Home Theater Cost: ಮನೆಯೇ ಚಿತ್ರಮಂದಿರ ಕಾಸಿದ್ದರೆ ಎಲ್ಲ ಸುಂದರ; ಇಲ್ಲಿದೆ ಹೋಮ್ ಥಿಯೇಟರ್ ಮಾಡಲು ಎಷ್ಟು ಖರ್ಚಾಗುತ್ತದೆ ಎಂಬ ವಿವರ
ಮನೆಯಲ್ಲಿ ಹೋಮ್ ಥಿಯೇಟರ್ ಮಾಡಿಸಲು ಎಷ್ಟು ಖರ್ಚಾಗುತ್ತದೆ? ಇದಕ್ಕೆ ಬೇಕಾದ ತಾಂತ್ರಿಕ ಅಗತ್ಯಗಳೇನು ಎಂಬಿತ್ಯಾದಿ ಅಂಶಗಳು ಈ ಲೇಖನದಲ್ಲಿವೆ.
Updated on:Jul 18, 2022 | 2:57 PM
ಕೊರೊನಾದಿಂದ ಜಗತ್ತು ಬಹಳ ಬದಲಾಗಿದೆ. ಅದು ಆರೋಗ್ಯದ ಬಗೆಗಿನ ಕಾಳಜಿಯಿಂದ ಮೊದಲುಗೊಂಡು ಮನರಂಜನೆಯ (Entertainment) ತನಕ ಅನ್ವಯ ಆಗುತ್ತದೆ. ಈಗೆಲ್ಲ ಮನೆಯಲ್ಲೇ ಥಿಯೇಟರ್. ಥೇಟ್ ಚಿತ್ರಮಂದಿರದಂತೆಯೇ ಅನುಭವ ಕೊಡುವ ತೆರೆ, ಸ್ಪೀಕರ್ಗಳು ಹೀಗೆ ಏನಿಲ್ಲ ಹೇಳಿ. ಇಂದಿನ ಲೇಖನದಲ್ಲಿ ಹೋಮ್ ಥಿಯೇಟರ್, ಅರ್ಥಾತ್ ಮನೆಯ ಚಿತ್ರಮಂದಿರಗಳ ಬಗ್ಗೆ ನಿಮಗೆ ತಿಳಿಸಲಾಗುವುದು. ಅದಕ್ಕಾಗಿಯೇ ನಮಸ್ಯ ಡಿಜಿಟಲ್ ಆಡಿಯೋದ ವಿ. ದೀಪಕ್ ಅವರನ್ನು ಟಿವಿ9 ಕನ್ನಡ ಡಿಜಿಟಲ್ನಿಂದ ಮಾತನಾಡಿಸಲಾಗಿದೆ. ಅವರು ಕೂಡ ಸಾದ್ಯಂತವಾಗಿ ಮಾಹಿತಿಗಳನ್ನು ತೆರೆದಿಟ್ಟಿದ್ದಾರೆ. ಪ್ರಶ್ನೋತ್ತರ ಮಾದರಿಯಲ್ಲಿ ವಿವರಗಳನ್ನು ನಿಮ್ಮೆದುರು ಇಡುವುದು ನಮ್ಮ ಉದ್ದೇಶ. ದಯವಿಟ್ಟು ಒಪ್ಪಿಸಿಕೊಳ್ಳಿ.
ಪ್ರಶ್ನೆ: ಹೋಮ್ ಥಿಯೇಟರ್ ಮಾಡಿಕೊಳ್ಳುವುದಕ್ಕೆ ಹೊಸ ಮನೆಯೇ ಆಗಿರಬೇಕಾ?
ದೀಪಕ್: ಹಾಗೇನಿಲ್ಲ. ಈಗಾಗಲೇ ಕಟ್ಟಿರುವ ಮನೆಯಿದ್ದರೂ ಪರವಾಗಿಲ್ಲ. ಅಲ್ಲಿ ಚಿತ್ರಮಂದಿರದ ರೀತಿಯಲ್ಲೇ ವ್ಯವಸ್ಥೆ ಮಾಡಿಕೊಳ್ಳಬಹುದು.
ಪ್ರಶ್ನೆ: ಎಷ್ಟು ಬಗೆಯ ಹೋಮ್ ಥಿಯೇಟರ್ಗಳಿವೆ ಹಾಗೂ ಎಷ್ಟು ಖರ್ಚು ಬರುತ್ತದೆ?
