George Munsey: ಸ್ಪೋಟಕ ಶತಕ ಸಿಡಿಸಿದ ಮುನ್ಸಿ: ಎದುರಾಳಿ ತಂಡ 66 ರನ್​ಗೆ ಆಲೌಟ್..!

T20 World Cup Qualifier 2023: ಟಿ20 ವಿಶ್ವಕಪ್ ಯುರೋಪ್ ಕ್ವಾಲಿಫೈಯರ್​ನ 14ನೇ ಪಂದ್ಯದಲ್ಲಿ ಸ್ಕಾಟ್ಲೆಂಡ್ ಆಟಗಾರ ಜಾರ್ಜ್ ಮುನ್ಸಿ ಭರ್ಜರಿ ಶತಕ ಸಿಡಿಸಿ ಮಿಂಚಿದ್ದಾರೆ. ಈ ಪಂದ್ಯದಲ್ಲಿ ಎದುರಾಳಿ ತಂಡ ಕೇವಲ 66 ರನ್​ಗಳಿಗೆ ಆಲೌಟ್ ಆಗಿರುವುದು ಇಲ್ಲಿ ವಿಶೇಷ. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಆಸ್ಟ್ರಿಯಾ ತಂಡವು ಫೀಲ್ಡಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿತು. ಅದರಂತೆ ಸ್ಕಾಟ್ಲೆಂಡ್ ಪರ ಇನಿಂಗ್ಸ್ ಆರಂಭಿಸಿದ ಜಾರ್ಜ್​ ಮುನ್ಸಿ ಹಾಗೂ ಒಲ್ಲಿ ಹೇರ್ಸ್ ಭರ್ಜರಿ ಬ್ಯಾಟಿಂಗ್ ನಡೆಸಿದರು. ಮೊದಲ ವಿಕೆಟ್​ಗೆ 96 ರನ್​ಗಳ ಜೊತೆಯಾಟವಾಡಿದ ಬಳಿಕ ಒಲ್ಲಿ ಹೇರ್ಸ್ (23) ಔಟಾದರು.

ಆದರೆ ಇನ್ನೊಂದೆಡೆ ಸಿಡಿಲಬ್ಬರ ಮುಂದುವರೆಸಿದ ಜಾರ್ಜ್ ಮುನ್ಸಿ 50 ಎಸೆತಗಳಲ್ಲಿ ಶತಕ ಪೂರೈಸಿದರು. ಇನ್ನು ಸೆಂಚುರಿ ಬಳಿಕ ಕೂಡ ಆಸ್ಟ್ರೀಯಾ ಬೌಲರ್​ಗಳ ಬೆಂಡೆತ್ತಿದ ಮುನ್ಸಿ ಕೇವಲ 61 ಎಸೆತಗಳಲ್ಲಿ 6 ಭರ್ಜರಿ ಸಿಕ್ಸ್ ಹಾಗೂ 15 ಫೋರ್​ಗಳೊಂದಿಗೆ 132 ರನ್ ಸಿಡಿಸಿದರು.

ಇನ್ನು ಮಧ್ಯಮ ಕ್ರಮಾಂಕದಲ್ಲಿ ನಾಯಕ ಬೆರಿಂಗ್ಟನ್ 19 ಎಸೆತಗಳಲ್ಲಿ 1 ಸಿಕ್ಸ್ ಹಾಗೂ 5 ಫೋರ್​ಗಳೊಂದಿಗೆ 40 ರನ್ ಬಾರಿಸುವ ಮೂಲಕ ತಂಡದ ಮೊತ್ತವನ್ನು 20 ಓವರ್​ಗಳಲ್ಲಿ 2 ವಿಕೆಟ್ ನಷ್ಟಕ್ಕೆ 232 ಕ್ಕೆ ತಂದು ನಿಲ್ಲಿಸಿದರು.

