Test Records: ಟೆಸ್ಟ್​ನಲ್ಲಿ ಶತಕ ಬಾರಿಸದೇ ಅತೀ ಹೆಚ್ಚು ರನ್ ಕಲೆಹಾಕಿದ ಬ್ಯಾಟರ್ ಯಾರು ಗೊತ್ತಾ?

ಟೆಸ್ಟ್ (Test Cricket) ಎಂಬುದು ಕ್ರಿಕೆಟ್​ನ ಜೀವಾಳ ಎಂದರೆ ತಪ್ಪಾಗಲಾರದು. ಏಕೆಂದರೆ ಟೆಸ್ಟ್​​ನಿಂದ ಆರಂಭವಾದ ಕ್ರಿಕೆಟ್ ಇಂದು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಮೂರು ಸ್ವರೂಪಗಳನ್ನು ಪಡೆದುಕೊಂಡಿದೆ. ಇದಾಗ್ಯೂ ತನ್ನ ಹಳೆಯ ಖದರ್ ಉಳಿಸುವಲ್ಲಿ ಟೆಸ್ಟ್​ ಕ್ರಿಕೆಟ್ ಯಶಸ್ವಿಯಾಗಿದೆ. ಹೀಗಾಗಿಯೇ ಇಂದಿಗೂ ಟೆಸ್ಟ್ ತಂಡದಲ್ಲಿ ಸ್ಥಾನ ಪಡೆಯಲು ಯುವ ಆಟಗಾರರು ಹಾತೊರೆಯುತ್ತಾರೆ.

ಏಕೆಂದರೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಬ್ಯಾಟರ್​ನ ಸಂಯಮವನ್ನು ಪರೀಕ್ಷಿಸಲಾಗುತ್ತದೆ. ಹೀಗೆ ತಾಳ್ಮೆಯಿಂದ ಕ್ರೀಸ್ ಕಚ್ಚಿ ನಿಂತರೆ ಮಾತ್ರ ಟೆಸ್ಟ್​ನಲ್ಲಿ ಸಫಲರಾಗಬಹುದು. ಇಂತಹದೊಂದು ತಾಳ್ಮೆಯಿಂದಲೇ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್​ ಟೆಸ್ಟ್​ನಲ್ಲಿ 51 ಶತಕ ಸಿಡಿಸಿರುವುದು. ಅಷ್ಟೇ ಅಲ್ಲದೆ ಇದೇ ವೇಳೆ 15921 ರನ್ ಕಲೆಹಾಕಿ ವಿಶ್ವ ದಾಖಲೆಯನ್ನು ನಿರ್ಮಿಸಿದ್ದಾರೆ.

ಆದರೆ ಕೆಲ ಆಟಗಾರರಿದ್ದಾರೆ, ಅವರು ಟೆಸ್ಟ್​ ಕ್ರಿಕೆಟ್​ನಲ್ಲಿ ಮಿಂಚಿದರೂ ಒಂದೇ ಒಂದು ಶತಕ ಬಾರಿಸಲು ಸಾಧ್ಯವಾಗಿಲ್ಲ. ಹೀಗೆ ಟೆಸ್ಟ್ ಕ್ರಿಕೆಟ್​​ನಲ್ಲಿ ಶತಕ ಸಿಡಿಸದೇ ಹೆಚ್ಚು ರನ್​ಗಳಿಸಿದ ಆಟಗಾರರು ಯಾರು ಎಂದು ನೋಡಿದ್ರೆ ಮೂವರ ಹೆಸರು ಕಾಣಿಸುತ್ತದೆ. ಆ ಆಟಗಾರರ ಕಿರು ಪರಿಚಯ ಇಲ್ಲಿದೆ…