ದೀಪಕ್: ಇದರಲ್ಲಿ ಮೂರು ಸೆಗ್ಮೆಂಟ್ ಇದೆ. ಬೇಸಿಕ್, ಮೀಡಿಯಂ ಹಾಗೂ ಲಕ್ಷುರಿ. ಆರಂಭದ್ದು 2ರಿಂದ 5 ಲಕ್ಷ ರೂಪಾಯಿ ಆಗುತ್ತದೆ. ಇದರಲ್ಲಿ ಅಕೌಸ್ಟಿಕ್ ಸಿಸ್ಟಮ್ ಬರುವುದಿಲ್ಲ. ಆ ನಂತರ 10ರಿಂದ 20 ಲಕ್ಷ ರೂಪಾಯಿಯದ್ದು. ಅದರಲ್ಲಿ ಅಕೌಸ್ಟಿಕ್ ಸಿಸ್ಟಮ್ ಇದೆ. 20 ಲಕ್ಷ ರೂಪಾಯಿ ಮೇಲ್ಪಟ್ಟದ್ದು ಲಕ್ಷುರಿ. ಆದರೆ ಇದರಲ್ಲಿ ಗರಿಷ್ಠ ಎಂಬ ಮಿತಿಯೇ ಇಲ್ಲ. ಖರೀದಿಸುವ ಗ್ರಾಹಕರ ಆಸಕ್ತಿ ಮೇಲೆ ಅವಲಂಬಿಸುತ್ತದೆ. ಕೋಟಿಗಟ್ಟಲೆ ಖರ್ಚು ಮಾಡಬಹುದು.
ಪ್ರಶ್ನೆ: ಯಾವ ಬ್ರ್ಯಾಂಡ್ನದು ಖರೀದಿ ಮಾಡಬಹುದು?
ದೀಪಕ್: ಪ್ರೊಜೆಕ್ಟರ್ ಒಂದು ಬ್ರ್ಯಾಂಡ್, ಅದೇ ರೀತಿ ಸ್ಕ್ರೀನ್ ಬೇರೆ, ಎವಿಆರ್ ಬೇರೆ, ಆಕ್ಸೆಸರೀಸ್, ಸ್ಪೀಕರ್ ಎಲ್ಲ ಬೇರೆ ಬೇರೆ ಆಗಿರುತ್ತದೆ. ವಿಶ್ವದಾದ್ಯಂತ 6000 ಸ್ಪೀಕರ್ ಬ್ರ್ಯಾಂಡ್ಗಳಿಗೆ ನಮ್ಮ ಬಜೆಟ್ಗೆ ತಕ್ಕ ಹಾಗೆ ಆರಿಸಿಕೊಳ್ಳಬಹುದು. ನಾವು ಆಸ್ಟ್ರೇಲಿಯಾದ Krix, ಕೆನಡಾದ ಆಕ್ಸಿಯಮ್ (Axiom real Canadian brand), ಆರಿಜಿನ್ ಅಕೌಸ್ಟಿಕ್ ಆರ್ಕಿಟೆಕ್ಚರ್ ಸ್ಪೀಕರ್ಸ್ (Origin acoustic- architecture speakers) ಬಳಸ್ತೀವಿ. ಇವೆಲ್ಲ ನಿಮಗೆ ಮಲ್ಟಿಪ್ಲೆಕ್ಸ್ಗಳಲ್ಲಿ ಕೂತು ಸಿನಿಮಾ ನೋಡಿದಂಥ ಅನುಭವವನ್ನೇ ನೀಡುತ್ತವೆ.
ಗ್ರಾಹಕರೊಂದಿಗೆ ದೀಪಕ್ ಮಾತುಕತೆ
ಪ್ರಶ್ನೆ: ಹೋಮ್ ಥಿಯೇಟರ್ಗೆ ಮನೆಯಲ್ಲಿ ಯಾವ ಅಳತೆಯ ಕೋಣೆ ಮೀಸಲಿಡಬೇಕು?
