40 ಲಕ್ಷ ರೂ.ಗೆ ಕೊಹ್ಲಿ ಜೆರ್ಸಿ ಮಾರಾಟ: ಧೋನಿ ಬ್ಯಾಟ್​ಗೆ ಸಿಕ್ತು 13 ಲಕ್ಷ ರೂ.

ಟೀಮ್ ಇಂಡಿಯಾ ಆಟಗಾರ ಕೆಎಲ್ ರಾಹುಲ್ ಹಾಗೂ ಪತ್ನಿ ಆತಿಯಾ ಶೆಟ್ಟಿ ಆಯೋಜಿಸಿದ ‘ಕ್ರಿಕೆಟ್ ಫಾರ್ ಚಾರಿಟಿ’ ಹರಾಜಿನಲ್ಲಿ ವಿರಾಟ್ ಕೊಹ್ಲಿಯ ಜೆರ್ಸಿ ಬರೋಬ್ಬರಿ 40 ಲಕ್ಷ ರೂ.ಗೆ ಮಾರಾಟವಾಗಿದೆ. ಇನ್ನು ರೋಹಿತ್ ಶರ್ಮಾ ಅವರ ಬ್ಯಾಟ್ 24 ಲಕ್ಷಕ್ಕೆ ಬಿಕರಿಯಾದರೆ, ಧೋನಿಗೆ ಬ್ಯಾಟ್​ 13 ಲಕ್ಷ ರೂ.ಗೆ ಹರಾಜಾಗಿದೆ. ಹಾಗಿದ್ರೆ ವಿಪ್ಲಾ ಫೌಂಡೇಶನ್​ಗಾಗಿ ಆಯೋಜಿಸಿದ ಹರಾಜಿನಲ್ಲಿ ಮಾರಾಟವಾದ ಪ್ರಮುಖ ವಸ್ತುಗಳಾವುವು ಎಂದು ನೋಡೋಣ…

ವಿರಾಟ್ ಕೊಹ್ಲಿ ಜೆರ್ಸಿ: ಟೀಮ್ ಇಂಡಿಯಾದ ಮಾಜಿ ನಾಯಕ ವಿರಾಟ್ ಕೊಹ್ಲಿಯ ನಂಬರ್ 18 ಜೆರ್ಸಿಯನ್ನು ಹರಾಜಿಗಿಡಲಾಗಿತ್ತು. ಈ ಜೆರ್ಸಿಯು ಬರೋಬ್ಬರಿ 40 ಲಕ್ಷ ರೂ.ಗೆ ಮಾರಾಟವಾಗಿರುವುದು ವಿಶೇಷ.

ವಿರಾಟ್ ಕೊಹ್ಲಿಯ ಗ್ಲೌಸ್: ವಿರಾಟ್ ಕೊಹ್ಲಿ ಬ್ಯಾಟಿಂಗ್ ಮಾಡುವಾಗ ಧರಿಸಿದ್ದ ಗ್ಲೌಸ್ ಕೂಡ ಈ ಹರಾಜಿನಲ್ಲಿತ್ತು. ಇದನ್ನು ವ್ಯಕ್ತಿಯೊಬ್ಬರು ಬರೋಬ್ಬರಿ 28 ಲಕ್ಷ ರೂ. ಖರೀದಿಸಿದ್ದಾರೆ.

ರೋಹಿತ್ ಶರ್ಮಾ ಬ್ಯಾಟ್: ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಅವರ ಬ್ಯಾಟ್ ಅನ್ನು 24 ಲಕ್ಷ ರೂ.ಗೆ ಖರೀದಿಸಲಾಗಿದೆ. ಇದು ಈ ಹರಾಜಿನಲ್ಲಿ ಬಿಕರಿಯಾದ ಮೂರನೇ ದುಬಾರಿ ವಸ್ತು.

ಧೋನಿ ಬ್ಯಾಟ್: ಈ ಹರಾಜಿನಲ್ಲಿ ಟೀಮ್ ಇಂಡಿಯಾ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರ ಬ್ಯಾಟ್ 13 ಲಕ್ಷ ರೂಪಾಯಿಗಳಿಗೆ ಬಿಕರಿಯಾಗಿದೆ.

