ವಿಜಯ ಹಝಾರೆ ಟೂರ್ನಿಯಲ್ಲಿ ವಿರಾಟ್ ಕೊಹ್ಲಿಯ ಅಂಕಿ ಅಂಶಗಳು ಹೇಗಿದೆ?
Vijay Hazare Trophy 2025: ಡಿಸೆಂಬರ್ 24 ರಂದು ಶುರುವಾಗಲಿರುವ ದೆಹಲಿ ಮತ್ತು ಆಂಧ್ರ ಪ್ರದೇಶ್ ನಡುವಣ ವಿಜಯ ಹಝಾರೆ ಟೂರ್ನಿಯ ಮೊದಲ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಕಣಕ್ಕಿಳಿಯುವುದು ಬಹುತೇಕ ಖಚಿತ. ಈ ಮೂಲಕ ಕೊಹ್ಲಿ 15 ವರ್ಷಗಳ ಬಳಿಕ ದೇಶೀಯ ಟೂರ್ನಿಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಇದಕ್ಕೂ ಮುನ್ನ ಅವರು 2010 ರಲ್ಲಿ ಕೊನೆಯ ಬಾರಿ ದೇಶೀಯ ಏಕದಿನ ಪಂದ್ಯವಾಡಿದ್ದರು.
ಬರೋಬ್ಬರಿ 15 ವರ್ಷಗಳ ಬಳಿಕ ವಿಜಯ ಹಝಾರೆ ಟೂರ್ನಿಯಲ್ಲಿ ಕಣಕ್ಕಿಳಿಯಲು ವಿರಾಟ್ ಕೊಹ್ಲಿ ಸಜ್ಜಾಗಿದ್ದಾರೆ. ಈ ಬಾರಿ ಕೂಡ ಕೊಹ್ಲಿ ಕಣಕ್ಕಿಳಿಯಲಿರುವುದು ದೆಹಲಿ ಪರ. 2008 ರಲ್ಲಿ ಚೊಚ್ಚಲ ವಿಜಯ ಹಝಾರೆ ಟೂರ್ನಿ ಆಡಿದ್ದ ಕೊಹ್ಲಿ 2010 ರವರೆಗೆ ದೇಶೀಯ ಏಕದಿನ ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದರು.
ಆದರೆ ಟೀಮ್ ಇಂಡಿಯಾಗೆ ಆಯ್ಕೆಯಾದ ಬಳಿಕ ಕಿಂಗ್ ಕೊಹ್ಲಿ ಹಿಂತಿರುಗಿ ನೋಡಿರಲಿಲ್ಲ. ಅದರಲ್ಲೂ 2011 ರ ಏಕದಿನ ವಿಶ್ವಕಪ್ ಬಳಿಕ ಕೊಹ್ಲಿ ಭಾರತ ತಂಡದ ಅವಿಭಾಜ್ಯ ಅಂಗವಾಗಿದ್ದರು. ಹೀಗಾಗಿ ದೇಶೀಯ ಟೂರ್ನಿ ಆಡುವ ಪ್ರಮೇಯವೇ ಬಂದಿರಲಿಲ್ಲ.
ಇದೀಗ ಭಾರತ ತಂಡದಿಂದ ಹೊರಗುಳಿದಿರುವ ಆಟಗಾರರು ದೇಶೀಯ ಟೂರ್ನಿಗಳಲ್ಲಿ ಕಣಕ್ಕಿಳಿಯಬೇಕೆಂದು ಬಿಸಿಸಿಐ ನಿರ್ದೇಶಿಸಿದೆ. ಹೀಗಾಗಿ ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಸೇರಿದಂತೆ ಪ್ರಮುಖ ಆಟಗಾರರು ವಿಜಯ ಹಝಾರೆ ಟೂರ್ನಿಯಲ್ಲಿ ಕಣಕ್ಕಿಳಿಯಲಿದ್ದಾರೆ.
ವಿಜಯ ಹಝಾರೆ ಟೂರ್ನಿಯಲ್ಲಿ ಕೊಹ್ಲಿ ಪ್ರದರ್ಶನ ಹೇಗಿದೆ?
