿಂಗ್ಸ್ ನೆರವಿನಿಂದ ಟೀಂ ಇಂಡಿಯಾ (Team India ) ಕೂಡ ಪಂದ್ಯವನ್ನು ಗೆದ್ದಿದ್ದಲ್ಲದೆ ಸರಣಿಯನ್ನೂ ಕೈವಶ ಮಾಡಿಕೊಂಡಿದೆ. ಇಡೀ ಸರಣಿಯಲ್ಲಿ ಎರಡು ಶತಕ ಸೇರಿದಂತೆ ಅತ್ಯಧಿಕ ರನ್ ಬಾರಿಸಿದ ಆಟಗಾರ ಎನಿಸಿಕೊಂಡಿರುವ ಕೊಹ್ಲಿಗೆ ಸರಣಿ ಶ್ರೇಷ್ಠ ಪ್ರಶಸ್ತಿ ಕೂಡ ಒಲಿದಿದೆ. ಇದೀಗ ಈ ಎಲ್ಲಾ ಪ್ರಶಸ್ತಿಗಳಿಗೂ ಮೀಗಿಲಾದ ಪ್ರಶಸ್ತಿಯೊಂದಿ ಕೊಹ್ಲಿಗೆ ಮಡದಿ ಅನುಷ್ಕಾ ಶರ್ಮಾ ಅವರಿಂದ ಸಿಕ್ಕಿದೆ. ವಿರಾಟ್ ಅವರ ದಾಖಲೆಯ ಇನ್ನಿಂಗ್ಸ್ ಕಂಡು ಬೆರಗಾಗಿರುವ ನಟಿ ಮತ್ತು ಅವರ ಪತ್ನಿ ಅನುಷ್ಕಾ ಶರ್ಮಾ (Anushka Sharma) ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ಕೊಹ್ಲಿಯ ಶತಕದ ಫೋಟೋವನ್ನು ಹಂಚಿಕೊಂಡಿದ್ದು, ಅದ್ಭುತ ಸಾಲುಗಳ ಮೂಲಕ ಪತಿ ವಿರಾಟ್​ ಆಟವನ್ನು ಶ್ಲಾಘಿಸಿದ್ದಾರೆ.

ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಟೀಂ ಇಂಡಿಯಾ 5 ವಿಕೆಟ್ ಕಳೆದುಕೊಂಡು 390 ರನ್​ಗಳ ಬೃಹತ್ ಮೊತ್ತ ಪೇರಿಸಿತು. ಇಷ್ಟು ದೊಡ್ಡ ಗುರಿಯ ಮುಂದೆ ಶ್ರೀಲಂಕಾದ ಇನಿಂಗ್ಸ್ ಇಸ್ಪೀಟೆಲೆಯಂತೆ ಕುಸಿಯಿತು. ವಾಸ್ತವವಾಗಿ ವಿರಾಟ್ ಅವರ ಶತಕದ ಇನ್ನಿಂಗ್ಸ್‌ನಿಂದಾಗಿ ಟೀಂ ಇಂಡಿಯಾ ಇಷ್ಟು ದೊಡ್ಡ ಸ್ಕೋರ್ ನಿರ್ಮಿಸಲು ಸಾಧ್ಯವಾಯಿತು. ಹೀಗಾಗಿ ಪತಿಯ ಆಟವನ್ನು ಸ್ಮರಿಸಿರುವ ಅನುಷ್ಕಾ ಶರ್ಮಾ, ಕೊಹ್ಲಿಯ ಫೋಟೋವನ್ನು ಇನ್​​ಸ್ಟಾಗ್ರಾಮ್​ನಲ್ಲಿ ಶೇರ್ ಮಾಡಿ, ‘ವಾಟ್ ಎ ಗೈ, ವಾಟ್ ಆ್ಯನ್ ಇನ್ನಿಂಗ್ಸ್ ಪ್ಲೇಯಿಡ್’ ಎಂದು ಬರೆದುಕೊಂಡಿದ್ದಾರೆ.

166 ರನ್ ಚಚ್ಚಿದ ವಿರಾಟ್

ಶ್ರೀಲಂಕಾ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ 110 ಎಸೆತಗಳನ್ನು ಎದುರಿಸಿದ ಕೊಹ್ಲಿ 13 ಬೌಂಡರಿ ಹಾಗೂ 8 ಸಿಕ್ಸರ್ ಸಹಿತ 166 ರನ್ ಗಳಿಸಿದರು. ಅದರಲ್ಲೂ ಲಂಕಾ ಬೌಲರ್ ರಜಿತಾ ಎಸೆತದಲ್ಲಿ ಚಾಪರ್ ಶಾಟ್ ಬಾರಿಸಿದ ಕೊಹ್ಲಿಯ ಆಟ ನೋಡಿ ಕ್ರೀಡಾಂಗಣದಲ್ಲಿ ನೆರದಿದ್ದವರೆಲ್ಲ ಹುಚ್ಚೆದು ಕುಣಿದರು. ಸುಮಾರು 97 ಮೀಟರ್ ಉದ್ದದ ಸಿಕ್ಸರ್ ನೋಡಿದ ಗೌತಮ್ ಗಂಭೀರ್ ಕೂಡ ಕೊಹ್ಲಿಯ ಈ ಶಾಟ್ ಅನ್ನು ಶ್ಲಾಘಿಸಿದ್ದಾರೆ. ಶತಕದ ನಂತರ ಇನ್ನಷ್ಟು ಉಗ್ರಾವತಾರ ತಾಳಿದ ಕೊಹ್ಲಿ ಶತಕದ ನಂತರ ಇನ್ನೂ 7 ಸಿಕ್ಸರ್‌ ಬಾರಿಸಿದರು.

ಈ ಚಿತ್ರದಲ್ಲಿ ಅನುಷ್ಕಾ ಬ್ಯುಸಿ

ವಿರಾಟ್ ಆಟವನ್ನು ಸೋಶಿಯಲ್ ಮೀಡಿಯಾದಲ್ಲಿ ಆಗಾಗ್ಗೆ ಹೊಗಳುವ ಕೆಲಸ ಮಾಡುವ ಅನುಷ್ಕಾ ಶರ್ಮಾ ಶೀಘ್ರದಲ್ಲೇ ಟೀಂ ಇಂಡಿಯಾ ಮಾಜಿ ಆಟಗಾರ್ತಿ ಜೂಲನ್ ಗೋಸ್ವಾಮಿ ಅವರ ಜೀವನಚರಿತ್ರೆ ಚಕ್ಡಾ ಎಕ್ಸ್‌ಪ್ರೆಸ್‌ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇತ್ತೀಚೆಗೆ ಈ ಚಿತ್ರಕ್ಕೆ ಸಂಬಂಧಿಸಿದ ಫೋಟೋಗಳು ಮತ್ತು ವೀಡಿಯೊಗಳನ್ನು ಅನುಷ್ಕಾ ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡು ಚಿತ್ರದ ಬಗ್ಗೆ ಅಪ್​ಡೇಟ್ ನೀಡಿದ್ದರು.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