Liam Livingstone: 10 ಎಸೆತಗಳಲ್ಲಿ 50 ರನ್​: ಅಬ್ಬರಿಸಿದ ಲಿಯಾಮ್ ಲಿವಿಂಗ್​ಸ್ಟೋನ್

T20 Blast: ಇಂಗ್ಲೆಂಡ್​ನಲ್ಲಿ ನಡೆಯುತ್ತಿರುವ ವಿಟಾಲಿಟಿ ಟಿ20 ಬ್ಲಾಸ್ಟ್​ನಲ್ಲಿ ನಡೆದ ಡರ್ಬಿಶೈರ್ ಹಾಗೂ ಲಂಕಾಶೈರ್ ನಡುವಣ ಪಂದ್ಯವು ರಣರೋಚಕ ಹೋರಾಟಕ್ಕೆ ಸಾಕ್ಷಿಯಾಗಿತ್ತು. ಈ ಪಂದ್ಯದಲ್ಲಿ ಟಾಸ್ ಗೆದ್ದ ಲಂಕಾಶೈರ್ ತಂಡವು ಮೊದಲು ಬ್ಯಾಟಿಂಗ್ ಆಯ್ದುಕೊಂಡಿತು. ಅದರಂತೆ ಇನಿಂಗ್ಸ್ ಆರಂಭಿಸಿದ ಲಂಕಾಶೈರ್ ಆರಂಭಿಕರಾದ ಜೆನ್ನಿಂಗ್ಸ್ ಹಾಗೂ ಸಾಲ್ಟ್ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದರು. ಮೊದಲ ವಿಕೆಟ್​ಗೆ 45 ರನ್​ಗಳ ಜೊತೆಯಾಟವಾಡಿ ಈ ಜೋಡಿ ನಿರ್ಗಮಿಸುತ್ತಿದ್ದಂತೆ ಕ್ರೀಸ್​ಗೆ ಎಂಟ್ರಿ ಕೊಟ್ಟಿದ್ದು ಲಿಯಾಮ್ ಲಿವಿಂಗ್​ಸ್ಟೋನ್ (Liam Livingstone).

ಐಪಿಎಲ್​ನಲ್ಲಿ ಪಂಜಾಬ್ ಕಿಂಗ್ಸ್ ಪರ ಅಬ್ಬರಿಸಿ ಬೊಬ್ಬರಿದಿದ್ದ ಲಿವಿಂಗ್​ಸ್ಟೋನ್ ತಮ್ಮ ಅದ್ಭುತ ಫಾರ್ಮ್​ನ್ನು ಟಿ20 ಬ್ಲಾಸ್ಟ್​ ಲೀಗ್​ನಲ್ಲೂ ಮುಂದುವರೆಸಿದ್ದಾರೆ. ಆರಂಭದಿಂದಲೇ ಡರ್ಬಿಶೈರ್​ ಬೌಲರ್​ಗಳ ಬೆಂಡೆತ್ತಿದ ಲಿವಿಂಗ್​ಸ್ಟೋನ್ ಸಿಕ್ಸ್​-ಫೋರ್​ಗಳ ಸುರಿಮಳೆಗೈದರು. ಪರಿಣಾಮ ಕೇವಲ 28 ಎಸೆತಗಳಲ್ಲಿ ಅರ್ಧಶತಕ ಮೂಡಿಬಂತು.

ಹಾಫ್​ ಸೆಂಚುರಿ ಬೆನ್ನಲ್ಲೇ ಬ್ಯಾಟಿಂಗ್ ಅಬ್ಬರ ಮುಂದುವರೆಸಿದ ಲಿವಿಂಗ್​ಸ್ಟೋನ್ 5 ಸಿಕ್ಸ್ ಹಾಗೂ 5 ಫೋರ್​ಗಳನ್ನು ಬಾರಿಸಿದ್ದರು. ಪರಿಣಾಮ 40 ಎಸೆತಗಳಲ್ಲಿ ವೈಯುಕ್ತಿಕ ಮೊತ್ತ 75ಕ್ಕೆ ಬಂದು ನಿಂತಿತು. ವಿಶೇಷ ಎಂದರೆ ಸಿಕ್ಸ್​, ಫೋರ್​ಗಳ ಮೂಲಕವೇ ಲಿವಿಂಗ್​ಸ್ಟೋನ್ ಕೇವಲ 10 ಎಸೆತಗಳಲ್ಲಿ 50 ರನ್​ ಕಲೆಹಾಕಿದ್ದರು. ಈ ಹಂತದಲ್ಲಿ ಲಿವಿಂಗ್​ಸ್ಟೋನ್ ಅವರ ಈ ಸಿಡಿಲಬ್ಬರದ ಬ್ಯಾಟಿಂಗ್​ ಅನ್ನು ತಡೆಯಲು ಕೊನೆಗೂ ಹೇಡನ್ ಕೇರ್ ಯಶಸ್ವಿಯಾದರು. ಅದರಂತೆ ಬಿರುಸಿನ 75 ರನ್​ಗಳಿಸಿ ಲಿವಿಂಗ್​ಸ್ಟೋನ್ ಔಟಾದರು. ಈ ಸ್ಪೋಟಕ ಬ್ಯಾಟಿಂಗ್ ನೆರವಿನಿಂದ ಲಂಕಾಶೈರ್ ತಂಡವು 20 ಓವರ್​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 219 ರನ್​ ಕಲೆಹಾಕಿತು.

220 ರನ್​ಗಳ ಬೃಹತ್ ಟಾರ್ಗೆಟ್ ಬೆನ್ನತ್ತಿದ ಡರ್ಬಿಶೈರ್ ಪರ ಲೂಯಿಸ್ ರೀಸ್ ಅಬ್ಬರಿಸಿದರು. ಆರಂಭಿಕನಾಗಿ ಕಣಕ್ಕಿಳಿದ ರೀಸ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶಿಸಿ ಕೇವಲ 36 ಎಸೆತಗಳಲ್ಲಿ 55 ರನ್ ಬಾರಿಸಿದರು. ಆ ಬಳಿಕ ಬಂದ ಡುಪೊಲಿ ಕೂಡ ಸ್ಪೋಟಕ ಇನಿಂಗ್ಸ್ ಆಡಿದರು. 3 ಸಿಕ್ಸ್ ಹಾಗೂ 3 ಫೋರ್​ಗಳನ್ನು ಒಳಗೊಂಡಂತೆ ಕೇವಲ 31 ಎಸೆತಗಳಲ್ಲಿ 59 ರನ್​ ಬಾರಿಸಿದ ಡುಪೊಲಿ ತಂಡವನ್ನು ಜಯದತ್ತ ಕೊಂಡೊಯ್ದರು.

ಆದರೆ ಅಂತಿಮ ಹಂತದಲ್ಲಿ ಲಂಕಾಶೈರ್ ಅತ್ಯುತ್ತಮ ಬೌಲಿಂಗ್ ಮೂಲಕ ಡರ್ಬಿಶೈರ್ ತಂಡವನ್ನು 202 ರನ್​ಗೆ ನಿಯಂತ್ರಿಸಿದರು. ಪರಿಣಾಮ ಲಂಕಾಶೈರ್ ತಂಡವು 17 ರನ್​ಗಳಿಂದ ಜಯ ಸಾಧಿಸಿತು.

ಕ್ರಿಕೆಟ್​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.