Milkha Singh: ಮಿಲ್ಖಾ ಸಿಂಗ್​ಗೆ ಭಾರತ ರತ್ನ ನೀಡಿ ಗೌರವಿಸಿ; ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚಾಯ್ತು ಒತ್ತಾಯ

ಭಾರತದ ಅಥ್ಲೆಟಿಕ್ ತಾರೆ ಮಿಲ್ಖಾ ಸಿಂಗ್ ಅವರು ಕೊರೊನಾ ಸೋಂಕಿನಿಂದ ಶುಕ್ರವಾರ ತಡರಾತ್ರಿ ನಿಧನರಾದರು. ಶನಿವಾರ ಮಿಲ್ಖಾ ಸಿಂಗ್ ಅವರನ್ನು ಸಕಲ ಸರ್ಕಾರಿ ಗೌರವಗಳೊಂದಿಗೆ ಬೀಳ್ಕೊಡಲಾಯಿತು. ಮಿಲ್ಖಾ ಸಿಂಗ್ ಸಾವಿನ ಸುದ್ದಿ ಬಂದಾಗಿನಿಂದ, ಅಭಿಮಾನಿಗಳು ಮತ್ತು ಅವರ ಆಪ್ತರು ಅವರನ್ನು ಸ್ಮರಿಸಿಕೊಂಡು ಸಾಮಾಜಿಕ ಜಾಲತಾಣಗಳ ಮೂಲಕ ಗೌರವ ಸಲ್ಲಿಸುತ್ತಿದ್ದಾರೆ. ಅದೇ ಸಮಯದಲ್ಲಿ, ಅವರಿಗೆ ಭಾರತ ರತ್ನ ನೀಡಬೇಕೆಂಬ ಬೇಡಿಕೆ ಪ್ರಾರಂಭವಾಗಿದೆ. ಈ ಹಿಂದೆ 1959 ರಲ್ಲಿ ಅವರಿಗೆ ಪದ್ಮಶ್ರೀ ನೀಡಲಾಗಿತ್ತು ಎನ್ನುವುದು ಗಮನಾರ್ಹ.

ಮಿಲ್ಖಾ ಸಿಂಗ್ ಅವರು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಭಾರತದ ಹೆಸರನ್ನು ಬೆಳಗಿಸಿದ್ದರು. ಏಷ್ಯನ್ ಕ್ರೀಡಾಕೂಟದಲ್ಲಿ ನಾಲ್ಕು ಬಾರಿ ಚಿನ್ನದ ಪದಕ ಗೆದ್ದಿದ್ದಾರೆ. ಅದೇ ಸಮಯದಲ್ಲಿ, ಅವರು 1958 ರ ಕಾಮನ್​ವೆಲ್ತ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕವನ್ನು ಗೆದ್ದರು. ಆದಾಗ್ಯೂ, ಅವರ ಅತ್ಯುತ್ತಮ ಪ್ರದರ್ಶನವೆಂದರೆ 1960 ರ ರೋಮ್ ಒಲಿಂಪಿಕ್ಸ್‌ನಲ್ಲಿ, ಇದರಲ್ಲಿ ಅವರು 400 ಮೀಟರ್ ಫೈನಲ್‌ನಲ್ಲಿ ನಾಲ್ಕನೇ ಸ್ಥಾನ ಪಡೆದರು. ಅವರು 1956 ಮತ್ತು 1964 ರ ಒಲಿಂಪಿಕ್ಸ್‌ನಲ್ಲಿ ಭಾರತವನ್ನು ಪ್ರತಿನಿಧಿಸಿದರು.

