ಮೂರೂವರೆ ವರ್ಷದ ಹೆಣ್ಣುಮಗುವಿನ ಈ ರೋಪ್​ಸ್ವಿಂಗ್​ ವಿಡಿಯೋ ಈಗ ವೈರಲ್

Viral Video : ಮೂರೂವರೆ ವರ್ಷದ ಈ ಹೆಣ್ಣುಮಗುವಿನ ಹೆಸರು ಸೈಲಾ. ಈಕೆಯ ಅಪ್ಪ ಅಮ್ಮ ಮೈಕ್​ ಸ್ಮೈಲಿ ಮತ್ತು ಜಾನೆಲ್ಲೆ ಸ್ಮೈಲಿ. ಈ ದಂಪತಿ ವೃತ್ತಿಪರ ಪರ್ವತಾರೋಹಿಗಳು. ಇದೀಗ ಅಪ್ಪಅಮ್ಮನ ಹಾದಿಯಲ್ಲಿಯೇ ಮಗಳು ಸೈಲಾ ಸಾಗುತ್ತಿದ್ದಾಳೆ. ಇಷ್ಟು ಎತ್ತರದ ಪರ್ವತದಿಂದ ರೋಪ್​ ಸ್ವಿಂಗ್ ಮಾಡುತ್ತಿರುವ ಈ ಪುಟಾಣಿಯ ವಿಡಿಯೋ ನೋಡಿ ನೆಟ್ಟಿಗರಂತೂ ಬಾಯಿಬಿಟ್ಟು ನೋಡುತ್ತಿದ್ದಾರೆ.

ಸಾಮಾನ್ಯವಾಗಿ ಪೋಷಕರು ತಮ್ಮ ಮಕ್ಕಳನ್ನು ಕಣ್ಣಲ್ಲಿ ಕಣ್ಣಿಟ್ಟು ಪೋಷಿಸುತ್ತಾರೆ. ಜೋರಾಗಿ ಓಡದಂತೆ, ಕುಣಿಯದಂತೆ, ನೆಗೆಯದಂತೆ, ಹಾರದಂತೆ ಹೀಗೆ. ಆದರೆ ಈ ಮಗುವಿನ ವಿಷಯದಲ್ಲಿ ಎಲ್ಲವೂ ಉಲ್ಟಾ. ಏಕೆಂದರೆ ಇದು ಹುಟ್ಟಿರುವುದೇ ಸಾಹಸಪ್ರಿಯ ಅಪ್ಪ ಅಮ್ಮನ ಹೊಟ್ಟೆಯಲ್ಲಿ. ತಮ್ಮ ಮಗುವಿನ ಈ ವಿಡಿಯೋ ಹಾಕಿದ ಪೋಷಕರು, ‘ನಮ್ಮ ಮಗಳು ಸೈಲಾ ಈಗಾಗಲೇ ಸಣ್ಣಪುಟ್ಟ ರೋಪ್​ಸ್ವಿಂಗ್ ಮಾಡಿದ್ದಾಳೆ. ಈ ಚಟುವಟಿಕೆ ಈಕೆಗೆ ಬಹಳ ಇಷ್ಟ. ಇದೀಗ ಇವಳ ಈ ಹೊಸ ವಿಡಿಯೋ ನೋಡಿ. ಎಲ್ಲಾ ರೀತಿಯ ಸುರಕ್ಷತಾ ಕ್ರಮಗಳನ್ನು ಅನುಸರಿಸಲಾಗಿದೆ’ ಎಂದು ಒಕ್ಕಣೆ ಬರೆದಿದ್ಧಾರೆ ಈ ವಿಡಿಯೋಗೆ. ​

ಈಗಾಗಲೇ 38 ಮಿಲಿಯನ್ ಜನರು ಈ ವಿಡಿಯೋ ನೋಡಿದ್ದಾರೆ. 9 ಲಕ್ಷಕ್ಕಿಂತಲೂ ಹೆಚ್ಚು ಜನರು ಇದನ್ನು ಇಷ್ಟಪಟ್ಟಿದ್ದಾರೆ. ಅನೇಕರು ಪ್ರತಿಕ್ರಿಯಿಸಿದ್ಧಾರೆ. ‘ಭಯ ಎನ್ನುವುದು ನಮ್ಮ ಪೋಷಕರಿಂದಲೇ ಬಂದಿರುವಂಥದ್ದು, ಆನುವಂಶಿಕವಾಗಿ. ಆದ್ದರಿಂದ ಹೀಗೆ ಮಕ್ಕಳನ್ನು ಇಂಥ ಚಟುವಟಿಕೆಗಳಲ್ಲಿ ತೊಡಗಿಸುವ ಮೂಲಕ ಆ ಭಯವನ್ನು ಸವಾಲಾಗಿ ಸ್ವೀಕರಿಸುವುದನ್ನು ಕಲಿಸಬೇಕು.’ ಎಂದಿದ್ಧಾರೆ ಒಬ್ಬರು. ‘ಇವಳು ಭಯವನ್ನು ಮೀರಿ ಸಂತೋಷದಿಂದ ತೂಗಾಡುತ್ತಿದ್ದಾಳೆ, ಮತ್ತಷ್ಟು ವಿಡಿಯೋಗಳನ್ನು ನೋಡಲು ಬಯಸುತ್ತೇನೆ’ ಎಂದಿದ್ದಾರೆ ಇನ್ನೂ ಒಬ್ಬರು. ‘ಅತ್ಯಂತ ಅದ್ಭುತ, ನಿಮ್ಮ ಮಗಳು ನಿಮ್ಮಂಥ ಪೋಷಕರನ್ನು ಪಡೆದಿದ್ದು ಅದೃಷ್ಟಶಾಲಿ’ ಎಂದಿದ್ದಾರೆ ಮಗದೊಬ್ಬರು.

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