ಇಂಪ್ಯಾಕ್ಟ್ ಪ್ಲೇಯರ್ ನಿಯಮವನ್ನು ಐಪಿಎಲ್​ನಿಂದ ತೆಗೆದುಹಾಕಿ’; ಟೀಂ ಇಂಡಿಯಾದ ಮಾಜಿ ಕ್ರಿಕೆಟಿಗ

ಐಪಿಎಲ್ 2024 ರ ಹರಾಜು (IPL 2024 Auction) ಡಿಸೆಂಬರ್ 19 ರಿಂದ ದುಬೈನಲ್ಲಿ ನಡೆಯಲಿದೆ. ವಿದೇಶದಲ್ಲಿ ಐಪಿಎಲ್ ಹರಾಜು ನಡೆಯುತ್ತಿರುವುದು ಇದೇ ಮೊದಲು. ಇದಕ್ಕಾಗಿ ಎಲ್ಲಾ ಪ್ರಾಂಚೈಸಿಗಳ ಕೂಡ ಅಂತಿಮ ತಯಾರಿಯಲ್ಲಿವೆ. ಈ ನಡುವೆ ಐಪಿಎಲ್​ನಲ್ಲಿ ಬಳಸುತ್ತಿರುವ ಇಂಪ್ಯಾಕ್ಟ್ ಪ್ಲೇಯರ್ (Impact Player) ನಿಯಮಕ್ಕೆ ವಿರೋಧ ವ್ಯಕ್ತಪಡಿಸಿರುವ ಭಾರತದ ಮಾಜಿ ಕ್ರಿಕೆಟಿಗ ವಾಸಿಂ ಜಾಫರ್ (Wasim Jaffer), ಈ ನಿಯಮವನ್ನು ಮುಂದಿನ ಆವೃತ್ತಿಯಿಂದ ತೆಗೆದುಹಾಕಿ ಎಂದು ಆಗ್ರಹಿಸಿದ್ದಾರೆ. ಈ ನಿಯಮದಿಂದ ಆಗುತ್ತಿರುವ ನಷ್ಟದ ಬಗ್ಗೆ ತಮ್ಮ ಎಕ್ಸ್​ ಖಾತೆಯಲ್ಲಿ ಬರೆದುಕೊಂಡಿರುವ ಜಾಫರ್, ಈ ನಿಯಮದಿಂದಾಗಿ ಆಲ್​ರೌಂಡರ್​ಗಳ ಬಳಕೆ ಕಡಿಮೆಯಾಗುತ್ತಿದೆ. ದೇಶೀಯ ಕ್ರಿಕೆಟ್‌ನಲ್ಲೂ ಈ ನಿಯಮವನ್ನು ಬಳಸುವುದರಿಂದ ಭವಿಷ್ಯದಲ್ಲಿ ಭಾರತಕ್ಕೆ ಉತ್ತಮ ಆಲ್‌ರೌಂಡರ್​ಗಳ ಕೊರತೆ ಎದುರಾಗಲಿದೆ ಎಂದಿದ್ದಾರೆ.

ಇಂಪ್ಯಾಕ್ಟ್ ಪ್ಲೇಯರ್ ನಿಯಮಕ್ಕೆ ವಿರೋಧ

ಈ ಬಗ್ಗೆ ತಮ್ಮ ಎಕ್ಸ್​ ಖಾತೆಯಲ್ಲಿ ಬರೆದುಕೊಂಡಿರುವ ಜಾಫರ್, ಈ ಇಂಪ್ಯಾಕ್ಟ್ ಪ್ಲೇಯರ್ ನಿಯಮದಿಂದ ಆಲ್​ರೌಂಡರ್‌ಗಳನ್ನು ಬೌಲಿಂಗ್​ನಲ್ಲಿ ಹೆಚ್ಚು ಬಳಸಿಕೊಳ್ಳಲಾಗುವುದಿಲ್ಲ. ಹೀಗಾಗಿ ಈ ನಿಯಮವನ್ನು ಐಪಿಎಲ್‌ನಿಂದ ತೆಗೆದುಹಾಕುವ ಅಗತ್ಯವಿದೆ ಎಂದು ನಾನು ಭಾವಿಸುತ್ತೇನೆ. ಈ ನಿಯಮದಿಂದಾಗಿ ಆಲ್‌ರೌಂಡರ್‌ಗಳು ಹೆಚ್ಚು ಬೌಲಿಂಗ್ ಮಾಡದಿರುವುದು ಭಾರತೀಯ ಕ್ರಿಕೆಟ್‌ಗೆ ಮುಂದೆ ಒಂದು ದೊಡ್ಡ ಅಪಾಯ ತಂದೊಡ್ಡಲಿದೆ ಎಂದಿದ್ದಾರೆ.

I think IPL needs to take away the impact player rule, as it’s not encouraging the all rounders to bowl much and lack of ARs and batters not bowling is a major area of concern for Indian cricket. Thoughts? #IPL2024 #iplauction2024

— Wasim Jaffer (@WasimJaffer14) December 10, 2023

ಮೊದಲ ಬಾರಿಗೆ ಎಲ್ಲಿ ಬಳಕೆ?

