BGT ಸರಣಿಗೂ ಮುನ್ನ ಭಾರತ ಎ ಮತ್ತು ಟೀಮ್ ಇಂಡಿಯಾ ನಡುವೆ ಅಭ್ಯಾಸ ಪಂದ್ಯ
Border - Gavaskar Trophy: 1996-97 ರಿಂದ ಶುರುವಾದ ಬಾರ್ಡರ್-ಗವಾಸ್ಕರ್ ಟೆಸ್ಟ್ ಸಿರೀಸ್ನಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳು ಇದುವರೆಗೆ 16 ಸರಣಿಗಳನ್ನು ಆಡಿದೆ. ಈ ವೇಳೆ ಭಾರತ ತಂಡವು 10 ಬಾರಿ ಸರಣಿ ಗೆದ್ದರೆ, ಆಸ್ಟ್ರೇಲಿಯಾ 5 ಸಲ ಟ್ರೋಫಿ ಎತ್ತಿ ಹಿಡಿದಿದೆ. ಇನ್ನು ಒಂದೇ ಒಂದು ಸರಣಿಯು ಡ್ರಾನಲ್ಲಿ ಅಂತ್ಯ ಕಂಡಿದೆ.
Updated on: May 28, 2024 | 7:26 AM
ಅಕ್ಟೋಬರ್ ಮತ್ತು ನವೆಂಬರ್ ನಡುವೆ ಭಾರತ ಎ ತಂಡ ಆಸ್ಟ್ರೇಲಿಯಾ ಪ್ರವಾಸ ಕೈಗೊಳ್ಳಲಿದೆ. ವಿಶೇಷ ಎಂದರೆ ಬಾರ್ಡರ್ – ಗಾವಸ್ಕರ್ ಟ್ರೋಫಿ (BGT) ಟೆಸ್ಟ್ ಸರಣಿ ಆರಂಭಕ್ಕೂ ಮುನ್ನ ಟೀಮ್ ಇಂಡಿಯಾ ಎ 2 ಪಂದ್ಯಗಳನ್ನಾಡಿದೆ. ಅಕ್ಟೋಬರ್ 31 ರಿಂದ ಶುರುವಾಗಲಿರುವ ಈ ಸರಣಿಯಲ್ಲಿ ಭಾರತ ಎ ಮತ್ತು ಆಸ್ಟ್ರೇಲಿಯಾ ಎ ತಂಡಗಳು ಮುಖಾಮುಖಿಯಾಗಲಿದ್ದು, 4 ದಿನದಾಟಗಳ 2 ಟೆಸ್ಟ್ ಪಂದ್ಯಗಳನ್ನಾಡಲಿದ್ದಾರೆ. ಅಲ್ಲದೆ ಈ ಮ್ಯಾಚ್ಗಳ ಬಳಿಕ ಆಸ್ಟ್ರೇಲಿಯಾದಲ್ಲೇ ಭಾರತ ಎ ತಂಡ ಟೀಮ್ ಇಂಡಿಯಾ ವಿರುದ್ಧ ಅಭ್ಯಾಸ ಪಂದ್ಯವನ್ನಾಡಲಿದೆ. ಈ ಸರಣಿಯ ವೇಳಾಪಟ್ಟಿ ಈ ಕೆಳಗಿನಂತಿದೆ.
- ಭಾರತ A vs ಆಸ್ಟ್ರೇಲಿಯಾ A: ಪಂದ್ಯ 1 (ಅಕ್ಟೋಬರ್ 31 ರಿಂದ ನವೆಂಬರ್ 3)
- ಭಾರತ A vs ಆಸ್ಟ್ರೇಲಿಯಾ A: ಪಂದ್ಯ 2 (ನವೆಂಬರ್ 7 ರಿಂದ ನವೆಂಬರ್ 10)
- ಭಾರತ vs ಭಾರತ A: ಅಭ್ಯಾಸ ಪಂದ್ಯ (ನವೆಂಬರ್ 15 ರಿಂದ ನವೆಂಬರ್ 17)
ಬಾರ್ಡರ್ ಗವಾಸ್ಕರ್ ಟ್ರೋಫಿ ಯಾವಾಗ ಶುರು?
ಭಾರತ ಮತ್ತು ಆಸ್ಟ್ರೇಲಿಯಾ ನಡುವಣ ಬಾರ್ಡರ್-ಗವಾಸ್ಕರ್ ಟೆಸ್ಟ್ ಸರಣಿಯು ನವೆಂಬರ್ 22 ರಿಂದ ಶುರುವಾಗಲಿದೆ. ಆಸ್ಟ್ರೇಲಿಯಾದಲ್ಲಿ ನಡೆಯಲಿರುವ ಈ ಸರಣಿಯಲ್ಲಿ ಒಟ್ಟು 5 ಪಂದ್ಯಗಳನ್ನಾಡಲಾಗುತ್ತದೆ. ಈ ಹಿಂದೆ BGT ಸರಣಿಯಲ್ಲಿ 3 ಹಾಗೂ 4 ಪಂದ್ಯಗಳನ್ನಾಡಲಾಗುತ್ತಿತ್ತು. ಇದೇ ಮೊದಲ ಬಾರಿಗೆ ಕ್ರಿಕೆಟ್ ಆಸ್ಟ್ರೇಲಿಯಾ ಭಾರತ ವಿರುದ್ಧ 5 ಪಂದ್ಯಗಳ ಟೆಸ್ಟ್ ಸರಣಿಯನ್ನು ಆಯೋಜಿಸುತ್ತಿರುವುದು ವಿಶೇಷ.
