India vs England Test Series: ರವೀಂದ್ರ ಜಡೇಜಾರ ಹೆಬ್ಬಟ್ಟಿನ ಗಾಯ ಮಾಯಲು ಎರಡು ತಿಂಗಳು ಬೇಕೇ; ಗಾವಸ್ಕರ್ ಪ್ರಶ್ನೆ
ಭಾರತ ಸ್ವದೇಶಕ್ಕೆ ವಾಪಸ್ಸಾದ ನಂತರ ಇಂಗ್ಲೆಂಡ್ ವಿರುದ್ಧ ಆರಂಭವಾದ ಟೆಸ್ಟ್ ಸರಣಿಗೆ ಜಡೇಜಾ ಇನ್ನೂ ಸಂಪೂರ್ಣವಾಗಿ ಚೇತರಿಸಿಕೊಂಡಿರದಿದ್ದ ಕಾರಣ ಒಬ್ಬ ಎಡಗೈ ಸ್ಪಿನ್ನರ್ನ ಅವಶ್ಯಕತೆಯಿತ್ತು. ಹಾಗಾಗೇ, ಬರೋಡಾದ ನೀಳಕಾಯದ ಎಡಗೈ ಸ್ಪಿನ್ನರ್ ಅಕ್ಷರ್ ಪಟೇಲ್ ತಂಡದಲ್ಲಿ ಸ್ಥಾನ ಪಡೆದರು
Updated on:Mar 02, 2021 | 7:41 PM
ಆಸ್ಟ್ರೇಲಿಯಾ ವಿರುದ್ಧ ಭಾರತ ತಂಡವು ಐತಿಹಾಸಿಕ ಟೆಸ್ಟ್ ಸರಣಿ ಗೆಲುವು ಸಾಧಿಸಲು ಮತ್ತು ಸೀಮಿತ ಓವರುಗಳ ಸರಣಿಗಳಲ್ಲೂ ಭಾರತ ಉತ್ತಮ ಪ್ರದರ್ಶನಗಳನ್ನು ನೀಡಲು ರವೀಂದ್ರ ಜಡೇಜಾ ಉಳಿದವರಿಗಿಂತ ಸ್ವಲ್ಪ ಜಾಸ್ತಿಯೇ ಕೊಡುಗೆ ನೀಡಿದರು ಅಂತ ಹೇಳಿದರೆ ಉತ್ಪ್ರೇಕ್ಷೆಯೆನಿಸದು. ಬ್ಯಾಟಿಂಗ್ ಮತ್ತು ಬೌಲಿಂಗ್- ಎರಡಲ್ಲೂ ಅವರು ಮಿಂಚಿದರು. 2019ರ ಐಸಿಸಿ ವಿಶ್ವಕಪ್ ನಂತರ ಅವರು ಟೀಮಿನ ಅವಿಭಾಜ್ಯ ಅಂಗವಾಗಿರುವುದು ಸುಳ್ಳಲ್ಲ. ಸಮಾರು ಎರಡು ತಿಂಗಳುಗಳಿಂದ ಅವರು ಹೆಬ್ಬಟ್ಟಿನ ಗಾಯದಿಂದಾಗಿ ಕ್ರಿಕೆಟ್ ಮೈದಾನದಿಂದ ದೂರವಿದ್ದರೂ ಐಸಿಸಿ ಬಿಡುಗಡೆ ಮಾಡಿರುವ ಅಲ್ರೌಂಡರ್ಗಳ ರ‍್ಯಾಕಿಂಗ್ನಲ್ಲಿ ಅವರು ಎರಡನೇ ಸ್ಥಾನದಲ್ಲಿದ್ದಾರೆ. ಆಸ್ಟ್ರೇಲಿಯಾ ವಿರುದ್ಧ ಸಿಡ್ನಿಯಲ್ಲಿ ನಡೆದ ಮೂರನೇ ಟೆಸ್ಟ್ನಲ್ಲಿ ಹೆಬ್ಬಟ್ಟಿಗೆ ಮಾಡಿಕೊಂಡು ಟೀಮಿನಿಂದ ಹೊರಬಿದ್ದಾಗ ಅವರ ಸ್ಥಾನದಲ್ಲಿ ಯಾರನ್ನಾಡಿಸುವುದು, ಅವರಿಗೆ ಸಮನಾದ ಬದಲೀ ಆಟಗಾರ ಯಾರು ಸಿಕ್ಕಾರು ಅಂತ ಟೀಮ್ ಇಂಡಿಯಾ ಮತ್ತು ಭಾರತದ ಕ್ರಿಕೆಟ್ ಪ್ರೇಮಿಗಳು ಆತಂಕಕ್ಕೊಳಗಾಗಿದ್ದರು.
