ಹಾವು ಕಚ್ಚಿ ಯುವಕ ಸಾವು,  ಬದುಕಬಹುದು ಎಂದು ಶವವನ್ನು ಗಂಗಾ ನದಿಗೆ ಮುಳುಗಿಸಿದ ಕುಟುಂಬ 

ಯಾವುದೇ ವಿಷಯಗಳಲ್ಲಿಯೂ  ಅತಿಯಾದ ಮೂಢನಂಬಿಕೆ ಒಳ್ಳೆಯದಲ್ಲ. ಸಾಕಷ್ಟು ಜನರು ಇಂತಹ ನಂಬಿಕೆಗಳಿಂದ ತಮ್ಮ ಜೀವನವನ್ನೇ ಹಾಳು ಮಾಡಿಕೊಳ್ಳುತ್ತಾರೆ. ಅದೇ ರೀತಿ ಇಲ್ಲೊಂದು ಮೂಢನಂಬಿಕೆಯ ಪರಮಾವಧಿಗೆ ಸಂಬಂಧಿಸಿದ ಸುದ್ದಿಯೊಂದು ವೈರಲ್ ಆಗಿದ್ದು, 20 ವರ್ಷದ ಯುವಕನೊಬ್ಬ ಹಾವು ಕಡಿತದಿಂದ ಮೃತಪಟ್ಟಿದ್ದು, ಆತ ಬದುಕಿ ಬರುತ್ತಾನೆಂದು ನಂಬಿ ಕುಟುಂಬಸ್ಥರು ಆತನ ಶವವನ್ನು ಹಗ್ಗದಲ್ಲಿ ಕಟ್ಟಿ ಎರಡು ದಿನಗಳ ಕಾಲ ಗಂಗಾನದಿ ನೀರಿನಲ್ಲಿ ಮುಳುಗಿಸಿಟ್ಟಿದ್ದಾರೆ.

ಈ ಘಟನೆ ಉತ್ತರ ಪ್ರದೇಶದ ಬುಲಂದ್ ಶಹರ್ ನ ಜಹಾಂಗೀರಾಬಾದಿನಲ್ಲಿ ನಡೆದಿದ್ದು, ಏಪ್ರಿಲ್ 26 ರಂದು ಮೋಹಿತ್ ಎಂಬ 20 ವರ್ಷ ವಯಸ್ಸಿನ ಯುವಕನೊಬ್ಬ ಮತ ಚಲಾಯಿಸಿ ಬಂದು ಹೊಲದ ಕಡೆಗೆ ಹೋಗಿರುತ್ತಾನೆ.  ಅಲ್ಲಿ ಆತನಿಗೆ ಹಾವು ಕಡಿದಿದ್ದು, ಆ ತಕ್ಷಣ ಆ ಯುವಕನನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು. ಆದರೆ ಚಿಕಿತ್ಸೆ ಫಲಕಾರಿಯಾಗದೆ ಯುವಕ ಮೃತಪಟ್ಟಿದ್ದಾನೆ.

ಇದನ್ನೂ ಓದಿ: ಟ್ರೆಡ್ ಮಿಲ್ ಮೇಲೆ ಓಡುವಂತೆ ಒತ್ತಾಯಿಸಿ ಮಗ ಪ್ರಾಣವನ್ನೇ ಬಲಿ ಪಡೆದುಕೊಂಡ ತಂದೆ

ನಂತರ ಹೀಗೆ ಹಾವು ಕಡಿತದಿಂದ ಮೃತಪಟ್ಟವರು ಬದುಕಿಬರಬೇಕಾದರೆ ಹಾಗೂ ಅವರ ದೇಹಕ್ಕೆ ಏರಿದ ವಿಷ ಹೋಗಲಾಡಸಬೇಕಾದರೆ ಮೃತ ದೇಹವನ್ನು ಗಂಗಾ ನದಿನೀರಿನಲ್ಲಿ ಮುಳುಗಿಸಬೇಕು ಎಂದು ಯಾರೋ ಹೇಳಿದ ಮೂಢ ನಂಬಿಕೆಯ ಮಾತನ್ನು ನಂಬಿ, ಮೃತ ಯುವಕನ ಕುಟುಂಬಸ್ಥರು ಮೃತ ದೇಹವನ್ನು  ಹಗ್ಗದಲ್ಲಿ ಕಟ್ಟಿ ಎರಡು ದಿನಗಳ ಕಾಲ ಗಂಗಾ ನದಿ ನೀರಿನಲ್ಲಿ ಇರಿಸಿದ್ದಾರೆ. ನಂತರ ಉಸಿರು ಮರಳಿ ಬರದಿದ್ದಾಗ ಆ ಯುವಕನ ಅಂತ್ಯ ಸಂಸ್ಕಾರವನ್ನು ಅಲ್ಲಿಯೇ ನೆರವೇರಿಸಲಾಗಿದೆ. ಈ ಘಟನೆ ಮೂಢನಂಬಿಕೆಯ ಪರಮಾವಧಿಗೆ ಜ್ವಲಂತ ಉದಾಹರಣೆ ಎಂದರೆ ತಪ್ಪಾಗಲಾರದು.

ಇನ್ನಷ್ಟು ವೈರಲ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