ವರ್ಷಕ್ಕೆ 1,248 ಕೋಟಿ ರೂ: ಅಲ್​ ಹಿಲಾಲ್ ಕ್ಲಬ್​ ಜೊತೆ ನೇಮರ್ ಒಪ್ಪಂದ

ಬ್ರೆಝಿಲ್​ನ ಖ್ಯಾತ ಫುಟ್​ಬಾಲ್ ಆಟಗಾರ ನೇಮರ್ ಜೂನಿಯರ್ ಸೌದಿ ಅರೇಬಿಯಾದ ಅಲ್​ ಹಿಲಾಲ್ ಕ್ಲಬ್​ ಪರ ಕಣಕ್ಕಿಳಿಯುವುದು ಖಚಿತವಾಗಿದೆ. ಮಂಗಳವಾರ ನೇಮರ್ ಹಾಗೂ ಕ್ಲಬ್ ಜೊತೆ ಒಪ್ಪಂದವಾಗಿದ್ದು, ಅದರಂತೆ ಮುಂದಿನ 2 ವರ್ಷಗಳ ಕಾಲ ಬ್ರೆಝಿಲ್ ತಾರೆ ಅಲ್ ಹಿಲಾಲ್ ಪರ ಕಣಕ್ಕಿಳಿಯಲಿದ್ದಾರೆ.

ಈ ಹಿಂದೆ ನೇಮರ್​ ಫ್ರಾನ್ಸ್​ನ ಪ್ಯಾರಿಸ್ ಸೇಂಟ್-ಜರ್ಮೈನ್ (PSG) ಪರ ಕಣಕ್ಕಿಳಿಯುತ್ತಿದ್ದರು. ಆದರೆ ಈ ಬಾರಿ ಪಿಎಸ್​ಜಿ ಜೊತೆಗಿನ ಒಪ್ಪಂದವನ್ನು ಕೊನೆಗೊಳಿಸಲು ಅವರು ನಿರ್ಧರಿಸಿದ್ದರು. ಹೀಗಾಗಿ ಪ್ಯಾರಿಸ್ ಸೇಂಟ್ ಜರ್ಮೈನ್ ಕ್ಲಬ್ ಅವರನ್ನು ಟ್ರಾನ್ಸ್​ಫರ್ ಮಾಡಲು ನಿರ್ಧರಿಸಿತ್ತು.

ಅದರಂತೆ ಇದೀಗ ಸೌದಿ ಅರೇಬಿಯಾದ ಅಲ್ ಹಿಲಾಲ್ ಹಾಗೂ ಪ್ಯಾರಿಸ್ ಸೇಂಟ್-ಜರ್ಮೈನ್ ನಡುವೆ ವರ್ಗಾವಣೆ ಡೀಲ್ ಕುದುರಿದೆ. ಅಲ್ಲದೆ ವರ್ಗಾವಣೆ ಮೊತ್ತವಾಗಿ ಪಿಎಸ್​ಜಿಗೆ ಅಲ್​ ಹಿಲಾಲ್ ಕ್ಲಬ್​ ಸುಮಾರು 100 ಮಿಲಿಯನ್ ಯುರೋ ನೀಡಲಿದೆ ಎಂದು ವರದಿಯಾಗಿದೆ.

2497 ಕೋಟಿ ರೂ.ಗೆ ನೇಮರ್ ಡೀಲ್:

ಹೊಸ ಒಪ್ಪಂದಂತೆ ನೇಮರ್ ಮುಂದಿನ 2 ವರ್ಷಗಳ ಕಾಲ ಅಲ್ ಹಿಲಾಲ್ ಪರ ಕಣಕ್ಕಿಳಿಯಲಿದ್ದಾರೆ. ಇದಕ್ಕಾಗಿ ಬ್ರೆಝಿಲ್ ತಾರೆ ಜೊತೆ ಅಲ್ ಹಿಲಾಲ್ ಕ್ಲಬ್​ 300 ಮಿಲಿಯನ್ ಡಾಲರ್​ನ ಒಪ್ಪಂದ ಮಾಡಿಕೊಂಡಿದೆ. ಅಂದರೆ ಭಾರತೀಯ ಮೌಲ್ಯ ಸುಮಾರು 24,970,496,700 ರೂ.

ವಾರ್ಷಿಕ ಮೊತ್ತದ ಜೊತೆ ಬೋನಸ್:

ಅಲ್​ ಹಿಲಾಲ್ ಜೊತೆಗಿನ ಒಪ್ಪಂದ ಪ್ರಕಾರ, ನೇಮರ್ ವರ್ಷಕ್ಕೆ 1248+ ಕೋಟಿ ರೂ. ಪಡೆಯಲಿದ್ದಾರೆ. ಇದರ ಜೊತೆಗೆ ಇತರೆ ಜಾಹೀರಾತು ಹಾಗೂ ವಾಣಿಜ್ಯ ವ್ಯವಹಾರಗಳಿಂದ ಗಳಿಸುವ ಆದಾಯದಿಂದ ಕ್ಲಬ್​ ಬೋನಸ್ ಮೊತ್ತವನ್ನು ಸಹ ನೀಡಲಿದೆ.

