India Vs Australia Test Series 2020 | ಅಡಿಲೇಡ್ ಮೈದಾನದಲ್ಲಿ ಇಂದು ಉರುಳಿದ್ದು 15 ವಿಕೆಟ್ಗಳು!
ಅಡಿಲೇಡ್ ಮೈದಾನದಲ್ಲಿ ಬೌಲರ್ಗಳು ಮೇಲುಗೈ ಸಾಧಿಸಿದ್ದಾರೆ, ಎರಡನೇ ದಿದಾಟದಲ್ಲಿ 15 ವಿಕೆಟ್ಗಳು ಉರುಳಿರುವುದು ಇದಕ್ಕೆ ಸಾಕ್ಷಿ. ಟೀಮ್ ಇಂಡಿಯಾದ ಆಟಗಾರರು ಬಹಳ ಜವಾಬ್ದಾರಿಯಿಂದ ಆಡುವ ಅವಶ್ಯಕತೆಯಿದೆ, ಯಾಕೆಂದರೆ ಈ ಸರಣಿಯನ್ನು ಗೆಲುವಿನೊಂದಿಗೆ ಆರಂಭಿಸಬೇಕಾದರೆ ಕನಿಷ್ಠ 300 ರನ್ಗಳ ಲೀಡ್ ಹೊಂದಿರಲೇಬೇಕು.
Updated on:Dec 18, 2020 | 9:05 PM
ಅಡಿಲೇಡ್ ಓವಲ್ ಮೈದಾನದಲ್ಲಿ ಯಾವುದಾದರೂ ಮಾಯೆ ಅಡಗಿದೆಯೋ ಅಥವಾ ಭಾರತೀಯರಂತೆ ಆಸ್ಸೀಗಳೂ ಇನ್ನೂ ಪಿಂಕ್ ಬಾಕ್ ಕ್ರಿಕೆಟ್ಗೆ ಕುದುರಿಕೊಳ್ಳಬೇಕಿದೆಯೋ ಎಂಬ ಅನುಮಾನ ಕ್ರಿಕೆಟ್ ಪ್ರೇಮಿಗಳಲ್ಲಿ ಮೊದಲ ಟೆಸ್ಟ್ನ ಎರಡನೇ ದಿನದಾಟದ ಮುಗಿದ ನಂತರ ಹುಟ್ಟಿಕೊಂಡಿದೆ.
ಹೌದು, ಈ ಮೈದಾನದಲ್ಲಿ ಇಂದು 15 ವಿಕೆಟ್ಗಳು ಪತನಗೊಂಡವು, 10 ಅತಿಥೇಯರದ್ದು, 5 ಪ್ರವಾಸಿಗಳದ್ದು. ಪಿಂಕ್ ಬಾಲ್ನೊಂದಿಗೆ ಭಾರತೀಯ ಬೌಲರ್ಗಳು ಸಹ ನಿಸ್ಸಂದೇಹವಾಗಿ ವಿಜೃಂಭಿಸುತ್ತಿದ್ದಾರೆ. ವಿದೇಶದ ಪಿಚ್ಗಳ ಮೇಲೆ ಅಷ್ಟೇನೂ ಪರಿಣಾಮಕಾರಿಯಲ್ಲ ಎಂಬ ಅಪವಾದ ಹೊತ್ತಿರುವ ಏಸ್ ಆಫ್ಸ್ಪಿನ್ನರ್ ರವಿಚಂದ್ರನ್ ಇಂದು ತಮ್ಮ ಟೀಕಾಕಾರರ ಬಾಯಿ ಮುಚ್ಚಿಸಿದರು.
ಉತ್ಕೃಷ್ಟ ಲಯ, ನಿಯಂತ್ರಣ ಮತ್ತು ವೈವಿಧ್ಯತೆ ಪ್ರದರ್ಶಿಸಿದ ಅವರು ತಾವೆಸದ 18 ಓವರ್ಗಳಲ್ಲಿ 55 ರನ್ ನೀಡಿ 4 ವಿಕೆಟ್ ಪಡೆದು ಭಾರತೀಯರ ಪರ ಅತಿ ಯಶಸ್ವೀ ಬೌಲರ್ ಎನಿಸಿದರು. ಅವರ ಕರಾರುವಕ್ಕಾದ ದಾಳಿಯಿಂದಾಗಿ ಭಾರತ ಮೊದಲ 53ರನ್ಗಳ ಆಮೂಲ್ಯ ಮುನ್ನಡೆ ಪಡೆಯಿತು.
ಅವರಿಗೆ ಅತ್ಯುತ್ತಮ ಬೆಂಬಲ ನೀಡಿದ ಉಮೇಶ್ ಯಾದವ್ 3 ವಿಕೆಟ್ ಪಡೆದರೆ, ಮತ್ತೊಬ್ಬ ಪೇಸರ್ ಜಸ್ಪ್ರೀತ್ ಬುಮ್ರಾ 2 ವಿಕೆಟ್ ಪಡೆದರು.
