IPL 2021 Auction: ಐಪಿಎಲ್ 2021 ಹರಾಜಿನಲ್ಲಿದ್ದಾರೆ 14 ಕನ್ನಡಿಗರು, ಕರ್ನಾಟಕದವರಿಗೆ ಆದ್ಯತೆ ಕೊಡುತ್ತಾ RCB
IPL 2021: ಈ ವರ್ಷ ಕೆ ಗೌತಮ್, ಸುಚಿತ್ ಜಗದೀಶ, ಅನಿರುದ್ಧ ಜೋಶಿ, ಶುಭಂ ಹೆಗ್ಡೆ, ಕರುಣ್ ನಾಯರ್, ಅಭಿಮನ್ಯು ಮಿಥುನ್, ರೋನಿತ್ ಮೋರೆ ಸೇರಿದಂತೆ ಒಟ್ಟು 14 ಜನ ಕರ್ನಾಟಕದ ಆಟಗಾರರಲ್ಲಿ ಯಾರಿಗೆ ಆರ್ಸಿಬಿ ಮಣೆ ಹಾಕಲಿದೆ ಎಂದು ನೋಡಲು ಕನ್ನಡಿಗರು ಕಾತರದಿಂದ ಕಾಯುತ್ತಿದ್ದಾರೆ.
Updated on:Feb 18, 2021 | 6:39 PM
ಐಪಿಎಲ್ 2021 ಹರಾಜು ಪ್ರಕ್ರಿಯೆ (IPL 2021 Auction) ಆರಂಭವಾಗಲು ಇನ್ನೇನು ಕೆಲವೇ ಕ್ಷಣಗಳು ಬಾಕಿ ಉಳಿದಿವೆ. ಈ ಬಾರಿಯ ಐಪಿಎಲ್ ಹರಾಜಿನಲ್ಲಿ ಕೆ ಗೌತಮ್, ಸುಚಿತ್ ಜಗದೀಶ, ಅನಿರುದ್ಧ ಜೋಶಿ, ಶುಭಂ ಹೆಗ್ಡೆ, ಕರುಣ್ ನಾಯರ್, ಅಭಿಮನ್ಯು ಮಿಥುನ್, ರೋನಿತ್ ಮೋರೆ ಸೇರಿದಂತೆ ಒಟ್ಟು 14 ಜನ ಕರ್ನಾಟಕದ ಆಟಗಾರರು ಲಭ್ಯವಿದ್ದಾರೆ. ಈ ಪೈಕಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಕರ್ನಾಟಕದ ಯಾವ ಆಟಗಾರರಿಗೆ ಮಣೆ ಹಾಕಲಿದೆ? ಪ್ರತಿವರ್ಷವೂ ಕನ್ನಡಿಗರಿಗೆ ಆದ್ಯತೆ ನೀಡಲ್ಲ ಎಂಬ ಆರೋಪಕ್ಕೆ ತುತ್ತಾಗುತ್ತಿರುವ ಆರ್ಸಿಬಿ ಈಗಲಾದರೂ ಆ ದೂಷಣೆಯಿಂದ ಮುಕ್ತವಾಗಲು ಪ್ರಯತ್ನಿಸಲಿದೆಯಾ? ಎಂಬ ಕುತೂಹಲ ಕ್ರಿಕೆಟ್ ಪ್ರೇಮಿಗಳಲ್ಲಿ ಮೂಡಿದೆ.
ಕೆ.ಎಲ್.ರಾಹುಲ್, ರಾಬಿನ್ ಉತ್ತಪ್ಪ ಸೇರಿದಂತೆ ಕರ್ನಾಟಕದ ಹಲವು ಆಟಗಾರರು ಈಗಾಗಲೇ ಐಪಿಎಲ್ನಲ್ಲಿ ಬೇರೆ ಬೇರೆ ತಂಡಗಳಲ್ಲಿ ಆಡುತ್ತಿದ್ದಾರೆ. ಪಂಜಾಬ್ ಕಿಂಗ್ಸ್ ತಂಡಕ್ಕಂತೂ ಕನ್ನಡಿಗರು ಹೆಚ್ಚೂ ಕಡಿಮೆ ಆರ್ಸಿಬಿಗೆ ನೀಡಿದಷ್ಟೇ ಪ್ರೀತಿ ನೀಡುತ್ತಾ ಬಂದಿದ್ದಾರೆ. ಇದಕ್ಕೆ ಮುಖ್ಯ ಕಾರಣವೆಂದರೆ ಪಂಜಾಬ್ ತಂಡದಲ್ಲಿ ಮಿಂಚುತ್ತಿರುವ ಕನ್ನಡ ನೆಲದ ಆಟಗಾರರು. ಅಲ್ಲಿನ ನಾಯಕನೂ ಕನ್ನಡಿಗನೇ ಆಗಿರುವ ಕಾರಣ ಇಲ್ಲಿನ ಕ್ರಿಕೆಟ್ ಪ್ರೇಮಿಗಳಿಗೆ ಅವರ ಆಟವನ್ನು ನೋಡುವುದು ಖುಷಿ.