ಅಂದರೆ ನೇಮರ್ ಇನ್ನೆರಡು ವರ್ಷಗಳ ಕಾಲ ಅಲ್ ಹಿಲಾಲ್ ಕ್ಲಬ್​ನಿಂದ ಪ್ರತಿ ತಿಂಗಳು 104 ಕೋಟಿ ರೂ. ಸಂಭಾವನೆ ಪಡೆಯಲಿದ್ದಾರೆ. ಆದರೆ ಇದು ಕ್ರಿಸ್ಟಿಯಾನೊ ರೊನಾಲ್ಡೊಗಿಂತ ಕಡಿಮೆ ಎಂಬುದು ಇಲ್ಲಿ ಉಲ್ಲೇಖಾರ್ಹ.

ಕೋಟಿಗಳಿಸುತ್ತಿರುವ ಕ್ರಿಸ್ಟಿಯಾನೊ:

ಸೌದಿ ಅರೇಬಿಯಾದ ಅಲ್​ ನಾಸ್ರ್ ಪರ ಆಡುತ್ತಿರುವ ಪೋರ್ಚುಗಲ್ ತಾರೆ ಕ್ರಿಸ್ಟಿಯಾನೊ ರೊನಾಲ್ಡೊ ಪಡೆಯುತ್ತಿರುವ ವಾರ್ಷಿಕ ವೇತನ ಬರೋಬ್ಬರಿ 1,770 ಕೋಟಿ ರೂ. ಅಂದರೆ CR7 ಅವರ ಪ್ರತಿ ತಿಂಗಳ ಸಂಭಾವನೆ 147 ಕೋಟಿ ರೂ.

ಪಿಎಸ್​ಜಿ ಪರ ಮಿಂಚಿದ್ದ ನೇಮರ್:

2017 ರಲ್ಲಿ ಸ್ಪೇನ್​ನ ಖ್ಯಾತ ಫುಟ್​ಬಾಲ್ ಕ್ಲಬ್ ಬಾರ್ಸಿಲೋನಾ ತಂಡದಲ್ಲಿದ್ದ ನೇಮರ್ ಅವರನ್ನು ಟ್ರಾನ್ಸ್​ಫರ್ ಆಯ್ಕೆಯ ಮೂಲಕ ಪ್ಯಾರಿಸ್ ಸೇಂಟ್-ಜರ್ಮೈನ್ ಖರೀದಿಸಿತ್ತು. ಆ ಬಳಿಕ 6 ವರ್ಷಗಳ ಕಾಲ ಪಿಎಸ್​ಜಿ ಗೆಲುವಿನಲ್ಲಿ ಬ್ರೆಝಿಲ್ ತಾರೆ ಪ್ರಮುಖ ಪಾತ್ರವಹಿಸಿದ್ದರು. ಈ ವೇಳೆ ಆಡಿದ್ದ 173 ಪಂದ್ಯಗಳಲ್ಲಿ 118 ಗೋಲುಗಳನ್ನು ಬಾರಿಸಿದ್ದಲ್ಲದೆ, 77 ಬಾರಿ ಇತರೆ ಆಟಗಾರರು ಗೋಲುಗಳಿಸುವಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.

ಇದನ್ನೂ ಓದಿ: ಭಾರತ ವಿಶ್ವಕಪ್ ತಂಡದಿಂದ 7 ಆಟಗಾರರು ಔಟ್..!

ಇದಕ್ಕೂ ಮುನ್ನ ಬಾರ್ಸಿಲೋನಾ ಪರ 186 ಪಂದ್ಯಗಳಲ್ಲಿ 105 ಗೋಲುಗಳಿಸಿದ್ದರು. ಹಾಗೆಯೇ 76 ಬಾರಿ ಅಸಿಸ್ಟ್ ಮಾಡಿದ್ದರು. ಇದೀಗ ತಮ್ಮ 31ನೇ ವಯಸ್ಸಿನಲ್ಲಿ ಸೌದಿ ಅರೇಬಿಯಾ ಕ್ಲಬ್​ನತ್ತ ಮುಖ ಮಾಡಿರುವ ನೇಮರ್ ಅರಬ್ಬರ ನಾಡಿನಲ್ಲಿ ಮೋಡಿ ಮಾಡುವ ವಿಶ್ವಾಸದಲ್ಲಿದ್ದಾರೆ.