ಕ್ಯಾನ್ಸರ್ ಹಿಮ್ಮೆಟ್ಟಿದ ಗೋವಾ ಪೊಲೀಸ್​ ಅಧಿಕಾರಿ; ಪಂದ್ಯವನ್ನು ಗೆಲ್ಲದಿದ್ದರೂ ಜನರ ಮನಸು ಗೆದ್ದರು

Viral : ರೋಗ ಯಾವಾಗ ಯಾರಿಗೆ ಬೇಕಾದರೂ ಬರಬಹುದು. ಆದರೆ ಆ ರೋಗವನ್ನು ಗೆಲ್ಲುವುದು ಎಲ್ಲರಿಗೂ ಸಾಧ್ಯವಾಗಲಿಕ್ಕಿಲ್ಲ. ಅದರಲ್ಲೂ ಕ್ಯಾನ್ಸರ್​ನಂಥ ಮಾರಣಾಂತಿಕ ರೋಗವನ್ನು ಗೆಲ್ಲಬೇಕೆಂದರೆ ಪ್ರಬಲ ಇಚ್ಛಾಶಕ್ತಿ ಬೇಕು. ಗೋವಾದಲ್ಲಿ ಕಾರ್ಯ ನಿರ್ವಹಿಸುತ್ತಿರುವ ಐಪಿಎಸ್​ ಅಧಿಕಾರಿ ನಿಧಿನ್​ ವಲ್ಸನ್ ಕ್ಯಾನ್ಸರ್​ ಗೆದ್ದವರ ಸಾಲಿಗೆ ಸೇರಿದ್ದಾರೆ ಎನ್ನುವುದಕ್ಕೆ ಸಾಕ್ಷಿ​ ಅತ್ಯಂತ ಕಷ್ಟಕರವಾದ ಐರನ್​ಮ್ಯಾನ್​ ಟ್ರೈಥ್ಲಾನ್​ ಓಟದಲ್ಲಿ ಇವರು ಭಾಗವಹಿಸಿದ್ದು ಮತ್ತು ಪಂದ್ಯವನ್ನು ಪೂರ್ಣಗೊಳಿಸಿದ್ದು. ಪಂದ್ಯದಲ್ಲಿ ಇವರು ಸೋತರೂ ಜನಮನವನ್ನು ಮಾತ್ರ ಸಂಪೂರ್ಣ ಗೆದ್ದರು.

ನಿಧಿನ್​ ಗೋವಾದಲ್ಲಿ ಅಪರಾಧ ವಿಭಾಗದಲ್ಲಿ ಪೊಲೀಸ್​ ಅಧೀಕ್ಷಕರಾಗಿದ್ದಾರೆ. ಭೂಕಬಳಿಕೆಗೆ ಸಂಬಂಧಿಸಿದ ಕೇಸ್​ಗಳನ್ನು ನಿರ್ವಹಿಸುತ್ತಾರೆ. ಪಣಜಿಯಲ್ಲಿ ನಡೆದ ಐರನ್​ಮ್ಯಾನ್​ ಟ್ರೈಥ್ಲಾನ್​ ಓಟದಲ್ಲಿ ಭಾಗವಹಿಸಿದ ಅವರು ಪಂದ್ಯದಲ್ಲಿ ಸೋತರೂ ತಮ್ಮ ದೃಢಚಿತ್ತ ಮತ್ತು ಇಚ್ಛಾಶಕ್ತಿಯಿಂದ ಜನಮಾನಸವನ್ನು ಗೆದ್ದಿದ್ದಾರೆ. ಈ ಪಂದ್ಯದಲ್ಲಿ 1,400 ಜನರು ಭಾಗವಹಿಸಿದ್ದರು. ನಿಧಿನ್​, 8 ಗಂಟೆ, 3 ನಿಮಿಷ ಮತ್ತು 53 ಸೆಕೆಂಡುಗಳಲ್ಲಿ ತಮ್ಮ ಪಂದ್ಯವನ್ನು ಪೂರ್ಣಗೊಳಿಸಿದ್ದಾರೆ. 1.9 ಕಿ.ಮೀ ಸಮುದ್ರದಲ್ಲಿ ಈಜು, 90 ಕಿ.ಮೀ ಸೈಕ್ಲಿಂಗ್ ಮತ್ತು 21 ಕಿ.ಮೀ ಓಟವನ್ನು ಈ ಪಂದ್ಯ ಒಳಗೊಂಡಿತ್ತು.

ಪಂದ್ಯದ ನಂತರ ಮಾಧ್ಯಮದೊಂದಿಗೆ ಮಾತನಾಡಿದ ನಿಧಿನ್, ‘ಕ್ಯಾನ್ಸರ್​ನೊಂದಿಗೆ ಹೋರಾಡಲು ಸಾಧ್ಯವಾದರೆ, ನಾವು ಇನ್ನೇನನ್ನು ಸಾಧಿಸಬಹುದು ಎನ್ನುವುದನ್ನು ಜಗತ್ತಿಗೆ ತೋರಿಸಲು ಸಾಧ್ಯವಾಗುತ್ತದೆ. ಕ್ಯಾನ್ಸರ್​ ಜೊತೆ ಹೋರಾಡುವುದು ಅಸಾಧ್ಯವೇನಲ್ಲ’ ಎಂದಿದ್ದಾರೆ.

ಕ್ಯಾನ್ಸರ್ Non-Hodgkin’s Lymphoma ನಿಂದ ಬಳಲುತ್ತಿದ್ದ ಇವರು, ಫೆಬ್ರುವರಿಯಲ್ಲಿ ಈ ರೋಗದಿಂದ ಮುಕ್ತರಾಗಿದ್ದಾರೆ.

ಮತ್ತಷ್ಟು ವೈರಲ್​ ನ್ಯೂಸ್​ಗಾಗಿ ಕ್ಲಿಕ್ ಮಾಡಿ