SMAT 2025: 6,6,6,6,6,6,6,6.. ಸಿಡಿಲಬ್ಬರದ ಶತಕ ಸಿಡಿಸಿದ ಆಯುಷ್ ಮ್ಹಾತ್ರೆ
Ayush Mhatre's Blazing Century: 2025-26ರ ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಮುಂಬೈ ತಂಡ ವಿದರ್ಭ ವಿರುದ್ಧ 7 ವಿಕೆಟ್ಗಳಿಂದ ಭರ್ಜರಿ ಜಯ ಸಾಧಿಸಿತು. ಯುವ ಆಯುಷ್ ಮ್ಹಾತ್ರೆ 53 ಎಸೆತಗಳಲ್ಲಿ ಅಜೇಯ 110 ರನ್ ಸಿಡಿಸಿ ಗೆಲುವಿನ ರೂವಾರಿಯಾದರು. ವಿದರ್ಭ 192 ರನ್ಗಳ ಬೃಹತ್ ಮೊತ್ತ ಗಳಿಸಿದರೂ (ಅಥರ್ವ 64, ಅಮನ್ 61), ಸೂರ್ಯಕುಮಾರ್ ಮತ್ತು ಶಿವಂ ದುಬೆ ಅವರ ಕೊಡುಗೆಗಳೊಂದಿಗೆ ಮುಂಬೈ ಸುಲಭವಾಗಿ ಗುರಿ ತಲುಪಿತು. ಇದು ಮುಂಬೈಗೆ ಸ್ಮರಣೀಯ ಗೆಲುವು.
Updated on: Nov 28, 2025 | 9:37 PM
2025-26ರ ಸೈಯದ್ ಮುಷ್ತಾಕ್ ಅಲಿ (Syed Mushtaq Ali Trophy 2025-26) ಟ್ರೋಫಿಯ ಎಲೈಟ್ ಗ್ರೂಪ್ ಎ ಪಂದ್ಯದಲ್ಲಿ ವಿದರ್ಭ ಹಾಗೂ ಮುಂಬೈ (Mumbai vs Vidarbha) ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯವನ್ನು ಮುಂಬೈ ತಂಡ 7 ವಿಕೆಟ್ಗಳಿಂದ ಗೆದ್ದುಕೊಂಡಿತು. ಭಾರತ ರತ್ನ ಶ್ರೀ ಅಟಲ್ ಬಿಹಾರಿ ವಾಜಪೇಯಿ ಏಕಾನಾ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಈ ಟಿ20 ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ವಿದರ್ಭ 20 ಓವರ್ಗಳಲ್ಲಿ 9 ವಿಕೆಟ್ಗಳಿಗೆ 192 ರನ್ ಗಳಿಸಿತು. ಈ ಗುರಿ ಬೆನ್ನಟ್ಟಿದ ಮುಂಬೈ ಕೇವಲ 17.5 ಓವರ್ಗಳಲ್ಲಿ 3 ವಿಕೆಟ್ ಕಳೆದುಕೊಂಡು ಜಯದ ನಗೆ ಬೀರಿತು. ಮುಂಬೈ ಪರ ಸ್ಫೋಟಕ ಶತಕ ಸಿಡಿಸಿದ ಆಯುಷ್ ಮ್ಹಾತ್ರೆ (Ayush Mhatre) ಈ ಗೆಲುವಿನ ಪ್ರಮುಖ ರೂವಾರಿಯಾದರು.
