Ranji Trophy 2022: ರಣಜಿ ಟ್ರೋಫಿಯ ಸೆಮಿ ಫೈನಲ್​ಗೆ ಬಲಿಷ್ಠ 4 ತಂಡಗಳ ಎಂಟ್ರಿ

ದೇಶೀಯ ಅಂಗಳದ ಕ್ರಿಕೆಟ್​ ಟೂರ್ನಿ ರಣಜಿ ಟ್ರೋಫಿ 2022ರ ಸೀಸನ್​ ಅಂತಿಮ ಹಂತಕ್ಕೆ ಬಂದು ನಿಂತಿದೆ. ಈಗಾಗಲೇ ಕ್ವಾರ್ಟರ್​ ಫೈನಲ್​ ಹಂತವು ಮುಗಿದಿದ್ದು, ಅದರಂತೆ ನಾಲ್ಕು ತಂಡಗಳು ಸೆಮಿಫೈನಲ್​ಗೆ ಪ್ರವೇಶಿಸಿದೆ. ಬೆಂಗಳೂರಿನ ಆಲೂರಿನ ಕೆಎಸ್​ಸಿಎ ಕ್ರಿಕೆಟ್ ಮೈದಾನದಲ್ಲಿ ನಡೆದ ಮೊದಲ ಕ್ವಾರ್ಟರ್​ ಫೈನಲ್​ನಲ್ಲಿ ಬೆಂಗಾಲ್ ತಂಡವು ಜಾರ್ಖಂಡ್ ವಿರುದ್ದ ಡ್ರಾ ಸಾಧಿಸಿ ಸೆಮಿಫೈನಲ್​ಗೆ ಎಂಟ್ರಿ ಕೊಟ್ಟಿದೆ. ಇನ್ನು 2ನೇ ಕ್ವಾರ್ಟರ್​ ಫೈನಲ್​ನಲ್ಲಿ ಉತ್ತರಾಖಂಡ್ ವಿರುದ್ದ ಮುಂಬೈ ತಂಡವು 725 ರನ್​ಗಳ ದಾಖಲೆಯ ಜಯ ಸಾಧಿಸಿ ಸೆಮೀಸ್​ಗೆ ಅರ್ಹತೆ ಪಡೆದುಕೊಂಡಿದೆ. ಹಾಗೆಯೇ ಮೂರನೇ ಸೆಮಿಫೈನಲ್​ನಲ್ಲಿ ಕರ್ನಾಟಕ ತಂಡವನ್ನು 5 ವಿಕೆಟ್​ಗಳಿಂದ ಮಣಿಸಿ ಉತ್ತರ ಪ್ರದೇಶ ತಂಡವು ನಿರ್ಣಾಯಕ ಹಂತಕ್ಕೇರಿದೆ. ನಾಲ್ಕನೇ ಸೆಮೀಸ್​ನಲ್ಲಿ ಪಂಜಾಬ್ ವಿರುದ್ದ 10 ವಿಕೆಟ್​ಗಳ ಭರ್ಜರಿ ಜಯ ಸಾಧಿಸಿರುವ ಮಧ್ಯಪ್ರದೇಶ ತಂಡವು ಈ ಬಾರಿ ಸೆಮಿಫೈನಲ್​ ಆಡಲಿದೆ.

ಸೆಮಿ ಫೈನಲ್ ಪಂದ್ಯವಾಳಿಯು ಜೂನ್ 14 ರಿಂದ ಶುರುವಾಗಲಿದ್ದು, ಮೊದಲ ಪಂದ್ಯದಲ್ಲಿ ಬಲಿಷ್ಠ ಬೆಂಗಾಲ್ ಹಾಗೂ ಮಧ್ಯಪ್ರದೇಶ ತಂಡಗಳು ಮುಖಾಮುಖಿಯಾಗಲಿದೆ. ಇನ್ನು 2ನೇ ಸೆಮಿ ಫೈನಲ್​ನಲ್ಲಿ ಮುಂಬೈ ತಂಡವು ಉತ್ತರ ಪ್ರದೇಶ ತಂಡವನ್ನು ಎದುರಿಸಲಿದೆ. ಈ ಎಲ್ಲಾ ಪಂದ್ಯಗಳು ಆಲೂರಿನ ಕ್ರಿಕೆಟ್​ ಮೈದಾನದಲ್ಲೇ ನಡೆಯಲಿರುವುದು ವಿಶೇಷ.

