RE modified interceptor 650: MIG- 21 ಅವತಾರದಲ್ಲಿ ರಾಯಲ್​ ಎನ್​ಫೀಲ್ಡ್ ಮಾಡಿಫೈಡ್ ಇಂಟರ್​ಸೆಪ್ಟರ್ 650 ಹೇಗಿದೆ?

ರಾಯಲ್​ ಎನ್​ಫೀಲ್ಡ್ ಬೈಕ್​ಗಳೆಂದರೆ ಭಾರತದಲ್ಲಿ ವಿಚಿತ್ರವಾದ ವ್ಯಾಮೋಹ ಇದೆ. ಭಾರತದ ರಸ್ತೆಗಳಲ್ಲಿ ಗುಡುಗುಡು ಎಂದು ಈ ಬೈಕ್ ಗಜ ಗಾಂಭೀರ್ಯದಿಂದ ಸಾಗುತ್ತಿದ್ದರೆ ಅತ್ತ ಒಮ್ಮೆ ತಿರುಗಿನೋಡಬೇಕು ಅಂತ ಯಾರಿಗೆ ಅನಿಸಲ್ಲ ಹೇಳಿ? ಅಂದಹಾಗೆ ರಾಯಲ್ ಎನ್​ಫೀಲ್ಡ್ ಪ್ರೇಮಿಗಳೆಂದರೆ ಅದರ ಮೂಲ ಸ್ವರೂಪದಲ್ಲೇ ಸಂತೃಪ್ತರಾಗ್ತಾರಾ? ತಮ್ಮ ಅಭಿರುಚಿ ಹಾಗೂ ಆದ್ಯತೆಗೆ ತಕ್ಕಂತೆ ಬದಲಾವಣೆಗಳನ್ನು ತಂದು, ಬೈಕ್​ಗೆ ಇನ್ನಷ್ಟು ಸಿಂಗಾರ- ಬಂಗಾರ ಮಾಡ್ತಾರೆ. ರಸ್ತೆಯಲ್ಲಿ ತಮ್ಮ ಬೈಕ್ ಹೋಗ್ತಿದ್ದರೆ ಉಳಿದ ಎಲ್ಲಕ್ಕಿಂತ ಡಿಫರೆಂಟು ಅನ್ನಿಸಿಕೊಳ್ಳುವ ಆಸೆ ಅವರದು. ಒಂದು ವೇಳೆ ನಿಮ್ಮ ಬಳಿಯೂ ರಾಯಲ್ ಎನ್​ಫೀಲ್ಡ್ ಬೈಕ್ ಇದ್ದು, ಅದನ್ನು ನಿಮಗೆ ಬೇಕಾದಂತೆ ಮಾರ್ಪಾಟು ಮಾಡಿಸಿಕೊಳ್ಳುವ ಉದ್ದೇಶ ಇದ್ದಲ್ಲಿ MIG- 21 ಡಿಸೈನ್​ನ ಈ ಇಂಟರ್​ಸೆಪ್ಟರ್ 650 ಬೈಕ್​ನ ನೋಡಲೇಬೇಕು.

ಬೆಂಗಳೂರು ಮೂಲದ “ಬುಲೆಟೀರ್ ಕಸ್ಟಮ್ಸ್” MIG- 21 ಯುದ್ಧವಿಮಾನದಿಂದ ಸ್ಫೂರ್ತಿಗೊಂಡು, ಇಂಟರ್​ಸೆಪ್ಟರ್ 650 ರೂಪಿಸಿದ್ದಾರೆ. ಮೊದಲ ನೋಟದಲ್ಲೇ ಈ ಬೈಕ್ ಮೇಲೆ ನಿಮಗೆ ಲವ್ ಆಗಿ, ಮಾರ್ಪಾಟಾದ ಆ ಡಿಸೈನ್​ ಅನ್ನು ಮೆಚ್ಚಿಕೊಳ್ಳದಿದ್ದಲ್ಲಿ ಹೇಳಿ. ಈ ರಚನೆ ಮಾಡಿದವರು ಬಹಳ ಚಂದದ ಕೆಲಸ ಮಾಡಿದ್ದಾರೆ. ಇಂಟರ್​ಸೆಪ್ಟರ್ 650ರ ಮೂಲ ಸ್ವರೂಪಕ್ಕೆ ಸರಿಯಾಗಿ ಹೊಂದಾಣಿಕೆ ಆಗುವಂತೆಯೇ ರೂಪುಗೊಳಿಸಲಾಗಿದೆ. ಇದರ ಮುಂಭಾಗದ ರಚನೆಯು ಮತ್ತಷ್ಟು ಸೌಂದರ್ಯ ಹಾಗೂ ಹಳೆಯ ಅನುಭೂತಿಯನ್ನೂ ನೀಡಿದೆ. ಹಳೆಯ ಮತ್ತು ಹೊಸ ಡಿಸೈನ್​ನ ಸರಿಯಾದ ಮಿಶ್ರಣದಂತಿದೆ ಈ ಬೈಕ್.

