Tokyo Olympics: ಫೈನಲ್ನಲ್ಲಿ ಪದಕ ಗೆದ್ದು ಇತಿಹಾಸ ಸೃಷ್ಟಿಸುವ ತವಕ; ಫೈನಲ್ಗೂ ಮುನ್ನ ಕಮಲ್‌ಪ್ರೀತ್ ಕೌರ್ ತಂದೆ ಬಳಿ ಹೇಳಿದ್ದೇನು?
Tokyo Olympics: ಕಮಲ್‌ಪ್ರೀತ್ ಫೈನಲ್ನಲ್ಲಿ ಯಾವುದೇ ಪದಕ ಗೆದ್ದರೆ, ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಅಥ್ಲೆಟಿಕ್ಸ್‌ನಲ್ಲಿ ಒಲಿಂಪಿಕ್ ಪದಕ ಗೆದ್ದ ಮೊದಲ ಕ್ರೀಡಾಪಟು ಎನಿಸಿಕೊಳ್ಳುತ್ತಾರೆ.
Updated on:Jul 31, 2021 | 3:50 PM
ಟೋಕಿಯೊ ಒಲಿಂಪಿಕ್ಸ್ 2020 ರಲ್ಲಿ ಭಾರತವು ಇದುವರೆಗೆ ಕೆಲವು ಉತ್ತಮ ಫಲಿತಾಂಶಗಳನ್ನು ಪಡೆದಿದೆ. ಆದರೆ ಅತ್ಯಂತ ಆಘಾತಕಾರಿ ಮತ್ತು ಸಂತೋಷದ ಫಲಿತಾಂಶವು ಅಥ್ಲೆಟಿಕ್ಸ್‌ನಲ್ಲಿ ಜುಲೈ 31 ರ ಶನಿವಾರದಂದು ಬಂದಿದೆ. ಭಾರತದ 25 ವರ್ಷದ ಡಿಸ್ಕಸ್ ಎಸೆತಗಾರ್ತಿ ಕಮಲ್‌ಪ್ರೀತ್ ಕೌರ್, ಮೊದಲ ಬಾರಿಗೆ ಒಲಿಂಪಿಕ್ಸ್‌ನಲ್ಲಿ ಭಾಗವಹಿಸುತ್ತಿದ್ದು, ಅರ್ಹತೆಯಲ್ಲಿ ಅದ್ಭುತ ಪ್ರದರ್ಶನ ನೀಡುವ ಮೂಲಕ ಫೈನಲ್‌ಗೆ ಟಿಕೆಟ್ ಗಳಿಸಿದರು. ಇದರೊಂದಿಗೆ ಅಥ್ಲೆಟಿಕ್ಸ್‌ನಲ್ಲಿ ಭಾರತದ ಮೊದಲ ಒಲಿಂಪಿಕ್ ಪದಕದ ನಿರೀಕ್ಷೆ ಹೆಚ್ಚಾಯಿತು. ಕಮಲ್‌ಪ್ರೀತ್ ಕೌರ್ ಅವರ ಈ ಸಾಧನೆಯು ಇಡೀ ದೇಶಕ್ಕೆ ಆಕೆಯ ಬಗ್ಗೆ ಹೆಮ್ಮೆ ಪಡುವಂತೆ ಮಾಡಿದೆ.
ಮಹಿಳಾ ಡಿಸ್ಕಸ್ ಥ್ರೋನಲ್ಲಿ ರಾಷ್ಟ್ರೀಯ ದಾಖಲೆಯನ್ನು ಹೊಂದಿರುವ ಕಮಲ್‌ಪ್ರೀತ್, ಶನಿವಾರ ನಡೆದ ಅರ್ಹತಾ ಸುತ್ತಿನಲ್ಲಿ ಸತತ ಮೂರು ಪ್ರಯತ್ನಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿದರು. ಪ್ರತಿ ಪ್ರಯತ್ನದಲ್ಲಿ ತನ್ನ ಅಂಕಿಅಂಶಗಳನ್ನು ಸುಧಾರಿಸಿಕೊಂಡರು. ಕಮಲ್‌ಪ್ರೀತ್ ಮೂರನೇ ಪ್ರಯತ್ನದಲ್ಲಿ 64 ಮೀಟರ್ ದೂರವನ್ನು ಎಸೆಯುವ ಮೂಲಕ ಫೈನಲ್‌ಗೆ ಅರ್ಹತೆ ಪಡೆದರು. ನಿಸ್ಸಂಶಯವಾಗಿ ಈ ಪ್ರದರ್ಶನವು ಎಲ್ಲರನ್ನೂ ಆಶ್ಚರ್ಯಗೊಳಿಸುವುದಲ್ಲದೆ, ಪದಕಗಳ ಭರವಸೆಯನ್ನು ಹೆಚ್ಚಿಸಿತು.
