ಗೆಲ್ಲಲು ಮಾತ್ರ ಹೊರಟ ಇಂಗ್ಲೆಂಡ್​ಗೆ ಟೆಸ್ಟ್​ನ​ ಟೇಸ್ಟ್​ ತೋರಿಸಿದ ಟೀಮ್ ಇಂಡಿಯಾ

ಇಂಗ್ಲೆಂಡ್ ಬಾಝ್​ಬಾಲ್ ಆಟ ಶುರು ಮಾಡಿ 3 ವರ್ಷಗಳಾಗಿವೆ. ಈ ಮೂರು ವರ್ಷಗಳಲ್ಲಿ ಆಂಗ್ಲರು ಟೆಸ್ಟ್ ಆಡಿದ್ದು ಗೆಲ್ಲಲು ಮಾತ್ರ. ಅಂದರೆ ಡ್ರಾ ಎಂಬ ಆಯ್ಕೆಯನ್ನೇ ಸಂಪೂರ್ಣವಾಗಿ ಮರೆತಿದ್ದರು. ಹೀಗೆ ಮೈ ಮರೆತಿದ್ದ ಇಂಗ್ಲೆಂಡ್ ತಂಡಕ್ಕೆ ಟೆಸ್ಟ್​ನ ಅಸಲಿ ಟೇಸ್ಟ್ ತೋರಿಸುವಲ್ಲಿ ಟೀಮ್ ಇಂಡಿಯಾ ಬ್ಯಾಟರ್​ಗಳು ಯಶಸ್ವಿಯಾಗಿದ್ದಾರೆ.

ಮ್ಯಾಂಚೆಸ್ಟರ್​ನ ಓಲ್ಡ್ ಟ್ರಾಫೋರ್ಡ್ ಮೈದಾನದಲ್ಲಿ ನಡೆದ ಭಾರತ ವಿರುದ್ಧ 4ನೇ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಗೆದ್ದ ಇಂಗ್ಲೆಂಡ್ ತಂಡದ ನಾಯಕ ಬೌಲಿಂಗ್ ಆಯ್ದುಕೊಂಡಿದ್ದರು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಟೀಮ್ ಇಂಡಿಯಾ ಪ್ರಥಮ ಇನಿಂಗ್ಸ್​ನಲ್ಲಿ 358 ರನ್ ಕಲೆಹಾಕಿತ್ತು. ಇದಕ್ಕುತ್ತರವಾಗಿ ಬ್ಯಾಟ್ ಬೀಸಿದ ಇಂಗ್ಲೆಂಡ್ ಕಲೆಹಾಕಿದ್ದು ಬರೋಬ್ಬರಿ 669 ರನ್​ಗಳು.

ಅಂದರೆ ಮೊದಲ ಇನಿಂಗ್ಸ್​ನಲ್ಲಿ ಇಂಗ್ಲೆಂಡ್ ತಂಡವು ಬರೋಬ್ಬರಿ 311 ರನ್​ಗಳ ಮುನ್ನಡೆ ಪಡೆದುಕೊಂಡಿದ್ದರು. ಹೀಗಾಗಿಯೇ 4ನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾಗೆ ಸೋಲು ಕಟ್ಟಿಟ್ಟ ಬುತ್ತಿ ಎನ್ನಲಾಗಿತ್ತು. ಇದನ್ನು ಪುಷ್ಠೀಕರಿಸುವಂತೆ ಭಾರತ ತಂಡವು ದ್ವಿತೀಯ ಇನಿಂಗ್ಸ್ ಶುರು ಮಾಡಿ ಖಾತೆ ತೆರೆಯುವ ಮುನ್ನವೇ ಎರಡು ವಿಕೆಟ್ ಕಳೆದುಕೊಂಡಿದ್ದರು.

ಆದರೆ ಆ ಬಳಿಕ ಶುರುವಾಗಿದ್ದೇ ಅಸಲಿ ಟೆಸ್ಟ್​. 3ನೇ ವಿಕೆಟ್​ಗೆ ಜೊತೆಯಾದ ಕೆಎಲ್ ರಾಹುಲ್ ಹಾಗೂ ಶುಭ್​ಮನ್ ಗಿಲ್ ಕ್ರೀಸ್ ಕಚ್ಚಿ ನಿಂತರು. ಪರಿಣಾಮ ಇಂಗ್ಲೆಂಡ್ ಬೌಲರ್​ಗಳ ತೋಳ್ಬಲವೇ ಹುದುಗಿ ಹೋಯಿತು. ರಕ್ಷಣಾತ್ಮಕ ಆಟದೊಂದಿಗೆ ಆಂಗ್ಲ ವೇಗಿಗಳನ್ನು ಎದುರಿಸಿದ ರಾಹುಲ್ ಹಾಗೂ ಗಿಲ್ ಜೋಡಿ 3ನೇ ವಿಕೆಟ್​ಗೆ ಬರೋಬ್ಬರಿ 188 ರನ್ ಪೇರಿಸಿದರು.