ರಾಹುಲ್ ದ್ರಾವಿಡ್ ಬ್ಯಾಟ್: ಭಾರತ ತಂಡದ ಲೆಜೆಂಡ್ ರಾಹುಲ್ ದ್ರಾವಿಡ್ ಸಹ ಈ ಹರಾಜಿಗಾಗಿ ತಮ್ಮ ಬ್ಯಾಟ್​ವೊಂದನ್ನು ನೀಡಿದ್ದರು. ಈ ಬ್ಯಾಟ್ ಬರೋಬ್ಬರಿ 11 ಲಕ್ಷ ರೂ.ಗೆ ಮಾರಾಟವಾಗಿದೆ.

ಕೆಎಲ್ ರಾಹುಲ್ ಜೆರ್ಸಿ: ಟೀಮ್ ಇಂಡಿಯಾ ಆಟಗಾರ ಕೆಎಲ್ ರಾಹುಲ್ ಹರಾಜಿಗಿಟ್ಟ ಜೆರ್ಸಿಯು ಬರೋಬ್ಬರಿ 11 ಲಕ್ಷ ರೂಪಾಯಿಗೆ ಮಾರಾಟವಾಗಿದೆ.

ಜಸ್​ಪ್ರೀತ್ ಬುಮ್ರಾ ಜೆರ್ಸಿ: ಟೀಮ್ ಇಂಡಿಯಾ ವೇಗಿ ಜಸ್​ಪ್ರೀತ್ ಬುಮ್ರಾ ಸಹಿ ಹಾಕಿರುವ ಟೀಮ್ ಇಂಡಿಯಾ ಜೆರ್ಸಿಯು 8 ಲಕ್ಷ ರೂ.ಗೆ ಹರಾಜಾಗಿದೆ.

ಇನ್ನು ಇಂಗ್ಲೆಂಡ್ ಆಟಗಾರ ಜೋಸ್ ಬಟ್ಲರ್ ಸಹಿ ಹಾಕಿದ ರಾಜಸ್ಥಾನ್ ರಾಯಲ್ಸ್ ಜೆರ್ಸಿ, ಸೌತ್ ಆಫ್ರಿಕಾ ಕ್ರಿಕೆಟಿಗ ಕ್ವಿಂಟನ್ ಡಿ ಕಾಕ್ ನೀಡಿದ ಕೀಪಿಂಗ್ ಗ್ಲೌಸ್ ಹಾಗೂ ವೆಸ್ಟ್ ಇಂಡೀಸ್ ಆಟಗಾರ ನಿಕೋಲಸ್ ಪೂರನ್ ನೀಡಿದ ಲಕ್ನೋ ಸೂಪರ್ ಜೈಂಟ್ಸ್ ಜೆರ್ಸಿಯು ಒಟ್ಟು 2.10 ಲಕ್ಷ ರೂ.ಗೆ ಮಾರಾಟವಾಗಿದೆ.

ಇದನ್ನೂ ಓದಿ: MS Dhoni: ಧೋನಿಯನ್ನು ಬ್ಯಾನ್ ಮಾಡಬೇಕಿತ್ತು: ವೀರೇಂದ್ರ ಸೆಹ್ವಾಗ್

ಕೆಎಲ್ ರಾಹುಲ್ ಸಹಿ ಮಾಡಿದ ಕ್ರಿಕೆಟ್ ಬ್ಯಾಟ್, ಟೀಮ್ ಇಂಡಿಯಾ ಜೆರ್ಸಿ, ಟೀಮ್ ಇಂಡಿಯಾ ಕ್ಯಾಪ್, ಬ್ಯಾಟಿಂಗ್ ಪ್ಯಾಡ್‌ಗಳು, ಟೀಮ್ ಇಂಡಿಯಾ ಹೆಲ್ಮೆಟ್, ಬ್ಯಾಟಿಂಗ್ ಗ್ಲೌಸ್ ಮತ್ತು ಟೆಸ್ಟ್ ಜೆರ್ಸಿಯು ಒಟ್ಟು 32.20 ಲಕ್ಷಕ್ಕೆ ಬಿಕರಿಯಾಗಿದೆ.  ಈ ಮೂಲಕ ಕೆಎಲ್ ರಾಹುಲ್ ಹಾಗೂ ಆತಿಯಾ ಶೆಟ್ಟಿ ಅವಕಾಶ ವಂಚಿತ ಮಕ್ಕಳ ಶಿಕ್ಷಣಕ್ಕಾಗಿ ಒಟ್ಟು 1.93 ಕೋಟಿ ರೂ. ಸಂಗ್ರಹಿಸಿದ್ದಾರೆ.