ಟಿ20 ಕ್ರಿಕೆಟ್‌ನಲ್ಲಿ ಭಾರತದ್ದೇ ದರ್ಬಾರ್: ಒಂದೇ ಪಂದ್ಯದಲ್ಲಿ ಮೂರು ವಿಶ್ವದಾಖಲೆ..!

ಕ್ರೈಸ್ಟ್‌ಚರ್ಚ್ ಬಳಿಕ ವೆಲ್ಲಿಂಗ್ಟನ್‌ನಲ್ಲೂ ಟೀಂ ಇಂಡಿಯಾ ಬ್ಯಾಟರ್‌ಗಳು ಅಬ್ಬರಿಸಿದ್ದಾರೆ. ನ್ಯೂಜಿಲೆಂಡ್ ವಿರುದ್ಧದ ಮೂರನೇ ಟಿ20 ಪಂದ್ಯದಲ್ಲಿ ಭಾರತ ಭರ್ಜರಿ ಗೆಲುವು ದಾಖಲಿಸಿ ಸರಣಿಯನ್ನು ತನ್ನದಾಗಿಸಿಕೊಂಡಿದೆ. ತಂಡದ ಈ ಗೆಲುವಿನಲ್ಲಿ ಭಾರತದ ಆರಂಭಿಕರಾದ ಅಭಿಷೇಕ್ ಶರ್ಮಾ ಮತ್ತು ವೈಭವ್ ಸೂರ್ಯವಂಶಿ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿದರು. 199 ರನ್‌ಗಳ ಗುರಿ ಬೆನ್ನಟ್ಟಿದ ಈ ಜೋಡಿ, ಎದುರಾಳಿ ತಂಡದ ಬೌಲರ್‌ಗಳನ್ನು ಮನಬಂದಂತೆ ದಂಡಿಸಿದರು.

ಇದರ ಪರಿಣಾಮವಾಗಿ ಅಭಿಷೇಕ್ ಶರ್ಮಾ ಕೇವಲ 15 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರೆ, ಇದರೊಂದಿಗೆ ಭಾರತ ತಂಡ ಕೇವಲ 2.2 ಓವರ್‌ಗಳಲ್ಲಿ 50 ರನ್‌ಗಳ ಗಡಿ ತಲುಪಿತು. ಈ ಮೂಲಕ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ವೇಗವಾಗಿ ತಂಡದ ಅರ್ಧಶತಕ ದಾಖಲಿಸಿದ ವಿಶ್ವದಾಖಲೆಯನ್ನು ಭಾರತ ಸರಿಗಟ್ಟಿತು. ಬಳಿಕ ಕೇವಲ ಐದು ಓವರ್‌ಗಳಲ್ಲಿ 100 ರನ್ ಪೂರೈಸಿದ ಟೀಂ ಇಂಡಿಯಾ, ಮತ್ತೊಂದು ವಿಶ್ವದಾಖಲೆಯನ್ನು ತನ್ನ ಹೆಸರಿಗೆ ಬರೆದುಕೊಂಡಿತು.

ಕೇವಲ 2.2 ಓವರ್‌ಗಳಲ್ಲಿ 50 ರನ್

ಟೆಸ್ಟ್ ಆಡುವ ರಾಷ್ಟ್ರಗಳ ಪೈಕಿ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ನಲ್ಲಿ ಅತಿ ವೇಗವಾಗಿ 50 ರನ್ ಗಳಿಸಿದ ತಂಡ ಎಂಬ ದಾಖಲೆಯನ್ನು ಭಾರತ ನಿರ್ಮಿಸಿತು. ಒಟ್ಟಾರೆ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಪಪುವಾ ನ್ಯೂಗಿನಿ ಮತ್ತು ರೊಮೇನಿಯಾ ತಂಡಗಳ ದಾಖಲೆಯನ್ನು ಭಾರತ ಸರಿಗಟ್ಟಿತು. ಪಪುವಾ ನ್ಯೂಗಿನಿ 2019ರಲ್ಲಿ ವನವಾಟು ವಿರುದ್ಧ ಹಾಗೂ ರೊಮೇನಿಯಾ 2021ರಲ್ಲಿ ಸೆರ್ಬಿಯಾ ವಿರುದ್ಧ ಕೇವಲ 2.2 ಓವರ್‌ಗಳಲ್ಲಿ 50 ರನ್ ಗಳಿಸಿದ್ದವು. ಇದೀಗ ನ್ಯೂಜಿಲೆಂಡ್ ವಿರುದ್ಧ ಟೀಂ ಇಂಡಿಯಾ ಅಷ್ಟೇ ವೇಗದಲ್ಲಿ ಈ ಸಾಧನೆ ಮಾಡಿದೆ.

