India vs Sri Lanka 3rd ODI: ಟೀಂ ಇಂಡಿಯಾ ವಿರುದ್ಧ ಸುಲಭ ಗೆಲುವು ದಾಖಲಿಸಿದ ಶ್ರೀಲಂಕಾ

India vs Sri Lanka 3rd ODI: ಶ್ರೀಲಂಕಾಗೆ ಉತ್ತಮ ಆರಂಭ ಒದಗಿಸುವಲ್ಲಿ ಅವಿಷ್ಕಾ ಫರ್ನಾಂಡೊ ಯಶಸ್ವಿಯಾದರು. ಆರಂಭದಿಂದಲೂ ಟೀಮ್ ಇಂಡಿಯಾ ಬೌಲರುಗಳನ್ನು ನಿರಾಯಾಸವಾಗಿ ಎದುರಿಸಿದ ಅವಿಷ್ಕಾ ಅತ್ಯುತ್ತಮ ಹೊಡೆತಗಳ ಮೂಲಕ ಗಮನ ಸೆಳೆದರು.

India vs Sri Lanka 3rd ODI: ಟೀಂ ಇಂಡಿಯಾ ವಿರುದ್ಧ ಸುಲಭ ಗೆಲುವು ದಾಖಲಿಸಿದ ಶ್ರೀಲಂಕಾ
India vs Sri Lanka

ಕೊಲಂಬೊದ ಆರ್​ ಪ್ರೇಮದಾಸ ಸ್ಟೇಡಿಯಂನಲ್ಲಿ ನಡೆದ ಭಾರತದ ವಿರುದ್ದದ ಮೂರನೇ ಏಕದಿನ ಪಂದ್ಯದಲ್ಲಿ ಶ್ರೀಲಂಕಾ ತಂಡವು 3 ವಿಕೆಟ್​ಗಳಿಂದ ಜಯ ಸಾಧಿಸಿದೆ. ಟೀಮ್ ಇಂಡಿಯಾ ನೀಡಿದ 226 ರನ್​ಗಳ ಸಾಧಾರಣ ಸವಾಲನ್ನು 39 ಓವರ್​ನಲ್ಲಿ ಬೆನ್ನತ್ತುವ ಮೂಲಕ ಲಂಕಾ ತಂಡ ಗೆಲುವು ದಾಖಲಿಸಿತು. ಇದಕ್ಕೂ ಮುನ್ನ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಭಾರತಕ್ಕೆ ಉತ್ತಮ ಆರಂಭ ದೊರೆತಿರಲಿಲ್ಲ. ನಾಯಕ ಶಿಖರ್ ಧವನ್ ಕೇವಲ 13 ರನ್​ಗಳಿಸಿ ಮೊದಲಿಗರಾಗಿ ಹೊರನಡೆದರು. ಈ ಹಂತದಲ್ಲಿ ಜೊತೆಗೂಡಿದ ಪೃಥ್ವಿ ಶಾ ಹಾಗೂ ಸಂಜು ಸ್ಯಾಮ್ಸನ್ ತಂಡವನ್ನು ಆರಂಭಿಕ ಆಘಾತದಿಂದ ಪಾರು ಮಾಡುವಲ್ಲಿ ಯಶಸ್ವಿಯಾದರು.

