ಕಿಂಗ್ ಕೊಹ್ಲಿ ಕ್ಯಾಚ್ ಕೈಚೆಲ್ಲಿ ಸೋಲಿಗೆ ಆಹ್ವಾನ ನೀಡಿದ ಆಸ್ಟ್ರೇಲಿಯಾ! ವಿಡಿಯೋ ನೋಡಿ

ಏಕದಿನ ವಿಶ್ವಕಪ್‌ನಲ್ಲಿ (World Cup 2023) ಭಾರತ ಗೆಲುವಿನ ಆರಂಭ ಪಡೆದುಕೊಂಡಿದೆ. ಟೀಂ ಇಂಡಿಯಾ ತನ್ನ ಮೊದಲ ಪಂದ್ಯದಲ್ಲಿ 5 ಬಾರಿಯ ವಿಶ್ವ ಚಾಂಪಿಯನ್ ಆಸ್ಟ್ರೇಲಿಯಾವನ್ನು (India vs Australia) 6 ವಿಕೆಟ್‌ಗಳಿಂದ ಸೋಲಿಸಿದೆ. ಚೆನ್ನೈನ ಎಂಎ ಚಿದಂಬರಂ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾವನ್ನು 49.3 ಓವರ್‌ಗಳಲ್ಲಿ 199 ರನ್‌ಗಳಿಗೆ ಆಲೌಟ್ ಮಾಡುವಲ್ಲಿ ರೋಹಿತ್ ಪಡೆ ಯಶಸ್ವಿಯಾಯಿತು. ಆ ಬಳಿಕ ಟೀಂ ಇಂಡಿಯಾ ಈ ಸವಾಲನ್ನು 41.2 ಓವರ್‌ಗಳಲ್ಲಿ ಪೂರ್ಣಗೊಳಿಸಿತು. ವಾಸ್ತವವಾಗಿ 200 ರನ್‌ಗಳ ಬೆನ್ನತ್ತಿದ್ದ ಟೀಂ ಇಂಡಿಯಾದ ಆರಂಭ ಅತ್ಯಂತ ಕಳಪೆಯಾಗಿತ್ತು. ಇಶಾನ್ ಕಿಶನ್, ರೋಹಿತ್ ಶರ್ಮಾ ಮತ್ತು ಶ್ರೇಯಸ್ ಅಯ್ಯರ್ ಶೂನ್ಯಕ್ಕೆ ಔಟಾದರು. ಆ ಬಳಿಕ ವಿರಾಟ್ ಕೊಹ್ಲಿ (Virat Kohli) ಹಾಗೂ ಕೆಎಲ್ ರಾಹುಲ್ (KL Rahul) ಇಬ್ಬರೂ ದಾಖಲೆಯ ಜೊತೆಯಾಟವನ್ನಾಡಿ ಭಾರತವನ್ನು ಗೆಲುವಿನ ದಡ ಮುಟ್ಟಿಸಿದರು. ಆದರೆ ಕಿಂಗ್ ಕೊಹ್ಲಿ ನೀಡಿದ ಸುಲಭದ ಕ್ಯಾಚ್ ಕೈಚೆಲ್ಲಿದ ಆಸ್ಟ್ರೇಲಿಯಾ ತಂಡ ಸೋಲಿಗೆ ತಾನೇ ಆಹ್ವಾನ ನೀಡಿತು.

2 ರನ್​ಗಳಿಗೆ ಪ್ರಮುಖ 3 ವಿಕೆಟ್‌

ವಾಸ್ತವವಾಗಿ ಆಸೀಸ್ ನೀಡಿದ ಅಲ್ಪ ರನ್​ಗಳ ಗುರಿ ಬೆನ್ನಟ್ಟಿದ ಭಾರತ ಕೇವಲ 2 ರನ್​ಗಳಿಗೆ ಪ್ರಮುಖ 3 ವಿಕೆಟ್‌ಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಈ ವೇಳೆ ತಂಡದ ಇನ್ನಿಂಗ್ಸ್ ಜವಬ್ದಾರಿ ಹೊತ್ತಿದ್ದ ವಿರಾಟ್ ಕೊಹ್ಲಿ ಹಾಗೂ ಕೆಎಲ್ ರಾಹುಲ್ ನಿದಾನಗತಿಯ ಬ್ಯಾಟಿಂಗ್ ಮಾಡಲಾರಂಭಿಸಿದರು. ಈ ವೇಳೆ ಆರಂಭದಲ್ಲೇ ಮೂರು ವಿಕೆಟ್ ಪಡೆದು ಪಂದ್ಯದಲ್ಲಿ ಹಿಡಿತ ಸಾಧಿಸಿದ ಆಸ್ಟ್ರೇಲಿಯಾಕ್ಕೆ ಮತ್ತೊಂದು ವಿಕೆಟ್ ಉರುಳಿಸುವ ಸುಲಭದ ಅವಕಾಶ ಒದಗಿ ಬಂದಿತ್ತು. ಆದರೆ ಆಸೀಸ್ ತಂಡದ ಆಲ್​ರೌಂಡರ್ ಮಿಚೆಲ್ ಮಾರ್ಷ್​ ಕೈಬಿಟ್ಟ ಕ್ಯಾಚ್ ತಂಡದ ಸೋಲಿಗೆ ನಾಂದಿ ಹಾಡಿತು.