• 3. ಚೇತನ್ ಚೌಹಾಣ್ (ಭಾರತ): ಭಾರತ ತಂಡದ ಮಾಜಿ ಆಟಗಾರ ಚೇತನ್ ಚೌಹಾಣ್ 1969 ರಿಂದ 1981 ರವರೆಗೆ ಒಟ್ಟು 40 ಟೆಸ್ಟ್ ಪಂದ್ಯಗಳನ್ನು ಆಡಿದ್ದಾರೆ. ಈ ವೇಳೆ ಒಟ್ಟು 2084 ರನ್ ಕಲೆಹಾಕಿದ್ದಾರೆ. ವಿಶೇಷ ಎಂದರೆ 40 ಟೆಸ್ಟ್​ ಪಂದ್ಯಗಳಿಂದ 16 ಅರ್ಧಶತಕಗಳನ್ನು ಬಾರಿಸಿದರೂ ಚೇತನ್ ಚೌಹಾಣ್ ಬ್ಯಾಟ್​ನಿಂದ ಒಂದೇ ಒಂದು ಸೆಂಚುರಿ ಮೂಡಿಬಂದಿಲ್ಲ. ಒಮ್ಮೆ 97 ರನ್​ಗಳಿಸಿ ಕೇವಲ 3 ರನ್​ಗಳಿಂದ ಶತಕ ವಂಚಿತರಾಗಿದ್ದರು.
• 2. ನಿರೋಶನ್ ಡಿಕ್ವೆಲ್ಲಾ (ಶ್ರೀಲಂಕಾ): ಶ್ರೀಲಂಕಾದ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ನಿರೋಶನ್ ಡಿಕ್ವೆಲ್ಲಾ ಈ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಅವರು ತಮ್ಮ ಟೆಸ್ಟ್ ವೃತ್ತಿಜೀವನದಲ್ಲಿ ಇದುವರೆಗೆ 53 ಪಂದ್ಯಗಳನ್ನು ಆಡಿದ್ದಾರೆ. ಈ ವೇಳೆ 94 ಇನ್ನಿಂಗ್ಸ್‌ಗಳಲ್ಲಿ ಬ್ಯಾಟ್ ಬೀಸಿರುವ ನಿರೋಶನ್ 31.60 ಸರಾಸರಿಯಲ್ಲಿ 2750 ರನ್ ಗಳಿಸಿದ್ದಾರೆ. ಇದರ ನಡುವೆ ಒಟ್ಟು 22 ಅರ್ಧಶತಕಳನ್ನು ಬಾರಿಸಿದ್ದಾರೆ. ಇದಾಗ್ಯೂ ಸೆಂಚುರಿ ಮಾತ್ರ ಮೂಡಿಬಂದಿಲ್ಲ. ಸದ್ಯ ಶ್ರೀಲಂಕಾ ತಂಡದ ಭಾಗವಾಗಿರುವ ನಿರೋಶನ್ ಅವರು 2024 ರಲ್ಲಿ ಶತಕ ಬಾರಿಸಲಿದ್ದಾರಾ ಕಾದು ನೋಡಬೇಕಿದೆ.
• 1. ಶೇನ್ ವಾರ್ನ್ (ಆಸ್ಟ್ರೇಲಿಯಾ): ಟೆಸ್ಟ್​ ಕ್ರಿಕೆಟ್​ನಲ್ಲಿ ಶತಕ ಬಾರಿಸದೇ ಅತೀ ಹೆಚ್ಚು ರನ್ ಕಲೆಹಾಕಿದ ವಿಶ್ವ ದಾಖಲೆ ಸ್ಪಿನ್ ಮಾಂತ್ರಿಕ ಶೇನ್ ವಾರ್ನ್​ ಹೆಸರಿನಲ್ಲಿದೆ. ವಾರ್ನ್ 145 ಟೆಸ್ಟ್​ ಪಂದ್ಯಗಳಲ್ಲಿ 199 ಇನ್ನಿಂಗ್ಸ್‌ಗಳಲ್ಲಿ ಬ್ಯಾಟ್ ಬೀಸಿದ್ದಾರೆ. ಈ ವೇಳೆ 12 ಅರ್ಧಶತಕಗಳನ್ನು ಬಾರಿಸಿದರೂ ಅವರ ಬ್ಯಾಟ್​ನಿಂದ ಸೆಂಚುರಿ ಮಾತ್ರ ಮೂಡಿಬಂದಿಲ್ಲ. ಒಮ್ಮೆ 99 ರನ್​ ಬಾರಿಸಿ ಕೇವಲ 1 ರನ್​ನಿಂದ ಶತಕ ವಂಚಿತರಾಗಿದ್ದರು. ಇದಾಗ್ಯೂ ತಮ್ಮ ಟೆಸ್ಟ್ ವೃತ್ತಿಜೀವನದಲ್ಲಿ ವಾರ್ನ್​ 3154 ರನ್ ಕಲೆಹಾಕುವ ಮೂಲಕ ಶತಕವಿಲ್ಲದ ಟೆಸ್ಟ್ ರನ್ ಸರದಾರ ಎನಿಸಿಕೊಂಡಿದ್ದಾರೆ.