ಅದರಂತೆ ಲಂಕಾ ಬೌಲರುಗಳನ್ನು ಆತ್ಮ ವಿಶ್ವಾಸದಿಂದಲೇ ಎದುರಿಸಿದ ಪೃಥ್ವಿ 48 ಎಸೆತಗಳಲ್ಲಿ 8 ಬೌಂಡರಿಗಳೊಂದಿಗೆ 49 ರನ್ ಬಾರಿಸಿದರು. ಈ ಹಂತದಲ್ಲಿ ಶನಕ ಎಸೆತವನ್ನು ಗುರುತಿಸುವಲ್ಲಿ ಎಡವಿದ ಪೃಥ್ವಿ ಎಲ್​ಬಿಡಬ್ಲ್ಯೂ ಆಗಿ ಅರ್ಧಶತಕದಿಂದ ವಂಚಿತರಾದರು. ಇನ್ನು ಮತ್ತೊಂದೆಡೆ ಸಂಜು ಸ್ಯಾಮ್ಸನ್ ಎಚ್ಚರಿಕೆಯ ಆಟದೊಂದಿಗೆ ತಂಡದ ಮೊತ್ತವನ್ನು ಹೆಚ್ಚಿಸಿದರು. ಈ ವೇಳೆ ಜೊತೆಯಾದ ಸ್ಯಾಮ್ಸನ್-ಮನೀಶ್ ಪಾಂಡೆ ಉತ್ತಮ ಜೊತೆಯಾಟವಾಡಿದರು. ಅತ್ಯುತ್ತಮ ಹೊಡೆತಗಳ ಮೂಲಕ ಗಮನ ಸೆಳೆದ ಈ ಜೋಡಿ ತಂಡದ ಮೊತ್ತವನ್ನು100ರ ಗಡಿ ದಾಟಿಸಿದರು. ಇದೇ ವೇಳೆ ಅರ್ಧಶತಕದ ತಲುಪಿದ್ದ ಸ್ಯಾಮ್ಸನ್ (46) ಜಯವಿಕ್ರಮ ಎಸೆತದಲ್ಲಿ ಅವಿಷ್ಕಾಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು. ಇನ್ನು ಪಂದ್ಯಕ್ಕೆ ವರುಣ ಅಡ್ಡಿಯಾಗಿದ್ದರಿಂದ ಕೆಲ ಹೊತ್ತಿನವರೆಗೆ ಆಟವನ್ನು ಸ್ಥಗಿತಗೊಳಿಸಲಾಗಿತ್ತು. ಆ ಬಳಿಕ ಮೂರು ಓವರ್​ಗಳ ಕಡಿತದೊಂದಿಗೆ ಪಂದ್ಯವನ್ನು ಪುನರಾರಂಭಿಸಲಾಗಿಯಿತು.

ಆದರೆ ನಾಲ್ಕನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಕನ್ನಡಿಗ ಮನೀಶ್ ಪಾಂಡೆ ಕೇವಲ 11 ರನ್​ಗಳಿಸಿ ವಿಕೆಟ್ ಒಪ್ಪಿಸುವ ಮೂಲಕ ನಿರಾಸೆ ಮೂಡಿಸಿದರು. ಇನ್ನೊಂದೆಡೆ ಸೂರ್ಯಕುಮಾರ್ ಯಾದವ್ ಮತ್ತೊಮ್ಮೆ ತಮ್ಮ ಫಾರ್ಮ್​ ಪ್ರದರ್ಶಿಸಿದರು. ಅದರಂತೆ 37 ಎಸೆತಗಳಲ್ಲಿ 7 ಬೌಂಡರಿಯೊಂದಿಗೆ 40 ರನ್ ಬಾರಿಸಿದರು. ಇದೇ ವೇಳೆ ದಾಳಿಗಿಳಿದ ಧನಂಜಯ ಸೂರ್ಯಕುಮಾರ್ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು. ಇದರ ಬೆನ್ನಲ್ಲೇ ಹಾರ್ದಿಕ್ ಪಾಂಡ್ಯ (19) ಕೂಡ ಜಯವಿಕ್ರಮನ ಎಸೆತದಲ್ಲಿ ಎಲ್​ಬಿಡಬ್ಲ್ಯೂ ಆಗಿ ಹೊರ ನಡೆದರು.

ಇನ್ನು ಪದಾರ್ಪಣೆ ಪಂದ್ಯದಲ್ಲಿ ಮಿಂಚುವಲ್ಲಿ ನಿತೀಶ್ ರಾಣಾ ಹಾಗೂ ಕೃಷ್ಣಪ್ಪ ಗೌತಮ್ ವಿಫಲರಾದರು. ರಾಣಾ 7 ರನ್​ಗಳಿಸಿದರೆ, ಕೆ ಗೌತಮ್ 2 ರನ್​ಗಳಿಸಿ ಧನಂಜಯಗೆ ವಿಕೆಟ್ ಒಪ್ಪಿಸಿದರು. ಇನ್ನು ರಾಹುಲ್ ಚಹರ್ (13) ಹಾಗೂ ನವದೀಪ್ ಸೈನಿ (15) ಒಂದಷ್ಟು ಪ್ರತಿರೋಧ ತೋರಿದರೂ ಲಂಕಾ ಬೌಲರುಗಳ ಪರಾಕ್ರಮದ ಮುಂದೆ ಹೆಚ್ಚು ಹೊತ್ತು ನಿಲ್ಲಲಾಗಲಿಲ್ಲ. ಅಂತಿಮವಾಗಿ ಟೀಮ್ ಇಂಡಿಯಾ 43.1 ಓವರ್​ನಲ್ಲಿ 225 ರನ್​ಗಳಿಗೆ ಸರ್ವಪತನ ಕಂಡಿತು. ಶ್ರೀಲಂಕಾ ಪರ ಅಕಿಲ ಧನಂಜಯ ಹಾಗೂ ಪ್ರವೀಣ್ ಜಯವಿಕ್ರಮ ತಲಾ 3 ವಿಕೆಟ್ ಪಡೆದು ಮಿಂಚಿದರೆ, ಚಮೀರ 2 ವಿಕೆಟ್ ಉರುಳಿಸಿದರು.

