7 ವರ್ಷದ ಈ ಪೋರಿಗೆ ದೀಪಾವಳಿಗೆ ಬಂದ ಹಣವನ್ನು ಮ್ಯೂಚುವಲ್​ ಫಂಡ್​​ನಲ್ಲಿ ತೊಡಗಿಸುವ ಆಶಯ

Viral Video : ಐದಾರು ವಯಸ್ಸಿಗೆ ಬರುತ್ತಿದ್ದಂತೆ ನಿಮ್ಮ ಮನೆಗಳಲ್ಲಿ ಪುಟ್ಟ ಕುಡಿಕೆಯನ್ನು ಕೊಟ್ಟು ಇದರಲ್ಲಿ ನೀನು ಹಣವನ್ನು ಕೂಡಿಡು ಎಂದು ಕೊಟ್ಟಿದ್ದು ನಿಮಗೆ ನೆನಪಿರಬಹುದು. ಈಗಿನ ಮಕ್ಕಳ ಭಾಷೆಯಲ್ಲಿ ಹೇಳಬೇಕೆಂದರೆ ಪಿಗ್ಗಿ ಬ್ಯಾಂಕ್​. ಹೀಗೆ ಹಣ ಕೂಡಿಟ್ಟ ಮಕ್ಕಳ ಆಸೆ ಸಾಮಾನ್ಯವಾಗಿ ಚಾಕೋಲೇಟ್​, ಬಟ್ಟೆ, ಪುಸ್ತಕ ಇತ್ಯಾದಿ ವಸ್ತುಗಳನ್ನು ಖರೀದಿಸುವತ್ತ ಇರುತ್ತದೆ. ಆದರೆ ಇದೀಗ ವೈರಲ್ ಆಗುತ್ತಿರುವ ಈ 7ರ ಬಾಲೆಯ ಬಳಿಯೂ ಒಂದಿಷ್ಟು ಉಳಿತಾಯದ ಹಣವಿದೆ. ಆದರೆ ಆಕೆಗೆ ಈ ಹಣವನ್ನು ಮ್ಯೂಚುವಲ್​ ಫಂಡ್​ಗಳಲ್ಲಿ ತೊಡಗಿಸುವುದಾಗಿ ಅಭಿಲಾಶೆ ವ್ಯಕ್ತಪಡಿಸಿದ್ದಾಳೆ. ನೋಡಿ ಈ ವೈರಲ್ ವಿಡಿಯೋ.

ಪೇಟಿಎಂ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ವಿಜಯ್ ಶೇಖರ್ ಶರ್ಮಾ ಈ ಟ್ವೀಟ್​ ಅನ್ನು ಮರುಟ್ವೀಟ್ ಮಾಡಿ, ಇತ್ತೀಚಿನ ದಿನಗಳಲ್ಲಿ ವಿನಾಕಾರಣ ಖರ್ಚನ್ನು ಕಡಿಮೆ ಮಾಡಿ, ಉಳಿತಾಯದ ಹಣವನ್ನು ಮ್ಯೂಚುವಲ್​ ಫಂಡ್​ಗಳಲ್ಲಿ ತೊಡಗಿಸಲು ಜನರು ಆಸಕ್ತಿ ವಹಿಸುತ್ತಿದ್ದಾರೆ. ಈ ವಿಡಿಯೋ ನೋಡಿ, ಇಲ್ಲಿರುವ 7 ವರ್ಷದ ಮಗುವಿಗೂ ಇದೆಲ್ಲ ಅರ್ಥವಾಗುತ್ತಿದೆ ಎಂದಿದ್ದಾರೆ.

ಈ ಮೂಲ ವಿಡಿಯೋ ಹಂಚಿಕೊಂಡಿದ್ದು ಸ್ವಾತಿ ಡುಗಾರ್ ಎಂಬ ಟ್ವಿಟರ್ ಖಾತೆದಾರರು. ಸ್ವಾತಿಯವರ ಮಗಳೇ ಈ ಪೋರಿ. ದೀಪಾವಳಿಯಂದು ಅವಳಿಗೆ ಉಡುಗೊರೆ ರೂಪದಲ್ಲಿ ಬಂದ ಹಣದ ಬಗ್ಗೆ ಯೋಚಿಸಿದ ಈಕೆ ಈ ಹಣವನ್ನು ಉಳಿತಾಯ ಮಾಡಿ ಮ್ಯೂಚುವಲ್ ಫಂಡ್​ನಲ್ಲಿ ತೊಡಗಿಸಬೇಕು ಎಂದು ಹೇಳಿದ್ದಾಳೆ. ಅಷ್ಟೇ ಅಲ್ಲ ಅದಕ್ಕೆ ಕಾರಣವನ್ನೂ ವಿವರಿಸಿದ್ದಾಳೆ. ಈ ಹಣವನ್ನು 10 ವರ್ಷಗಳವರೆಗೆ ಹೂಡಿಕೆ ಮಾಡಲಿದ್ದೇನೆ ಎಂದೂ ಹೇಳಿದ್ದಾಳೆ. ಆದರೆ ಮ್ಯೂಚುವಲ್​ ಫಂಡ್ ಯಾವಾಗಲೂ ಲಾಭ ತಂದುಕೊಡುತ್ತದೆ ಎಂದು ಹೇಳಲಾಗದು, ಕೆಲವೊಮ್ಮೆ ನಷ್ಟವೂ ಸಂಭವಿಸುತ್ತಿರುತ್ತದೆ ಎಂದಿರುವ ಈಕೆಗೆ ಈ ಬಗ್ಗೆ ಅರಿವು ಚೆನ್ನಾಗಿಯೇ ಇದೆ.

ನೆಟ್ಟಿಗರು ಈಕೆಯ ಆರ್ಥಿಕ ತಿಳಿವಳಿಕೆಯ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ‘ನಾನು ಒಂದನೇ ಕ್ಲಾಸಿನಲ್ಲಿದ್ಧಾಗಲೇ ಮ್ಯೂಚುವಲ್​ ಫಂಡ್​ ಮಾಡಿದ್ದೆ. ಅದನ್ನು ಈ ವಿಡಿಯೋ ನೆನಪಿಸುತ್ತಿದೆ’ ಎಂದಿದ್ದಾರೆ ಒಬ್ಬರು.

ನೀವೂ ಇದೀಗ ಮ್ಯೂಚುವಲ್​ ಫಂಡ್ ಬಗ್ಗೆ ಆಲೋಚಿಸುತ್ತಿದ್ದೀರಾ? ನೋಡಿ ಮತ್ತೆ ಈ ಬಾಲೆಯ ಸಲಹೆ ಕೇಳುತ್ತೀರೋ?

ಮತ್ತಷ್ಟು ವೈರಲ್​ ವಿಡಿಯೋಗಾಗಿ ಕ್ಲಿಕ್ ಮಾಡಿ