ವಾಸ್ತವವಾಗಿ ಕಳೆದ ಆವೃತ್ತಿಯಿಂದ ಐಪಿಎಲ್‌ನಲ್ಲಿನ ಬಳಸಲಾಗುತ್ತಿರುವ ಇಂಪ್ಯಾಕ್ಟ್ ಪ್ಲೇಯರ್ ನಿಯಮವನ್ನು ಮೊದಲ ಬಾರಿಗೆ ಆಸ್ಟ್ರೇಲಿಯನ್ ಬಿಗ್ ಬ್ಯಾಷ್ ಲೀಗ್‌ನಿಂದ ಜಾರಿಗೆ ತರಲಾಯಿತು. ಆ ಬಳಿಕ ಭಾರತದ ದೇಶಿ ಪಂದ್ಯಾವಳಿಯಾದ ಸೈಯದ್ ಮುಷ್ತಾಕ್ ಅಲಿ ಟ್ರೋಫಿಯಲ್ಲಿ ಪ್ರಯತ್ನಿಸಲಾಯಿತು. ಆ ನಂತರ ಅಂತಿಮವಾಗಿ ಈ ನಿಯಮವನ್ನು ಐಪಿಎಲ್​ನಲ್ಲಿ ಅಳವಡಿಸಿಕೊಳ್ಳಲಾಯಿತು. ಈ ನಿಯಮದಿಂದಾಗಿ, ಆಲ್‌ರೌಂಡರ್‌ಗಳ ಮೇಲೆ ತಂಡದ ಅವಲಂಬನೆ ಕಡಿಮೆಯಾಗಿದೆ. ಏಕೆಂದರೆ ಈ ನಿಯಮದಿಂದಾಗಿ ತಂಡವು ಸಂದರ್ಭಕ್ಕೆ ತಕ್ಕಂತೆ ತಮಗೆ ಬೇಕಾದ ಆಟಗಾರರನ್ನು (ಒಬ್ಬ ಬೌಲರ್ ಅಥವಾ ಬ್ಯಾಟರ್) ಬಳಸಬಹುದಾಗಿದೆ.

ಈ ಬಾರಿಯ ಐಪಿಎಲ್ ಹರಾಜಿನಲ್ಲಿ ಮಹತ್ವದ ಬದಲಾವಣೆ..!

ಈ ನಿಯಮದ ಪ್ರಕಾರ, ಪಂದ್ಯದ ಪರಿಸ್ಥಿತಿಗೆ ಅನುಗುಣವಾಗಿ ಯಾವುದೇ ತಂಡವು ಆಟದ ಮಧ್ಯದಲ್ಲಿ ಆಟಗಾರನನ್ನು ಬದಲಾಯಿಸಬಹುದಾಗಿದೆ. ಐಪಿಎಲ್ 2023 ರಲ್ಲಿ ತುಷಾರ್ ದೇಶಪಾಂಡೆ ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಮೈದಾನಕ್ಕೆ ಬಂದ ಮೊದಲ ಆಟಗಾರರಾಗಿದ್ದಾರೆ. ಐಪಿಎಲ್​ನ ಆರಂಭಿಕ ಪಂದ್ಯದಲ್ಲಿ ಚೆನ್ನೈ ತಂಡವು, ಗುಜರಾತ್ ಟೈಟಾನ್ಸ್ ವಿರುದ್ಧದ ಈ ಪಂದ್ಯದಲ್ಲಿ ಅಂಬಟಿ ರಾಯುಡು ಬದಲಿಗೆ ತುಷಾರ್ ದೇಶಪಾಂಡೆ ಅವರನ್ನು ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಆಯ್ಕೆ ಮಾಡಿತ್ತು.

ಏನಿದು ಇಂಪ್ಯಾಕ್ಟ್ ಪ್ಲೇಯರ್ ನಿಯಮ?

ಈ ನಿಯಮದ ಪ್ರಕಾರ ಟಾಸ್ ಸಮಯದಲ್ಲಿ, ಆಡುವ ಹನ್ನೊಂದರ ಬಳಗವನ್ನು ಹೊರತುಪಡಿಸಿ ತಂಡದ ನಾಯಕನು ಪಂದ್ಯದ ಸಮಯದಲ್ಲಿ ಬಳಸಲು ಬಯಸುವ ಇನ್ನೂ 5 ಆಟಗಾರರ ಹೆಸರನ್ನು ಮೊದಲೇ ಆಯೋಜಕರಿಗೆ ನೀಡಬೇಕಾಗುತ್ತದೆ. ಈ 5 ಆಟಗಾರರಲ್ಲಿ, ಯಾವುದೇ ಒಬ್ಬ ಆಟಗಾರನನ್ನು ಪಂದ್ಯದ ಮಧ್ಯದಲ್ಲಿ ಮತ್ತೊಬ್ಬ ಆಟಗಾರನ ಬದಲಿಯಾಗಿ ಆಡಿಸಬಹುದಾಗಿದೆ. ಈ ನಿಯಮದಿಂದಾಗಿ 12 ಆಟಗಾರರು ಪಂದ್ಯದಲ್ಲಿ ಆಡಿದಂತ್ತಾಗುತ್ತದೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 9:07 am, Mon, 11 December 23