Anna Kiesenhofer: ಸೈಕ್ಲಿಂಗ್ನಲ್ಲಿ ಚಿನ್ನ ಬಾಚಿದ ಸೈಂಟಿಸ್ಟ್: ಈಕೆಯ ಜರ್ನಿಯೇ ಅತ್ಯಂತ ರೋಚಕ
Tokyo Olympics: 2004ರ ಬಳಿಕ ಆಸ್ಟ್ರಿಯಾ ಒಲಿಂಪಿಕ್ನಲ್ಲಿ ಯಾವುದೇ ಕ್ರೀಡೆಯಲ್ಲಿ ಒಂದೇ ಒಂದು ಪದಕ ಗೆದ್ದಿರಲಿಲ್ಲ. ಸದ್ಯ ಚಿನ್ನಕ್ಕೆ ಕೊರಳೊಡ್ಡುವ ಮೂಲಕ ಕೀಸೆನ್ ಹೋಫೆರ್ ಹೊಸ ದಾಖಲೆ ಕೂಡ ಬರೆದರು.
Updated on: Jul 31, 2021 | 12:39 PM
ಟೋಕಿಯೋ ಒಲಿಂಪಿಕ್ಸ್ (Tokyo Olympics) 2020 ಸಾಕಷ್ಟು ಹೊಸತನಗಳಿಗೆ ಸಾಕ್ಷಿಯಾಗಿದೆ. ಊಹಿಸಲಾಗದಂತ ಅನೇಕ ಸಂಗತಿಗಳು ನಡೆಯುತ್ತಿವೆ. ಇದೇ ಸಾಲಿಗೆ ಆಸ್ಟ್ರೇಯಾದ ವಿಜ್ಞಾನಿ ಅನ್ನಾ ಕೀಸೆನ್ ಹೊಫೆರ್ (Anna Kiesenhofer) ಎಂಬವಳು ಚಿನ್ನ ಗೆದ್ದ ಸಂಗತಿಯೂ ಸೇರಿದೆ.
ಹೌದು, ಆಸ್ಟ್ರಿಯಾದ ಸೈಂಟಿಸ್ಟ್ ಕೀಸೆನ್ ಹೊಫೆರ್ ಅವರು ಟೋಕಿಯೋ ಒಲಿಂಪಿಕ್ಸ್ನ ಸೈಕ್ಲಿಂಗ್ ರೋಡ್ ರೇಸ್ನಲ್ಲಿ, ಫೇವರಿಟ್ ವೃತ್ತಿಪರ ಸೈಕ್ಲಿಸ್ಟ್ಗಳಿಗೆ ಆಘಾತ ನೀಡಿ ಚಿನ್ನದ ಪದಕ ಗೆದ್ದುಕೊಂಡು ಸುದ್ದಿಯಾಗಿದ್ದಾರೆ. ಅಚ್ಚರಿ ಎಂದರೆ ಇವರು ಕೇವಲ ಸೈಂಟಿಸ್ಟ್ ಮಾತ್ರವಲ್ಲ ಗಣಿತಶಾಸ್ತ್ರ ಪಿಎಚ್ಡಿ ಪದವೀಧರೆ ಕೂಡ ಹೌದು.
ಕ್ಯಾಲಿಫೋರ್ನಿಯಾದ ಪಾಲಿಟೆಕ್ನಿಕ್ ವಿಶ್ವವಿದ್ಯಾನಿಲಯದಲ್ಲಿ ಅನ್ವಯಿಕ ಗಣಿತಶಾಸ್ತ್ರದ ವಿಷಯದಲ್ಲಿ ಇವರು ಪಿಎಚ್ಡಿ ಪಡೆದಿದ್ದಾರೆ. ವಿಯೆನ್ನಾ ಹಾಗೂ ಕ್ಯಾಂಬ್ರಿಡ್ಜ್ ವಿವಿಗಳಲ್ಲೂ ಅಧ್ಯಯನ ಮಾಡಿರುವ 30 ವರ್ಷದ ಮಹಿಳೆ ನ್ಯಾಷನಲ್ ಟೈಮ್ ಟ್ರಯಲ್ ಚಾಂಪಿಯನ್ ಆಗಿ ಹೊರಹೊಮ್ಮಿದ್ದರು.
