Mobile Lost: ಮೊಬೈಲ್ ಕಳೆದುಹೋದರೆ ಸುಲಭದಲ್ಲಿ ನೀವೇ ಹುಡುಕುವುದು ಹೇಗೆ?
ನಮ್ಮ ದೇಶದಲ್ಲಿ ಸ್ಮಾರ್ಟ್ಫೋನ್ ಬಳಕೆದಾರರ ಸಂಖ್ಯೆ ಹೆಚ್ಚಾದಂತೆಯೇ, ಮೊಬೈಲ್ ಕಳ್ಳತನವೂ ಹೆಚ್ಚಾಗುತ್ತಿದೆ. ಅಲ್ಲದೆ, ಜನರು ಗಡಿಬಿಡಿಯಲ್ಲಿ ಮೊಬೈಲ್ ಕಳೆದುಕೊಳ್ಳುವುದೂ ನಡೆಯುತ್ತಿದೆ. ಫೋನ್ ಕಳವಾದರೆ ಇಲ್ಲವೇ ಕಳೆದುಹೋದರೆ, ಹಲವರಿಗೆ ತಕ್ಷಣಕ್ಕೆ ಏನು ಮಾಡಬೇಕೆಂದೇ ತೋಚುವುದಿಲ್ಲ. ಅಂತಹ ಸಂದರ್ಭದಲ್ಲಿ ನಾವು ಮಾಡಬೇಕಾಗಿರುವುದೇನು? ಸ್ಮಾರ್ಟ್ಫೋನ್ನಲ್ಲಿರುವ IMEI ನಂಬರ್ ಬಳಸಿಕೊಂಡು, ಫೋನ್ ಹುಡುಕುವುದು ಹೇಗೆ? ಪೊಲೀಸರಿಗೆ ದೂರು ನೀಡಿದ ಬಳಿಕ ಏನು ಮಾಡಬೇಕು? ಆನ್ಲೈನ್ನಲ್ಲಿ ನಾವು ಅನುಸರಿಸಬೇಕಾದ ಹಂತಗಳು ಯಾವುದು? ಎನ್ನುವ ಕುರಿತು ವಿವರವಾದ ಮಾಹಿತಿ ಇಲ್ಲಿದೆ.
ನಮ್ಮ ಜೀವನದ ಒಂದು ಭಾಗವಾಗಿ ಬದಲಾಗಿರುವ ಸ್ಮಾರ್ಟ್ಫೋನ್ ಅಕಸ್ಮಾತ್ ಆಗಿ ಕಳೆದು ಹೋದಾಗ ಆಗುವ ಸಂಕಟ ಅಷ್ಟಿಷ್ಟಲ್ಲ. ಕೇವಲ ದುಬಾರಿ ಬೆಲೆ ವಸ್ತು ಎನ್ನುವುದಕ್ಕಿಂತಲೂ ಅದರಲ್ಲಿರುವ ಸಂಪರ್ಕ ಸಂಖ್ಯೆಗಳು, ಒಡನಾಡಿಗಳ ಜೊತೆಗಿರುವ ಫೋಟೋಗಳು ಮತ್ತು ಖಾಸಗಿ ಮಾಹಿತಿಗಳು ಸೋರಿಕೆಯಾಗುವ ಭಯ ಸಾಕಷ್ಟು ಕಾಡುತ್ತಿರುತ್ತದೆ. ಆದರೆ ಇದಕ್ಕೆ ಇದೀಗ ನೀವು ಹೆದರಬೇಕಿಲ್ಲ.. ಸ್ಮಾರ್ಟ್ಫೋನ್ ಕಳೆದುಹೋದ ತಕ್ಷಣವೇ ಸಿಇಐಆರ್ ವೆಬ್ಸೈಟ್ನಲ್ಲಿ (https://www.ceir.gov.in/) ನಿಮ್ಮ ಫೋನ್ನ ಐಎಂಇಐ ನಂಬರ್ (IMEI Number) ದಾಖಲಿಸುವ ಮೂಲಕ ದೂರು ನೀಡಿ. ಸಿಇಐರ್ ಅನ್ನು ದೆಹಲಿ ಪೊಲೀಸ್, ಟೆಲಿಕಾಂ ಸಚಿವಾಲಯ ಮತ್ತು ಟೆಲಿಮ್ಯಾಟಿಕ್ಸ್ ಕೇಂದ್ರದ ಸಹಯೋಗದಲ್ಲಿ ಅಭಿವೃದ್ಧಿಪಡಿಸಲಾಗಿದೆ. ಇಲ್ಲಿ ದೂರು ನೀಡಲು ನಿಮಗೆ ಕಳೆದುಹೋದ ಫೋನ್ನ ಐಎಂಇಐ ನಂಬರ್ ಮಾತ್ರ ಸಾಕಾಗುತ್ತದೆ. ಫೋನ್ನ ಬಿಲ್, ಬಾಕ್ಸ್ನಲ್ಲಿ ಐಎಂಇಐ ಎನ್ನುವ 15 ಅಂಕಿಗಳ ನಂಬರ್ ಇರುತ್ತದೆ.
