India vs England: ಹೊಸ ಪ್ರಯೋಗಕ್ಕಿಳಿದು ಕೈಸುಟ್ಟುಕೊಂಡ ಕೊಹ್ಲಿ: ಜಡೇಜಾಗೆ ಬಡ್ತಿ ನೀಡಲು ಕಾರಣವೇನು ಗೊತ್ತಾ?
Ravindra Jadeja: ಸತತ ವೈಫಲ್ಯ ಅನುಭವಿಸಿದ್ದರೂ ಆಡುವ ಬಳಗದಲ್ಲಿ ಸ್ಥಾನ ಗಿಟ್ಟಿಸಿಕೊಂಡ ಅಜಿಂಕ್ಯಾ ರಹಾನೆ 5ನೇ ಕ್ರಮಾಂಕದಲ್ಲಿ ಕಣಕ್ಕಿಳಿಯಬೇಕಿತ್ತು. ಆದರೆ, ಕೊಹ್ಲಿ ಜಡೇಜಾ ಅವರನ್ನ ಬ್ಯಾಟಿಂಗ್ಗೆ ಕಳುಹಿಸಿದ್ದು ಅಚ್ಚರಿ ಮೂಡಿಸಿತು.
ಆಂಗ್ಲರ ನಾಡಿನಲ್ಲಿ ಸಾಗುತ್ತಿರುವ ಭಾರತ ಹಾಗೂ ಇಂಗ್ಲೆಂಡ್ (India vs England) ನಡುವಣ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲೂ ಬ್ಯಾಟ್ಸ್ಮನ್ಗಳ ಆಟ ನಡೆಯುತ್ತಿಲ್ಲ. ಬೌಲರ್ಗಳೇ ಪಾರುಪತ್ಯ ಮೆರೆಯುತ್ತಿದ್ದಾರೆ. 4ನೇ ಟೆಸ್ಟ್ ಆರಂಭವಾದ ಮೊದಲ ದಿನವೇ ಬರೋಬ್ಬರಿ 13 ವಿಕೆಟ್ ಉರುಳಿದವು. ಟೀಮ್ ಇಂಡಿಯಾ (Team India) 191 ರನ್ಗಳಿಗೆ ಸರ್ವಪತನ ಕಂಡರೆ, ಇಂಗ್ಲೆಂಡ್ ದಿನದಾಟದ ಅಂತ್ಯಕ್ಕೆ 3 ವಿಕೆಟ್ ಕಳೆದುಕೊಂಡು 53 ರನ್ ಕಲೆಹಾಕಿದೆ. ಇಂದು ಎರಡನೇ ದಿನ ಭಾರತೀಯ ಬೌಲರ್ಗಳು ಮಾರಕ ದಾಳಿ ಸಂಘಟಿಸಬೇಕಾದ ಅನಿವಾರ್ಯತೆ ಇದ್ದು 200 ರನ್ ಒಳಗೆ ಇಂಗ್ಲೆಂಡ್ ಅನ್ನು ಕಟ್ಟಿಹಾಕಬೇಕಿದೆ.
ನಾಲ್ಕನೇ ಟೆಸ್ಟ್ನ ಮೊದಲನೇ ದಿನ ಅಷ್ಟೊಂದು ಕುತೂಹಲಕಾರಿಯಾಗಿ ಇರಲಿಲ್ಲ. ಶಾರ್ದೂಲ್ ಠಾಕೂರ್ ಹಾಗೂ ನಾಯಕ ವಿರಾಟ್ ಕೊಹ್ಲಿ ಅರ್ಧಶತಕ ಗಳಿಸಿದ್ದು ಬಿಟ್ಟರೆ ಉಳಿದೆಲ್ಲ ಬ್ಯಾಟ್ಸ್ಮನ್ಗಳು ತಮ್ಮ ಹಳೆಯ ಚಾಳಿ ಮುಂದುವರೆಸಿದರು. ಇದರ ನಡುವೆ ಟೀಮ್ ಇಂಡಿಯಾ ಹೊಸ ಪ್ರಯೋಗಕ್ಕೆ ಇಳಿಯಿತಾದರೂ ಅದು ಪ್ರಯೋಜನಕ್ಕೆ ಬರಲಿಲ್ಲ.
ಸತತ ವೈಫಲ್ಯ ಅನುಭವಿಸಿದ್ದರೂ ಆಡುವ ಬಳಗದಲ್ಲಿ ಸ್ಥಾನ ಗಿಟ್ಟಿಸಿಕೊಂಡ ಉಪ ನಾಯಕ ಅಜಿಂಕ್ಯಾ ರಹಾನೆ 5ನೇ ಕ್ರಮಾಂಕದಲ್ಲಿ ಕಣಕ್ಕಿಳಿಯಬೇಕಿತ್ತು. ಆದರೆ, ಕೊಹ್ಲಿ ರಹಾನೆಗಿಂತ ಮೊದಲು ರವೀಂದ್ರ ಜಡೇಜಾ ಅವರನ್ನ ಬ್ಯಾಟಿಂಗ್ಗೆ ಕಳುಹಿಸಿದ್ದು ಅಚ್ಚರಿ ಮೂಡಿಸಿತು. ಥರ್ಡ್ ಡೌನ್ನಲ್ಲಿ ಜಡೇಜಾ ಆಡಿರುವುದು ತೀರಾ ಅಪರೂಪ. ಅದರಲ್ಲೂ ವಿಶೇಷ ಸಂದರ್ಭ ಇಲ್ಲದಿದ್ದರೂ ಜಡೇಜಾಗೆ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಬಡ್ತಿ ನೀಡಿದ್ದು ಎಲ್ಲರ ಹುಬ್ಬೇರುವಂತೆ ಮಾಡಿತು.