ಅತಿ ವೇಗದ ತಂಡದ ಅರ್ಧಶತಕ

• 2.2 ಓವರ್‌ಗಳು- ಪಪುವಾ ನ್ಯೂಗಿನಿ vs ವನವಾಟು, 2019
• 2.2 ಓವರ್‌ಗಳು- ರೊಮೇನಿಯಾ vs ಸೆರ್ಬಿಯಾ, 2021
• 2.2 ಓವರ್‌ಗಳು – ಭಾರತ vs ನ್ಯೂಜಿಲೆಂಡ್, 2026
• 2.3 ಓವರ್‌ಗಳು- ಫಿಲಿಪ್ಪೀನ್ಸ್ vs ಇಂಡೋನೇಷ್ಯಾ, 2023
• 2.4 ಓವರ್‌ಗಳು- ನ್ಯೂಜಿಲೆಂಡ್ vs ಸ್ಕಾಟ್ಲೆಂಡ್, 2009
• 2.4 ಓವರ್‌ಗಳು- ನ್ಯೂಜಿಲೆಂಡ್ vs ಇಂಗ್ಲೆಂಡ್, 2019
• 2.4 ಓವರ್‌ಗಳು- ದಕ್ಷಿಣ ಆಫ್ರಿಕಾ vs ವೆಸ್ಟ್ ಇಂಡೀಸ್, 2023

ಕೇವಲ 5 ಓವರ್‌ಗಳಲ್ಲಿ 100 ರನ್

ಅರ್ಧಶತಕದ ಬಳಿಕವೂ ಭಾರತದ ರನ್ ವೇಗಕ್ಕೆ ಕಡಿವಾಣವೇ ಬೀಳಲಿಲ್ಲ. ಕೇವಲ ಐದು ಓವರ್‌ಗಳಲ್ಲಿ 100 ರನ್ ಪೂರೈಸಿದ ಭಾರತ, ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಅತಿ ವೇಗವಾಗಿ ತಂಡದ ಶತಕ ದಾಖಲಿಸಿದ ವಿಶ್ವದಾಖಲೆಯನ್ನು ತನ್ನದಾಗಿಸಿಕೊಂಡಿತು. ಇದಕ್ಕೂ ಮೊದಲು 2021ರಲ್ಲಿ ಸೆರ್ಬಿಯಾ ವಿರುದ್ಧ ರೊಮೇನಿಯಾ 5.2 ಓವರ್‌ಗಳಲ್ಲಿ 100 ರನ್ ಗಳಿಸಿದ್ದು ದಾಖಲೆಯಾಗಿತ್ತು. ಟೆಸ್ಟ್ ಆಡುವ ರಾಷ್ಟ್ರಗಳ ಪೈಕಿ ದಕ್ಷಿಣ ಆಫ್ರಿಕಾ 5.3 ಓವರ್‌ಗಳಲ್ಲಿ ಶತಕ ಪೂರೈಸಿದ್ದು ಹಿಂದಿನ ದಾಖಲೆಯಾಗಿತ್ತು.

ಅತಿ ವೇಗದ ತಂಡದ ಶತಕ

• 5 ಓವರ್‌ಗಳು- ಭಾರತ vs ನ್ಯೂಜಿಲೆಂಡ್, 2026
• 5.2 ಓವರ್‌ಗಳು- ರೊಮೇನಿಯಾ vs ಸೆರ್ಬಿಯಾ, 2021
• 5.3 ಓವರ್‌ಗಳು- ದಕ್ಷಿಣ ಆಫ್ರಿಕಾ vs ವೆಸ್ಟ್ ಇಂಡೀಸ್, 2023
• 5.3 ಓವರ್‌ಗಳು- ಆಸ್ಟ್ರೇಲಿಯಾ vs ಸ್ಕಾಟ್ಲೆಂಡ್, 2024
• 5.5 ಓವರ್‌ಗಳು- ಜಿಂಬಾಬ್ವೆ vs ಗ್ಯಾಂಬಿಯಾ, 2024
• 5.5 ಓವರ್‌ಗಳು- ಇಂಗ್ಲೆಂಡ್ vs ದಕ್ಷಿಣ ಆಫ್ರಿಕಾ, 2025

