IPL 2025: 8, 7, 4, ಮೆಗಾ ಹರಾಜಿಗೆ ಬ್ರೇಕ್: ಐಪಿಎಲ್ ಫ್ರಾಂಚೈಸಿ ಬೇಡಿಕೆಯಿಂದ ಕಂಗೆಟ್ಟ ಬಿಸಿಸಿಐ
IPL 2025: ಬಿಸಿಸಿಐ ಮತ್ತು ಐಪಿಎಲ್ ಮಾಲೀಕರ ಸಭೆಯಲ್ಲಿ ಫ್ರಾಂಚೈಸಿಗಳ ನಡುವೆ ಭಿನ್ನಾಪ್ರಾಯಗಳು ಕಂಡು ಬಂದಿದೆ. ಕೆಲ ಫ್ರಾಂಚೈಸಿಗಳು ಮೆಗಾ ಹರಾಜನ್ನು ಮುಂದುವರೆಸಬೇಕೆಂದು ತಿಳಿಸಿದರೆ, ಮತ್ತೆ ಕೆಲ ತಂಡಗಳ ಮಾಲೀಕರು ಮೆಗಾ ಆಕ್ಷನ್ ಅನ್ನು ರದ್ದುಗೊಳಿಸಬೇಕೆಂದು ಆಗ್ರಹಿಸಿದ್ದಾರೆ. ಇತ್ತ ಮೆಗಾ ಹರಾಜಿಗಾಗಿ ರೂಪುರೇಷೆ ಸಿದ್ಧಪಡಿಸಲು ಬಿಸಿಸಿಐ ಕರೆದ ಸಭೆಯಲ್ಲಿ ಒಮ್ಮತದ ತೀರ್ಮಾನ ಮೂಡಿಬರದಿರುವುದು ಇದೀಗ ಬಿಸಿಸಿಐನ ಚಿಂತೆ ಹೆಚ್ಚಿಸಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್-18ರ ಮೆಗಾ ಹರಾಜಿನ ರೂಪುರೇಷೆಗಳ ಬಗ್ಗೆ ಚರ್ಚಿಸಲು ಬಿಸಿಸಿಐ ಐಪಿಎಲ್ ಫ್ರಾಂಚೈಸಿಗಳೊಂದಿಗೆ ಸಭೆ ನಡೆಸಿದೆ. ಈ ಮುಂಬೈನಲ್ಲಿ ನಡೆದ ಈ ಸಭೆಯಲ್ಲಿ ಮೆಗಾ ಹರಾಜು ಬೇಡವೆಂಬ ಕೂಗುಗಳು ಕೇಳಿ ಬಂದಿರುವುದು ವಿಶೇಷ. ಅಂದರೆ ಮೆಗಾ ಹರಾಜಿನ ಸಿದ್ಧತೆಗಾಗಿ ನಡೆಸಲಾದ ಈ ಮೀಟಿಂಗ್ನಲ್ಲಿ ಬಹುತೇಕ ಫ್ರಾಂಚೈಸಿಗಳು ಮೆಗಾ ಆಕ್ಷನ್ ಅನ್ನು ಕೈ ಬಿಡುವಂತೆ ಬಿಸಿಸಿಐಗೆ ಮನವಿ ಮಾಡಿದೆ.
ಈ ಸಭೆಯಲ್ಲಿ ಮೆಗಾ ಹರಾಜಿನ ಕುರಿತಾದ ಎಲ್ಲಾ ಫ್ರಾಂಚೈಸಿಗಳು ತಮ್ಮ ಅಭಿಪ್ರಾಯಗಳು ಮುಂದಿಟ್ಟಿದ್ದಾರೆ. ಈ ವೇಳೆ ಕೆಲ ಫ್ರಾಂಚೈಸಿಗಳು ಕೆಲ ಬೇಡಿಕೆಗಳನ್ನು ಸಲ್ಲಿಸಿದ್ದು, ಆ ಬೇಡಿಕೆಗಳ ವಿವರಗಳು ಈ ಕೆಳಗಿನಂತಿದೆ…
- ಕೊಲ್ಕತ್ತಾ ನೈಟ್ ರೈಡರ್ಸ್ ಫ್ರಾಂಚೈಸಿಯು ಮೆಗಾ ಹರಾಜು ನಡೆಸುವುದಾದರೆ ಆರ್ಟಿಎಂ ಆಯ್ಕೆಯೊಂದಿಗೆ 8 ಆಟಗಾರರನ್ನು ರಿಟೈನ್ ಮಾಡಲು ಅವಕಾಶ ನೀಡಬೇಕೆಂದು ಕೋರಿದೆ.