ಆದರೆ, ಅವರ ಸ್ಥಾನದಲ್ಲಿ ಆಸ್ಟ್ರೇಲಿಯಾದಲ್ಲಿ ಅಡಿದ ವಾಷಿಂಗ್ಟನ್ ಸುಂದರ್ ನಿರಾಶೆಗೊಳಿಸಲಿಲ್ಲ. ತಮಿಳುನಾಡಿನ ಈ ಆಟಗಾರ ಬ್ಯಾಟಿಂಗ್ನಲ್ಲಿ ಜಾಸ್ತಿ ಮಿಂಚಿದರೂ ಉತ್ತಮ ಬೌಲಿಂಗ್ ಅಕ್ರಮಣ ನಡೆಸಿದರು. ಸ್ವದೇಶಕ್ಕೆ ವಾಪಸ್ಸಾದ ನಂತರ ಇಂಗ್ಲೆಂಡ್ ವಿರುದ್ಧ ಆರಂಭವಾದ ಟೆಸ್ಟ್ ಸರಣಿಗೆ ಜಡೇಜಾ ಇನ್ನೂ ಸಂಪೂರ್ಣವಾಗಿ ಚೇತರಿಸಿಕೊಂಡಿರದಿದ್ದ ಕಾರಣ ಒಬ್ಬ ಎಡಗೈ ಸ್ಪಿನ್ನರ್ನ ಅವಶ್ಯಕತೆಯಿತ್ತು. ಹಾಗಾಗೇ, ಬರೋಡಾದ ನೀಳಕಾಯದ ಎಡಗೈ ಸ್ಪಿನ್ನರ್ ಅಕ್ಷರ್ ಪಟೇಲ್ ತಂಡದಲ್ಲಿ ಸ್ಥಾನ ಪಡೆದರು.
ತಮಗೆ ದೊರೆತ ಅವಕಾಶವನ್ನು ಪಟೇಲ್ ಉಪಯೋಗಿಸಿಕೊಂಡಿದ್ದಾದರೂ ಹೇಗೆ? ಎರಡು ಟೆಸ್ಟ್ಗಳಲ್ಲಿ ಮೂರು ಬಾರಿ 5 ವಿಕೆಟ್ ಪಡೆಯುವ ಸಾಧನೆ ! ಯಾವ ಬೌಲರ್ ತಾನೆ ಇಂಥ ಆರಂಭ ಟೆಸ್ಟ್ ಕ್ರಿಕೆಟ್ನಲ್ಲಿ ಸಿಕ್ಕೀತೆಂದು ಕನಸು ಕಂಡಾನು? ಸುಂದರ್ ಮತ್ತು ಅಕ್ಷರ್ ತಮಗೆ ನೀಡಿದ ಅವಕಾಶಗಳನ್ನು ಸಮರ್ಥವಾಗಿ ಬಳಸಿಕೊಂಡು ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಬಾಳಲು ಬಂದಿದ್ದೇವೆ ಎನ್ನುವುದನ್ನು ಸಾಬೀತು ಮಾಡಿದ್ದಾರೆ.