ಬುಮ್ರಾಗೆ ಎರಡನೇ ವಿಕೆಟ್, ಸಂಭ್ರಮದಲ್ಲಿ ಕೊಹ್ಲಿ
ಗುರುವಾರದಂದು ಭಾರತೀಯ ಬ್ಯಾಟ್ಸ್ಮನ್ಗಳು ರನ್ ಗಳಿಸಲು ಪರದಾಡಿದಂತೆ ಇಂದು ಅತಿಥೇಯರು ಸಹ ತಿಣುಕಾಡಿದರು. ಬುಮ್ರಾ ಮತ್ತು ಯಾದವ್ ಅವರ ಶಿಸ್ತಿನ ದಾಳಿ ಆಸ್ಟ್ರೇಲಿಯಾದ ಆರಂಭ ಆಟಗಾರರಿಗೆ ಹೊಡೆತಗಳಿಗೆ ಪ್ರಯತ್ನಿಸುವ ಅವಕಾಶವನ್ನೇ ನೀಡಲಿಲ್ಲ. 28 ಎಸೆತಗಳ ನಂತರ ಅಂದರೆ 5ನೇ ಓವರ್ನಲ್ಲಿ ಆಸ್ಸೀಗಳಿಗೆ ಮೊದಲ ರನ್ ಗಳಿಸಲು ಸಾಧ್ಯವಾಯಿತು! ಮೊದಲ 14 ಓವರ್ಗಳಲ್ಲಿ ಜೊ ಬರ್ನ್ಸ್ ಮತ್ತು ಮ್ಯಾಥ್ಯೂ ವೇಡ್ ಗಳಿಸಿದ್ದು ಕೇವಲ 20 ರನ್ ಮಾತ್ರ. 14ನೇ ಓವರ್ನಲ್ಲಿ ಬುಮ್ರಾ ಭಾರತಕ್ಕೆ ಮೊದಲ ಯಶ ದೊರಕಿಸಿದರು. ಎಡಗೈ ಆಟಗಾರ ವೇಡ್ ಆನ್ ಸೈಡ್ನಲ್ಲಿ ಚೆಂಡನ್ನು ಡ್ರೈವ್ ಮಾಡುವ ಪ್ರಯತ್ನದಲ್ಲಿ ಎಲ್ಬಿ ಬಲೆಗೆ ಬಿದ್ದರು. ಎರಡು ಓವರ್ಗಳ ನಂತರ ಬುಮ್ರಾ ಮತ್ತೊಬ್ಬ ಓಪನರ್ ಬರ್ನ್ಸ್ ಅವರನ್ನು ಅದೇ ರೀತಿಯಲ್ಲಿ ಔಟ್ ಮಾಡಿದರು.
ಭಾರತಕ್ಕೆ ಬೇಕಿದ್ದ ಸ್ಟೀವ್ ಸ್ಮಿತ್ ಅವರ ಅತ್ಯಮೂಲ್ಯ ವಿಕೆಟನ್ನು ಭಾರತಕ್ಕೆ ಕೊಡಿಸಿದ್ದು ಅಶ್ವಿನ್. ಸ್ಮಿತ್ ನಿರೀಕ್ಷಿಸದಷ್ಟು ಸ್ಪಿನ್ ಆಗದ ಎಸೆತವು ಅವರ ಬ್ಯಾಟಿನ ಅಂಚನ್ನು ಮುತ್ತಿಕ್ಕಿ ಸ್ಲಿಪ್ನಲ್ಲಿದ್ದ ರಹಾನೆ ಅವರತ್ತ ಚಿಮ್ಮಿದಾಗ ಭಾರತದ ಉಪನಾಯಕ ಯಾವುದೇ ತಪ್ಪು ಮಾಡಲಿಲ್ಲ. ಭಾರತದ ಫೀಲ್ಡಿಂಗ್ ಇವತ್ತು ಕಳಪೆಯಾಗಿತ್ತು. ಸುಲಭವಾದ ಕ್ಯಾಚ್ಗಳು ನೆಲಸಮಗೊಂಡವು. ಮಾರ್ನಸ್ ಲಬುಶೇನ್ಗೆ ಒಮ್ಮೆ ಬುಮ್ರಾ ಮತ್ತೊಮ್ಮೆ ಪೃಥ್ವಿ ಶಾ ಜೀವದಾನ ನೀಡಿದರು. ಹಾಗಾಗದೆ ಹೋಗಿದ್ದರೆ, ಆಸ್ಟ್ರೇಲಿಯ 150ರ ಗಡಿ ದಾಟುವುದು ಸಹ ಸಾಧ್ಯವಾಗುತ್ತಿರಲಿಲ್ಲ.
