ICC World Cup 2023: ಝಿಂಬಾಬ್ವೆಗೆ ಸೋಲುಣಿಸಿದ ಸ್ಕಾಟ್​ಲ್ಯಾಂಡ್

ICC World Cup Qualifiers 2023: ಬುಲವಾಯೊದಲ್ಲಿ ನಡೆದ ಏಕದಿನ ವಿಶ್ವಕಪ್​ನ  ಅರ್ಹತಾ ಸುತ್ತಿನ ಪಂದ್ಯದಲ್ಲಿ ಝಿಂಬಾಬ್ವೆ ವಿರುದ್ಧ ಸ್ಕಾಟ್​ಲ್ಯಾಂಡ್ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ ಏಕದಿನ ವಿಶ್ವಕಪ್​ ಆಸೆಯನ್ನು ಸ್ಕಾಟ್​ಲ್ಯಾಂಟ್ ತಂಡವು ಜೀವಂತವಿರಿಸಿಕೊಂಡಿದೆ. ಇತ್ತ ನಿರ್ಣಾಯಕ ಪಂದ್ಯದಲ್ಲಿ ಸೋತಿರುವ ಝಿಂಬಾಬ್ವೆ ಇನ್ನು ಸ್ಕಾಟ್​ಲ್ಯಾಂಡ್​ ತಂಡದ ಮುಂದಿನ ಫಲಿತಾಂಶವನ್ನು ಎದುರು ನೋಡಬೇಕಿದೆ. ಒಂದು ವೇಳೆ ನೆದರ್​ಲ್ಯಾಂಡ್ಸ್​ ವಿರುದ್ಧದ ಕೊನೆಯ ಪಂದ್ಯದಲ್ಲಿ ಸ್ಕಾಟ್​ಲ್ಯಾಂಡ್ ಗೆದ್ದರೆ ಏಕದಿನ ವಿಶ್ವಕಪ್​ಗೆ ಅರ್ಹತೆ ಪಡೆಯಲಿದೆ.

ಇನ್ನು ಪಂದ್ಯದಲ್ಲಿ ಟಾಸ್ ಗೆದ್ದ ಝಿಂಬಾಬ್ವೆ ತಂಡವು ಫೀಲ್ಡಿಂಗ್ ಆಯ್ದುಕೊಂಡಿತು. ಅದರಂತೆ ಮೊದಲು ಬ್ಯಾಟ್ ಮಾಡಿದ ಸ್ಕಾಟ್​​ಲ್ಯಾಂಡ್ ತಂಡಕ್ಕೆ ಆರಂಭಿಕರಾದ ಕ್ರಿಸ್ಟೋಫರ್ (28) ಹಾಗೂ ಮ್ಯಾಥ್ಯೂ ಕ್ರಾಸ್ (38) ಉತ್ತಮ ಆರಂಭ ಒದಗಿಸಿದ್ದರು. ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಮೆಕ್​ಮುಲ್ಲೆನ್ 34 ರನ್ ಬಾರಿಸಿದರೆ, ಮುನ್ಸಿ 31 ರನ್​ಗಳ ಕೊಡುಗೆ ನೀಡಿದರು. ಪರಿಣಾಮ 25 ಓವರ್​ಗಳಲ್ಲಿ ಸ್ಕಾಟ್​ಲ್ಯಾಂಡ್ ತಂಡದ ಮೊತ್ತ 100ರ ಗಡಿದಾಟಿತು.

ಈ ಹಂತದಲ್ಲಿ ಉತ್ತಮ ದಾಳಿ ಸಂಘಟಿಸಿದ ಶಾನ್ ವಿಲಿಯಮ್ಸ್ ಬ್ಯಾಕ್ ಟು ಬ್ಯಾಕ್ 2 ವಿಕೆಟ್ ಕಬಳಿಸಿದರು. ಇದಾಗ್ಯೂ ಮಧ್ಯಮ ಕ್ರಮಾಂಕದಲ್ಲಿ ಮೈಕಲ್ ಲೀಸ್ಕ್​ 34 ಎಸೆತಗಳಲ್ಲಿ 48 ರನ್​ ಬಾರಿಸುವ ಮೂಲಕ ತಂಡಕ್ಕೆ ಆಸರೆಯಾದರು. ಇದರೊಂದಿಗೆ ಸ್ಕಾಟ್​ಲ್ಯಾಂಡ್ ತಂಡವು ನಿಗದಿತ 50 ಓವರ್​ಗಳಲ್ಲಿ 8 ವಿಕೆಟ್ ಕಳೆದುಕೊಂಡು 234 ರನ್​ ಪೇರಿಸಿತು.