ಅಕ್ಷರ್ ಪಟೇಲ್
ಪರಿಸ್ಥಿತಿ ಹೀಗಿರುವಾಗ ಜಡೇಜಾ ಗತಿಯೇನು? ಅವರು ಟೀಮಿಗೆ ವಾಪಸ್ಸಾಗುವುದು ಯಾವಾಗ? ಅವರ ಗಾಯ ಇನ್ನೂ ವಾಸಿಯಾಗಿಲ್ಲವೇ ಎಂಬ ಪ್ರಶ್ನೆಗಳು ಮೂಡುವುದು ಸಹಜ. ಇದೇ ಪ್ರಶ್ನೆಯನ್ನು ಭಾರತದ ಮಾಜಿ ಲೆಜಂಡರಿ ಆರಂಭ ಆಟಗಾರ ಸುನಿಲ್ ಗವಾಸ್ಕರ್ ಅವರನ್ನು ಕೇಳಿದಾಗ ಗಲಿಬಿಲಿಗೊಳಗಾದರು. ಕ್ರೀಡಾ ಚಾನೆಲ್ನಲ್ಲಿ ಕ್ರಿಕೆಟ್ ಬಗ್ಗೆ ಮಾತುಕತೆ ನಡೆಯುತ್ತಿದ್ದ ಸಮಯದಲ್ಲಿ ಈ ಪ್ರಶ್ನೆಯನ್ನು ಅವರ ಮುಂದಿಡಲಾಗಿತ್ತು.
‘ತನ್ನ ಹೆಬ್ಬಟ್ಟಿಗೆ ಅಂಥದ್ದೇನಾಗಿರಬಹುದೆಂದು ಜಡೇಜಾ ಯೋಚಿಸುತ್ತಿಬಹುದು. ಹೆಬ್ಬಟ್ಟಿಗಾದ ಗಾಯ ಮಾಯಲು ಎರಡು ತಿಂಗಳು ಬೇಕೇ? ಅಬ್ಬಾ ನಾ ಕಾಣೆ! ನಿಮಗೆ ನೆನಪಿರಬಹುದು, ಅವರು (ಜಡೇಜಾ) ಗಾಯಗೊಂಡಿದ್ದು ಜನೆವರಿ 10 ರಂದು. ಆಂದರೆ, ಅದು ಸಂಭವಿಸಿ ಹೆಚ್ಚು ಕಡಿಮೆ ಎರಡು ತಿಂಗಳಾಗಿದೆ, ಅವರ ಗಾಯದ ಸ್ವರೂಪ ನನಗಂತೂ ಅರ್ಥವಾಗುತ್ತಿಲ್ಲ’ ಎಂದು ಸನ್ನಿ ಹೇಳಿದರು.
ಅದೇ ಚರ್ಚೆಯಲ್ಲಿ ಭಾಗಿಯಾಗಿದ್ದ ಇಂಗ್ಲೆಂಡ್ನ ಮಾಜಿ ಸ್ಪಿನ್ನರ್ ಮತ್ತು ಈಗ ಕಾಮೆಂಟರಿ ಪ್ಯಾನೆಲ್ನಲ್ಲಿರುವ ಗ್ರಹಾಂ ಸ್ವ್ಯಾನ್ ಅವರು ಅಕ್ಷರ್ ಇಂಗ್ಲೆಂಡ್ ತಂಡಕ್ಕೆ ಸಾಕಷ್ಟು ಹಾನಿ ಮಾಡಿಯಾಗಿದೆ. ಅವರೀಗ ರಜೆ ಮೇಲೆ ಹೋಗುವುದು ಒಳಿತು ಎಂದಿದ್ದಾರೆ.
‘ನೀವೇನೇ ಹೇಳಿ, ನಾನಂತೂ ಜಡೇಜಾ ಅವರ ಅತಿದೊಡ್ಡ ಫ್ಯಾನ್, ಅಕ್ಸರ್ ಪಟೇಲ್ ಪರ್ಫಾರ್ಮ್ ಮಾಡುತ್ತಿರುವುದನ್ನು ನೋಡಿದರೆ, ಅವರು ಒಂದು ವಾರದ ಮಟ್ಟಿಗೆ ರಜೆ ಮೇಲೆ ಹೋಗಬೇಕು, ಹಾಗಾದರೆ ಮಾತ್ರ ಜಡೇಜಾಗೆ ಆಡುವ ಅವಕಾಶ ಸಿಗುತ್ತದೆ. ಮತ್ತೊಂದು ಐಡಿಯಾ ನನಗೆ ಹೊಳೆಯುತ್ತಿದೆ. ಜಡೇಜಾ ಅವರು ಇಂಗ್ಲೆಂಡ್ ಪರ ಆಡಬಹುದು!’ ಎಂದು ಸ್ವ್ಯಾನ್ ಹೇಳಿದ್ದಾರೆ.
Published On - 7:40 pm, Tue, 2 March 21