ಬೃಹತ್ ಮೊತ್ತ ದಾಖಲಿಸಿದ ವಿದರ್ಭ
ಪಂದ್ಯದ ಆರಂಭದಲ್ಲಿ, ಮುಂಬೈ ತಂಡದ ನಾಯಕ ಟಾಸ್ ಗೆದ್ದು ಮೊದಲು ಬೌಲಿಂಗ್ ಮಾಡಲು ನಿರ್ಧರಿಸಿದರು. ಹೀಗಾಗಿ ಮೊದಲು ಬ್ಯಾಟಿಂಗ್ ಮಾಡಿದ ವಿದರ್ಭ ತಂಡವು ಮೊದಲ ವಿಕೆಟ್ಗೆ 115 ರನ್ ಸೇರಿಸುವ ಮೂಲಕ ಉತ್ತಮ ಆರಂಭ ಪಡೆದುಕೊಂಡಿತು. ತಂಡದ ಪರ ಅಥರ್ವ ಟೈಡೆ 64 ಮತ್ತು ಅಮನ್ ಮೊಖಡೆ 61 ರನ್ ಬಾರಿಸಿದರು. ಆದಾಗ್ಯೂ, ಈ ಇಬ್ಬರು ಆಟಗಾರರು ಔಟಾದ ನಂತರ ಬಂದ ಆರು ಬ್ಯಾಟ್ಸ್ಮನ್ಗಳು ಎರಡಂಕಿ ತಲುಪಲು ವಿಫಲವಾದ ಕಾರಣ ವಿದರ್ಭದ ಇನ್ನಿಂಗ್ಸ್ ಕುಸಿಯಿತು. ಒಮ್ಮೆ 200 ಕ್ಕೂ ಹೆಚ್ಚು ಸ್ಕೋರ್ಗಳ ಹಾದಿಯಲ್ಲಿದ್ದ ವಿದರ್ಭ ಅಂತಿಮವಾಗಿ 192 ರನ್ಗಳಿಗೆ ಆಲೌಟ್ ಆಯಿತು.
ಆಯುಷ್ ಮ್ಹಾತ್ರೆ ಭರ್ಜರಿ ಶತಕ
ಈ ಬೃಹತ್ ಮೊತ್ತವನ್ನು ಬೆನ್ನಟ್ಟಿದ ಮುಂಬೈ ಪರ 18 ವರ್ಷದ ಆಯುಷ್ ಮ್ಹಾತ್ರೆ ಸ್ಮರಣೀಯ ಇನ್ನಿಂಗ್ಸ್ ಆಡಿದರು. ಆಯುಷ್ ಮ್ಹಾತ್ರೆ ಕೇವಲ 53 ಎಸೆತಗಳನ್ನು ಎದುರಿಸಿ ಅಜೇಯ 110 ರನ್ ಗಳಿಸಿದರು. ಈ ಇನ್ನಿಂಗ್ಸ್ನಲ್ಲಿ, ಆಯುಷ್ ಮ್ಹಾತ್ರೆ 8 ಬೌಂಡರಿ ಮತ್ತು 8 ಸಿಕ್ಸರ್ಗಳನ್ನು ಬಾರಿಸಿದರು. ಈ ಮೂಲಕ ಕೇವಲ ಬೌಂಡರಿಗಳಿಂದಲೇ ಅವರು 80 ರನ್ ಕಲೆಹಾಕಿದರು.
ಆಯುಷ್ ಮ್ಹಾತ್ರೆ ಜೊತೆಗೆ, ಸೂರ್ಯಕುಮಾರ್ ಯಾದವ್ ಕೂಡ 30 ಎಸೆತಗಳಲ್ಲಿ 35 ರನ್ ಗಳಿಸಿದರು. ಏತನ್ಮಧ್ಯೆ, ಶಿವಂ ದುಬೆ 19 ಎಸೆತಗಳಲ್ಲಿ 205.26 ಸ್ಟ್ರೈಕ್ ರೇಟ್ನಲ್ಲಿ ಅಜೇಯ 39 ರನ್ ಗಳಿಸಿ ತಂಡವನ್ನು ಗೆಲುವಿನತ್ತ ಕೊಂಡೊಯ್ದರು. ಶಿವಂ ದುಬೆ ಕೂಡ ಮೂರು ಬೌಂಡರಿ ಮತ್ತು ಅಷ್ಟೇ ಸಿಕ್ಸರ್ಗಳನ್ನು ಬಾರಿಸಿದರು. ಪರಿಣಾಮವಾಗಿ, ಮುಂಬೈ ಕೇವಲ ಮೂರು ವಿಕೆಟ್ಗಳನ್ನು ಕಳೆದುಕೊಂಡು ಈ ಬೃಹತ್ ಗುರಿಯನ್ನು ಬೆನ್ನಟ್ಟಿತು.
ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