235 ರನ್​ಗಳ ಗುರಿ ಪಡೆದ ಝಿಂಬಾಬ್ವೆ ತಂಡವು ಉತ್ತಮ ಆರಂಭ ಪಡೆದಿರಲಿಲ್ಲ. ಇನಿಂಗ್ಸ್​ನ ಮೊದಲ ಎಸೆತದಲ್ಲೇ ಜಾಯ್ಲಾರ್ಡ್ ಗುಂಬಿ (0) ಕ್ರಿಸ್ ಸೋಲ್​ಗೆ ವಿಕೆಟ್ ಒಪ್ಪಿಸಿದರು. ಇದರ ಬೆನ್ನಲ್ಲೇ ನಾಯಕ ಕ್ರೇಗ್ ಇರ್ವಿನ್ (2) ಕೂಡ ಸೋಲ್ ಎಸೆತದಲ್ಲಿ ಬೌಲ್ಡ್​ ಆದರು.

ಇನ್ನು ಇನ್ನೊಸೆಂಟ್ ಕೈಯ (12) ಬಂದ ವೇಗದಲ್ಲೇ ಹಿಂತಿರುಗಿದರೆ, ಶಾನ್ ವಿಲಿಯಮ್ಸ್ 12 ರನ್​ಗಳಿಸಿ ಇನಿಂಗ್ಸ್ ಅಂತ್ಯಗೊಳಿಸಿದರು. ಕೇವಲ 37 ರನ್​ಗಳಿಗೆ 4 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ತಂಡಕ್ಕೆ ಸಿಕಂದರ್ ರಾಝ ಹಾಗೂ ರಯಾನ್ ಬರ್ಲ್ ಆಸರೆಯಾದರು.

ಉತ್ತಮ ಜೊತೆಯಾಟ ಪ್ರದರ್ಶಿಸಿದ ಈ ಜೋಡಿ 5ನೇ ವಿಕೆಟ್​ಗೆ 54 ರನ್ ಪೇರಿಸಿದರು. ಆದರೆ ಈ ಹಂತದಲ್ಲಿ 34 ರನ್​ಗಳಿಸಿದ್ದ ಸಿಕಂದರ್ ರಾಝ ಕ್ರಿಸ್ ಗ್ರೀವ್ಸ್​​ಗೆ ವಿಕೆಟ್ ಒಪ್ಪಿಸಿದರು. ಆ ಬಳಿಕ ರಯಾನ್ ಬರ್ಲ್ ಬಿರುಸಿನ ಬ್ಯಾಟಿಂಗ್​ಗೆ ಒತ್ತು ನೀಡಿದರು. ಅಲ್ಲದೆ​ ವೆಸ್ಲಿ ಮಾಧೆವೆರೆ (40) ಜೊತೆಗೂಡಿ 73 ರನ್​ಗಳ ಜೊತೆಯಾಟವಾಡಿದರು.

ಈ ಹಂತದಲ್ಲಿ ದಾಳಿಗಿಳಿದ ಮಾರ್ಕ್​ ವ್ಯಾಟ್ ಎಸೆತದಲ್ಲಿ ಮಾಧೆವೆರೆ ಎಲ್​ಬಿಡಬ್ಲ್ಯೂ ಆದರು. ಇದರ ಬೆನ್ನಲ್ಲೇ ವೆಲ್ಲಿಂಗ್ಟನ್ ಮಸಕಡ್ಝ (5) ಕೂಡ ವಿಕೆಟ್ ಒಪ್ಪಿಸಿದರು. ಆದರೆ ಮತ್ತೊಂದೆಡೆ ಗಟ್ಟಿಯಾಗಿ ನೆಲೆಯೂರಿದ್ದ ರಯಾನ್ ಬರ್ಲ್ ಅರ್ಧಶತಕ ಪೂರೈಸಿದರು.