| ಎದುರಾಳಿ ತಂಡ | ರನ್ಸ್ | ಬಾಲ್ಸ್ | ಫೋರ್/ಸಿಕ್ಸ್ | ಸ್ಥಳ | ದಿನಾಂಕ |
| ಬಂಗಾಳ | 56 | 56 | 1/3 | ವಿಶಾಖಪಟ್ಟಣಂ | ಏಪ್ರಿಲ್ 2, 2008 |
| ಜಮ್ಮು ಮತ್ತು ಕಾಶ್ಮೀರ | 102 | 113 | 14/0 | ಧರ್ಮಶಾಲಾ | ಫೆಬ್ರವರಿ 15, 2009 |
| ಪಂಜಾಬ್ | 119* | 110 | 14/3 | ಧರ್ಮಶಾಲಾ | ಫೆಬ್ರವರಿ 17, 2009 |
| ಹಿಮಾಚಲ ಪ್ರದೇಶ | 23 | 26 | 4/0 | ಉನಾ | ಫೆಬ್ರವರಿ 19, 2009 |
| ಹರ್ಯಾಣ | 124 | 82 | 9/7 | ಧರ್ಮಶಾಲಾ | ಫೆಬ್ರವರಿ 21, 2009 |
| ಸರ್ವೀಸಸ್ | 45 | 58 | 5/1 | ಉನಾ | ಫೆಬ್ರವರಿ 23, 2009 |
| ರೈಲ್ವೇಸ್ | 114 | 93 | 17/1 | ಅಗರ್ತಲಾ | ಫೆಬ್ರವರಿ 28, 2009 |
| ಬಂಗಾಳ | 7 | 10 | 1/0 | ಅಗರ್ತಲಾ | ಮಾರ್ಚ್ 4, 2009 |
| ಜಮ್ಮು ಮತ್ತು ಕಾಶ್ಮೀರ | 16 | 16 | 3/0 | ಸಿರ್ಸಾ | ಫೆಬ್ರವರಿ 10, 2010 |
| ಪಂಜಾಬ್ | 71 | 48 | 4/2 | ಸಿರ್ಸಾ | ಫೆಬ್ರವರಿ 12, 2010 |
| ಹಿಮಾಚಲ ಪ್ರದೇಶ | 32 | 33 | 6/0 | ಸಿರ್ಸಾ | ಫೆಬ್ರವರಿ 14, 2010 |
| ಹರ್ಯಾಣ | 94 | 99 | 10/0 | ರೋಹ್ಟಕ್ | ಫೆಬ್ರವರಿ 16, 2010 |
| ಸರ್ವೀಸಸ್ | 16 | 8 | 3/0 | ಗುರ್ಗಾವ್ | ಫೆಬ್ರವರಿ 18, 2010 |
ವಿರಾಟ್ ಕೊಹ್ಲಿ ವಿಜಯ ಹಝಾರೆ ಟೂರ್ನಿಯಲ್ಲಿ ಈವರೆಗೆ 13 ಪಂದ್ಯಗಳನ್ನಾಡಿದ್ದಾರೆ. ಈ ವೇಳೆ ಕಲೆಹಾಕಿರುವುದು ಬರೋಬ್ಬರಿ 819 ರನ್ಗಳು. ಇದರ ನಡುವೆ ಹರ್ಯಾಣ ವಿರುದ್ಧ 124 ರನ್ ಬಾರಿಸಿದ್ದು ಅವರ ಗರಿಷ್ಠ ಸ್ಕೋರ್.
ಇನ್ನು ಈ 13 ಇನಿಂಗ್ಸ್ಗಳಲ್ಲಿ ಕೊಹ್ಲಿ ಬ್ಯಾಟ್ನಿಂದ 4 ಶತಕ ಹಾಗೂ 3 ಅರ್ಧಶತಕಗಳು ಮೂಡಿಬಂದಿವೆ. ಅಲ್ಲದೆ 91 ಫೋರ್ ಹಾಗೂ 17 ಸಿಕ್ಸರ್ಗಳನ್ನು ಸಹ ಬಾರಿಸಿದ್ದಾರೆ.
ಇದನ್ನೂ ಓದಿ: ಒಂದೇ ವರ್ಷದಲ್ಲಿ ಇತಿಹಾಸ ನಿರ್ಮಿಸಿದ ಜೇಕಬ್ ಡಫಿ
ಅಂದರೆ ದೇಶೀಯ ಏಕದಿನ ಟೂರ್ನಿಯಲ್ಲಿ 13 ಇನಿಂಗ್ಸ್ ಆಡಿರುವ ಕೊಹ್ಲಿ 106 ರ ಸ್ಟ್ರೈಕ್ ರೇಟ್ನಲ್ಲಿ 68.25 ಸರಾಸರಿಯಲ್ಲಿ ಒಟ್ಟು 819 ರನ್ಗಳಿಸಿದ್ದಾರೆ. ಈ ಅದ್ಭುತ ಪ್ರದರ್ಶನದೊಂದಿಗೆ ಕೊಹ್ಲಿ ಭಾರತ ತಂಡಕ್ಕೆ ಆಯ್ಕೆಯಾಗಿದ್ದರು. ಇದೀಗ ಬರೋಬ್ಬರಿ 15 ವರ್ಷಗಳ ಬಳಿಕ ಮತ್ತೊಮ್ಮೆ ದೇಶೀಯ ಅಂಗಳದಲ್ಲಿ ಕಣಕ್ಕಿಳಿಯಲು ಕಿಂಗ್ ಕೊಹ್ಲಿ ಸಜ್ಜಾಗಿದ್ದಾರೆ.