David Miller: ಡೇವಿಡ್ ಮಿಲ್ಲರ್ ಅವರ ಲಿಟಲ್ ರಾಕ್​ಸ್ಟಾರ್ ನಿಧನ..!

ಭಾರತ ಪ್ರವಾಸದಲ್ಲಿರುವ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ತಂಡದ ಸ್ಫೋಟಕ ಬ್ಯಾಟ್ಸ್‌ಮನ್ ಡೇವಿಡ್ ಮಿಲ್ಲರ್ (David Miller) ಅವರು ತಮ್ಮ ಲಿಟಲ್​ ರಾಕ್​ಸ್ಟಾರ್ ಅಭಿಮಾನಿಯು ನಿಧನರಾಗಿರುವ ವಿಷಯವನ್ನು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಮಿಲ್ಲರ್ ಪಾಲಿಗೆ ತುಂಬಾ ಆಪ್ತರಾಗಿದ್ದ ಈ ಪುಟ್ಟ ಅಭಿಮಾನಿಯು ಕ್ಯಾನ್ಸರ್​ನಿಂದ ಬಳಲುತ್ತಿದ್ದರು. ಅಲ್ಲದೆ ಪ್ರತಿ ಬಾರಿಯೂ ತನ್ನ ಪುಟ್ಟ ಅಭಿಮಾನಿಯನ್ನು ಭೇಟಿಯಾದ ವೇಳೆ ಮಿಲ್ಲರ್ ಆಕೆಗೆ ಜೀವನೋತ್ಸಾಹ ತುಂಬುತ್ತಿದ್ದರು.

ಆದರೀಗ ಭಾರತದ ವಿರುದ್ಧ ಏಕದಿನ ಸರಣಿ ಆಡುತ್ತಿರುವ ಸಂದರ್ಭದಲ್ಲೇ ಪುಟ್ಟ ರಾಕ್​ಸ್ಟಾರ್​ ಇಹಲೋಕ ತ್ಯಜಿಸಿರುವ ಆಘಾತಕಾರಿ ಸುದ್ದಿಯನ್ನು ಮಿಲ್ಲರ್ ಹಂಚಿಕೊಂಡಿದ್ದಾರೆ. ಈ ಬಗ್ಗೆ ವಿಡಿಯೋ ಹಂಚಿಕೊಂಡಿರುವ ಸೌತ್ ಆಫ್ರಿಕಾ ಬ್ಯಾಟ್ಸ್​ಮನ್, “RIP, ನಾನು ನಿನ್ನನ್ನು ಎಂದೆಂದಿಗೂ ಪ್ರೀತಿಸುತ್ತೇನೆ ನನ್ನ ಪುಟ್ಟ ರಾಕ್‌ಸ್ಟಾರ್” ಎಂಬ ಶೀರ್ಷಿಕೆಯಲ್ಲಿ ಬರೆದಿದ್ದಾರೆ. ಮಿಲ್ಲರ್ ಹಂಚಿಕೊಂಡ ಈ ವೀಡಿಯೊದಲ್ಲಿ ಮಿಲ್ಲರ್ ಜೊತೆ ಬಾಲಕಿ ಕ್ರಿಕೆಟ್ ಆಡಿರುವ ಹಾಗೂ ಆಟವಾಡುತ್ತಿರುವ ಫೋಟೋಗಳನ್ನು ಕಾಣಬಹುದು.

ಇದೀಗ ಡೇವಿಡ್ ಮಿಲ್ಲರ್ ಹಂಚಿಕೊಂಡಿರುವ ವಿಡಿಯೋಗೆ ಅಭಿಮಾನಿಗಳು ಕೂಡ ದುಃಖವನ್ನು ವ್ಯಕ್ತಪಡಿಸುತ್ತಿದ್ದಾರೆ. ಅಲ್ಲದೆ ಅನೇಕರು ತಮ್ಮ ಸಂತಾಪ ಸೂಚಿಸಿದ್ದಾರೆ. ಭಾರತದ ವಿರುದ್ಧದ 2ನೇ ಏಕದಿನ ಪಂದ್ಯವು ಇಂದು ನಡೆಯಲಿದ್ದು, ಈ ಪಂದ್ಯದಲ್ಲಿ ದುಃಖಪ್ತರಾಗಿರುವ ಡೇವಿಡ್ ಮಿಲ್ಲರ್ ಆಡಲಿದ್ದಾರಾ ಕಾದು ನೋಡಬೇಕಿದೆ.