ಇನ್ನು ಬೈಕ್​ಗೆ ಬಳಸಿರುವ ಬಣ್ಣದ ಕಾಂಬಿನೇಷನ್ ಮತ್ತು MIG- 21 ರಚನೆಯ ಲೇಬಲ್​ಗಳಿಂದ ಒಮ್ಮೆ ಕಣ್ಣು ತಾನಾಗಿಯೇ ಅತ್ತ ಹೋಗುತ್ತದೆ. ಮಿಲಿಟರಿ ಹಸಿರು ಬಣ್ಣದ ಪೆಟ್ರೋಲ್ ಟ್ಯಾಂಕ್​ಗೆ IND ಲೇಬಲ್ ಇದೆ. MIG- 21 ಯುದ್ಧ ವಿಮಾನದ ಎಂಜಿನಿಯರಿಂಗ್ ಮತ್ತು ಅಂಶಗಳನ್ನು ಒಳಗೊಂಡ ಕಸ್ಟಮೈಸ್ಡ್ ಮೋಟಾರ್ ಬೈಕ್ ಇದು. ಹೊಸ ಹಾಗೂ ಹಳೆ ಅಭಿರುಚಿಯ ಸರಿಯಾದ ಮಿಶ್ರಣದಂತೆಯೂ ಇದು ಕಾಣುತ್ತದೆ. ಈ ಬೈಕ್​ನ ಎಂಜಿನ್​ ಮಷೀನ್​ಗೆ ಯಾವ ಬದಲಾವಣೆಯೂ ಮಾಡಿಲ್ಲ. ಮೂಲ 650cc ಏರ್/ಆಯಿಲ್ ಕೂಲ್ಡ್ ಎಂಜಿನ್ ಮೂಲಕ 47ಎಚ್​ಪಿ ಪವರ್ ಮತ್ತು 52 ಎನ್​ಎಂ ಗರಿಷ್ಠ ಟಾರ್ಕ್ ಜನರೇಟ್ ಮಾಡುತ್ತದೆ.

ಬೈಕ್ ಸ್ಟೈಲ್​ ಆಗಿ ಕಾಣಲಿ ಎಂಬ ಕಾರಣಕ್ಕೆ ಹೊಸ ಒಂದು ಜೊತೆ ಹೊಗೆ ಹೊರಹೋಗುವ ಎಕ್ಸಾಸ್ಟ್ ಹಾಕಲಾಗಿದೆ. ಇನ್ನು ವ್ಹೀಲ್ ಸೆಟ್ ಅಪ್ ಬಗ್ಗೆ ಹೇಳುವುದಾದರೆ, 18 ಇಂಚಿನ ವೈರ್ ಸ್ಪೋಕ್ ಯೂನಿಟ್​ ಅನ್ನು 17 ಇಂಚಿನ ಅಲಾಯ್ ಅಪೋಲೋ ಟೈರ್​ಗೆ ಬದಲಾಯಿಸಲಾಗಿದೆ. ಈ ಬೈಕ್​ ಅನ್ನು ಗರಿಷ್ಠ ವೇಗ ಗಂಟೆಗೆ 180 ಕಿಲೋಮೀಟರ್​ ತನಕ ಪರೀಕ್ಷಿಸಿರುವುದಾಗಿ ಡಿಸೈನರ್​ಗಳು ಹೇಳಿದ್ದಾರೆ. ಅಂದಹಾಗೆ ಮಾರ್ಪಾಟು ಮಾಡಿದ ಈ ಬೈಕ್​ಗೆ Fearless 650 ಎಂದು ಹೆಸರಿಡಲಾಗಿದೆ. ಈಗ ನಿಮಗೆ ಏನನ್ನಿಸ್ತಾ ಇದೆ?

ಇದನ್ನೂ ಓದಿ: Bajaj Auto CT110X Launch: ಬಜಾಜ್ ಆಟೋ CT110X ಹೊಸ ಬೈಕ್ ಬಿಡುಗಡೆ, ಬೆಲೆ ರೂ. 55,494

(Bengaluru based Bulleteer Customs modified Royal Enfield Interceptor 650 bike with inspiration of MIG 21 war plane)