ಈ ಸರಣಿಯ ಮೊದಲ ಪಂದ್ಯವು ಪರ್ತ್ನಲ್ಲಿ ನಡೆದರೆ, 2ನೇ ಪಂದ್ಯಕ್ಕೆ ಅಡಿಲೇಡ್ ಆತಿಥ್ಯವಹಿಸಲಿದೆ. ವಿಶೇಷ ಎಂದರೆ ಈ ಸರಣಿಯ 2ನೇ ಪಂದ್ಯವು ಡೇ ನೈಟ್ ಪಂದ್ಯವಾಗಿದೆ. ಈ ಅಹರ್ನಿಶಿ ಪಂದ್ಯವನ್ನು ಪಿಂಕ್ ಬಾಲ್ನಲ್ಲಿ ಆಡಲಾಗುತ್ತದೆ.
ಇದನ್ನೂ ಓದಿ: IPL 2024: ಐಪಿಎಲ್ ಪ್ರಶಸ್ತಿ ಮೊತ್ತಕ್ಕಿಂತ ಹೆಚ್ಚು ಹಣ ಪಡೆದ ಸ್ಟಾರ್ಕ್, ಕಮಿನ್ಸ್
ಇನ್ನು ಮೂರನೇ ಪಂದ್ಯಕ್ಕೆ ಗಾಬ್ಬಾ ಮೈದಾನ ಆತಿಥ್ಯವಹಿಸಿದರೆ, ನಾಲ್ಕನೇ ಪಂದ್ಯವು ಮೆಲ್ಬೋರ್ನ್ನಲ್ಲಿ ನಡೆಯಲಿದೆ. ಅಂದರೆ ನಾಲ್ಕನೇ ಪಂದ್ಯವು ಬಾಕ್ಸಿಂಗ್ ಟೆಸ್ಟ್. ಕ್ರಿಸ್ಮಸ್ ಹಬ್ಬದ ಮರುದಿನ ನಡೆಯುವ ಪಂದ್ಯವನ್ನು ಬಾಕ್ಸಿಂಗ್ ಟೆಸ್ಟ್ ಎಂದು ಕರೆಯಲಾಗುತ್ತದೆ. ಇನ್ನು ಅಂತಿಮ ಟೆಸ್ಟ್ ಪಂದ್ಯವು ಸಿಡ್ನಿಯಲ್ಲಿ ಜನವರಿ 3, 2025 ರಿಂದ ಶುರುವಾಗಲಿದೆ.
ಭಾರತ vs ಆಸ್ಟ್ರೇಲಿಯಾ ನಡುವಣ ಟೆಸ್ಟ್ ಸರಣಿ ವೇಳಾಪಟ್ಟಿ:
| ಪಂದ್ಯ | ದಿನಾಂಕ | ಸ್ಥಳ |
| ಮೊದಲ ಟೆಸ್ಟ್ | ನವೆಂಬರ್ 22 ರಿಂದ 26, 2024 | ಪರ್ತ್ ಸ್ಟೇಡಿಯಂ, ಪರ್ತ್ |
| ಎರಡನೇ ಟೆಸ್ಟ್ (ಪಿಂಕ್ ಬಾಲ್) | ಡಿಸೆಂಬರ್ 6 ರಿಂದ 10, 2024 | ಅಡಿಲೇಡ್ ಓವಲ್ ಸ್ಟೇಡಿಯಂ, ಅಡಿಲೇಡ್ |
| ಮೂರನೇ ಟೆಸ್ಟ್ | ಡಿಸೆಂಬರ್ 14 ರಿಂದ 18, 2024 | ದಿ ಗಬ್ಬಾ ಸ್ಟೇಡಿಯಂ, ಬ್ರಿಸ್ಬೇನ್ |
| ನಾಲ್ಕನೇ ಟೆಸ್ಟ್ (ಬಾಕ್ಸಿಂಗ್ ಡೇ) | ಡಿಸೆಂಬರ್ 26 ರಿಂದ 30, 2024 | ಎಂಸಿಜಿ ಸ್ಟೇಡಿಯಂ, ಮೆಲ್ಬೋರ್ನ್ |
| ಐದನೇ ಟೆಸ್ಟ್ | ಜನವರಿ 3 ರಿಂದ 7, 2025 | ಸಿಡ್ನಿ ಕ್ರಿಕೆಟ್ ಸ್ಟೇಡಿಯಂ, ಸಿಡ್ನಿ |