ಆದರೆ, ಭಾರತ ಆಯ್ಕೆ ಮಾಡಿಕೊಂಡ ಪ್ಲಾನ್ ಸಂಪೂರ್ಣ ವಿಫಲವಾಯಿತು. ಜಡೇಜಾ ಮೇಲಿನ ಕ್ರಮಾಂಕಕ್ಕೆ ಬಂದ ಉದ್ದೇಶ ಈಡೇರಲಿಲ್ಲ. ಕೇವಲ 10 ರನ್ ಗಳಿಸಿ ಜಡ್ಡು ಪೆವಿಲಿಯನ್ ಹಾದಿ ಹಿಡಿದರು. ಇದರ ನಡುವೆ ಟಿವಿ ವೀಕ್ಷಕ ವಿವರಣೆಗಾರರಾಗಿದ್ದ ಸುನೀಲ್ ಗವಾಸ್ಕರ್ ಈ ಬೆಳವಣಿಗೆ ಬಗ್ಗೆ ತಮ್ಮದೇ ವಿಶ್ಲೇಷಣೆ ನೀಡಿದರು. ವಿರಾಟ್ ಕೊಹ್ಲಿ ಮೇಲೆ ಮುಗಿಬಿದ್ದಿದ್ದ ಇಂಗ್ಲೆಂಡ್ ಬೌಲರ್ಗಳ ಲಯ ಮುರಿಯುವ ತಂತ್ರ ಇದಾಗಿರಬಹುದು ಎಂಬುದು ಅವರ ಅನಿಸಿಕೆ. ಜಡೇಜಾ ಎಡಗೈ ಬ್ಯಾಟ್ಸ್ಮನ್, ವಿರಾಟ್ ಕೊಹ್ಲಿ ಬಲಗೈ ಬ್ಯಾಟ್ಸ್ಮನ್ ಎಂಬ ಲೆಕ್ಕಾಚಾರ ಇರಬಹುದು ಎಂದು ಹೇಳಿದರು. ಆದರೆ, ಕೊಹ್ಲಿ ಪಡೆಯ ಪ್ಲಾನ್ ವರ್ಕೌಟ್ ಆಗಿಲ್ಲ.
India in tatters already. Kohli’s there, but the innings hasn’t gained any momentum and 3 wickets have fallen. Jadeja walks out at no.5. This is a surprise!
— Cricketwallah (@cricketwallah) September 2, 2021
ಲಂಡನ್ನ ಕೆನ್ನಿಂಗ್ಟನ್ ಓವಲ್ ಮೈದಾನದಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್ ವಿರುದ್ಧದ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಮತ್ತೆ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿತು. ಮೊದಲ ದಿನವೇ 191 ರನ್ಗೆ ಸರ್ವಪತನ ಕಂಡಿರುವ ಕೊಹ್ಲಿ ಬಳಗ ಪಂದ್ಯವನ್ನು ತನ್ನ ಹಿಡಿತಕ್ಕೆ ತೆಗೆದುಕೊಳ್ಳಬೇಕಿದೆ. ಇತ್ತ ಇಂಗ್ಲೆಂಡ್ ದಿನದಾಟದ ಅಂತ್ಯಕ್ಕೆ 3 ವಿಕೆಟ್ ಕಳೆದುಕೊಂಡು 53 ರನ್ ಗಳಿಸಿದೆ.
ಭಾರತ ಪರ ಠಾಕೂರ್ 57 ರನ್ ಬಾರಿಸಿದರೆ, ನಾಯಕ ವಿರಾಟ್ ಕೊಹ್ಲಿ 96 ಎಸೆತಗಳಲ್ಲಿ 8 ಬೌಂಡರಿಯೊಂದಿಗೆ 50 ರನ್ ಗಳಿಸಿದರು. ಕೆ. ಎಲ್ ರಾಹುಲ್ 17 ರನ್ ಗಳಿಸಿದರು. ಉಳಿದ ಬ್ಯಾಟ್ಸ್ಮನ್ಗಳ ಸ್ಕೋರ್ 15ರ ಗಡಿ ದಾಟಲಿಲ್ಲ. ಇಂಗ್ಲೆಂಡ್ ಪರ ಕ್ರಿಸ್ ವೋಕ್ಸ್ 4 ವಿಕೆಟ್ ಪಡೆದರೆ, ರಾಬಿನ್ಸನ್ 3, ಜೇಮ್ಸ್ ಆಂಡರ್ಸನ್ ಹಾಗೂ ಓವರ್ಟನ್ ತಲಾ 1 ವಿಕೆಟ್ ಕಿತ್ತರು.
Tokyo Paralympics: ಪ್ಯಾರಾಲಿಂಪಿಕ್ಸ್ನಲ್ಲಿ ಭಾರತಕ್ಕೆ 11ನೇ ಪದಕ: ಹೈ ಜಂಪ್ನಲ್ಲಿ ಪ್ರವೀಣ್ಗೆ ಬೆಳ್ಳಿ
(India vs England You know why Ravindra Jadeja Walks In To Bat Ahead Of Ajinkya Rahane)