- ಪಂಜಾಬ್ ಕಿಂಗ್ಸ್ ಫ್ರಾಂಚೈಸಿಯು ಕೇವಲ 4 ಆಟಗಾರರನ್ನು ಮಾತ್ರ ರಿಟೈನ್ ಮಾಡಲು ಅವಕಾಶ ನೀಡಿದರೆ ಸಾಕು, ಹೆಚ್ಚಿನ ಆಟಗಾರರನ್ನು ಉಳಿಸಿಕೊಳ್ಳಲು ಅವಕಾಶ ನೀಡಬಾರದೆಂದು ತಿಳಿಸಿದೆ.
- ಸನ್ರೈಸರ್ಸ್ ಹೈದರಾಬಾದ್ ಫ್ರಾಂಚೈಸಿಯು ಯಾವುದೇ ನಿಯಮಗಳು ಅನ್ವಯವಾಗದಂತೆ 7 ಆಟಗಾರರನ್ನು ರಿಟೈನ್ ಮಾಡಿಕೊಳ್ಳುವ ಆಯ್ಕೆ ನೀಡಬೇಕೆಂದು ಮನವಿ ಮಾಡಿದೆ.
- ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿಯು ಮುಂಬರುವ ಐಪಿಎಲ್ನಿಂದ ಇಂಪ್ಯಾಕ್ಟ್ ಪ್ಲೇಯರ್ ನಿಯಮವನ್ನು ರದ್ದುಗೊಳಿಸಬೇಕೆಂಬ ಬೇಡಿಕೆಯನ್ನು ಬಿಸಿಸಿಐ ಮುಂದಿಟ್ಟಿದೆ.
- ಬಹುತೇಕ ಫ್ರಾಂಚೈಸಿಗಳು ಮೆಗಾ ಹರಾಜು ನಡೆಸದಂತೆ ಮನವಿ ಮಾಡಿದೆ. ಅಲ್ಲದೆ ಇನ್ಮುಂದೆ ಕೇವಲ ಮಿನಿ ಹರಾಜು ಆಯೋಜಿಸಿದರೆ ಸಾಕು ಎಂಬ ಅಭಿಪ್ರಾಯವನ್ನು ಮುಂದಿಟ್ಟಿದ್ದಾರೆ.
- ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಪಂಜಾಬ್ ಕಿಂಗ್ಸ್ ಮೆಗಾ ಹರಾಜು ಇರಬೇಕೆಂದು ತಿಳಿಸಿದ್ದಾರೆ. ಇದರಿಂದ ತಂಡಗಳ ಬದಲಾವಣೆಯೊಂದಿಗೆ ಐಪಿಎಲ್ ಆಕರ್ಷಕವಾಗಿರಲಿದೆ ಎಂಬ ವಾದವನ್ನು ಮುಂದಿಟ್ಟಿದ್ದಾರೆ.
- ಒಂದು ವೇಳೆ ಮೆಗಾ ಹರಾಜು ಮುಂದುವರೆಸಲು ಬಯಸಿದರೆ, 3 ವರ್ಷಗಳ ಬದಲಿಗೆ 5 ವರ್ಷಗಳಿಗೊಮ್ಮೆ ಆಯೋಜಿಸುವಂತೆ ಎಸ್ಆರ್ಹೆಚ್ ಸೇರಿದಂತೆ ಕೆಲ ಫ್ರಾಂಚೈಸಿಗಳು ಆಗ್ರಹಿಸಿದೆ.
