IPL 2021: ಇದುವರೆಗೂ ಕಪ್ ಗೆದ್ದಿಲ್ಲ, ಹಾಗೆಂದು ಆರ್ಸಿಬಿ ತಂಡದಿಂದ ದೂರವಾಗುವ ಯೋಚನೆ ಸ್ವಲ್ಪವೂ ಬಂದಿಲ್ಲ: ವಿರಾಟ್ ಕೊಹ್ಲಿ
2013ರಿಂದಲೂ ತಂಡದ ನಾಯಕರಾಗಿರುವ ಕೊಹ್ಲಿ, ಬೆಂಗಳೂರು ಅಭಿಮಾನಿಗಳಿಂದ ಪಡೆದಿರುವ ಗೌರವ, ಸಂಭ್ರಮವನ್ನು ಮತ್ತೆಲ್ಲೂ ಪಡೆಯಲು ಸಾಧ್ಯವಿಲ್ಲ ಎಂದು ಹೇಳಿಕೊಂಡಿದ್ದಾರೆ.
Updated on:Apr 05, 2022 | 12:43 PM
ಐಪಿಎಲ್ ಟೂರ್ನಿಯ ಮೊದಲ ಪಂದ್ಯಾಟ ಇಂದು (ಏಪ್ರಿಲ್ 9) ಸಂಜೆ 7 ಗಂಟೆಗೆ ಆರಂಭವಾಗಲಿದೆ. 5 ಬಾರಿ ಚಾಂಪಿಯನ್ ಪಟ್ಟಕ್ಕೇರಿದ ಮುಂಬೈ ಇಂಡಿಯನ್ಸ್, ಬೆಂಗಳೂರಿನ ರಾಯಲ್ ಚಾಲೆಂಜರ್ಸ್ ತಂಡದ ವಿರುದ್ಧ ಸೆಣೆಸಾಡಲಿದೆ. ಆರ್ಸಿಬಿ ಅಭಿಮಾನಿಗಳು ಈ ಸಲ ಕಪ್ ನಮ್ದೇ ಎಂಬ ಉತ್ಸಾಹದಲ್ಲಿದ್ದಾರೆ. ಮುಂಬೈ ಇಂಡಿಯನ್ಸ್ ಆಟಗಾರರು ನಾವು ಈ ಬಾರಿಯೂ ಚಾಂಪಿಯನ್ಸ್ ಎನ್ನಲು ಕಾದು ಕುಳಿತಿದ್ದಾರೆ. ಈ ಮಧ್ಯೆ, ಆರ್ಸಿಬಿ ತಂಡದ ನಾಯಕ, ಅಭಿಮಾನಿಗಳ ಹಾಟ್ ಫೇವರಿಟ್ ಕ್ರಿಕೆಟರ್ ವಿರಾಟ್ ಕೊಹ್ಲಿ ತಮ್ಮ ಮತ್ತು ಆರ್ಸಿಬಿ ನಡುವಿನ ಬಾಂಧವ್ಯವನ್ನು ಬಿಚ್ಚಿಟ್ಟಿದ್ದಾರೆ.
ಭಾರತ ತಂಡದ ನಾಯಕನೂ ಆಗಿರುವ ಕೊಹ್ಲಿಗೆ ಸದ್ಯ 32 ವರ್ಷ ವಯಸ್ಸು. ಕೊಹ್ಲಿ ಮತ್ತು ಆರ್ಸಿಬಿ ನಂಟು ಇಂದು ನಿನ್ನೆಯದಲ್ಲ. ಐಪಿಎಲ್ ಆರಂಭಿಕ ಆವೃತ್ತಿಯಿಂದಲೂ ಕೊಹ್ಲಿ ಆರ್ಸಿಬಿಯ ಆಟಗಾರರಾಗಿದ್ದಾರೆ. ಅಂದರೆ, 2008ರಿಂದ 2021ರ ಐಪಿಎಲ್, ಒಟ್ಟು 12 ವರ್ಷಗಳಿಗೂ ಹೆಚ್ಚು ಕಾಲ ಆರ್ಸಿಬಿ ಮತ್ತು ಬೆಂಗಳೂರು ಜೊತೆ ಬಾಂಧವ್ಯ ಹೊಂದಿದ್ದಾರೆ.