ಕರ್ನಾಟಕದ ಆಟಗಾರರು ಯಾವ ತಂಡದಲ್ಲಿದ್ದರೂ ಪ್ರೀತಿ, ಪ್ರೋತ್ಸಾಹ ನೀಡುವುದರಲ್ಲಿ ಕನ್ನಡಿಗರು ಕಿಂಚಿತ್ತೂ ಕೊರತೆ ಮಾಡುವುದಿಲ್ಲ. ಆದರೆ, ಅವರು ನಮ್ಮದೇ ತಂಡವಾದ ಆರ್ಸಿಬಿಯಲ್ಲಿದ್ದರೆ ಇನ್ನೂ ಚೆನ್ನ ಎನ್ನುವುದು ಹೆಬ್ಬಯಕೆಯಷ್ಟೇ. ಹೀಗಾಗಿಯೇ ಪ್ರತಿಬಾರಿಯೂ ಐಪಿಎಲ್ ತಂಡ ರಚಿಸುವ ಸಂದರ್ಭದಲ್ಲಿ ಬೆಂಗಳೂರು ತಂಡ ಕನ್ನಡಿಗರಿಗೆ ಆದ್ಯತೆ ನೀಡಬಹುದಾ ಎಂದು ವೀಕ್ಷಕರು ಕಣ್ಣು ಮಿಟುಕಿಸದೇ ಕಾಯುತ್ತಾರೆ. ಇಷ್ಟಾದರೂ ಈ ವಿಚಾರದಲ್ಲಿ ಆರ್ಸಿಬಿ ಅನೇಕ ಸಲ ಕನ್ನಡಿಗರಿಗೆ ನಿರಾಸೆ ಮಾಡಿದೆ. ಹೀಗಾಗಿ, ಈ ವರ್ಷ ಕೆ ಗೌತಮ್, ಸುಚಿತ್ ಜಗದೀಶ, ಅನಿರುದ್ಧ ಜೋಶಿ, ಶುಭಂ ಹೆಗ್ಡೆ, ಕರುಣ್ ನಾಯರ್, ಅಭಿಮನ್ಯು ಮಿಥುನ್, ರೋನಿತ್ ಮೋರೆ ಸೇರಿದಂತೆ ಒಟ್ಟು 14 ಜನ ಕರ್ನಾಟಕದ ಆಟಗಾರರಲ್ಲಿ ಯಾರಿಗೆ ಆರ್ಸಿಬಿ ಮಣೆ ಹಾಕಲಿದೆ ಎಂದು ನೋಡಲು ಕನ್ನಡಿಗರು ಕಾತರದಿಂದ ಕಾಯುತ್ತಿದ್ದಾರೆ.
ಇನ್ನು ಹರಾಜಿನಲ್ಲಿ ಪಾಲ್ಗೊಳ್ಳುತ್ತಿರುವ ಎಲ್ಲಾ 8 ಫ್ರಾಂಚೈಸಿಗಳಿಗೆ ಗರಿಷ್ಠ ₹85 ಕೋಟಿ ವ್ಯಯಿಸುವ ಅವಕಾಶವಿದೆ. ಅಷ್ಟೂ ತಂಡಗಳ ಪೈಕಿ ಪಂಜಾಬ್ ಕಿಂಗ್ಸ್ ಅತಿ ಹೆಚ್ಚು ಅಂದರೆ ₹53.2 ಕೋಟಿ ಉಳಿಸಿಕೊಂಡಿದ್ದರೆ, ರಾಜಸ್ಥಾನ ₹37.85 ಕೋಟಿ ಉಳಿಸಿಕೊಳ್ಳುವ ಮೂಲಕ ಎರಡನೇ ಸ್ಥಾನದಲ್ಲಿದೆ. ಈ ಮೂಲಕ ತಮ್ಮಲ್ಲಿದ್ದ ಕೆಲ ಆಟಗಾರರನ್ನು ಕೈ ಬಿಟ್ಟು ಖಾತೆಯಲ್ಲಿ ಸದ್ಯ ಹೆಚ್ಚು ಹಣ ಉಳಿಸಿಕೊಂಡಿವೆ. ಇನ್ನೊಂದೆಡೆ ಕೋಲ್ಕತ್ತಾ ನೈಟ್ ರೈಡರ್ಸ್ ಮತ್ತು ಸನ್ ರೈಸರ್ಸ್ ಹೈದರಾಬಾದ್ ತಂಡಗಳು ಅತಿ ಕಡಿಮೆ ಅಂದರೆ ಕೇವಲ ₹10.75 ಕೋಟಿಯನ್ನು ಕೈಯಲ್ಲಿ ಉಳಿಸಿಕೊಂಡಿವೆ. ಹೀಗಾಗಿ ಈ ತಂಡಗಳು ಹೊಸಬರನ್ನು ಖರೀದಿ ಮಾಡುವಾಗ ಹೆಚ್ಚು ವ್ಯಯಿಸುವುದು ಸಾಧ್ಯವಿಲ್ಲ.
ಇದನ್ನೂ ಓದಿ: ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಹೆಸರೇ ಬದಲಾಯ್ತು, ಹೊಸ ಹೆಸರು ಡಾಭಾದಂತಿದೆ ಎಂದು ಕಾಲೆಳೆದ ನೆಟ್ಟಿಗರು
Published On - 3:04 pm, Thu, 18 February 21
