U19 World Cup: ಟೀಂ ಇಂಡಿಯಾ ಆಟಗಾರರು ಬಯೋ ಬಬಲ್‌ನಲ್ಲಿರುವಾಗಲೂ ಕೊರೊನಾ ತಗುಲಿದ್ದು ಹೇಗೆ?

ಭಾರತದ ಅಂಡರ್ 19 ಕ್ರಿಕೆಟ್ ತಂಡವು ಪ್ರಸ್ತುತ ಕೊರೊನಾ ವೈರಸ್‌ನಿಂದ ಬಳಲುತ್ತಿರುವ ಆಟಗಾರರೊಂದಿಗೆ ಹೋರಾಡುತ್ತಿದೆ. ಅಂಡರ್ 19 ವಿಶ್ವಕಪ್ 2022 ರಲ್ಲಿ, ನಾಯಕ ಯಶ್ ಧುಲ್ ಸೇರಿದಂತೆ ತಂಡದ ಐವರು ಆಟಗಾರರು ಕೊರೊನಾ ಹಿಡಿತದಲ್ಲಿದ್ದಾರೆ. ಟೂರ್ನಿ ನಾಕೌಟ್‌ ಹಂತ ತಲುಪುತ್ತಿದ್ದಂತೆ ಟೀಂ ಇಂಡಿಯಾ ಪಾಳಯದಲ್ಲಿ ಆತಂಕದ ಸಾಲುಗಳು ಮೂಡಿವೆ. ಭಾರತ ನಾಲ್ಕು ಬಾರಿ ಚಾಂಪಿಯನ್ ಆಗಿದ್ದು, ಕಳೆದ ಮೂರು ಆವೃತ್ತಿಗಳಲ್ಲಿ ನಿರಂತರವಾಗಿ ಫೈನಲ್ ಪಂದ್ಯಗಳನ್ನು ಆಡುತ್ತಿದೆ. ಈ ಬಾರಿಯೂ ಅವರು ಪ್ರಶಸ್ತಿಗೆ ಸ್ಪರ್ಧಿಯಾಗಿದ್ದಾರೆ. ಆದರೆ ಕೊರೊನಾ ಪ್ರಕರಣಗಳು ಅವರ ತಂತ್ರ ಮತ್ತು ಸಿದ್ಧತೆಯ ಮೇಲೆ ಕೆಟ್ಟ ಪರಿಣಾಮ ಬೀರಿವೆ. ಆದರೆ ಭಾರತೀಯ ಆಟಗಾರರು ಬಯೋ ಬಬಲ್​ನಲ್ಲಿದ್ದರೂ ವೈರಸ್‌ಗೆ ಹೇಗೆ ಒಳಗಾದರು ಎಂಬ ಪ್ರಶ್ನೆ ಉದ್ಭವಿಸುತ್ತಿದೆ.

ಯುಎಇಯಲ್ಲಿ ನಡೆದ ಏಷ್ಯಾಕಪ್ ಗೆದ್ದ ನಂತರ ಭಾರತ ತಂಡ ಆಮ್ಸ್ಟರ್‌ಡ್ಯಾಮ್ ಮೂಲಕ ವೆಸ್ಟ್ ಇಂಡೀಸ್‌ಗೆ ತೆರಳಿದೆ. ಗಯಾನಾ ತಲುಪಿದ ನಂತರ, ಭಾರತ ತಂಡವು ಐದು ದಿನಗಳ ಕಾಲ ಕ್ವಾರಂಟೈನ್‌ನಲ್ಲಿ ಇರಬೇಕಾಗಿತ್ತು ಮತ್ತು ಈ ಸಮಯದಲ್ಲಿ ತಂಡದ ಸಹೋದ್ಯೋಗಿ ಕೊರೊನಾ ಪಾಸಿಟಿವ್ ಆದರು. ಪ್ರಯಾಣದ ಸಮಯದಲ್ಲಿ ಈ ಸದಸ್ಯರು ಈ ವೈರಸ್‌ನ ಹಿಡಿತಕ್ಕೆ ಒಳಗಾದರು ಎಂದು ನಂಬಲಾಗಿದೆ, ಇದು ಇತರ ಆಟಗಾರರಿಗೆ ಸೋಂಕು ತಗುಲಿತು.

