Monu Goyat: ಎಂಥಾ ರೋಚಕ ಪಂದ್ಯ: ಒಂದೇ ರೇಡ್ನಲ್ಲಿ ಎಲ್ಲರನ್ನೂ ಆಲೌಟ್ ಮಾಡಿದ ಪಟ್ನಾ ಪೈರೇಟ್ಸ್ ರೇಡರ್
Pro Kabaddi League: ಆರಂಭದಲ್ಲಿ ಉಭಯ ತಂಡಗಳು ಸಮಬಲದ ಪೈಪೋಟಿ ನಡೆಸಿದವು. ಮೋನು ಮತ್ತು ಸಚಿನ್‌ ಪಟ್ನಾ ಪೈರೇಟ್ಸ್‌ಗೆ ಮತ್ತು ಮಣಿಂದರ್ ಸಿಂಗ್ ಬೆಂಗಾಲ್‌ಗೆ ಪಾಯಿಂಟ್‌ಗಳನ್ನು ಗಳಿಸಿಕೊಟ್ಟರು. ಮೋನು ಗೋಯಟ್ 16 ರೇಡ್ಗಳಿಂದ 15 ಅಂಕ ಗಳಿಸಿದರು.
Updated on: Jan 01, 2022 | 7:22 AM
ಎಂಟನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ (Pro Kabaddi League) ದಿನದಿಂದ ದಿನಕ್ಕೆ ರೋಚಕತೆ ಪಡೆಯುತ್ತಿದೆ. ಪ್ರತಿಯೊಂದು ಪಂದ್ಯ ಕೂಡ ಪ್ರೇಕ್ಷಕರನ್ನು ತುದಿಗಾಲಿನಲ್ಲಿ ನಿಲ್ಲಿಸುವಂತೆ ಮಾಡುತ್ತಿದೆ. ಅದರಂತೆ ಶುಕ್ರಾವರ ನಡೆದ ಎರಡು ಪಂದ್ಯ ಕೂಡ ಕುತೂಹಲ ಕೆರಳಿಸಿತ್ತು. ಇದರಲ್ಲಿ ಪಟ್ನಾ ಪೈರೇಟ್ಸ್ (Patna Pirates) ಮತ್ತು ತಮಿಳ್ ತಲೈವಾಸ್ (Tamil Thalaivas) ತಂಡಗಳು ಗೆಲುವು ಸಾಧಿಸಿದವು. ಅದರಲ್ಲೂ ಪಟ್ನಾ ತಂಡದ ರೇಡರ್ ಮೋನು ಗೋಯಟ್ (Monu Goyat) ಹಾಲಿ ಚಾಂಪಿಯನ್ ಬೆಂಗಾಲ್ ವಾರಿಯರ್ಸ್ ಅನ್ನು ಒಂದೇ ರೇಡ್ನಲ್ಲಿ ಆಲೌಟ್ ಮಾಡಿದ್ದು ಎಲ್ಲರ ಹುಬ್ಬೇರುವಂತೆ ಮಾಡಿತು. ಒಂದೇ ದಾಳಿಯಲ್ಲಿ ಏಳು ಅಂಕಗಳನ್ನು ಗಳಿಸಿದರು. ಒಟ್ಟು 15 ಪಾಯಿಂಟ್ಸ್ ಕಲೆಹಾಕಿದ ಪಾಟ್ನ ಪೈರೇಟ್ಸ್ ಬೆಂಗಾಲ್ ವಾರಿಯರ್ಸ್ (Bengal Warriors) ವಿರುದ್ಧ 43-29 ಅಂತರದಲ್ಲಿ ಗೆಲುವು ಸಾಧಿಸಿತು.
ಆರಂಭದಲ್ಲಿ ಉಭಯ ತಂಡಗಳು ಸಮಬಲದ ಪೈಪೋಟಿ ನಡೆಸಿದವು. ಮೋನು ಮತ್ತು ಸಚಿನ್‌ ಪಟ್ನಾ ಪೈರೇಟ್ಸ್‌ಗೆ ಮತ್ತು ಮಣಿಂದರ್ ಸಿಂಗ್ ಬೆಂಗಾಲ್‌ಗೆ ಪಾಯಿಂಟ್‌ಗಳನ್ನು ಗಳಿಸಿಕೊಟ್ಟರು. ಕೊನೆಯಲ್ಲಿ ಮೋನು, ಸಚಿನ್‌ ಆಟ ಫಲ ಕಂಡಿತು. ಮೋನು ಗೋಯಟ್ 16 ರೇಡ್ಗಳಿಂದ 15 ಅಂಕ ಗಳಿಸಿದರು. ಆದರೆ, ಅವರ ರೇಡ್ಗಳಲ್ಲಿ ಬೆರಗಾಗಿಸಿದ್ದು ಅವರ ಕೊನೆಯ ರೇಡ್. ಪಟ್ನಾ ಗೆಲುವು ಬಹುತೇಕ ಖಚಿತವಾಗಿದ್ದ ಸಮಯದಲ್ಲಿ ರೇಡಿಂಗ್ ಮಾಡಿದ ಮೋನು ಗೋಯಟ್ ಎದುರಾಳಿ ಅಂಗಳದ ಎಲ್ಲಾ ಏಳು ಮಂದಿಯನ್ನ ಔಟ್ ಮಾಡಿ ಬಂದರು.
