BCCI: ಖಾಲಿಯಿರುವ 7 ಹುದ್ದೆಗಳಿಗೆ ಅರ್ಜಿ ಆಹ್ವಾನಿಸಿದ ಬಿಸಿಸಿಐ; 90 ಲಕ್ಷ ರೂ. ವೇತನ

ವಿಶ್ವದ ಶ್ರೀಮಂತ ಕ್ರಿಕೆಟ್ ಮಂಡಳಿ ಬಿಸಿಸಿಐ (BCCI) ಹಲವಾರು ಖಾಲಿ ಹುದ್ದೆಗಳಿಗೆ ಅರ್ಜಿ ಆಹ್ವಾನಿಸಿದೆ. ರಾಷ್ಟ್ರೀಯ ಆಯ್ಕೆದಾರರ ಹುದ್ದೆಯ ಜೊತೆಗೆ, ಮಹಿಳಾ ಮತ್ತು ಜೂನಿಯರ್ ಆಯ್ಕೆ ಸಮಿತಿಯ ಹುದ್ದೆಗಳಿಗೂ ಅರ್ಜಿಗಳನ್ನು ಆಹ್ವಾನಿಸಲಾಗಿದೆ. ಅಲ್ಲದೆ ಈ ಹುದ್ದೆ ಪಡೆಯಲಿಚ್ಚಿಸುವವರಿಗೆ ಹಲವಾರು ಅರ್ಹತೆಗಳನ್ನು ಸಹ ನಿಗದಿಪಡಿಸಲಾಗಿದೆ. ಹಾಗೆಯೇ ಈ ಹುದ್ದೆಗೇರಿದವರಿಗೆ ಸುಮಾರು 90 ಲಕ್ಷ ರೂ. ವಾರ್ಷಿಕ ವೇತನವೂ ಸಿಗಲಿದೆ. ಬಿಸಿಸಿಐ ತನ್ನ ವೆಬ್‌ಸೈಟ್‌ನಲ್ಲಿ ಹಲವಾರು ಪೋಸ್ಟ್‌ಗಳಿಗೆ ಜಾಹೀರಾತನ್ನು ಬಿಡುಗಡೆ ಮಾಡಿದ್ದು, ಹಿರಿಯ ಪುರುಷರ ತಂಡಕ್ಕೆ ಇಬ್ಬರು ರಾಷ್ಟ್ರೀಯ ಆಯ್ಕೆದಾರರು, ಮಹಿಳಾ ತಂಡಕ್ಕೆ ನಾಲ್ಕು ಆಯ್ಕೆದಾರರು ಮತ್ತು ಜೂನಿಯರ್ ತಂಡಕ್ಕೆ ಒಬ್ಬ ಆಯ್ಕೆದಾರರ ಹುದ್ದೆಗೆ ಅರ್ಜಿಗಳನ್ನು ಆಹ್ವಾನಿಸಲಾಗಿದೆ.

ಖಾಲಿ ಇರುವ ಹುದ್ದೆಗಳು

ಪುರುಷರ ತಂಡ: ಇಬ್ಬರು ರಾಷ್ಟ್ರೀಯ ಆಯ್ಕೆದಾರರು

ಈ ಹುದ್ದೆಗೇರುವವರು ಟೀಂ ಇಂಡಿಯಾದ ಹಿರಿಯ ಪುರುಷರ ಟೆಸ್ಟ್, ಏಕದಿನ ಮತ್ತು ಟಿ 20 ಅಂತರರಾಷ್ಟ್ರೀಯ ತಂಡಗಳನ್ನು ಆಯ್ಕೆ ಮಾಡುವ ಜವಾಬ್ದಾರಿಯನ್ನು ಹೊಂದಿರುತ್ತಾರೆ.

ಅರ್ಹತೆ:

• ಕನಿಷ್ಠ 7 ಟೆಸ್ಟ್ ಪಂದ್ಯಗಳು ಅಥವಾ 30 ಪ್ರಥಮ ದರ್ಜೆ ಪಂದ್ಯಗಳು ಅಥವಾ 10 ಏಕದಿನ ಪಂದ್ಯಗಳು ಮತ್ತು 20 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿರಬೇಕು.
• ಕನಿಷ್ಠ 5 ವರ್ಷಗಳ ಹಿಂದೆ ನಿವೃತ್ತರಾಗಿರಬೇಕು.
• 5 ವರ್ಷಗಳ ಕಾಲ ಬಿಸಿಸಿಐನ ಕ್ರಿಕೆಟ್ ಸಮಿತಿಯ ಸದಸ್ಯರಾಗಿರಬಾರದು.