ದೀಪಕ್: 11 X 13 ಅಥವಾ 14ರಿಂದ ಶುರುವಾಗಿ, 13×20, 15×30, ಹಾಗೂ 12×20 ಈ ಅಳತೆಯಲ್ಲಿ ಕೋಣೆ ಇದ್ದರೆ ಒಳ್ಳೆಯದು.
ಪ್ರಶ್ನೆ: ಯಾವ ಹಂತದಲ್ಲಿ ಹೋಮ್ ಥಿಯೇಟರ್ ಮಾಡುವ ಬಗ್ಗೆ ನಿರ್ಧಾರ ಮಾಡಬೇಕು?
ದೀಪಕ್: ಇಂಟೀರಿಯರ್ಸ್ ಮಾಡುವ ವೇಳೆಗೆ ನಿರ್ಧಾರ ತೆಗೆದುಕೊಂಡರೆ ಉತ್ತಮ.
ಪ್ರಶ್ನೆ: ಈಗಾಗಲೇ ಕಟ್ಟಿರುವ ಮನೆಗಳಿಗೆ ಹೆಚ್ಚಿನ ಎಲೆಕ್ಟ್ರಿಕಲ್ ಕೆಲಸಗಳನ್ನು ಮಾಡಿಸಬೇಕಾ?
ದೀಪಕ್: ಖಂಡಿತಾ ಇಲ್ಲ. ಈಗಿರುವ ಎಲೆಕ್ಟ್ರಿಕಲ್ ವ್ಯವಸ್ಥೆಯೊಳಗೆ ಮಾಡಬಹುದು.
ಪ್ರಶ್ನೆ: ಹೋಮ್ ಥಿಯೇಟರ್ ಅಂದರೆ ಸಿನಿಮಾ ಮಾತ್ರ ನೋಡುವುದಕ್ಕೆ ಸಾಧ್ಯವಾ?
ದೀಪಕ್: ಹಾಗೇನಿಲ್ಲ. ವಿಡಿಯೋ ಕಾನ್ಫರೆನ್ಸ್ ಸೇರಿದಂತೆ ಹಲವಾರು ಕಾರ್ಯಗಳಿಗೆ ಇದರಿಂದ ಪ್ರಯೋಜನ ಇದೆ.
ನಮಸ್ಯ ಕಚೇರಿ
ಪ್ರಶ್ನೆ: ಈ ಕ್ಷೇತ್ರದಲ್ಲಿ ನಿಮ್ಮ ಅನುಭವ, ಕೆಲಸದ ಬಗ್ಗೆ ತಿಳಿಸಿ.
ದೀಪಕ್: ಈ ವೃತ್ತಿಗೆ ಬಂದು 11 ವರ್ಷದ ಮೇಲಾಯಿತು. ಇದುವರೆಗೆ 1000ಕ್ಕೂ ಹೆಚ್ಚು ಪ್ರಾಜೆಕ್ಟ್ ಮಾಡಿದ್ದೀವಿ. ನಮ್ಮದು ಬೆಂಗಳೂರಿನಲ್ಲಿ ಎರಡು ಎಕ್ಸ್ಪೀರಿಯೆನ್ಸ್ ಸೆಂಟರ್ಗಳಿವೆ. ಒಂದು ವರ್ಷಕ್ಕೆ 60ರಿಂದ 70 ಪ್ರಾಜೆಕ್ಟ್ ಮಾಡ್ತೀವಿ. ಒಂದು ಪ್ರಾಜೆಕ್ಟ್ಗೆ 30ರಿಂದ 60 ದಿನ ಬೇಕಾಗುತ್ತದೆ. ಪ್ರಾಜೆಕ್ಟ್ನ ಎಲ್ಲ ಸೆಗ್ಮೆಂಟ್ ಮಾಡುವುದು ಹೌದು. ಆದರೆ 20 ಲಕ್ಷ ಮೇಲ್ಪಟ್ಟು ಪ್ರಾಜೆಕ್ಟ್ಗಳೇ ನಮಗೆ ಹೆಚ್ಚು ಬರೋದು. ಕರ್ನಾಟಕ ಚಲನಚಿತ್ರ ಒಕ್ಕೂಟದಲ್ಲಿನ ಪ್ರಾಜೆಕ್ಟ್ ನಾವೇ ಮಾಡಿರೋದು. ಸದ್ಯಕ್ಕೆ 1.5 ಕೋಟಿ ರೂಪಾಯಿಯ ನಾಲ್ಕು ಪ್ರಾಜೆಕ್ಟ್ ಮಾಡ್ತಿದ್ದೇವೆ.