ಕೊನೆಯ 15 ಓವರ್​ಗಳಲ್ಲಿ ಝಿಂಬಾಬ್ವೆಗೆ ಗೆಲ್ಲಲು 58 ರನ್​ಗಳ ಅವಶ್ಯಕತೆಯಿತ್ತು. ಅತ್ತ ಸ್ಕಾಟ್​ಲ್ಯಾಂಡ್​ ತಂಡಕ್ಕೆ 3 ವಿಕೆಟ್​ಗಳ ಅಗತ್ಯತೆಯಿತ್ತು. ಈ ಹಂತದಲ್ಲಿ ರಿಚರ್ಡ್ (2) ಔಟಾದರು. ಇದರ ಬೆನ್ನಲ್ಲೇ ಬಿರುಸಿನ ಬ್ಯಾಟಿಂಗ್​ ಮೂಲಕ 83 ರನ್​ಗಳಿಸಿದ್ದ ರಯಾನ್ ಬರ್ಲ್​ ಕೂಡ ವಿಕೆಟ್ ಒಪ್ಪಿಸಿದರು. ಅಂತಿಮವಾಗಿ ಝಿಂಬಾಬ್ವೆ ತಂಡವು 203 ರನ್​ಗಳಿಗೆ ಆಲೌಟ್ ಆಯಿತು. ಈ ಮೂಲಕ ಸ್ಕಾಟ್​ಲ್ಯಾಂಡ್ ತಂಡವು 31 ರನ್​ಗಳ ಜಯ ಸಾಧಿಸಿತು.

ಝಿಂಬಾಬ್ವೆ ಪ್ಲೇಯಿಂಗ್ 11: ಜಾಯ್ಲಾರ್ಡ್ ಗುಂಬಿ (ವಿಕೆಟ್ ಕೀಪರ್) , ಕ್ರೇಗ್ ಇರ್ವಿನ್ (ನಾಯಕ) , ಇನೋಸೆಂಟ್ ಕೈಯಾ , ಶಾನ್ ವಿಲಿಯಮ್ಸ್ , ಸಿಕಂದರ್ ರಾಝ , ರಯಾನ್ ಬರ್ಲ್ , ವೆಸ್ಲಿ ಮಾಧೆವೆರೆ , ವೆಲ್ಲಿಂಗ್ಟನ್ ಮಸಕಡ್ಝ , ರಿಚರ್ಡ್ ನಾಗರವಾ , ಟೆಂಡೈ ಚಟಾರಾ , ಬ್ಲೆಸ್ಸಿಂಗ್ ಮುಜರಬಾನಿ.

ಇದನ್ನೂ ಓದಿ: IND vs AUS: ಏಕದಿನ ವಿಶ್ವಕಪ್​ಗೂ ಮುನ್ನ ಟೀಮ್ ಇಂಡಿಯಾದ ಮಾಸ್ಟರ್​ ಪ್ಲ್ಯಾನ್..!

ಸ್ಕಾಟ್​ಲ್ಯಾಂಡ್​ ಪ್ಲೇಯಿಂಗ್ 11: ಕ್ರಿಸ್ಟೋಫರ್ ಮೆಕ್‌ಬ್ರೈಡ್ , ಮ್ಯಾಥ್ಯೂ ಕ್ರಾಸ್ (ವಿಕೆಟ್ ಕೀಪರ್) , ಬ್ರಾಂಡನ್ ಮೆಕ್‌ಮುಲ್ಲೆನ್ , ಜಾರ್ಜ್ ಮುನ್ಸಿ , ರಿಚಿ ಬೆರಿಂಗ್ಟನ್ (ನಾಯಕ) , ತೋಮಸ್ ಮ್ಯಾಕಿಂತೋಷ್ , ಮೈಕೆಲ್ ಲೀಸ್ಕ್ , ಕ್ರಿಸ್ ಗ್ರೀವ್ಸ್ , ಮಾರ್ಕ್ ವ್ಯಾಟ್ , ಸಫ್ಯಾನ್ ಷರೀಫ್ , ಕ್ರಿಸ್ ಸೋಲ್.