ಆದರೆ ಈ ಬಾರಿ ಬಲಿಷ್ಠ ತಂಡವಾಗಿ ಗುರುತಿಸಿಕೊಂಡಿದ್ದ ಮನೀಶ್ ಪಾಂಡೆ ನೇತೃತ್ವದ ಕರ್ನಾಟಕ ತಂಡವು ಕ್ವಾರ್ಟರ್​ ಫೈನಲ್​ನಲ್ಲಿ ಉತ್ತರ ಪ್ರದೇಶದ ವಿರುದ್ದ ಮುಗ್ಗರಿಸುವ ಮೂಲಕ ತವರಿನಲ್ಲಿ ಪ್ರಶಸ್ತಿ ಗೆಲ್ಲುವ ಅವಕಾಶವನ್ನು ಕೈತಪ್ಪಿಸಿಕೊಂಡಿದೆ. ಏಕೆಂದರೆ ಈ ಬಾರಿಯ ಫೈನಲ್ ಪಂದ್ಯವು ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆಯಲಿದ್ದು, ಹೀಗಾಗಿ ತವರಿನ ಪಿಚ್​ನ ಸಂಪೂರ್ಣ ಲಾಭ ಪಡೆದುಕೊಳ್ಳುವ ಅವಕಾಶ ಕರ್ನಾಟಕ ತಂಡದ ಆಟಗಾರರಿಗಿತ್ತು. ಆದರೆ ಕ್ವಾರ್ಟರ್​ ಫೈನಲ್​ನಲ್ಲಿ ಬ್ಯಾಟ್ಸ್​ಮನ್​ಗಳ ಕಳಪೆ ಪ್ರದರ್ಶನದಿಂದಾಗಿ ಉತ್ತರ ಪ್ರದೇಶ ವಿರುದ್ದ 5 ವಿಕೆಟ್​ಗಳ ಹೀನಾಯ ಸೋಲನುಭವಿಸಿತು.

ಸದ್ಯ ಸೆಮಿ ಫೈನಲ್​ಗೇರಿರುವ ನಾಲ್ಕು ತಂಡಗಳು ಟೂರ್ನಿಯುದ್ದಕ್ಕೂ ಭರ್ಜರಿ ಪ್ರದರ್ಶನ ನೀಡುತ್ತಾ ಬಂದಿದ್ದು, ಹೀಗಾಗಿ ನಿರ್ಣಾಯಕ ಹಂತದ ಹೋರಾಟದಲ್ಲಿ ರೋಚಕತೆಯನ್ನು ನಿರೀಕ್ಷಿಸಬಹುದು.

ರಣಜಿ ಟ್ರೋಫಿ ಸೆಮಿ ಫೈನಲ್ ವೇಳಾಪಟ್ಟಿ:

1. ಜೂನ್ 14 ರಿಂದ 18 (ಮೊದಲ ಸೆಮಿಫೈನಲ್​)- ಬೆಂಗಾಲ್ vs ಮಧ್ಯಪ್ರದೇಶ- (ಕೆಎಸ್​ಸಿಎ ಕ್ರಿಕೆಟ್ ಮೈದಾನ- ಆಲೂರು)
2. ಜೂನ್ 14 ರಿಂದ 18 (ಎರಡನೇ ಸೆಮಿಫೈನಲ್​)- ಮುಂಬೈ vs ಉತ್ತರಪ್ರದೇಶ- ( ಜಸ್ಟ್​ ಕ್ರಿಕೆಟ್ ಅಕಾಡೆಮಿ ಮೈದಾನ- ಬೆಂಗಳೂರು)
3. ಜೂನ್ 22 ರಿಂದ 26- ಫೈನಲ್​: ಚಿನ್ನಸ್ವಾಮಿ ಸ್ಟೇಡಿಯಂ – ಬೆಂಗಳೂರು

ಕ್ರಿಕೆಟ್​ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.