ಈ ಬಗ್ಗೆ ಮಾತನಾಡಿರುವ ಕೊಹ್ಲಿ, ಇದುವರೆಗೆ ಒಂದು ಬಾರಿಯೂ ಆರ್ಸಿಬಿ ಕಪ್ ಗೆಲ್ಲಲಾಗಲಿಲ್ಲ. ಆದರೂ ಆರ್ಸಿಬಿ ತಂಡವನ್ನು ತ್ಯಜಿಸುವ ಮನ ಮಾಡಲಿಲ್ಲ ಎಂದು ಹೇಳಿದ್ದಾರೆ. 2013ರಿಂದಲೂ ತಂಡದ ನಾಯಕರಾಗಿರುವ ಕೊಹ್ಲಿ, ಬೆಂಗಳೂರು ಅಭಿಮಾನಿಗಳಿಂದ ಪಡೆದಿರುವ ಗೌರವ, ಸಂಭ್ರಮವನ್ನು ಮತ್ತೆಲ್ಲೂ ಪಡೆಯಲು ಸಾಧ್ಯವಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ಅಭಿಮಾನಿಗಳಿಂದ ತುಂಬಾ ಸಪೋರ್ಟ್ ಪಡೆಯುವ ಇತರ ತಂಡಗಳೂ ಐಪಿಎಲ್ನಲ್ಲಿವೆ. ಆದರೆ, ನಮಗೆ ಎಲ್ಲೆಡೆ ಸಿಗುವಷ್ಟು ಪ್ರೋತ್ಸಾಹ ಇನ್ಯಾರಿಗೂ ಸಿಕ್ಕಿಲ್ಲ ಎಂದು ಹೇಳಿದ್ದಾರೆ. ನಾವು ಹೃತ್ಪೂರ್ವಕವಾಗಿ ಕ್ರಿಕೆಟ್ ಆಡುತ್ತೇವೆ. ಈ ಹಿಂದೆ ಕಷ್ಟದ ಸನ್ನಿವೇಶಗಳಿಂದಾಗಿ ನಾವು ಸೋತಿಸರಬಹುದು. ಅಷ್ಟಾಗ್ಯೂ ಕ್ರಿಕೆಟ್ ಬಗೆಗಿನ ಆಸಕ್ತಿ, ಬದ್ಧತೆ ಕಡಿಮೆ ಆಗಿಲ್ಲ ಎಂದು ತಿಳಿಸಿದ್ದಾರೆ.
ಇದುವರೆಗೂ ನಾವು ಕಪ್ ಗೆದ್ದಿಲ್ಲ ಎಂಬ ಕಾರಣಕ್ಕೆ ಈ ತಂಡದಿಂದ ದೂರವಾಗುವ ಮನಸ್ಸೇ ನನಗೆ ಬಂದಿಲ್ಲ. ಇಂತಹ ಪರಿಸ್ಥಿತಿ, ಸನ್ನಿವೇಶ ಇನ್ನೆಲ್ಲೂ ಸಿಗಲು ಅಥವಾ ಸೃಷ್ಟಿಮಾಡಲು ಸಾಧ್ಯವಿಲ್ಲ. ಈ ಅನುಭವ ಮ್ಯಾಜಿಕಲ್ ಆಗಿದೆ ಎಂದು ಆರ್ಸಿಬಿ ಪೋಸ್ಟ್ ಮಾಡಿಕೊಂಡಿರುವ ವಿಡಿಯೋದಲ್ಲಿ ವಿರಾಟ್ ಹೇಳಿಕೊಂಡಿದ್ದಾರೆ.
ಆರ್ಸಿಬಿ ತಂಡ ಈ ಬಾರಿಯಾದರೂ ಕಪ್ ಗೆಲ್ಲುವ ಉತ್ಸಾಹದಲ್ಲಿದೆ. ಗ್ಲೆನ್ ಮ್ಯಾಕ್ಸ್ವೆಲ್, ಕೈಲ್ ಜೆಮಿಸನ್ ಮುಂತಾದ ಆಟಗಾರರು ತಂಡದಲ್ಲಿದ್ದಾರೆ. ಭಾರತದ ಅತ್ಯಂತ ಸೆಲೆಬ್ರೇಟೆಡ್ ಕ್ರಿಕೆಟರ್ ಎ.ಬಿ. ಡಿವಿಲಿಯರ್ಸ್ ಕೂಡ ಆರ್ಸಿಬಿಯಲ್ಲಿದ್ದಾರೆ. ಕಳೆದ ಸೀಸನ್ನಲ್ಲಿ ಆರ್ಸಿಬಿ ಪ್ಲೇ ಆಫ್ವರೆಗೆ ಮುನ್ನುಗ್ಗಿತ್ತು. ಆದರೆ, ಸನ್ರೈಸರ್ಸ್ ಹೈದರಾಬಾದ್ ಮುಂದೆ ಸೋಲು ಅನುಭವಿಸಿತ್ತು.
ಇದನ್ನೂ ಓದಿ: MI vs RCB: ನಮ್ಮ ಆರ್ಸಿಬಿ ಗೆದ್ದರೆ ಕಿಚ್ಚ ಸುದೀಪ್ ಹೀಗೆ ಮಾಡ್ತಾರಂತೆ!
Published On - 5:03 pm, Fri, 9 April 21