36 ವರ್ಷಗಳ ದಾಖಲೆ ಉಡೀಸ್; 1992 ರ ನಂತರ ಮೊದಲ ಬಾರಿಗೆ ಈ ರೀತಿಯ ಸೋಲು ಕಂಡ ಆಸ್ಟ್ರೇಲಿಯಾ..!

12 ರನ್ ಸಿಡಿಸಿ ಆಡುತ್ತಿದ್ದ ವಿರಾಟ್

ಭಾರತದ ಇನ್ನಿಂಗ್ಸ್ 9ನೇ ಓವರ್‌ನಲ್ಲಿ ಈ ಘಟನೆ ನಡೆಯಿತು. ಆ ವೇಳೆಗೆ ಟೀಂ ಇಂಡಿಯಾ 26 ರನ್​ಗಳಿಗೆ 3 ವಿಕೆಟ್​ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಸಮಯದಲ್ಲಿ 12 ರನ್ ಸಿಡಿಸಿ ಆಡುತ್ತಿದ್ದ ವಿರಾಟ್ ಕೊಹ್ಲಿ, ಜೋಶ್ ಹೇಜಲ್‌ವುಡ್ ಬೌಲಿಂಗ್ ಮಾಡಿದ ಶಾರ್ಟ್ ಬಾಲ್ ಅನ್ನು ಬೌಂಡರಿಗಟ್ಟಲು ಪ್ರಯತ್ನಿಸಿದರು. ಆದರೆ ಚೆಂಡು ಟಾಪ್-ಎಡ್ಜ್ ಆಗಿ ಗಾಳಿಯಲ್ಲಿ ಮೇಲಕ್ಕೆ ಹೋಯಿತು. ಇದು ಆಸ್ಟ್ರೇಲಿಯಾದ ಮಾನದಂಡಗಳ ಪ್ರಕಾರ ಸುಲಭದ ಕ್ಯಾಚ್ ಆಗಿತ್ತು. ಆದರೆ ವಿಶ್ವಕಪ್‌ನ ಒತ್ತಡವು ಆಸೀಸ್ ಫೀಲ್ಡರ್‌ಗಳಲ್ಲೂ ಕಂಡು ಬಂತ್ತು. ಕೊಹ್ಲಿ ನೀಡಿದ ಈ ಸುಲಭದ ಕ್ಯಾಚ್ ಅನ್ನು ಹಿಡಿಯಲು ಮಿಡ್-ವಿಕೆಟ್‌ನಿಂದ ಮಿಚೆಲ್ ಮಾರ್ಷ್ ಓಡಿ ಬಂದರೆ, ಇತ್ತ ವಿಕೆಟ್‌ಕೀಪರ್ ಕೂಡ ಕ್ಯಾಚ್​ಗೆ ಪ್ರಯತ್ನಿಸಿದರು. ಈ ವೇಳೆ ಉಂಟಾದ ಗೊಂದಲದಿಂದ ಇಬ್ಬರಿಗೂ ಆ ಕ್ಯಾಚ್ ಅನ್ನು ತೆಗೆದುಕೊಳ್ಳಲು ಸಾಧ್ಯವಾಗಲಿಲ್ಲ. ಹೀಗಾಗಿ ಸುಲಭವಾಗಿ ತೆಗೆದುಕೊಳ್ಳುವ ಕ್ಯಾಚ್ ಅನ್ನು ಮಾರ್ಷ್ ಕೈಚೆಲ್ಲಿದರು.

View this post on Instagram

A post shared by ICC (@icc)

ಸೋಲಿನ ಶಾಯರಿ ಬರೆಯಿತು

ಮಾರ್ಷ್​ ಕೈಬಿಟ್ಟ ಈ ಕ್ಯಾಚ್ ತಂಡವನ್ನು ಪಂದ್ಯದಿಂದಲೇ ಹೊರಹಾಕಿತು. ಜೀವದಾನದ ಲಾಭ ಪಡೆದ ವಿರಾಟ್ ಕೊಹ್ಲಿ 85 ರನ್​ಗಳ ಸ್ಮರಣೀಯ ಇನ್ನಿಂಗ್ಸ್ ಆಡಿದರೆ, ಇತ್ತ ಕೆಎಲ್ ರಾಹುಲ್ ಅವರೊಂದಿಗೆ 165 ರನ್​ಗಳ ಜೊತೆಯಾಟವನ್ನು ಹಂಚಿಕೊಂಡರು. ಈ ಜೊತೆಯಾಟ ಆಸೀಸ್ ಪಾಲಿಗೆ ಸೋಲಿನ ಶಾಯರಿ ಬರೆಯಿತು.

ಇನ್ನಷ್ಟು ಕ್ರೀಡಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