IND vs ENG: 6 ಫೋರ್ಗಳಿಂದ ಸೋತ ಟೀಮ್ ಇಂಡಿಯಾ
India vs England 3rd Test: ಭಾರತದ ವಿರುದ್ಧದ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಆತಿಥೇಯ ಇಂಗ್ಲೆಂಡ್ ತಂಡವು ಜಯ ಸಾಧಿಸಿದೆ. ದ್ವಿತೀಯ ಇನಿಂಗ್ಸ್ನಲ್ಲಿ ಇಂಗ್ಲೆಂಡ್ ನೀಡಿದ 193 ರನ್ಗಳ ಗುರಿಯನ್ನು ಬೆನ್ನತ್ತಿದ ಟೀಮ್ ಇಂಡಿಯಾ ಕೇವಲ 170 ರನ್ಗಳಿಗೆ ಆಲೌಟ್ ಆಗಿದೆ. ಈ ಮೂಲಕ ಆಂಗ್ಲರ ಪಡೆ 22 ರನ್ಗಳ ಗೆಲುವು ದಾಖಲಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
Updated on: Jul 15, 2025 | 7:32 AM
ಲಾರ್ಡ್ಸ್ ಮೈದಾನದಲ್ಲಿ ನಡೆದ ಇಂಗ್ಲೆಂಡ್ ವಿರುದ್ಧದ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಸೋಲನುಭವಿಸಿದೆ. ಗೆಲ್ಲಬಹುದಾಗಿದ್ದ ಪಂದ್ಯವನ್ನು ಭಾರತ ತಂಡ ಕೇವಲ 22 ರನ್ಗಳಿಂದ ಕೈ ಚೆಲ್ಲಿಕೊಂಡಿದೆ. ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಇಂಗ್ಲೆಂಡ್ ತಂಡವು ಪ್ರಥಮ ಇನಿಂಗ್ಸ್ನಲ್ಲಿ 387 ರನ್ ಕಲೆಹಾಕಿದ್ದರು. ಇದಕ್ಕುತ್ತರವಾಗಿ ಪ್ರಥಮ ಇನಿಂಗ್ಸ್ ಆಡಿದ ಟೀಮ್ ಇಂಡಿಯಾ ಕೂಡ 387 ರನ್ಗಳಿಸಿ ಆಲೌಟ್ ಆಗಿತ್ತು.
ಯಾವುದೇ ಮುನ್ನಡೆಯಿಲ್ಲದೆ ದ್ವಿತೀಯ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ತಂಡವನ್ನು 192 ರನ್ಗಳಿಗೆ ಆಲೌಟ್ ಮಾಡುವಲ್ಲಿ ಭಾರತೀಯ ಬೌಲರ್ಗಳು ಯಶಸ್ವಿಯಾಗಿದ್ದರು. ಅದರಂತೆ 193 ರನ್ಗಳ ಸುಲಭ ಗುರಿ ಪಡೆದಿದ್ದ ಟೀಮ್ ಇಂಡಿಯಾ ನಾಲ್ಕನೇ ದಿನದಾಟದ ಅಂತ್ಯಕ್ಕೆ 4 ವಿಕೆಟ್ ಕಳೆದುಕೊಂಡು 58 ರನ್ ಕಲೆಹಾಕಿದ್ದರು. ಆದರೆ 5ನೇ ದಿನದಾಟದಲ್ಲಿ ಕಳಪೆ ಬ್ಯಾಟಿಂಗ್ ಪ್ರದರ್ಶಿಸುವ ಮೂಲಕ 170 ರನ್ಗಳಿಗೆ ಆಲೌಟ್ ಆಗಿದ್ದಾರೆ.
ಈ ಮೂಲಕ ಆತಿಥೇಯ ಇಂಗ್ಲೆಂಡ್ ತಂಡವು 22 ರನ್ಗಳ ಜಯ ಸಾಧಿಸಿದೆ. ಈ ಗೆಲುವಿನೊಂದಿಗೆ 5 ಪಂದ್ಯಗಳ ಸರಣಿಯಲ್ಲಿ ಇಂಗ್ಲೆಂಡ್ ತಂಡವು 2-1 ಅಂತರದಿಂದ ಮುನ್ನಡೆ ಸಾಧಿಸಿದೆ.
6 ಫೋರ್ಗಳಿಂದ ಸೋತ ಟೀಮ್ ಇಂಡಿಯಾ:
ಈ ಪಂದ್ಯದಲ್ಲಿ ಟೀಮ್ ಇಂಡಿಯಾ ಸೋಲಿಗೆ ಹಲವು ಕಾರಣಗಳಿವೆ. ಅವುಗಳಲ್ಲೊಂದು 6 ಫೋರ್ಗಳು. ಈ ಆರು ಫೋರ್ಗಳು ಮೂಡಿಬಂದಿರುವುದು ಬೈಸ್ ಆಗಿ ಎಂಬುದು ಇಲ್ಲಿ ಉಲ್ಲೇಖಾರ್ಹ. ಅಂದರೆ ಭಾರತೀಯ ಬೌಲರ್ಗಳು ದ್ವಿತೀಯ ಇನಿಂಗ್ಸ್ನಲ್ಲಿ ಅಗಲವಾದ ಎಸೆತಗಳ ಮೂಲಕ 6 ಬೈಸ್ ಫೋರ್ಗಳನ್ನು ನೀಡಿದ್ದರು.