ಮಳೆ ಬಂದ ಕಾರಣ ಡಿಆರ್​ಎಸ್ ನಿಯಮದಂತೆ 47 ಓವರ್​ನಲ್ಲಿ 227 ರನ್​ಗಳ ಗುರಿ ಪಡೆದ ಶ್ರೀಲಂಕಾಗೆ ಉತ್ತಮ ಆರಂಭ ಒದಗಿಸುವಲ್ಲಿ ಅವಿಷ್ಕಾ ಫರ್ನಾಂಡೊ ಯಶಸ್ವಿಯಾದರು. ಆರಂಭದಿಂದಲೂ ಟೀಮ್ ಇಂಡಿಯಾ ಬೌಲರುಗಳನ್ನು ನಿರಾಯಾಸವಾಗಿ ಎದುರಿಸಿದ ಅವಿಷ್ಕಾ ಅತ್ಯುತ್ತಮ ಹೊಡೆತಗಳ ಮೂಲಕ ಗಮನ ಸೆಳೆದರು. ಆದರೆ ಇನ್ನೊಂದೆಡೆಯಿದ್ದ ಮಿನೋದ್ ಭನುಕಾ (7) ವಿಕೆಟ್ ಪಡೆಯುವ ಕೃಷ್ಣಪ್ಪ ಗೌತಮ್ ಚೊಚ್ಚಲ ಪಂದ್ಯದಲ್ಲೇ ವಿಕೆಟ್ ಖಾತೆ ತೆರೆದರು. ಈ ಹಂತದಲ್ಲಿ ಅವಿಷ್ಕಾ ಜೊತೆಗೂಡಿದ ಭಾನುಕ ರಾಜಪಕ್ಸ ಶತಕದ ಜೊತೆಯಾಟವಾಡಿದರು.

ಇತ್ತ ವಿಕೆಟ್​ಗಾಗಿ ಪರದಾಡಿದ ಟೀಮ್ ಇಂಡಿಯಾ ವೇಗಿಗಳನ್ನು ಹೆಚ್ಚಿನ ರನ್​ಗಳನ್ನು ಕೂಡ ನೀಡಿದರು. ಪರಿಣಾಮ ಅವಿಷ್ಕಾ ಹಾಗೂ ಭಾನುಕ ಅರ್ಧಶತಕ ಬಾರಿಸಿದರು. 23ನೇ ಓವರ್​ನಲ್ಲಿ ತಂಡದ ಮೊತ್ತ 144 ಆಗಿದ್ದ ವೇಳೆ ಚೇತನ್ ಸಕರಿಯಾ ಎಸೆತದಲ್ಲಿ ಭಾನುಕ ರಾಜಪಕ್ಸ (65) ವಿಕೆಟ್ ಒಪ್ಪಿಸಿ ಹೊರನಡೆದರು. ಇದರ ಬೆನ್ನಲ್ಲೇ ಧನಂಜಯ ಡಿಸಿಲ್ವಾ (2) ವಿಕೆಟ್ ಪಡೆದ ಚೇತನ್ ಸಕರಿಯಾ ಟೀಮ್ ಇಂಡಿಯಾಗೆ 3ನೇ ಯಶಸ್ಸು ತಂದುಕೊಟ್ಟರು. ಇದಾಗ್ಯೂ ಆರಂಭಿಕ ಆಟಗಾರ ಅವಿಷ್ಕಾ ಫರ್ನಾಂಡೊ ಆರ್ಭಟ ಮುಂದುವರೆದಿತ್ತು. ಪರಿಣಾಮ 27 ಓವರ್​ ವೇಳೆಗೆ ಶ್ರೀಲಂಕಾ ತಂಡದ ಮೊತ್ತ 160 ಕ್ಕೆ ಬಂದು ನಿಂತಿತು.