ಕೋಚ್‌ನಿಂದ ಕೊರೊನಾ ಹರಡಿದೆ ಐದನೇ ದಿನದಂದು ಕ್ವಾರಂಟೈನ್‌ನಿಂದ ಬಂದ ನಂತರ ಭಾರತೀಯ ಆಟಗಾರರು ಕೋಚಿಂಗ್ ತಂಡದ ಸದಸ್ಯರೊಂದಿಗೆ ಎರಡು ದಿನಗಳ ಕಾಲ ಸಂಪರ್ಕದಲ್ಲಿದ್ದರು. ಮೂಲವೊಂದರ ಪ್ರಕಾರ, ಆ ಅವಧಿಯಲ್ಲಿ ಆಟಗಾರರು ತರಬೇತುದಾರರೊಂದಿಗೆ ಇದ್ದರು ಮತ್ತು ಅಲ್ಲಿಂದ ತಂಡವು ವೈರಸ್‌ಗೆ ತುತ್ತಾಗಿದೆ ಎಂದು ತೋರುತ್ತದೆ. ಯುಎಇಯಲ್ಲಿ ನಡೆದ ಏಷ್ಯಾಕಪ್‌ನಲ್ಲಿದ್ದಷ್ಟು ಕಟ್ಟುನಿಟ್ಟಾಗಿ ಟೂರ್ನಿಯ ಬಯೋ ಬಬಲ್ ಇಲ್ಲ ಎಂದೂ ಹೇಳಲಾಗುತ್ತಿದೆ. ಏಷ್ಯಾಕಪ್‌ನಲ್ಲಿ, ಪ್ರತಿ ತಂಡವು ಹೋಟೆಲ್‌ನಲ್ಲಿ ಪ್ರತ್ಯೇಕವಾಗಿದೆ. ಆದರೆ, ಅಲ್ಲಿಯೂ ಕೊರೊನಾ ಪ್ರಕರಣಗಳು ಕಂಡುಬಂದಿವೆ. ಶ್ರೀಲಂಕಾ ಮತ್ತು ಬಾಂಗ್ಲಾದೇಶ ನಡುವಿನ ಪಂದ್ಯದಲ್ಲಿ ಇಬ್ಬರು ಪಂದ್ಯದ ಅಧಿಕಾರಿಗಳು ಸೋಂಕಿಗೆ ಒಳಗಾಗಿದ್ದಾರೆ. ಇದಾದ ಬಳಿಕ ಪಂದ್ಯವನ್ನು ರದ್ದುಗೊಳಿಸಬೇಕಾಯಿತು.

ನಾಕೌಟ್‌ಗೂ ಮುನ್ನ ಟೀಂ ಇಂಡಿಯಾ ಸಂಪೂರ್ಣ ಶಕ್ತಿ ಪಡೆಯಲಿದೆಯೇ? ಭಾರತದ ಒಟ್ಟು ಆರು ಆಟಗಾರರು ಈ ಹಿಂದೆ ಪಾಸಿಟಿವ್ ಆಗಿದ್ದರು, ಅವರಲ್ಲಿ ಒಬ್ಬರು ಈಗ ಕೊರೊನಾದಿಂದ ಗುಣಮುಖರಾಗಿದ್ದಾರೆ. ಈ ನಿಟ್ಟಿನಲ್ಲಿ ಸ್ವಲ್ಪ ಸಮಾಧಾನವಿದೆ. ಆದರೆ ಸಮಸ್ಯೆಯೆಂದರೆ ಇನ್ನೂ ಪಾಸಿಟಿವ್​ ಆಗಿರುವ ಐದು ಆಟಗಾರರು ಎಲ್ಲಾ ಪ್ರಮುಖ ಆಟಗಾರರಾಗಿದ್ದಾರೆ. ನಾಕೌಟ್ ಪಂದ್ಯಗಳಿಗೆ ಮುನ್ನ ಅವರು ಚೇತರಿಸಿಕೊಳ್ಳುವ ನಿರೀಕ್ಷೆಯಿದೆ. ಆದರೆ ಪಂದ್ಯದ ಅಭ್ಯಾಸದಿಂದ ದೂರ ಉಳಿಯಲಿದ್ದಾರೆ. ಅಂತಹ ಪರಿಸ್ಥಿತಿಯಲ್ಲಿ, ಅವರು ಪಂದ್ಯವನ್ನು ಆಡಲು ಬಂದರೂ, ಅವರ ಆಟದಿಂದ ಹೊಳಪು ಕಾಣೆಯಾಗಬಹುದು. ಇದು ಭಾರತದ ಭವಿಷ್ಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಬಹುದು. ಈ ಸಂಕಷ್ಟದ ಪರಿಸ್ಥಿತಿಯಿಂದ ತಂಡ ಹಾಗೂ ಆಟಗಾರರು ಹೇಗೆ ಚೇತರಿಸಿಕೊಂಡು ಮುನ್ನಡೆಯುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ.