IPL 2022: ವಿಶ್ವದ ಅತ್ಯಂತ ಜನಪ್ರಿಯ ಕ್ರೀಡಾ ತಂಡಗಳ ಪಟ್ಟಿಯಲ್ಲಿ ಐಪಿಎಲ್​ನ ಎರಡು ಟೀಮ್..!

ವಿಶ್ವದ ಅತ್ಯಂತ ಜನಪ್ರಿಯ ಕ್ರೀಡೆ ಯಾವುದೆಂದು ಕೇಳಿದ್ರೆ ಥಟ್ಟನೆ ಬರುವ ಉತ್ತರ ಫುಟ್​ಬಾಲ್. ಇದಾಗ್ಯೂ ಏಷ್ಯಾ ಖಂಡದಲ್ಲಿ ಕ್ರಿಕೆಟ್​ ಅತ್ಯಂತ ನೆಚ್ಚಿನ ಕ್ರೀಡೆಯಾಗಿ ಮಾರ್ಪಟ್ಟಿದೆ. ಇದೀಗ ಕ್ರಿಕೆಟ್​ನಲ್ಲಿ ಐಪಿಎಲ್​ನಂತಹ ರಂಜಿತ ಟೂರ್ನಿ ಸೇರ್ಪಡೆಯಾಗಿರುವುದು ಇದರ ಜನಪ್ರಿಯತೆಯನ್ನು ಮತ್ತಷ್ಟು ಹೆಚ್ಚಿಸಿದೆ. ಇದೀಗ ಜನಪ್ರಿಯತೆಯ ಫಲವಾಗಿ ಸೋಷಿಯಲ್​ ಮೀಡಿಯಾದಲ್ಲಿ ವಿಶ್ವದ ಅತ್ಯಂತ ಜನಪ್ರಿಯ ತಂಡಗಳ ಟಾಪ್​ ಪಟ್ಟಿಯಲ್ಲಿ ಇದೀಗ ಐಪಿಎಲ್​ನ​ ತಂಡಗಳು ಕೂಡ ಕಾಣಿಸಿಕೊಂಡಿದೆ.

ಜನವರಿ 1 ರಿಂದ ಡಿಸೆಂಬರ್ 31 ರ ಅವಧಿಯಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಅತೀ ಹೆಚ್ಚು ಎಂಗೇಜ್​ಮೆಂಟ್ ಹೊಂದಿದ್ದ ತಂಡಗಳ ಪೈಕಿ ಇಂಗ್ಲೆಂಡ್​ನ ಫುಟ್​ಬಾಲ್ ಕ್ಲಬ್ ಮ್ಯಾಂಚೆಸ್ಟರ್ ಯುನೈಟೆಡ್ ತಂಡವು 2.6 ಬಿಲಿಯನ್ ಎಂಗೇಜ್‌ಮೆಂಟ್‌ಗಳೊಂದಿಗೆ ನಂಬರ್ 1 ಸ್ಥಾನವನ್ನು ಅಲಂಕರಿಸಿದೆ. 2ನೇ ಸ್ಥಾನದಲ್ಲಿ ಬಾರ್ಸಿಲೋನಾ ಫುಟ್​ಬಾಲ್​ ಕ್ಲಬ್, 3ನೇ ಸ್ಥಾನದಲ್ಲಿ ರಿಯಲ್ ಮ್ಯಾಡ್ರಿಡ್ ಫುಟ್​ಬಾಲ್​ ಕ್ಲಬ್, 4ನೇ ಸ್ಥಾನದಲ್ಲಿ ಪ್ಯಾರಿಸ್ ಸೇಂಟ್ ಜರ್ಮೈನ್ ಫುಟ್​ಬಾಲ್​ ಕ್ಲಬ್ ಮತ್ತು 5ನೇ ಸ್ಥಾನದಲ್ಲಿ ಚೆಲ್ಸಿ ಫುಟ್​ಬಾಲ್​ ಕ್ಲಬ್ ತಂಡಗಳಿವೆ.

6ನೇ ಸ್ಥಾನದಲ್ಲಿ ಲಿವರ್​ಪೂಲ್ ಫುಟ್​ಬಾಲ್​ ಕ್ಲಬ್ ಇದ್ದರೆ, 7ನೇ ಸ್ಥಾನವನ್ನು ಗಲಾಟಸಾರೆ ಫುಟ್​ಬಾಲ್ ಕ್ಲಬ್ ಅಲಂಕರಿಸಿದೆ. ಇನ್ನು 8ನೇ ಸ್ಥಾನದಲ್ಲಿ 82 ಕೋಟಿ ಎಂಗೇಜ್​ಮೆಂಟ್​ನೊಂದಿಗೆ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡ ಇರುವುದು ವಿಶೇಷ. ಹಾಗೆಯೇ 9ನೇ ಸ್ಥಾನವನ್ನು 75.2 ಕೋಟಿ ಎಂಗೇಜ್​ಮೆಂಟ್​ನೊಂದಿಗೆ ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಅಲಂಕರಿಸಿದೆ. 10ನೇ ಸ್ಥಾನವನ್ನು ಫ್ಲಮೆಂಗೊ ಫುಟ್​ಬಾಲ್ ಕ್ಲಬ್ ಪಡೆದುಕೊಂಡಿದೆ.