- ಕೆಲ ಫ್ರಾಂಚೈಸಿಗಳು ಹೆಚ್ಚಿನ ಆರ್ಟಿಎಂ ಕಾರ್ಡ್ ಆಯ್ಕೆ ಬಳಸಲು ಅವಕಾಶ ನೀಡಬೇಕೆಂದು ತಿಳಿಸಿದೆ. ಆದರೆ ಪಂಜಾಬ್ ಕಿಂಗ್ಸ್ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ ಫ್ರಾಂಚೈಸಿಗಳು ಹಳೆಯ ಆರ್ಟಿಎಂ ನಿಯಮವನ್ನು ಮುಂದುವರೆಸಬೇಕೆಂದು ಮನವಿ ಮಾಡಿದೆ.
- ಐಪಿಎಲ್ ಹರಾಜು ಮೊತ್ತ ಹೆಚ್ಚಳಕ್ಕೆ ಎಲ್ಲಾ ಫ್ರಾಂಚೈಸಿಗಳು ಸಮ್ಮತಿ ಸೂಚಿಸಿದ್ದಾರೆ. ಹೀಗಾಗಿ ಮೆಗಾ ಆಕ್ಷನ್ನ ಹರಾಜು ಮೊತ್ತ 100 ಕೋಟಿಯಿಂದ 120 ಅಥವಾ 140 ಕೋಟಿ ರೂ.ಗೆ ಏರಿಕೆಯಾಗುವ ಸಾಧ್ಯತೆಯಿದೆ.
- ಬಹುತೇಕ ಫ್ರಾಂಚೈಸಿಗಳು ಮಿನಿ ಹರಾಜಿಗೆ ಆಸಕ್ತಿ ತೋರಿಸಿದ್ದಾರೆ. ಆಟಗಾರರ ರಿಟೈನ್, ಆರ್ಟಿಎಂ ಆಯ್ಕೆಗಳ ಸಮಸ್ಯೆ ಎದುರಾಗುವುದು ಮೆಗಾ ಹರಾಜು ನಡೆಸುವುದರಿಂದ. ಹೀಗಾಗಿ ಪ್ರತಿ ಸೀಸನ್ನಲ್ಲೂ ಮಿನಿ ಹರಾಜು ನಡೆಸುವುದು ಸೂಕ್ತ ಎಂಬ ವಾದವನ್ನು ಮುಂದಿಟ್ಟಿದ್ದಾರೆ.
ಇದನ್ನೂ ಓದಿ: IPL 2025: RTM ಗಾಗಿ ಐಪಿಎಲ್ ಫ್ರಾಂಚೈಸಿಗಳ ಮನವಿ: ಏನಿದು ಆಯ್ಕೆ?
ಒಟ್ಟಿನಲ್ಲಿ ಬಿಸಿಸಿಐ ಪ್ರಧಾನ ಕಚೇರಿಯಲ್ಲಿ ನಡೆದ ಈ ಸಭೆಯಲ್ಲಿ ಫ್ರಾಂಚೈಸಿಗಳ ಕಡೆಯಿಂದ ಒಮ್ಮತದ ಅಭಿಪ್ರಾಯ ಮೂಡಿಬಂದಿಲ್ಲ ಎಂಬುದು ಸ್ಪಷ್ಟ. ಇನ್ನು ಈ ಅಭಿಪ್ರಾಯಗಳಲ್ಲಿ ಬಹುತೇಕ ಫ್ರಾಂಚೈಸಿಗಳು ಮೆಗಾ ಹರಾಜನ್ನು ಕೈ ಬಿಡಬೇಕೆಂದು ಆಗ್ರಹಿಸಿರುವುದೇ ಬಿಸಿಸಿಐ ಪಾಲಿಗೆ ಅಚ್ಚರಿ. ಹೀಗಾಗಿ ಈ ಬಾರಿ ಮೆಗಾ ಹರಾಜಿನ ಹೆಸರಿನಲ್ಲಿ ಮಿನಿ ಹರಾಜು ನಡೆದರೂ ಅಚ್ಚರಿಪಡಬೇಕಿಲ್ಲ.