ದ್ವಿತೀಯ ಇನಿಂಗ್ಸ್ನ 2ನೇ ಓವರ್ನ ಮೊದಲ ಎಸೆತದಲ್ಲಿ ಮೊಹಮ್ಮದ್ ಸಿರಾಜ್ ಮೊದಲ ಬೈಸ್ ಫೋರ್ ನೀಡಿದ್ದರು. ಇನ್ನು 12ನೇ ಓವರ್ನ 5ನೇ ಎಸೆತವನ್ನು ಹಿಡಿಯುವಲ್ಲಿ ವಿಕೆಟ್ ಕೀಪರ್ ಧ್ರುವ್ ಜುರೇಲ್ ವಿಫಲರಾದರು. ಇದರಿಂದ ಕೂಡ ಇಂಗ್ಲೆಂಡ್ ತಂಡಕ್ಕೆ 4 ರನ್ಗಳು ಲಭಿಸಿತು.
ಹಾಗೆಯೇ ಆಕಾಶ್ ದೀಪ್ ಎಸೆದ 24ನೇ ಓವರ್ನ ಕೊನೆಯ ಎಸೆತವು ಬೈಸ್ ಆಗಿ ಬೌಂಡರಿ ಲೈನ್ ದಾಟಿತು. ಜಸ್ಪ್ರೀತ್ ಬುಮ್ರಾ ಎಸೆದ 25ನೇ ಓವರ್ನ ಮೊದಲ ಎಸೆತ ಕೂಡ ವಿಕೆಟ್ ಕೀಪರ್ನನ್ನು ವಂಚಿಸಿ ಫೋರ್ ಆಯಿತು.
ಮೊಹಮ್ಮದ್ ಸಿರಾಜ್ ಎಸೆದ 34ನೇ ಓವರ್ನ 5ನೇ ಎಸೆತ ಕೂಡ ಬೈಸ್ ಆಗಿ ಫೋರ್ ಆಯಿತು. 36ನೇ ಓವರ್ನ ಮೊದಲ ಎಸೆತವನ್ನು ಹಿಡಿಯುವಲ್ಲಿ ವಿಕೆಟ್ ಕೀಪರ್ ಧ್ರುವ್ ಜುರೇಲ್ ಹಿಡಿಯುವಲ್ಲಿ ವಿಫಲರಾದರು. ಇದರಿಂದ ಮತ್ತೊಂದು ಬೈಸ್ ಫೋರ್ ಲಭಿಸಿತು.
ಹೀಗೆ 6 ಬೈಸ್ ಫೋರ್ಗಳ ಮೂಲಕ ಟೀಮ್ ಇಂಡಿಯಾ ದ್ವಿತೀಯ ಇನಿಂಗ್ಸ್ನಲ್ಲಿ ಹೆಚ್ಚುವರಿಯಾಗಿ ನೀಡಿದ್ದು ಬರೋಬ್ಬರಿ 32 ರನ್ಗಳು. ಇದರಲ್ಲಿ ಬೈಸ್ ಫೋರ್ಗಳಿಂದಲೇ 24 ರನ್ಗಳು ಮೂಡಿಬಂದಿದ್ದವು. ಇತ್ತ ಭಾರತ ತಂಡ ಸೋತಿರುವುದು 22 ರನ್ಗಳಿಂದ. ಅಂದರೆ ಟೀಮ್ ಇಂಡಿಯಾ ಪಾಲಿಗೆ ಬೈಸ್ ಫೋರ್ಗಳೇ ಮುಳುವಾಗಿರುವುದು ಸ್ಪಷ್ಟ.
ಇದನ್ನೂ ಓದಿ: ವಿಶ್ವ ದಾಖಲೆ… ಮುಂಬೈ ಇಂಡಿಯನ್ಸ್ ಮುಡಿಗೆ 13ನೇ ಟ್ರೋಫಿ
ಒಂದು ವೇಳೆ ಟೀಮ್ ಇಂಡಿಯಾ ಈ 6 ಬೈಸ್ ಫೋರ್ಗಳನ್ನು ನೀಡದಿದ್ದರೆ, ಈ ಪಂದ್ಯದಲ್ಲಿ ಭಾರತ ತಂಡಕ್ಕೆ 169 ರನ್ಗಳ ಗುರಿ ಲಭಿಸುತ್ತಿತ್ತು. ಈ ಮೂಲಕ ಟೀಮ್ ಇಂಡಿಯಾ ಈ ಪಂದ್ಯವನ್ನು ಸುಲಭವಾಗಿ ಗೆಲ್ಲುತ್ತಿದ್ದರು. ಆದರೆ ಬೌಲರ್ಗಳು ಹಾಗೂ ವಿಕೆಟ್ ಕೀಪರ್ ಮಾಡಿದ ತಪ್ಪುಗಳಿಂದಾಗಿ ಫೋರ್ಗಳ ಮೂಲಕ ಇಂಗ್ಲೆಂಡ್ ತಂಡಕ್ಕೆ 24 ರನ್ಗಳು ಲಭಿಸಿದ್ದವು. ಈ ಹೆಚ್ಚುವರಿ ರನ್ಗಳೇ ಟೀಮ್ ಇಂಡಿಯಾ ಸೋಲಿಗೆ ಕಾರಣವಾಗಿದ್ದು ಸುಳ್ಳಲ್ಲ.