ಮಿಲ್ಖಾ ಸಿಂಗ್ ಯಾವುದೇ ಪ್ರಶಸ್ತಿಗಿಂತ ಮೇಲಿದ್ದಾರೆ ಸೆಕ್ಟರ್ 25 ರ ಸ್ಮಶಾನದಲ್ಲಿ ಮಿಲ್ಖಾ ಸಿಂಗ್ ಅವರನ್ನು ಪೂರ್ಣ ರಾಜ್ಯ ಗೌರವಗಳೊಂದಿಗೆ ಅಂತ್ಯಕ್ರಿಯೆ ಮಾಡಲಾಯಿತು. ಇದರಲ್ಲಿ ಪೊಲೀಸ್ ತಂಡವು ಶ್ರೇಷ್ಠ ಕ್ರೀಡಾಪಟುವಿಗೆ ಗನ್ ಸೆಲ್ಯೂಟ್ ನೀಡಿತು. ಅವರ ಮಗ ಮತ್ತು ಅಂತಾರಾಷ್ಟ್ರೀಯ ಗಾಲ್ಫ್ ಆಟಗಾರ ಜೀವ್ ಮಿಲ್ಖಾ ಸಿಂಗ್ ಅವರು ತಂದೆಯ ಚಿತೆಗೆ ಅಗ್ನಿಸ್ಪರ್ಶ ಮಾಡಿದರು. ಇದೀಗ, ಸೋಷಿಯಲ್ ಮೀಡಿಯಾದಲ್ಲಿ ಅಭಿಮಾನಿಗಳು ಮಿಲ್ಖಾ ಸಿಂಗ್​ ಎಂಬ ಅಪ್ರತಿಮ ಆಟಗಾರನಿಗೆ ಭಾರತ ರತ್ನವನ್ನು ನೀಡಬೇಕೆಂದು ಒತ್ತಾಯಿಸಲು ಪ್ರಾರಂಭಿಸಿದ್ದಾರೆ. ಈ ಪ್ರಶ್ನೆಯನ್ನು ಕ್ರೀಡಾ ಸಚಿವ ಕಿರೆನ್ ರಿಜಿಜು ಅವರಿಗೆ ಕೇಳಲಾಯಿತು. ನಮ್ಮ ಪೀಳಿಗೆಗೆ ಮಿಲ್ಖಾ ಸಿಂಗ್ ಐಕಾನ್. ಅವರ ಧೈರ್ಯವು ಯಾವುದೇ ಪ್ರಶಸ್ತಿಗಿಂತ ಮೇಲಿರುತ್ತದೆ ಎಂಬ ಉತ್ತರವನ್ನು ಅವರು ನೀಡಿದರು.

ಮಿಲ್ಖಾ ದೇಶಕ್ಕಾಗಿ ಅನೇಕ ದಾಖಲೆಗಳನ್ನು ಮಾಡಿದ್ದಾರೆ 1958 ಮಿಲ್ಖಾ ಅವರ ವೃತ್ತಿಜೀವನದ ಅತ್ಯುತ್ತಮ ವರ್ಷ. ಇದರ ನಂತರ, 1959 ರಲ್ಲಿ, ಅವರು ಅನೇಕ ಯುರೋಪಿಯನ್ ಸ್ಪರ್ಧೆಗಳನ್ನು ಗೆದ್ದರು. ಅವರು 1960 ರ ರೋಮ್ ಒಲಿಂಪಿಕ್ಸ್‌ಗೆ ತಯಾರಾಗುತ್ತಿದ್ದರು. ಇಲ್ಲಿ ಅವರು ಗೆಲ್ಲಲು ಸಾಧ್ಯವಾಗಲಿಲ್ಲ, ಆದರೆ 45.73 ಸೆಕೆಂಡುಗಳ ಸಮಯವನ್ನು ತೆಗೆದುಕೊಳ್ಳುವ ಮೂಲಕ ಅವರು 400 ಮೀಟರ್ ಹೊಸ ರಾಷ್ಟ್ರೀಯ ದಾಖಲೆಯನ್ನು ಸ್ಥಾಪಿಸಿದರು. 1962 ರ ಜಕಾರ್ತಾ ಏಷ್ಯನ್ ಕ್ರೀಡಾಕೂಟದಲ್ಲಿ ಇನ್ನೂ ಎರಡು ಚಿನ್ನದ ಪದಕಗಳನ್ನು ಗೆದ್ದಿದ್ದಾರೆ. ಆ ವರ್ಷದ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ನಲ್ಲಿ ಮಖಾನ್, ಮಿಲ್ಖಾ ಅವರನ್ನು ಸೋಲಿಸಿದ್ದರು.

ಇದನ್ನೂ ಓದಿ: Milkha Singh: ಮಿಲ್ಖಾ ಸಿಂಗ್​ಗಿಂತ ಐದು ದಿನ ಮುಂಚೆ ಪತ್ನಿ ನಿರ್ಮಲ್ ಕೌರ್ ನಿಧನ; ಇವರಿಬ್ಬರ ಪ್ರೇಮಕಥೆಯನ್ನು ಕೇಳಿದ್ದೀರಾ?