‘ನಾನು ಮಗುವಲ್ಲ’; ತನ್ನ ವಿರುದ್ಧ ಪಿತೂರಿ ಮಾಡಿದ ಸಹ ಆಟಗಾರರ ವಿರುದ್ಧ ಮುನಿದ ಬಾಬರ್..!

ಟಿ20 ವಿಶ್ವಕಪ್ (T20 World Cup 2024) ಗ್ರೂಪ್ ಹಂತದಲ್ಲಿ ಪಾಕಿಸ್ತಾನ ತಂಡದ (Pakistan Team) ಪಯಣ ಅಂತ್ಯಗೊಂಡಿದೆ. 2022 ರಲ್ಲಿ ಫೈನಲ್ ಆಡಿದ್ದ ಬಾಬರ್ ಪಡೆಗೆ ಈ ಬಾರಿ ಸೂಪರ್ -8 ತಲುಪಲು ಸಾಧ್ಯವಾಗಲಿಲ್ಲ. ಮೊದಲು ಅಮೆರಿಕ ವಿರುದ್ಧ ಮಣಿದಿದ್ದ ಪಾಕ್ ತಂಡ ಆ ಬಳಿಕ ಭಾರತದ ವಿರುದ್ಧ ಸೋತು ಸಾಕಷ್ಟು ಅವಮಾನಕ್ಕೊಳಗಾಯಿತು. ಆ ನಂತರ ಟೂರ್ನಿಯಿಂದಲೇ ಹೊರಬಿದ್ದಿತ್ತು. ಇದೀಗ ತಂಡದೊಳಗೆ ವಿವಾದಗಳ ಸರಣಿ ಶುರುವಾಗಿದೆ. ಮೊದಲು ತಂಡದ ಕಳಪೆ ಪ್ರದರ್ಶನದ ಬಗ್ಗೆ ಮಾಜಿ ಆಟಗಾರರು ಅಸಮಾಧಾನ ಹೊರಹಾಕಿದ್ದರು. ಆ ಬಳಿಕ ತಂಡದ ಮುಖ್ಯ ಕೋಚ್ ಗ್ಯಾರಿ ಕರ್ಸ್ಟನ್ ಪಾಕಿಸ್ತಾನಿ ತಂಡವನ್ನು ಟೀಕಿಸಿದ್ದರು. ಇದೇ ವೇಳೆ ತಂಡದೊಳಗಿರುವ ಒಡಕಿನ ಬಗ್ಗೆ ಮಾತನಾಡಿದ್ದರು. ಇದೆಲ್ಲದರ ಹೊರತಾಗಿ ಇದೀಗ ತಂಡದ ನಾಯಕ ಬಾಬರ್ ಆಝಂ (Babar Azam) ಅವರೇ ತನ್ನ ವಿರುದ್ಧ ಪಿತೂರಿ ನಡೆಸಿದ್ದ ಆಟಗಾರರ ಮೇಲೆ ಹರಿಹಾಯ್ದಿದ್ದಾರೆ ಎಂದು ವರದಿಯಾಗಿದೆ.

ನಾನು ಮಗುವಲ್ಲ; ಬಾಬರ್

ಪಾಕ್ ಟಿವಿ ಚಾನೆಲ್‌ನ ವರದಿ ಪ್ರಕಾರ, ಟಿ20 ವಿಶ್ವಕಪ್‌ನ ಪಾಕ್ ತಂಡದ ಕೊನೆಯ ಪಂದ್ಯದ ನಂತರ ತಂಡದ ಸಭೆ ನಡೆದಿದೆ. ಈ ಸಭೆಯಲ್ಲಿ ಭಾಗಿಯಾಗಿದ್ದ ಆಯ್ಕೆಗಾರ ವಹಾಬ್ ರಿಯಾಜ್, ಕೋಚ್ ಗ್ಯಾರಿ ಕರ್ಸ್ಟನ್ ಮತ್ತು ನಾಯಕ ಬಾಬರ್ ಆಝಂ ತಂಡದ ಪ್ರದರ್ಶನದ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದರು. ಈ ವೇಳೆ ಮುಖ್ಯ ಕೋಚ್ ಗ್ಯಾರಿ ಕರ್ಸ್ಟನ್ ತಂಡದಲ್ಲಿರುವ ಒಡಕ್ಕಿನ ಬಗ್ಗೆ ಮಾತನಾಡಿದ್ದರು. ಈ ಸಭೆ ಮುಗಿದ ನಂತರ, ತಂಡದ ಆಟಗಾರರನ್ನು ಭೇಟಿ ಮಾಡಿದ್ದ ಬಾಬರ್, ‘ನಾನು ಮಗುವಲ್ಲ. ನನ್ನ ಹಿಂದೆ ಏನು ನಡೆಯುತ್ತಿದೆ ಎಂಬುದರ ಬಗ್ಗೆ ನನಗೆ ಅರಿವಿದೆ ಎಂದು ಹೇಳಿದ್ದಾರೆ ಎಂದು ವರದಿ ಮಾಡಿದ್ದಾರೆ.

ಬಾಬರ್ ವಿರುದ್ಧ ಮ್ಯಾಚ್ ಫಿಕ್ಸಿಂಗ್ ಆರೋಪ

ಟಿ20 ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ತಂಡದ ಹೀನಾಯ ಪ್ರದರ್ಶನದ ಬಳಿಕ ಪಾಕಿಸ್ತಾನದ ಯೂಟ್ಯೂಬರ್ ಮುಬಾಶಿರ್ ಲುಕ್ಮಾನ್ ಬಾಬರ್ ವಿರುದ್ಧ ಫಿಕ್ಸಿಂಗ್ ಆರೋಪ ಹೊರಿಸಿದ್ದರು. ಅವರು, ಪಾಕಿಸ್ತಾನದ ನಾಯಕ ಬಾಬರ್ ದುಬೈನಲ್ಲಿ ಫ್ಲಾಟ್ ಮತ್ತು ಅಮೆರಿಕದಲ್ಲಿ ಪ್ಲಾಟ್ ತೆಗೆದುಕೊಂಡಿದ್ದಾರೆ. ಅಲ್ಲದೆ ಬಾಬರ್ ಇತ್ತೀಚೆಗಷ್ಟೇ 8 ಕೋಟಿ ರೂಪಾಯಿ ಮೌಲ್ಯದ ದುಬಾರಿ ಕಾರನ್ನು ಖರೀದಿಸಿದ್ದಾರೆ. ಇದಕ್ಕೆ ಹಣ ಎಲ್ಲಿಂದ ಬಂತು ಎಂದು ಪ್ರಶ್ನಿಸಿದ್ದರು. ಆದಾಗ್ಯೂ, ಪಾಕಿಸ್ತಾನಿ ಕ್ರೀಡಾ ಪತ್ರಕರ್ತರು ಈ ಆರೋಪವನ್ನು ಆಧಾರರಹಿತ ಎಂದು ಕರೆದಿದ್ದು, ಪಿಸಿಬಿಯಿಂದ ಕ್ರಮಕ್ಕೆ ಒತ್ತಾಯಿಸಿದ್ದಾರೆ.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 7:54 pm, Fri, 21 June 24