ತಂಡಕ್ಕಾಗಿ ಸುನಿಲ್ 4 ಮತ್ತು ಪ್ರಶಾಂತ್ 3 ಪಾಯಿಂಟ್ ಗಳಿಸಿದರು. ಬೆಂಗಾಲ್ ಪರ ಮಣಿಂದರ್ ಸೂಪರ್ ಟೆನ್ (12 ಪಾಯಿಂಟ್) ಸಾಧನೆ ಮಾಡಿದರೆ ಅಮಿತ್‌ ನರ್ವಾಲ್ 5, ಸುಕೇಶ್ ಹೆಗ್ಡೆ ಮತ್ತು ಅಬೊಜರ್ ತಲಾ 3 ಪಾಯಿಂಟ್ ಗಳಿಸಿದರು. ಅಂತಿಮವಾಗಿ ಪಟ್ನಾ 44-30ರಲ್ಲಿ ಬೆಂಗಾಲ್ ವಾರಿಯರ್ಸ್ ತಂಡವನ್ನು ಮಣಿಸಿತು.
ಇತ್ತ ಮತ್ತೊಂದು ಪಂದ್ಯದಲ್ಲಿ ಎಂಟನೇ ಪ್ರೊ ಕಬಡ್ಡಿ ಆವೃತ್ತಿಯಲ್ಲಿ ತಮಿಳ್ ತಲೈವಾಸ್ ಮೊದಲ ಗೆಲುವು ಸಾಧಿಸಿತು. ಪುನೇರಿ ಪಲ್ಟಾನ್‌ ವಿರುದ್ಧ 36-26 ಅಂಕಗಳಿಂದ ಗೆದ್ದು ಬಂದಿತು. 4 ಪಂದ್ಯಗಳನ್ನಾಡಿರುವ ತಲೈವಾಸ್ ಎರಡನ್ನು ಟೈ ಮಾಡಿಕೊಂಡು, ಒಂದರಲ್ಲಿ ಸೋಲನುಭವಿಸಿತ್ತು. ತಲೈವಾಸ್ ಮೇಲುಗೈಯಲ್ಲಿ ರೈಡರ್‌ ಮನ್‌ಜೀತ್ ಸಾಹಸ ಮಹತ್ವದ್ದಾಗಿತ್ತು. ಅವರು 17 ರೈಡ್‌ ನಡೆಸಿ ಸರ್ವಾಧಿಕ 8 ಅಂಕ ತಂದಿತ್ತರು. 5 ಟಚ್‌ ಪಾಯಿಂಟ್ ಮತ್ತು 3 ಬೋನಸ್‌ ಪಾಯಿಂಟ್ ಇದರಲ್ಲಿ ಸೇರಿತ್ತು. 17ರಲ್ಲಿ 5 ರೈಡ್‌ ಯಶಸ್ವಿಯಾಗಿತ್ತು.
ಮನ್‌ಜೀತ್ ಹೊರತುಪಡಿಸಿದರೆ ನಾಯಕನೂ ಆಗಿರುವ ಡಿಫೆಂಡರ್‌ ಸುರ್ಜೀತ್‌ ಸಿಂಗ್ 3 ಅಂಕ ಗಳಿಸಿದರು. ಡಿಫೆಂಡರ್‌ಗಳಾದ ಸಾಗರ್‌ ಮತ್ತು ಸಾಹಿಲ್‌ ತಲಾ 2 ಅಂಕ ಕೊಡಿಸಿದರು. ವಿರಾಮದ ವೇಳೆ 18-11 ಮುನ್ನಡೆಯಲ್ಲಿದ್ದ ತಮಿಳ್ ತಲೈವಾಸ್ ಆಗಲೇ ಗೆಲುವಿನ ಸೂಚನೆ ನೀಡಿತ್ತು.
ಅತ್ತ ಪುಣೇರಿ ಪಲ್ಟಾನ್ಸ್ ತಂಡದ ಸ್ಟಾರ್ ರೇಡರ್ ರಾಹುಲ್ ಚೌಧರಿ ಈ ಪಂದ್ಯದಲ್ಲಿ ಮಂಕಾಗಿ ಹೋಗಿದ್ದರು. ಪಂಕಜ್ ಮೋಹಿತೆ ಮತ್ತು ಅಸ್ಲಮ್ ಒಂದಷ್ಟು ರೇಡಿಂಗ್ ಪಾಯಿಂಟ್ಸ್ ಗಿಟ್ಟಿಸಿದರು. ಪುಣೆ ಡಿಫೆನ್ಸ್ನಲ್ಲಿ ಅಬಿನೇಶ್ ನಡರಾಜನ್ ಮತ್ತು ವಿಶಾಲ್ ಭಾರದ್ವಜ್ ಮಿಂಚಿದರು.
IND vs SA: ಗೆಲುವಿನ ಸಂಭ್ರಮದಲ್ಲಿರುವ ಭಾರತಕ್ಕೆ ದಂಡದ ಬರೆ! ಡಬ್ಲ್ಯುಟಿಸಿ ಪಾಯಿಂಟ್ಗೂ ಕತ್ತರಿ ಹಾಕಿದ ಐಸಿಸಿ
(Monu Goyat unthinkable he scored a mammoth seven points in a single raid and Tamil Thalaivas maiden win in Pro Kabaddi League)