IMEI ನಂಬರ್ ಎಂದರೆ ಏನು?
ಇಂಟರ್ನ್ಯಾಶನಲ್ ಮೊಬೈಲ್ ಇಕ್ವಿಪ್ಮೆಂಟ್ ಐಡೆಂಟಿಟಿ ಅಂದರೆ, ಐಎಂಇಐ ನಂಬರ್ ಪ್ರತಿಯೊಂದು ಫೋನ್ಗೆ ಇರುವ ವಿಶಿಷ್ಟ ಸಂಖ್ಯೆ. ಈ ಸಂಖ್ಯೆಯನ್ನು ಬಳಸಿಕೊಂಡು, ಪೊಲೀಸರು ನಿಮ್ಮ ಕಳವಾದ ಸ್ಮಾರ್ಟ್ಫೋನ್ (Smartphone) ಅನ್ನು ಹುಡುಕಲು ಸಾಧ್ಯವಾಗುತ್ತದೆ. ಈ ನಂಬರ್ ಅನ್ನು ನಾವು ನೋಟ್ ಮಾಡಿಟ್ಟುಕೊಳ್ಳುವುದು, ಇಲ್ಲವೇ ಬಿಲ್ ಅಥವಾ ಫೋನ್ ಬಾಕ್ಸ್ ಅನ್ನು ತೆಗೆದಿರಿಸುವುದು ಕೂಡ ಅಗತ್ಯವಾಗಿರುತ್ತದೆ.
ದೂರು ನೀಡಲು ಅಗತ್ಯವಾಗಿ ಬೇಕು ಐಎಂಇಐ ನಂಬರ್
ಫೋನ್ ಕಳ್ಳತನದ ಬಳಿಕ ಅದರಲ್ಲಿನ ಸಿಮ್ ತೆಗೆದು ಬೇರೆ ಸಿಮ್ ಬಳಕೆ ಮಾಡಿದಲ್ಲಿ ತಕ್ಷಣವೇ ಪೊಲೀಸರಿಗೆ ಪತ್ತೆ ಹಚ್ಚಲು ಐಎಂಇಐ ನಂಬರ್ ನೆರವಾಗುತ್ತದೆ. ಕಳವಾದ ಫೋನ್ನಲ್ಲಿ, ಬೇರೆ ಸಿಮ್ ಬಳಸಿದಾಗ ಸಮೀಪದ ಟವರ್ ನೆಟ್ವರ್ಕ್ ಮೂಲಕ ಪೊಲೀಸರು ಫೋನ್ ಇರುವ ಸ್ಥಳವನ್ನು ಪತ್ತೆಮಾಡುತ್ತಾರೆ. ಅದಕ್ಕಾಗಿ ಪೊಲೀಸರಿಗೆ ದೂರು ನೀಡುವಾಗ ಮತ್ತು ಸಿಇಐರ್ ಮೂಲಕ ದೂರು ನೀಡುವ ಸಂದರ್ಭದಲ್ಲಿ ಐಎಂಇಐ ನಂಬರ್ ಅಗತ್ಯವಾಗಿ ಇರಬೇಕಾಗುತ್ತದೆ.
IMEI ನಂಬರ್ ತಿದ್ದಲು ಸಾಧ್ಯವೇ?