ಜೊತೆ ಆಟಗಾರರಿಂದ ಅಶ್ವಿನ್ಗೆ ಅಭಿನಂದನೆ
ಭಾರತದ ಪರ ನಾಯಕ ವಿರಾಟ್ ಕೊಹ್ಲಿ ಹೋರಾಡಿದಂತೆ, ಆಸ್ಟ್ರೇಲಿಯಾದ ನಾಯಕ ಟಿಮ್ ಪೈನ್ ಟೀಮಿನ ಸ್ಕೋರನ್ನು ಹೆಚ್ಚಿಸುವ ಜವಾಬ್ದಾರಿ ನಿಭಾಯಿಸಬೇಕಾಯಿತು. ಭಾರತದ ಬೌಲರ್ಗಳನ್ನು ಸಮರ್ಥವಾಗಿ ಎದುರಿಸಿದ ಪೈನ್ 73 ರನ್ಗಳೊಂದಿಗೆ ಅಜೇಯರಾಗಿ ಉಳಿದರು. ಟೇಲ್ ಎಂಡರ್ಗಳ ಜತೆ ಚಿಕ್ಕ ಚಿಕ್ಕ ಪಾರ್ಟ್ನರ್ಶಿಪ್ಗಳೊಂದಿಗೆ ಅವರು ಟೀಮಿನ ಸ್ಕೋರನ್ನು 200 ಗಡಿ ತಲುಪಿಸಿದರು ಮತ್ತು ಲೀಡಿನ ಮೊತ್ತವನ್ನು ಸಾಕಷ್ಟ್ಟು ತಗ್ಗಿಸಿದರು.
ಮೊಹಮ್ಮದ್ ಶಮಿ ಸಹ ಬೇರೆ ಬೌಲರ್ಗಳಷ್ಟೇ ಉತ್ತಮವಾಗಿ ಬೌಲ್ ಮಾಡಿದಾಗ್ಯೂ ಅವರಿಗೆ ಒಂದೂ ವಿಕೆಟ್ ದಕ್ಕಲಿಲ್ಲ.
53 ರನ್ಗಳ ಲೀಡ್ನೊಂದಿಗೆ ತನ್ನ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ಭಾರತಕ್ಕೆ ಪೃಥ್ವಿ ಶಾ ಮತ್ತೊಮ್ಮೆ ನಿರಾಶೆಗೊಳಿಸದರು. ಈ ಬಾರಿ ಸ್ಟಾರ್ಕ್ ಬದಲು ಪ್ಯಾಟ್ ಕಮ್ಮಿನ್ಸ್ಗೆ ವಿಕೆಟ್ ಒಪ್ಪಿಸಿದರು. ಅವರು ಔಟಾದ ನಂತರ ರಾತ್ರಿ ಕಾವಲುಗಾರನಾಗಿ ಬುಮ್ರಾ ಅವರನ್ನು ಆಡಲು ಕಳಿಸಲಾಗಿದೆ. ದಿನದಾಟ ಕೊನಗೊಂಡಾಗ ಭಾರತದ ಸ್ಕೋರ್ 9/1, ಅದೀಗ 62 ರನ್ಗಳಿಂದ ಮುಂದಿದೆ.
ಉಮೇಶ್ ಯಾದವ್
ನಾಳೆ ಮಧ್ಯಾಹ್ನ ಭಾರತೀಯ ಆಟಗಾರರು ಹೇಗೆ ಲೀಡನ್ನು ಹೆಚ್ಚಿಸಿ ಪಂದ್ಯದ ಮೇಲೆ ಸಂಪೂರ್ಣ ಹಿಡಿತ ಸಾಧಿಸುತ್ತಾರೆ ಎನ್ನುವುದು ಕುತೂಹಲಕಾರಿ ಅಂಶವಾಗಿದೆ.
ಇಂದು ಮಧ್ಯಾಹ್ನ 233/6 ಸ್ಕೋರಿನೊಂದಿಗೆ ಇನ್ನಿಂಗ್ಸ್ ಮುಂದುವರಿಸಿದ ಭಾರತದ ಬಾಲ ಉದ್ದ ಬೆಳೆಯಲಿಲ್ಲ. ಕೇವಲ 11 ರನ್ ಗಳಿಸುವಷ್ಟರಲ್ಲಿ ಅದು ಉಳಿದ 4 ವಿಕೆಟ್ಗಳನ್ನು ಕಳೆದುಕೊಂಡಿತು. ಮಿಚೆಲ್ ಸ್ಟಾರ್ಕ್ 55ರನ್ ನೀಡಿ 4 ವಿಕೆಟ್ ಪಡೆದರೆ ಕಮ್ಮಿನ್ಸ್ 48ರನ್ ನೀಡಿ 3 ವಿಕೆಟ್ ಪಡೆದರು
ಇದುವರೆಗಿನ ಸಂಕ್ಷಿಪ್ತ ಸ್ಕೋರ್: ಭಾರತ 244 ಮತ್ತು 9/1, ಆಸ್ಟ್ರೇಲಿಯ: 191 (ಪೈನ್ 73*, ಲಬುಶೇನ್ 47, ಅಶ್ವಿನ್ 4/55, ಯಾದವ್ 3/40 ಮತ್ತು ಬುಮ್ರಾ 2/52
Published On - 7:43 pm, Fri, 18 December 20