ಇದರ ಬೆನ್ನಲ್ಲೇ 90 ರನ್​ಗಳಿಸಿ ರಾಹುಲ್ ಔಟಾದರು. ಈ ತೊಂಬತ್ತು ರನ್​ಗಳಿಸಲು ಕೆಎಲ್​ಆರ್​ ಎದುರಿಸಿದ್ದು ಬರೋಬ್ಬರಿ 230 ಎಸೆತಗಳನ್ನು. ಅಂದರೆ ರನ್​ಗಳಿಸುವುದಕ್ಕಿಂತ ಪಂದ್ಯವನ್ನು ಡ್ರಾ ಗೊಳಿಸಲು ಎಲ್ಲಾ ರೀತಿಯಲ್ಲೂ ರಾಹುಲ್ ಸೆಟೆದು ನಿಂತಿದ್ದರು.

ಮತ್ತೊಂದೆಡೆ ಇಂಗ್ಲೆಂಡ್ ಪಾಲಿಗೆ ಶುಭ್​ಮನ್ ಗಿಲ್ ಕೂಡ ಮಹಾ ಗೋಡೆಯಾಗಿ ಪರಿಣಮಿಸಿತು. ಗಿಲ್ ಕೂಡ 238 ಎಸೆತಗಳನ್ನು ಎದುರಿಸಿ 103 ರನ್​ಗಳಿಸಿದರು. ಆ ಬಳಿಕ ಬಂದ ವಾಷಿಂಗ್ಟನ್ ಸುಂದರ್ 206 ಎಸೆತಗಳೊಂದಿಗೆ 101 ರನ್​ಗಳಿಸಿದರು. ಇದರ ಜೊತೆಗೆ ರವೀಂದ್ರ ಜಡೇಜಾ 185 ಎಸೆತಗಳನ್ನು ಎದುರಿಸಿ 107 ರನ್ ಬಾರಿಸಿದರು.

4ನೇ ದಿನದಾಟದ ಕೊನೆಯ ಸೆಷನ್​ನಲ್ಲಿ ಶುರುವಾದ ಟೀಮ್ ಇಂಡಿಯಾ ಬ್ಯಾಟರ್​ಗಳ ಅಸಲಿ ಟೆಸ್ಟ್​ ಆಟ ಕೊನೆಗೊಂಡಿದ್ದು ಐದನೇ ದಿನದಾಟದ ಮೂರನೇ ಸೆಷನ್​ನಲ್ಲಿ. ಅದು ಕೂಡ ಇಂಗ್ಲೆಂಡ್ ತಂಡದ ನಾಯಕ ಬೆನ್ ಸ್ಟೋಕ್ಸ್ ಅವರ ಶೇಕ್ ಹ್ಯಾಂಡ್​ನೊಂದಿಗೆ..!

ಅಲ್ಲೇ ಡ್ರಾ:

ಹೌದು, ಟೆಸ್ಟ್​ನಲ್ಲಿ ಡ್ರಾವನ್ನೇ ಮರೆತಿದ್ದ ಇಂಗ್ಲೆಂಡ್ ತಂಡಕ್ಕೆ ಬಾಝ್​ಬಾಲ್ ಯುಗದಲ್ಲಿ 2ನೇ ಬಾರಿ ಡ್ರಾ ರುಚಿ ತೋರಿಸುವಲ್ಲಿ ಟೀಮ್ ಇಂಡಿಯಾ ಯಶಸ್ವಿಯಾಗಿದೆ. ಅಂದರೆ 2022 ರಿಂದ ಈವರೆಗೆ 36 ಟೆಸ್ಟ್ ಪಂದ್ಯಗಳನ್ನಾಡಿರುವ ಇಂಗ್ಲೆಂಡ್ ತಂಡವು ಪಂದ್ಯವನ್ನು ಡ್ರಾನಲ್ಲಿ ಅಂತ್ಯಗೊಳಿಸಿದ್ದು ಕೇವಲ 2 ಬಾರಿ ಮಾತ್ರ.