ಸ್ಮಾರ್ಟ್ಫೋನ್ ಕಳ್ಳತನವಾದ ತಕ್ಷಣ ಖದೀಮರು ಅದರಲ್ಲಿನ ಐಎಂಇಐ ನಂಬರ್ ಅನ್ನು ತಿದ್ದಲು ಫ್ಲ್ಯಾಶ್ ತಂತ್ರಜ್ಞಾನ ಬಳಸುವ ಸಾಧ್ಯತೆಯಿರುತ್ತದೆ. ಆ್ಯಂಡ್ರಾಯ್ಡ್ ಸ್ಮಾರ್ಟ್ಫೋನ್ಗಳ ಐಎಂಇಐ ನಂಬರ್ ಅನ್ನು ತಿರುಚಿದ್ದಲ್ಲಿ ಅವುಗಳನ್ನು ಪತ್ತೆ ಹಚ್ಚುವುದು ಅಸಾಧ್ಯವಾಗುತ್ತದೆ. ಅದಕ್ಕಾಗಿಯೇ ಸ್ಮಾರ್ಟ್ಫೋನ್ ಕಳವಾದ ಮತ್ತು ಮಿಸ್ ಆದ ಕೂಡಲೇ ಪೊಲೀಸರಿಗೆ ದೂರು ನೀಡುವುದರ ಜೊತೆಗೆ ಸಿಇಐರ್ ವೆಬ್ಸೈಟ್ನಲ್ಲಿ ದೂರು ದಾಖಲಿಸುವುದು ಅಗತ್ಯವಾಗಿದೆ. ಸಿಇಐರ್ ಮೂಲಕ ದೂರು ದಾಖಲಿಸಿ ನಿಮ್ಮ ಸ್ಮಾರ್ಟ್ಫೋನ್ ಅನ್ನು ಬ್ಲಾಕ್ ಮಾಡಿಸಬಹುದು. ಇದರಿಂದ ಫೋನ್ ಅನ್ಯರ ಕೈಸೇರಿದರೂ ಅವರಿಗೆ ಅದನ್ನು ಬಳಸಲು ಸಾಧ್ಯವಾಗುವುದಿಲ್ಲ. ನಿಮ್ಮ ಫೋನ್ ವಾಪಸ್ ಪಡೆದ ಬಳಿಕ ಐಎಂಇಐ ಅನ್ಬ್ಲಾಕ್ ಮಾಡಲು ಆಯ್ಕೆಗಳಿವೆ. ಸಿಇಐರ್ ಮೂಲಕ ದೂರು ನೀಡಿದ ಬಳಿಕ ದೂರಿನ ಸ್ಥಿತಿಗತಿಯನ್ನು ಪರಿಶೀಲಿಸಬಹುದು. ಅಲ್ಲದೆ, ಪೊಲೀಸ್ ತನಿಖೆಯಲ್ಲಿ ಯಾವ ರೀತಿ ಪ್ರಗತಿಯಾಗಿದೆ ಎನ್ನುವ ಮಾಹಿತಿ ಕೂಡಾ ದೊರೆಯುತ್ತದೆ.
ಈ ರೀತಿಯಾಗಿ, ಯಾರದ್ದಾದರೂ ಸ್ಮಾರ್ಟ್ಫೋನ್ ಕಳ್ಳತನವಾದರೆ ಇಲ್ಲವೇ ಮಿಸ್ ಆಗಿದ್ದರೆ, ತಕ್ಷಣವೇ ಮೇಲೆ ಸೂಚಿಸಿರುವ ಕ್ರಮಗಳನ್ನು ಅನುಸರಿಸಿ, ನಿಮ್ಮ ಸ್ಮಾರ್ಟ್ಫೋನ್ ಅನ್ನು ಮರಳಿ ಪಡೆಯಬಹುದು. ಜತೆಗೆ ನಿಮ್ಮ ದೂರಿನ ಸ್ಥಿತಿಗತಿಯನ್ನು ಟ್ರ್ಯಾಕ್ ಮಾಡಬಹುದು. ಇದರಿಂದ ನಿಮ್ಮ ಮೊಬೈಲ್ ಬೇರೆಯವರ ಪಾಲಾಗುವುದನ್ನು ತಡೆಯಬಹುದು.
Published On - 5:38 pm, Thu, 23 February 23