“ಇದು ನಂಬಲು ಅಸಾಧ್ಯ, ನಾನು ವಿಜಯದ ಗೆರೆ ದಾಟಿದರೂ ನನಗೆ ನಂಬಲು ಸಾಧ್ಯವಾಗಲಿಲ್ಲ” ಎಂದು ಕೀಸೆನ್ ಹೋಫೆರ್ ಸಂಭ್ರಮದ ಕ್ಷಣ ಹಂಚಿಕೊಂಡರು. “ಒಂದು ಕಿಲೋಮೀಟರ್ಗಿಂತ ಕಡಿಮೆ ಇದ್ದಾಗ ನಾನು ದಾಳಿಗೆ ಯೋಜಿಸಿದ್ದೆ ಹಾಗೂ ನಾನು ಮುಂಚೂಣಿಯನ್ನು ಸಾಧಿಸಿದ ಬಗ್ಗೆ ಸಂತಸವಿದೆ. ಆದರೆ ಪೆರೊಟಾನ್ ನಲ್ಲಿ ನಾನು ಉತ್ತಮವಾಗಿ ಸವಾರಿ ಮಾಡದಿದ್ದುದು ಕಡೆಗಣಿಸುವ ವಿಚಾರವಲ್ಲ” ಎಂದು ಹೇಳಿದರು.
ಇನ್ನೂ ಬೆವರಿನಲ್ಲಿ ಮುಳುಗಿದ್ದ ಕೀಸೆನ್ ಹೋಫೆರ್, ವಿಜಯದ ಗೆರೆ ದಾಟಿದ ತಕ್ಷಣವೇ ನಂಬಲಸಾಧ್ಯ ಚಿನ್ನ ಸಾಧಿಸಿದ ಸಂಭ್ರಮದಿಂದ ಚೀರಿಕೊಂಡು ಕುಸಿದುಬಿದ್ದರು.
2004ರ ಬಳಿಕ ಆಸ್ಟ್ರಿಯಾ ಒಲಿಂಪಿಕ್ನಲ್ಲಿ ಯಾವುದೇ ಕ್ರೀಡೆಯಲ್ಲಿ ಒಂದೇ ಒಂದು ಪದಕ ಗೆದ್ದಿರಲಿಲ್ಲ. ಸದ್ಯ ಚಿನ್ನಕ್ಕೆ ಕೊರಳೊಡ್ಡುವ ಮೂಲಕ ಕೀಸೆನ್ ಹೋಫೆರ್ ಹೊಸ ದಾಖಲೆ ಕೂಡ ಬರೆದರು.
ಖ್ಯಾತ ಸೈಕ್ಲಿಂಗ್ ಪಟು ಹಾಲೆಂಡ್ನ ಅನ್ನೆಮಿಕ್ ವಾನ್ ವ್ಲೆಟನ್ ತಾನು ವಿಜಯದ ಗೆರೆ ದಾಟಿದಾಗ ತಾವೇ ಸ್ಪರ್ಧೆಯಲ್ಲಿ ಗೆದ್ದಿರುವುದಾಗಿ ತಪ್ಪುಕಲ್ಪನೆ ಮಾಡಿಕೊಂಡಿದ್ದರು. ಆದರೆ ಅವರು ಬೆಳ್ಳಿಗೆ ತೃಪ್ತಿಪಡಬೇಕಾಯಿತು. ಇಟಲಿಯ ಎಲಿಸಾ ಲೋಂಗೊ ಬೋರ್ಗಿನಿ ಸತತ ಎರಡನೇ ಬಾರಿಗೆ ಕಂಚಿನ ಪದಕ ಗೆದ್ದರು. ಸ್ಪರ್ಧೆಯಲ್ಲಿ ತಾವೇ ಜಯ ಸಾಧಿಸಿದ್ದಾಗಿ ತಿಳಿದು ಕೈಗಳನ್ನು ಮೇಲಕ್ಕೆತ್ತಿ ಸಂಭ್ರಮಿಸಿದ್ದು ನಿರರ್ಥಕವಾಯಿತು ಎಂದು ವಾನ್ ವ್ಲೆಟೆನ್ ಹೇಳಿದರು.
Isuru Udana Retirement: ಅಂತರರಾಷ್ಟ್ರೀಯ ಕ್ರಿಕೆಟ್ಗೆ ದಿಢೀರ್ ನಿವೃತ್ತಿ ಘೋಷಿಸಿದ ಶ್ರೀಲಂಕಾ ತಂಡದ ಇಸುರು ಉದಾನ
Tokyo Olympics: ಭಾರತ ಮಹಿಳಾ ಹಾಕಿ ತಂಡದ ಕ್ವಾರ್ಟರ್ ಫೈನಲ್ ಆಸೆ ಜೀವಂತ: ಆಫ್ರಿಕಾ ವಿರುದ್ಧ 4-3 ಅಂತರದ ಗೆಲುವು
(Meet Anna Kiesenhofer a scientist Mathematics Lecturer Who Shocked Cycling Superstars to Win Gold Medal at Tokyo Olympics)