233 ರನ್​ಗಳ ಕಠಿಣ ಗುರಿ ಪಡೆದ ಆಸ್ಟ್ರೀಲಿಯಾ ತಂಡಕ್ಕೆ ಸಫ್ಯಾನ್ ಷರೀಫ್ 3ನೇ ಓವರ್​ನಲ್ಲಿ ಮೊದಲ ಆಘಾತ ನೀಡಿದರು. ಇದರ ಬೆನ್ನಲ್ಲೇ ನವೀನ್ ವಿಜೆಶೇಖರ (6) ವಿಕೆಟ್ ಪಡೆದು ಗೇವಿನ್ ಮೇನ್ 2ನೇ ಯಶಸ್ಸು ತಂದುಕೊಟ್ಟರು.

ಅಲ್ಲಿಂದ ಶುರುವಾದ ವಿಕೆಟ್ ಪತನ ಬಂದು ನಿಂತದ್ದು 66 ರನ್​ಗಳಿಗೆ. ಅಂದರೆ 16.3 ಓವರ್​ಗಳಲ್ಲಿ 66 ರನ್​ಗಳಿಸುವಷ್ಟರಲ್ಲಿ ಆಸ್ಟ್ರೀಯಾ ತಂಡವು ಸರ್ವಪತನ ಕಂಡಿತು. ಇದರೊಂದಿಗೆ ಸ್ಕಾಟ್ಲೆಂಡ್ ತಂಡ 166 ರನ್​ಗಳ ಭರ್ಜರಿ ಜಯ ತನ್ನದಾಗಿಸಿಕೊಂಡಿತು.

ಇನ್ನು ಸ್ಕಾಟ್ಲೆಂಡ್ ಪರ ಮೈಕೆಲ್ ಲೀಸ್ಕ್ 3 ವಿಕೆಟ್ ಪಡೆದರೆ, ಸಫ್ಯಾನ್ ಷರೀಫ್, ಮೈಕೆಲ್ ಮೇನ್, ಕ್ರಿಸ್ ಗ್ರೀವ್ಸ್ ತಲಾ 2 ವಿಕೆಟ್ ಕಬಳಿಸಿದರು.

ಸ್ಕಾಟ್ಲೆಂಡ್ ಪ್ಲೇಯಿಂಗ್ 11: ಜಾರ್ಜ್ ಮುನ್ಸಿ , ಆಲಿ ಹೇರ್ಸ್ , ಬ್ರಾಂಡನ್ ಮೆಕ್‌ಮುಲ್ಲೆನ್ , ರಿಚಿ ಬೆರಿಂಗ್ಟನ್ (ನಾಯಕ) , ತೋಮಸ್ ಮ್ಯಾಕಿಂತೋಷ್ (ವಿಕೆಟ್ ಕೀಪರ್) , ಮೈಕೆಲ್ ಲೀಸ್ಕ್ , ಕ್ರಿಸ್ ಗ್ರೀವ್ಸ್ , ಮಾರ್ಕ್ ವ್ಯಾಟ್ , ಸಫ್ಯಾನ್ ಷರೀಫ್ , ಗೇವಿನ್ ಮೇನ್ , ಬ್ರಾಡ್ಲಿ ಕ್ಯೂರಿ.

ಇದನ್ನೂ ಓದಿ: Suzie Bates: ಟಿ20 ಕ್ರಿಕೆಟ್​ನಲ್ಲಿ ವಿಶ್ವ ದಾಖಲೆ ನಿರ್ಮಿಸಿದ ಸುಝಿ ಬೇಟ್ಸ್

ಆಸ್ಟ್ರೀಯಾ ಪ್ಲೇಯಿಂಗ್ 11: ನವೀನ್ ವಿಜೆಶೇಖರ , ಇಕ್ಬಾಲ್ ಹೊಸೈನ್ , ರಜ್ಮಲ್ ಶಿಗಿವಾಲ್ (ನಾಯಕ) , ಅರ್ಮಾನ್ ರಾಂಧವಾ , ಶಾಹಿಲ್ ಮೊಮಿನ್ , ಮೆಹರ್ ಚೀಮಾ (ವಿಕೆಟ್ ಕೀಪರ್) , ಉಮೈರ್ ತಾರಿಕ್ , ಅಬ್ದುಲ್ಲಾ ಅಕ್ಬರ್ಜನ್ , ಜಾವೀದ್ ಸದ್ರಾನ್ , ಸಹೇಲ್ ಜದ್ರಾನ್ , ಅಮಿತ್ ನಾಥ್ವಾನಿ.