RCB vs RR: ರಾಜಸ್ಥಾನ್ ರಾಯಲ್ಸ್ ವಿರುದ್ಧ ಆರ್ಸಿಬಿ ಗೆಲ್ಲೋದಕ್ಕೆ ಇಲ್ಲಿದೆ ಪ್ರಮುಖ ಮೂರು ಕಾರಣಗಳು
ಕನ್ನಡಿಗ ದೇವದತ್ ಪಡಿಕಲ್ ಶತಕ ಹಾಗೂ ನಾಯಕ ವಿರಾಟ್ ಕೊಹ್ಲಿ ಅದ್ಭುತ ಅರ್ಧ ಶತಕದ ನೆರವಿನಿಂದ ರಾಜಸ್ಥಾನ್ ನೀಡಿದ್ದ 178 ರನ್ಗಳ ಗುರಿಯನ್ನು ಆರ್ಸಿಬಿ ಕೇವಲ 16.3 ಓವರ್ಗಳಲ್ಲೇ ಪೂರ್ಣಗೊಳಿಸಿದೆ.
ಗುರುವಾರ (ಏಪ್ರಿಲ್ 22) ನಡೆದ ಪಂದ್ಯದಲ್ಲಿ ರಾಜಸ್ಥಾನ್ ರಾಯಲ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ 10 ವಿಕೆಟ್ಗಳ ಅದ್ಭುತ ಗೆಲುವು ಸಾಧಿಸಿದೆ. ಕನ್ನಡಿಗ ದೇವದತ್ ಪಡಿಕ್ಕಲ್ ಶತಕ ಹಾಗೂ ನಾಯಕ ವಿರಾಟ್ ಕೊಹ್ಲಿ ಅದ್ಭುತ ಅರ್ಧ ಶತಕದ ನೆರವಿನಿಂದ ರಾಜಸ್ಥಾನ್ ನೀಡಿದ್ದ 178 ರನ್ಗಳ ಗುರಿಯನ್ನು ಆರ್ಸಿಬಿ ಕೇವಲ 16.3 ಓವರ್ಗಳಲ್ಲೇ ಪೂರ್ಣಗೊಳಿಸಿದೆ. ಇಂದಿನ ಗೆಲುವಿನಲ್ಲಿ ಮೂರು ವಿಚಾರಗಳು ಪ್ರಮುಖ ಎನಿಸಿವೆ. ಆ ಬಗ್ಗೆ ಇಲ್ಲಿದೆ ಮಾಹಿತಿ.
ಟಾಸ್ ಗೆದ್ದ ಆರ್ಸಿಬಿ
ಮುಂಬೈ ಪಿಚ್ ಬ್ಯಾಟಿಂಗ್ ಪಿಚ್. ಅಷ್ಟೇ ಅಲ್ಲ, ಇಲ್ಲಿ ಎರಡನೇ ಬ್ಯಾಟಿಂಗ್ಗೆ ಇಳಿದವರಿಗೆ ಗೆಲುವು ಒಲಿದಿದ್ದು ಹೆಚ್ಚು. ಎರಡನೇ ಬ್ಯಾಟಿಂಗ್ ವೇಳೆಗೆ ಪಿಚ್ ಒದ್ದೆ ಆಗಿರುತ್ತದೆ. ಬಾಲ್ ಜಾರುವುದರಿಂದ ಬೌಲರ್ ಅಂದುಕೊಂಡ ಮಟ್ಟಿಗೆ ಬಾಲ್ ಎಸೆಯೋಕೆ ಸಾಧ್ಯ ಆಗುವುದಿಲ್ಲ. ಹೀಗಾಗಿ, ಟಾಸ್ ಗೆದ್ದ ಆರ್ಸಿಬಿ ಬೌಲಿಂಗ್ ಆಯ್ಕೆ ಮಾಡಿಕೊಂಡಿದ್ದು ಮಹತ್ವದ ಪಾತ್ರವಹಿಸಿತ್ತು.
ಆರ್ಸಿಬಿ ಅದ್ಭುತ ಬೌಲಿಂಗ್
ಟಾಸ್ ಗೆದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಮೊದಲು ಬೌಲಿಂಗ್ಗೆ ಇಳಿಯಿತು. ಮೊಹಮದ್ ಸಿರಾಜ್ ಅವರ ಅದ್ಭುತ ಬೌಲಿಂಗ್ ಪ್ರದರ್ಶನದಿಂದ ಆರ್ಆರ್ ಆರಂಭಿಕ ಆಘಾತ ಎದುರಿಸಿತು. ರಾಜಸ್ಥಾನದ ಪ್ರಮುಖ ಬ್ಯಾಟ್ಸ್ಮನ್ಗಳಾದ ಜೋಸ್ ಬಟ್ಲರ್, ಮಿಲ್ಲರ್ ಸೇರಿ ಮೂರು ವಿಕೆಟ್ಗಳನ್ನು ಸಿರಾಜ್ ಪಡೆದರು. ಬ್ಯಾಟಿಂಗ್ ಪಿಚ್ ಆದ ಹೊರತಾಗಿಯೂ ಆರ್ಆರ್ 177 ರನ್ ಮಾತ್ರ ಗಳಿಸಿತ್ತು.
ಪಡಿಕ್ಕಲ್-ಕೊಹ್ಲಿ ಜತೆಯಾಟ
178ರನ್ಗಳ ಬೆನ್ನು ಹತ್ತಿದ ಆರ್ಸಿಬಿ ಉತ್ತಮ ಆರಂಭ ಕಂಡಿತ್ತು. ಕಳೆದ ಎರಡು ಮ್ಯಾಚ್ಗಳಲ್ಲಿ ಸಾಧಾರಣ ಮೊತ್ತದ ಪರ್ಫಾರ್ಮೆನ್ಸ್ ನೀಡಿದ್ದ ದೇವದತ್ತ ಸಿಡಿದೆದ್ದರು. ಈ ಮೂಲಕ ಕೇವಲ 51 ಬಾಲ್ಗಳಲ್ಲಿ ಅವರು ಶತಕ ಬಾರಿಸಿದರು. ಇನ್ನು ವಿರಾಟ್ ಕೊಹ್ಲಿ ಕೂಡ ಅದ್ಭುತ ಪ್ರದರ್ಶನ ನೀಡುವ ಮೂಲಕ ಆರ್ಸಿಬಿಯನ್ನು ಗೆಲುವಿನ ದಡ ತಲುಪಿಸಿದರು.
ಇದನ್ನೂ ಓದಿ: RCB vs RR , IPL 2021 Match 16 Result: ಕೊಹ್ಲಿ- ಪಡಿಕ್ಕಲ್ ಅಮೋಘ ಜೊತೆಯಾಟ; ಆರ್ಸಿಬಿಗೆ 10 ವಿಕೆಟ್ಗಳ ಭರ್ಜರಿ ಗೆಲುವು