8 ಕೆ.ಜಿ. ತೂಗುವ ಈ ಸಮೋಸಾವನ್ನು ಒಬ್ಬರೇ, ಒಂದೇ ಏಟಿಗೆ ತಿಂದರೆ ರೂ. 51,000 ಬಹುಮಾನ!

Viral Video : ಸಮೋಸಾ! ಹೆಸರು ಕೇಳಿದರೆ ಬಾಯಲ್ಲಿ ನೀರೂರುತ್ತದೆಯಲ್ಲ? ಇನ್ನು ಕಣ್ಣೆದುರಿಗಿದ್ದರಂತೂ ಹೇಗೆ ಸುಮ್ಮನಿರುವುದು? ಮಿನಿ ಸಮೋಸಾ ಆದರೆ ಒಂದೇ ಬಾರಿಗೆ ಗುಳುಂ. ಮಾಮೂಲಿ ಸಮೋಸಾ ಆದರೆ ಏಳೆಂಟು ತುತ್ತು. ಆದರೆ ಇಲ್ಲಿರುವ ಈ ಬಡಾ ಸಮೋಸಾ! ಎಲ್ಲಿಂದ ಎತ್ತಕಡೆಯಿಂದ ಯಾವ ತುದಿಯಿಂದ ಯಾವ ಅಂಗುಲದಿಂದ ತಿನ್ನುತ್ತೀರಿ? ಅದೂ ಒಬ್ಬರೇ ಅಂತೂ ತಿನ್ನಲು ಸಾಧ್ಯವೇ ಇಲ್ಲ. ಆದರೆ ಇದನ್ನು ಒಬ್ಬರೇ ತಿನ್ನಬೇಕು ಎಂಬ ಶರತ್ತು ಬೇರೆ ವಿಧಿಸಿದೆ ಇದನ್ನು ತಯಾರಿಸಿದ ಮೀರತ್​ನ ಸಿಹಿಯಂಗಡಿ. ಉದ್ಯಮಿ ಹರ್ಷ ಗೋಯೆಂಕಾ, ಟ್ವೀಟ್ ಮಾಡುತ್ತಿದ್ದಂತೆ ವೈರಲ್ ಆಗುತ್ತಿದೆ.

ಬರೋಬ್ಬರಿ 8 ಕೆ.ಜಿ ತೂಗುವ ಈ ಸಮೋಸಾ ಖಂಡಿತ ಒಬ್ಬರೇ ತಿನ್ನಲು ಸಾಧ್ಯವಿಲ್ಲ ಅಲ್ಲವಾ? ಮೀರತ್​ನ ಕೌಶಲ್ ಸ್ವೀಟ್ಸ್​ ಎಂಬ ಅಂಗಡಿಯಲ್ಲಿ ಈ ಸಮೋಸಾ ತಯಾರಾಗಿದೆ. ಇದನ್ನು ಇನ್​ಸ್ಟಾಗ್ರಾಂನಲ್ಲಿ ಮೊದಲಿಗೆ ಹಂಚಿಕೊಂಡಿದ್ದು ಫುಡ್​ ಬ್ಲಾಗರ್ ಚಾಹತ್ ಆನಂದ. ಇನ್ನೇನು ಈ ಸಮೋಸಾ ನೋಡಿದವರ ಸಂಖ್ಯೆ 5 ಲಕ್ಷಕ್ಕೆ ಏರುತ್ತದೆ.

ನೆಟ್ಟಿಗರು ಸಮೋಸಾ ತಿಂದರೆ ಆರೋಗ್ಯ ಏರುಪೇರಾಗುವುದು ಖಚಿತ ಎನ್ನುತ್ತಿದ್ದಾರೆ. ಹಾಗೆಂದು ಜೀವನಪೂರ್ತಿ ನೀವು ಸಮೋಸಾ ತಿಂದೇ ಇಲ್ಲವೇ? ಎಂದು ಇನ್ನೊಬ್ಬರು ಕೇಳಿದ್ದಾರೆ. ಆದರೆ, ಕೌಶಲ್ ಸ್ವೀಟ್ಸ್ ಈ ಸಮೋಸಾವನ್ನು ಪ್ರದರ್ಶನಕ್ಕೆ ಮಾಡಿದ್ದಲ್ಲ. ಜುಲೈನಲ್ಲಿ ಸ್ಪರ್ಧೆಗಾಗಿ ಮಾಡಿತ್ತು. 30 ನಿಮಿಷದೊಳಗೆ ಒಂದೇ ಏಟಿಗೆ ಒಬ್ಬರೇ ಈ ಸಮೋಸಾ ತಿಂದರೆ ರೂ. 51,000 ನಗದು ಬಹುಮಾನ ಕೊಡಲಾಗುವುದೆಂದು ಘೋಷಿಸಿತ್ತು.

ಹಳೆಯ ವಿಡಿಯೋ ಈ ದೀಪಾವಳಿ ಸಮಯದಲ್ಲಿ ವೈರಲ್ ಆಗಿದೆ.

ನೀವು ಪ್ರಯತ್ನಿಸಬೇಕು ಎಂದುಕೊಂಡಿದ್ದಿರಾ ಹೇಗೆ?

ಮತ್ತಷ್ಟು ವೈರಲ್ ವಿಡಿಯೋಗಾಗಿ ಕ್ಲಿಕ್ ಮಾಡಿ