ಪವರ್‌ಪ್ಲೇನಲ್ಲಿ 118 ರನ್ ವಿಶ್ವದಾಖಲೆ

ಭಾರತದ ಸ್ಫೋಟಕ ಬ್ಯಾಟಿಂಗ್ ಮೊದಲ ಆರು ಓವರ್‌ಗಳಲ್ಲೂ ಮುಂದುವರಿಯಿತು. 199 ರನ್‌ಗಳ ಗುರಿ ಬೆನ್ನಟ್ಟಿದ ಭಾರತ, ಪವರ್‌ಪ್ಲೇ ಮುಕ್ತಾಯಕ್ಕೆ ವಿಕೆಟ್ ನಷ್ಟವಿಲ್ಲದೆ 118 ರನ್ ಕಲೆಹಾಕಿತು. ಈ ಮೂಲಕ ಪುರುಷರ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ಪವರ್‌ಪ್ಲೇಯಲ್ಲಿ ಗಳಿಸಿದ ಗರಿಷ್ಠ ಮೊತ್ತದ ವಿಶ್ವದಾಖಲೆಯನ್ನು ಭಾರತ ತನ್ನದಾಗಿಸಿಕೊಂಡಿತು. ಇದಕ್ಕೂ ಮೊದಲು 2021ರಲ್ಲಿ ಸೆರ್ಬಿಯಾ ವಿರುದ್ಧ ರೊಮೇನಿಯಾ ಆರು ಓವರ್‌ಗಳಲ್ಲಿ 116 ರನ್ ಗಳಿಸಿದ್ದು ದಾಖಲೆಯಾಗಿತ್ತು. ಇದೀಗ ಭಾರತ 118 ರನ್ ಗಳಿಸುವ ಮೂಲಕ ಆ ದಾಖಲೆಯನ್ನು ಮುರಿದಿದೆ.

15 ಎಸೆತಗಳಲ್ಲಿ ಅರ್ಧಶತಕ, 35 ಎಸೆತಗಳಲ್ಲಿ ಶತಕ; ಅಭಿಷೇಕ್ ಅಬ್ಬರಕ್ಕೆ ನ್ಯೂಜಿಲೆಂಡ್ ತತ್ತರ!

ಪವರ್‌ಪ್ಲೇನ ಗರಿಷ್ಠ ಮೊತ್ತ

• 118/0- ಭಾರತ vs ನ್ಯೂಜಿಲೆಂಡ್, ವೆಲ್ಲಿಂಗ್ಟನ್, 2026
• 116/0- ರೊಮೇನಿಯಾ vs ಸೆರ್ಬಿಯಾ, 2021
• 113/1- ಆಸ್ಟ್ರೇಲಿಯಾ vs ಸ್ಕಾಟ್ಲೆಂಡ್, 2024
• 103/1- ಜಿಂಬಾಬ್ವೆ vs ಗ್ಯಾಂಬಿಯಾ, 2024
• 102/0- ದಕ್ಷಿಣ ಆಫ್ರಿಕಾ vs ವೆಸ್ಟ್ ಇಂಡೀಸ್, 2023
• 100/0- ಇಂಗ್ಲೆಂಡ್ vs ದಕ್ಷಿಣ ಆಫ್ರಿಕಾ, 2025
• 100/0- ಭಾರತ vs ಅಫ್ಘಾನಿಸ್ತಾನ, ದೆಹಲಿ, 2026

35 ಎಸೆತಗಳಲ್ಲಿ ಶತಕ ಸಿಡಿಸಿದ ಅಭಿಷೇಕ್

ಅಭಿಷೇಕ್ ಶರ್ಮಾ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮುಂದುವರಿಸಿ ಕೇವಲ 35 ಎಸೆತಗಳಲ್ಲಿ ಶತಕ ಪೂರೈಸಿದರು. ಶತಕದ ಬಳಿಕ ಅವರು 38 ಎಸೆತಗಳಲ್ಲಿ 113 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. ಇನ್ನೊಂದೆಡೆ, ಯುವ ಬ್ಯಾಟರ್ ವೈಭವ್ ಸೂರ್ಯವಂಶಿ ಕೇವಲ 19 ಎಸೆತಗಳಲ್ಲಿ 45 ರನ್ ಸಿಡಿಸಿ ಗಮನ ಸೆಳೆದರು. ಈ ಇಬ್ಬರ ಸ್ಫೋಟಕ ಆಟದ ನೆರವಿನಿಂದ ಭಾರತದ ಗೆಲುವಿನ ಹಾದಿ ಸುಲಭವಾಯಿತು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