ಪ್ರಶ್ನೆ: ಇದರ ನಿರ್ವಹಣೆ ಖರ್ಚು ಎಷ್ಟು ಬರುತ್ತದೆ? ಎಷ್ಟು ಸಮಯ ಬಾಳಿಕೆ ಬರುತ್ತದೆ?
ದೀಪಕ್: ನಿರ್ವಹಣೆ ಖರ್ಚು ಅಂದರೆ ವಿದ್ಯುತ್ ಬಿಲ್ ಮಾತ್ರ. ವೋಲ್ಟೇಜ್ ಹೆಚ್ಚು-ಕಡಿಮೆ ಆಗುವುದರಿಂದ ಏನಾದರೂ ಸಣ್ಣ- ಪುಟ್ಟ ಸಮಸ್ಯೆಗಳು ಆಗಬಹುದು. ಇನ್ನು ಪ್ರೊಜೆಕ್ಟರ್ ಒಳಗಿನ ಲ್ಯಾಂಪ್ ಸರಾಸರಿ ಮೂರರಿಂದ ಐದು ವರ್ಷ ಬಾಳಿಕೆ ಬರುತ್ತದೆ. ಆ ನಂತರದ ಅದು ಬದಲಿಸುವುದಕ್ಕೆ ಆಗುವ ಖರ್ಚು ಯಾವ ಮಾಡೆಲ್ ಪ್ರೊಜೆಕ್ಟರ್ ಎಂಬುದರ ಮೇಲೆ ನಿರ್ಧಾರ ಆಗುತ್ತದೆ.
ಪ್ರಶ್ನೆ: ಹೋಮ್ ಥಿಯೇಟರ್ ನಿಜವಾದ ಅನುಭವ ಬೇಕು ಎಂದಾದಲ್ಲಿ ಕನಿಷ್ಠ ಎಷ್ಟು ಖರ್ಚಾಗುತ್ತದೆ?
ದೀಪಕ್: ಸ್ಕ್ರೀನ್, ಪ್ರೊಜೆಕ್ಟರ್, ಎವಿಆರ್, ಸ್ಪೀಕರ್, ಅಕೌಸ್ಟಿಕ್ ಸಿಸ್ಟಮ್ ಸೇರಿ ಕನಿಷ್ಠ ಆರು ಲಕ್ಷ ರೂಪಾಯಿಯಿಂದ ಎಂಟು ಲಕ್ಷ ಬೇಕಾಗುತ್ತದೆ. ಅದು ಆಯಾ ಸಮಯಕ್ಕೆ ಬದಲಾಗುತ್ತದೆ. ನಾನು ಹೇಳುತ್ತಿರುವುದು ಸದ್ಯದ ಲೆಕ್ಕ.
ಸಿನಿಮಾ ಸ್ಕ್ರೀನ್
ಪ್ರಶ್ನೆ: ಈ ಹೋಮ್ ಥಿಯೇಟರ್ಗಳಿಗೆ ಬ್ಯಾಂಕ್, ಹಣಕಾಸು ಸಂಸ್ಥೆಯಿಂದ ಸಾಲ ಸಿಗುತ್ತಾ?
ದೀಪಕ್: ಬ್ಯಾಂಕ್ಗಳ ಹೋಮ್ ಲೋನ್ ಲೆಕ್ಕದಲ್ಲಿ ಸಿಗಲ್ಲ. ಆದರೆ ಕನ್ಸ್ಯೂಮರ್ ಡ್ಯೂರಬಲ್ಸ್ ಲೆಕ್ಕದಲ್ಲಿ ತೆಗೆದುಕೊಳ್ಳಬಹುದು. ಕ್ರೆಡಿಟ್ ಸ್ಕೋರ್, ಬಡ್ಡಿ ಲೆಕ್ಕಾಚಾರ, ಮರುಪಾವತಿ ಅವಧಿ ಇವೆಲ್ಲ ಅದೇ ಬಗೆಯ ಸಾಲಕ್ಕೆ ಅನ್ವಯಿಸುತ್ತದೆ.
Published On - 7:04 pm, Fri, 15 July 22