ಇನ್ನು 24 ರನ್ ಬಾರಿಸಿದ ಚರಿತ್ ಅಸಲಂಕಾ ವಿಕೆಟ್ ಪಡೆಯುವ ಮೂಲಕ ಹಾರ್ದಿಕ್ ಪಾಂಡ್ಯ 4ನೇ ಯಶಸ್ಸು ತಂದುಕೊಟ್ಟರು. ಇದರ ಬೆನ್ನಲ್ಲೇ ಶ್ರೀಲಂಕಾ ತಂಡದ ನಾಯಕ ದುಸನ್ ಶನಕಾ ಅವರನ್ನು ಶೂನ್ಯಕ್ಕೆ ಔಟ್ ಮಾಡಿ ರಾಹುಲ್ ಚಹರ್ ತಮ್ಮ ಏಕದಿನ ವಿಕೆಟ್ ಖಾತೆ ತೆರೆದರು. ಇನ್ನೊಂದೆಡೆ ಗಟ್ಟಿಯಾಗಿ ನೆಲೆಯೂರಿದ್ದ ಅವಿಷ್ಕಾ ಫರ್ನಾಂಡೊ ಎಚ್ಚರಿಕೆಯ ಆಟದೊಂದಿಗೆ 34ನೇ ಓವರ್​ನಲ್ಲಿ ತಂಡದ ಮೊತ್ತವನ್ನು 200ರ ಗಡಿದಾಟಿಸಿದರು.

ಉಭಯ ತಂಡಗಳು ಹೀಗಿವೆ (India vs Sri Lanka 3rd ODI Playing 11):

ಶ್ರೀಲಂಕಾ (Sri Lanka Playing 11): ಶ್ರೀಲಂಕಾ (ಇಲೆವೆನ್ ಪ್ಲೇಯಿಂಗ್): ಅವಿಷ್ಕಾ ಫರ್ನಾಂಡೊ, ಮಿನೋಡ್ ಭನುಕಾ (ವಿಕೆಟ್ ಕೀಪರ್), ಭನುಕಾ ರಾಜಪಕ್ಸೆ, ಧನಂಜಯ ಡಿ ಸಿಲ್ವಾ, ಚರಿತ್ ಅಸಲಂಕಾ, ದಾಸುನ್ ಶನಕಾ (ನಾಯಕ), ರಮೇಶ್ ಮೆಂಡಿಸ್, ಚಮಿಕಾ ಕರುಣರತ್ನ, ಅಕಿಲಾ ದಾನಂಜಯ, ಜಯವಿಕ್ರಮ

ಭಾರತ (Team India Playing 11): ಪೃಥ್ವಿ ಶಾ, ಶಿಖರ್ ಧವನ್ (ನಾಯಕ), ಸಂಜು ಸ್ಯಾಮ್ಸನ್ (ವಿಕೆಟ್ ಕೀಪರ್), ಮನೀಶ್ ಪಾಂಡೆ, ಸೂರ್ಯಕುಮಾರ್ ಯಾದವ್, ನಿತೀಶ್ ರಾಣಾ, ಹಾರ್ದಿಕ್ ಪಾಂಡ್ಯ, ಕೃಷ್ಣಪ್ಪ ಗೌತಮ್, ರಾಹುಲ್ ಚಹರ್, ನವದೀಪ್ ಸೈನಿ, ಚೇತನ್ ಸಕರಿಯಾ

ಇದನ್ನೂ ಓದಿ: Rahul Dravid: ಇಡೀ ಪಂದ್ಯದ ಗತಿ ಬದಲಿಸಿದ ರಾಹುಲ್ ದ್ರಾವಿಡ್ ಅವರ ಆ ಒಂದು ನಿರ್ಧಾರ..!

 

ಇದನ್ನೂ ಓದಿ: The Hundred League: ದಿ ಹಂಡ್ರೆಡ್ ಲೀಗ್ ಆಡಲು ತೆರಳಿದ ಆಟಗಾರನಿಗೆ ತಕ್ಷಣವೇ ದೇಶ ತೊರೆಯುವಂತೆ ಸೂಚನೆ..!

 

 

Read Full Article

Click on your DTH Provider to Add TV9 Kannada