2023 ರಲ್ಲಿ ಮ್ಯಾಂಚೆಸ್ಟರ್​ನ ಓಲ್ಡ್ ಟ್ರಾಫೋರ್ಡ್ ಮೈದಾನದಲ್ಲಿ ನಡೆದ ಆ್ಯಶಸ್ ಸರಣಿಯ 4ನೇ ಟೆಸ್ಟ್ ಪಂದ್ಯವನ್ನು ಡ್ರಾನಲ್ಲಿ ಕೊನೆಗೊಳಿಸುವಲ್ಲಿ ಆಸ್ಟ್ರೇಲಿಯಾ ತಂಡ ಯಶಸ್ವಿಯಾಗಿತ್ತು. ಇದಾದ ಬಳಿಕ ಇಂಗ್ಲೆಂಡ್ ಒಂದೇ ಒಂದು ಮ್ಯಾಚ್​ನಲ್ಲಿ ಡ್ರಾ ಸಾಧಿಸಿರಲಿಲ್ಲ. ಡ್ರಾ ಸಾಧಿಸಿಲ್ಲ ಅನ್ನುವುದಕ್ಕಿಂತ, ಇಂಗ್ಲೆಂಡ್ ಪಂದ್ಯ ಗೆಲ್ಲಬೇಕು ಇಲ್ಲ ಸೋಲಬೇಕೆಂಬ ಧ್ಯೇಯವಾಕ್ಯದೊಂದಿಗೆ ಕಣಕ್ಕಿಳಿಯುತ್ತಿದ್ದರು.

ಹೀಗೆ ಗೆಲುವೊಂದೇ ಮಂತ್ರ ಎಂಬ ಧ್ಯೇಯವಾಕ್ಯದೊಂದಿಗೆ ಸಾಗಿದ್ದ ಇಂಗ್ಲೆಂಡ್​ಗೆ ಮತ್ತೆ ಡ್ರಾ ಫಲಿತಾಂಶ ಎದುರಾಗಿದೆ. ಅದು ಸಹ ಮ್ಯಾಂಚೆಸ್ಟರ್​ನ ಓಲ್ಡ್ ಟ್ರಾಫೋರ್ಡ್​ ಮೈದಾನದಲ್ಲೇ ಎಂಬುದು ವಿಶೇಷ. ಅಂದರೆ 2023 ರಲ್ಲಿ ಇದೇ ಮೈದಾನದಲ್ಲಿ ಆಸ್ಟ್ರೇಲಿಯಾ ತಂಡ ಇಂಗ್ಲೆಂಡ್ ವಿರುದ್ಧ ಡ್ರಾ ಸಾಧಿಸಿದ್ದರು. ಇದು ಬಾಝ್​ಬಾಲ್ ಯುಗದ ಇಂಗ್ಲೆಂಡ್ ತಂಡದ ಮೊದಲ ಡ್ರಾ ಪಂದ್ಯವಾಗಿತ್ತು.

ಇದೀಗ 2 ವರ್ಷಗಳ ಬಳಿಕ ಇದೇ ಮೈದಾನದಲ್ಲಿ ಇಂಗ್ಲೆಂಡ್ ವಿರುದ್ಧ ಡ್ರಾ ಸಾಧಿಸುವಲ್ಲಿ ಟೀಮ್ ಇಂಡಿಯಾ ಯಶಸ್ವಿಯಾಗಿದೆ. ಈ ಮೂಲಕ ಆಂಗ್ಲರ ಪಡೆಗೆ ಭಾರತೀಯರು ಟೆಸ್ಟ್​ನ ಅಸಲಿ ಟೇಸ್ಟ್ ತೋರಿಸಿದ್ದಾರೆ.

ಇದನ್ನೂ ಓದಿ: WTC ಅಂಕ ಪಟ್ಟಿಯಲ್ಲಿ ಮೇಲೇರಿದ ಟೀಮ್ ಇಂಡಿಯಾ

ಬಾಝ್​ಬಾಲ್ ಯುಗದಲ್ಲಿ ಇಂಗ್ಲೆಂಡ್ ಅಂಕಿ ಅಂಶಗಳು:

ಬ್ರೆಂಡನ್ ಮೆಕಲಂ ಕೋಚಿಂಗ್​ನಲ್ಲಿ, ಬೆನ್ ಸ್ಟೋಕ್ಸ್ ನಾಯಕತ್ವದಲ್ಲಿ ಇಂಗ್ಲೆಂಡ್ ತಂಡವು ಈವರೆಗೆ 36 ಟೆಸ್ಟ್ ಪಂದ್ಯಗಳನ್ನಾಡಿದೆ. ಈ ವೇಳೆ ಆಂಗ್ಲರು 21 ಪಂದ್ಯಗಳಲ್ಲಿ ಗೆಲುವು ಸಾಧಿಸಿದರೆ, 13 ಮ್ಯಾಚ್​ಗಳಲ್ಲಿ ಸೋಲನುಭವಿಸಿದೆ. ಇನ್ನು 2 ಮ್ಯಾಚ್​ಗಳು ಡ್ರಾನಲ್ಲಿ ಅಂತ್ಯವಾಗಿದೆ. ಹೀಗೆ ಬಾಝ್​ಬಾಲ್ ಯುಗದಲ್ಲಿ ಡ್ರಾ ಸಾಧಿಸಿದ ಹೆಗ್ಗಳಿಕೆ ಆಸ್ಟ್ರೇಲಿಯಾ ಮತ್ತು ಭಾರತ ತಂಡಗಳ ಪಾಲಾಗಿದೆ.

Published On - 11:05 am, Mon, 28 July 25