ಮಹಿಳಾ ತಂಡ: ನಾಲ್ವರು ರಾಷ್ಟ್ರೀಯ ಆಯ್ಕೆದಾರರು

ಈ ಹುದ್ದೆಯ ಆಕಾಂಕ್ಷಿಗಳು ಏಕದಿನ, ಟೆಸ್ಟ್ ಮತ್ತು ಟಿ20 ಅಂತರರಾಷ್ಟ್ರೀಯ ಪಂದ್ಯಗಳಿಗೆ ಮಹಿಳಾ ತಂಡಗಳನ್ನು ಆಯ್ಕೆ ಮಾಡಬೇಕಾಗುತ್ತದೆ. ಇದರ ಜೊತೆಗೆ, ಕೋಚ್, ಸಹಾಯಕ ಸಿಬ್ಬಂದಿ ಮತ್ತು ಇತರ ವಿಷಯಗಳ ಜವಾಬ್ದಾರಿಯೂ ಇರುತ್ತದೆ.

ಅರ್ಹತೆ:

• ಭಾರತೀಯ ಮಹಿಳಾ ಕ್ರಿಕೆಟ್ ತಂಡಕ್ಕೆ ಆಡಿರಬೇಕು.
• 5 ವರ್ಷಗಳ ಹಿಂದೆ ನಿವೃತ್ತರಾಗಿರಬೇಕು.
• 5 ವರ್ಷಗಳ ಕಾಲ ಬಿಸಿಸಿಐ ಕ್ರಿಕೆಟ್ ಸಮಿತಿಯ ಸದಸ್ಯರಾಗಿರಬಾರದು.

ಜೂನಿಯರ್ ಪುರುಷರ ತಂಡ: ಒಬ್ಬರು ರಾಷ್ಟ್ರೀಯ ಆಯ್ಕೆದಾರರು

ಈ ಹುದ್ದೆ ಪಡೆಯುವವರು 22 ವರ್ಷದೊಳಗಿನವರ ತಂಡದ ಆಯ್ಕೆಗೆ ಜವಾಬ್ದಾರರಾಗಿರುತ್ತಾರೆ. ಪ್ರವಾಸಗಳು ಮತ್ತು ಪಂದ್ಯಾವಳಿಗಳಿಗೆ ತಂಡವನ್ನು ಆಯ್ಕೆ ಮಾಡುವ ಜವಾಬ್ದಾರಿಯನ್ನು ಇದು ಹೊಂದಿರುತ್ತದೆ.

ಅರ್ಹತೆ:

• ಕನಿಷ್ಠ 25 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿರಬೇಕು.
• 5 ವರ್ಷಗಳ ಹಿಂದೆ ಆಟದಿಂದ ನಿವೃತ್ತರಾಗಿರಬೇಕು.
• 5 ವರ್ಷಗಳ ಕಾಲ ಬಿಸಿಸಿಐ ಕ್ರಿಕೆಟ್ ಸಮಿತಿಯ ಸದಸ್ಯರಾಗಿರಬಾರದು.

ಅರ್ಜಿಗೆ ಸಂಬಂಧಿಸಿದ ಪ್ರಮುಖ ವಿಷಯಗಳು

• ರಾಷ್ಟ್ರೀಯ ಆಯ್ಕೆದಾರರ ಹುದ್ದೆಗೆ, ಸೆಪ್ಟೆಂಬರ್ 10, 2025 ರಂದು ಸಂಜೆ 5 ಗಂಟೆಯ ಮೊದಲು ಅರ್ಜಿಯನ್ನು ಸಲ್ಲಿಸಬೇಕು.
• ಆಯ್ಕೆಯ ನಂತರ, ನಿಮ್ಮನ್ನು ಬಿಸಿಸಿಐ ಸಂದರ್ಶನಕ್ಕೆ ಕರೆಯಲಾಗುವುದು.
• ಯಾವುದೇ ಪಾತ್ರಕ್ಕೆ ಬಿಸಿಸಿಐನ ನಿಯಮಗಳು ಮತ್ತು ಷರತ್ತುಗಳನ್ನು ಪಾಲಿಸಬೇಕು.

ವೇತನ ವಿವರ

ಹಿರಿಯ ತಂಡದ ಆಯ್ಕೆ ಸಮಿತಿಯ ಸದಸ್ಯರು ಸುಮಾರು 90 ಲಕ್ಷ ರೂಪಾಯಿಗಳ ವಾರ್ಷಿಕ ವೇತನವನ್ನು ಪಡೆಯುತ್ತಾರೆ. ಇದಲ್ಲದೆ, ಜೂನಿಯರ್ ಕ್ರಿಕೆಟ್ ಸಮಿತಿಯ ಸದಸ್ಯರು ವಾರ್ಷಿಕ 30 ಲಕ್ಷ ರೂಪಾಯಿಗಳ ವೇತನವನ್ನು ಪಡೆಯುತ್ತಾರೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 4:57 pm, Fri, 22 August 25