ತಂದೆಗೆ ಅಂತಿಮ ಭರವಸೆ ಕಮಲ್‌ಪ್ರೀತ್ ಕೂಡ ಇದಕ್ಕಾಗಿ ಸಂಪೂರ್ಣವಾಗಿ ಸಿದ್ಧರಾಗಿದ್ದಾರೆ ಮತ್ತು ಫೈನಲ್ನಲ್ಲಿ ತನ್ನ ಅತ್ಯುತ್ತಮ ಪ್ರಯತ್ನವನ್ನು ಮಾಡಲಿದ್ದಾರೆ. ಇದಕ್ಕಾಗಿ ಅವರು ತನ್ನ ತಂದೆಗೆ ಭರವಸೆ ನೀಡಿದ್ದಾರೆ. ಪಂಜಾಬ್‌ನ ಕಬರ್‌ವಾಲಾ ಹಳ್ಳಿಯ ನಿವಾಸಿ ಕಮಲ್‌ಪ್ರೀತ್ ಕೌರ್ ಅವರ ತಂದೆ ಕುಲದೀಪ್ ಸಿಂಗ್ ಸುದ್ದಿ ಸಂಸ್ಥೆ ಪಿಟಿಐ ಜೊತೆ ಮಾತನಾಡಿ, ನಾನು ಇಂದು ಅವಳೊಂದಿಗೆ ಮಾತನಾಡಿದೆ ಮತ್ತು ಅವಳು ತುಂಬಾ ಸಂತೋಷವಾಗಿದ್ದಳು. ಫೈನಲ್ನಲ್ಲಿ ಅವಳು ಅತ್ಯುತ್ತಮ ಪ್ರದರ್ಶನ ನೀಡುವುದಾಗಿ ನನಗೆ ಹೇಳಿದಳು. ಅವಳು ತನ್ನ ಕಠಿಣ ಪರಿಶ್ರಮದಿಂದ ಒಲಿಂಪಿಕ್ಸ್‌ನಲ್ಲಿ ಭಾಗವಹಿಸುವ ಕನಸನ್ನು ನನಸಾಗಿಸಿದಳು ಎಂದಿದ್ದಾರೆ.
ಅಥ್ಲೆಟಿಕ್ಸ್‌ನಲ್ಲಿ ಇತಿಹಾಸ ಸೃಷ್ಟಿಸಬಹುದು ಕಮಲ್‌ಪ್ರೀತ್ ಕೌರ್ ಆಗಸ್ಟ್ 2 ರಂದು ನಡೆಯಲಿರುವ ಡಿಸ್ಕಸ್ ಥ್ರೋ ಫೈನಲ್‌ಗೆ ಪ್ರವೇಶಿಸಲಿದ್ದು, ಅವರಿಗೆ ಇತಿಹಾಸದ ಪುಟಗಳಲ್ಲಿ ತನ್ನ ಹೆಸರನ್ನು ನೋಂದಾಯಿಸುವ ಅವಕಾಶವಿದೆ. ಕಮಲ್‌ಪ್ರೀತ್ ಫೈನಲ್ನಲ್ಲಿ ಯಾವುದೇ ಪದಕ ಗೆದ್ದರೆ, ಸ್ವತಂತ್ರ ಭಾರತದ ಇತಿಹಾಸದಲ್ಲಿ ಅಥ್ಲೆಟಿಕ್ಸ್‌ನಲ್ಲಿ ಒಲಿಂಪಿಕ್ ಪದಕ ಗೆದ್ದ ಮೊದಲ ಕ್ರೀಡಾಪಟು ಎನಿಸಿಕೊಳ್ಳುತ್ತಾರೆ. ಈ ಹಿಂದೆ 1960 ರ ರೋಮ್ ಒಲಿಂಪಿಕ್ಸ್‌ನಲ್ಲಿ ಭಾರತದ ಪರ ಮಿಲ್ಖಾ ಸಿಂಗ್ 400 ಮೀಟರ್ಸ್ ಓಟದಲ್ಲಿ ಪದಕದ ಸಮೀಪಕ್ಕೆ ಬಂದು ನಾಲ್ಕನೇ ಸ್ಥಾನ ಪಡೆದಿದ್ದರು. ಅದೇ ಸಮಯದಲ್ಲಿ, ಪಿಟಿ ಉಷಾ ಕೂಡ 1984 ರ ಒಲಿಂಪಿಕ್ಸ್‌ನಲ್ಲಿ ಹರ್ಡಲ್ಸ್‌ನಲ್ಲಿ ನಾಲ್ಕನೇ ಸ್ಥಾನ ಪಡೆದರು.
ಇದನ್ನೂ ಓದಿ:Tokyo Olympics: ಒಲಂಪಿಕ್ಸ್ನಲ್ಲಿ ಜೆಸ್ಸಿಕಾ ಫಾಕ್ಸ್ಗೆ ಪದಕ ಗೆಲ್ಲಲು ಸಹಾಯ ಮಾಡಿತು ಒಂದು ಕಾಂಡೊಮ್!
Published On - 3:50 pm, Sat, 31 July 21