ಅಂದರೆ ಇಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಕಳೆದ ವರ್ಷ ಅತೀ ಹೆಚ್ಚು ಎಂಗೇಜ್​ಮೆಂಟ್​ನಲ್ಲಿದ್ದ ಟಾಪ್ 10 ತಂಡಗಳ ಪೈಕಿ 8 ತಂಡಗಳು ಫುಟ್​ಬಾಲ್​ ಟೀಮ್​ಗಳು ಎಂಬುದು ವಿಶೇಷ. ಇದಾಗ್ಯೂ ಈ ಪಟ್ಟಿಯಲ್ಲಿ ಆರ್​ಸಿಬಿ ಹಾಗೂ ಸಿಎಸ್​ಕೆ ಎಂಟ್ರಿ ಕೊಡುವ ಮೂಲಕ ವಿಶ್ವದ ಅತ್ಯಂತ ಜನಪ್ರಿಯ ಕ್ರೀಡಾ ತಂಡಗಳಾಗಿ ಗುರುತಿಸಿಕೊಂಡಿದೆ.

ಇನ್ನು ಕಳೆದ ವರ್ಷ ಯುಟ್ಯೂಬ್​ನಲ್ಲಿನ ಅತ್ಯಂತ ಜನಪ್ರಿಯ ಟಾಪ್ ಕ್ರೀಡಾ ತಂಡಗಳಲ್ಲಿ ಸಿಎಸ್​ಕೆ ಹಾಗೂ ಆರ್​ಸಿಬಿ ಕಾಣಿಸಿಕೊಂಡಿತ್ತು ಎಂಬುದು ಇಲ್ಲಿ ಮತ್ತೊಂದು ವಿಶೇಷ. ಈ ಪಟ್ಟಿಯಲ್ಲೂ ಫುಟ್​ಬಾಲ್​ ತಂಡಗಳೇ ಮುಂಚೂಣಿಯಲ್ಲಿದ್ದು ಬಾರ್ಸಿಲೋನಾ ಅಗ್ರಸ್ಥಾನವನ್ನು ಹೊಂದಿದ್ದರೆ, ಮ್ಯಾಂಚೆಸ್ಟರ್ ಯುನೈಟೆಡ್ 2ನೇ ಸ್ಥಾನದಲ್ಲಿದೆ. ಇನ್ನು ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ಈ ಪಟ್ಟಿಯಲ್ಲಿ 7ನೇ ಸ್ಥಾನ ಅಲಂಕರಿಸುವ ಮೂಲಕ ಗಮನ ಸೆಳೆದಿದೆ. ಹಾಗೆಯೇ ಟಾಪ್ 10ನ ಕೊನೆಯ ಸ್ಥಾನದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್​ ಕೂಡ ಕಾಣಿಸಿಕೊಂಡಿದೆ. ಈ ಮೂಲಕ ಐಪಿಎಲ್​ ಎರಡು ತಂಡಗಳು ವಿಶ್ವದ ಜನಪ್ರಿಯ ಕ್ರೀಡಾ ತಂಡಗಳಾಗಿ ಗುರುತಿಸಿಕೊಳ್ಳುತ್ತಿರುವುದು ವಿಶೇಷ.

ಇದನ್ನೂ ಓದಿ: IPL 2022: ಮತ್ತೆ RCB ಪರ ಆಡಬೇಕೆಂದ ಸ್ಟಾರ್ ಬೌಲರ್

ಇದನ್ನೂ ಓದಿ:  Sachin Tendulkar: ಆಲ್‌ ಟೈಮ್ ಬೆಸ್ಟ್‌ 11 ಹೆಸರಿಸಿದ ಸಚಿನ್: ಪ್ರಮುಖ ಆಟಗಾರರಿಗಿಲ್ಲ ಸ್ಥಾನ

ಇದನ್ನೂ ಓದಿ: IPL 2022 Mega Auction: ಐಪಿಎಲ್ ಮೆಗಾ ಹರಾಜು ಡೇಟ್ ಫಿಕ್ಸ್..!

ಇದನ್ನೂ ಓದಿ: IPL 2022: ಅಹಮದಾಬಾದ್ ತಂಡಕ್ಕೆ ಟೀಮ್ ಇಂಡಿಯಾ ಮಾಜಿ ಆಟಗಾರ ಕೋಚ್..!

(RCB, CSK now in top 10 most popular teams on social media in the world)