Viral: ಗೂಗಲ್​ಮ್ಯಾಪ್​ನಲ್ಲಿ ಕಾಣಿಸಿಕೊಂಡ ಕೈ-ಕಾಲು, ತಲೆಯೇ ಇಲ್ಲದ ಆಕೃತಿ; ಬೆಚ್ಚಿಬಿದ್ದ ಜನ

ಅಂತರ್ಜಾಲದಲ್ಲಿ ನಾವು ಹಲವು ಸಂಗತಿಗಳನ್ನು ಗಮನಿಸುತ್ತೇವೆ. ಕೆಲವು ನಮ್ಮ ಮುಖದಲ್ಲಿ ನಗು ಮೂಡಿಸಿದರೆ ಮತ್ತೆ ಕೆಲವು ನಮಗೆ ಆಶ್ಚರ್ಯ ತರಿಸುತ್ತದೆ. ಮತ್ತೆ ಕೆಲವಂತೂ ಬೆಚ್ಚಿಬೀಳಿಸುತ್ತವೆ. ಒಟ್ಟಿನಲ್ಲಿ ಅಂತರ್ಜಾಲದಲ್ಲಿ ನಾವು ನೋಡುವ ವಿಚಾರಗಳು ಹಲವು ಭಾವಗಳ ಸಂಗಮ. ಅದೇನೇ ಇರಲಿ, ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಸೇರಿದಂತೆ ಕೆಲವು ಫೋಟೋಗಳು ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿವೆ. ಅದನ್ನು ನೋಡಿದರೆ ನೀವು ಬೆಚ್ಚಿಬೀಳೋದು ಗ್ಯಾರಂಟಿ! ಹೌದು, ಕಾರಣ ನ್ಯೂಯಾರ್ಕ್​ನ ಬಹುಭದ್ರತೆಯ ಬೀದಿಯಲ್ಲಿ ಕೈ- ಕಾಲುಗಳಿಲ್ಲದ ಅಷ್ಟೇ ಏಕೆ ತಲೆಯೇ ಇಲ್ಲದ ಆಕೃತಿಯ ಚಿತ್ರಗಳು ವೈರಲ್ ಆಗಿವೆ. ಇದನ್ನು ನೋಡಿದ ಜನರು ತಲೆಕೆಡಿಸಿಕೊಂಡಿದ್ದಾರೆ. ಗೂಗಲ್ ಮ್ಯಾಪ್​ಗಳಲ್ಲಿ ಕಾಣಿಸಿಕೊಂಡ ಈ ಚಿತ್ರಗಳು ಇದೀಗ ವೈರಲ್ (Viral) ಆಗಿವೆ. ವಾಸ್ತವವಾಗಿ ಈ ಆಕೃತಿ ಕಾಣಿಸಿಕೊಂಡಿದ್ದು 2021ರ ಮೇ ಸಂದರ್ಭದಲ್ಲಿ. ಆದರೆ ಇದೀಗ ಈ ಫೋಟೋಗಳು ಜನರ ಗಮನವನ್ನು ಮತ್ತೆ ತನ್ನೆಡೆಗೆ ಸೆಳೆದಿದ್ದು, ವೈರಲ್ ಆಗಿದೆ.

ಫೋಟೋದಲ್ಲಿ ಏನಿದೆ?

ಗೂಗಲ್ ಮ್ಯಾಪ್ ಬಳಕೆದಾರರು ಸೂಟ್​ ಮಾದರಿಯ ದಿರಿಸೊಂದನ್ನು ಧರಿಸಿದ ಆಕೃತಿಯೊಂದು ಬೀದಿಗಳಲ್ಲಿ ಅಡ್ಡಾಡುವ ಚಿತ್ರಗಳನ್ನು ಗಮನಿಸಿದ್ದಾರೆ. ಅದು ಸಾಮಾನ್ಯ ಬೀದಿಯೂ ಅಲ್ಲ, ಬದಲಾಗಿ ನ್ಯೂಯಾರ್ಕ್​ನ ಬ್ರೂಕ್ಲಿನ್​ನ ನೇವಿ ಯಾರ್ಡ್​! ಅಲ್ಲಿ ಈ ಆಕೃತಿ ಕಾಣಿಸಿಕೊಂಡಿದ್ದು, ಬೀದಿಗಳಲ್ಲಿ ಓಡಾಡುವ, ಮರದ ಬಳಿ ನಿಂತಿರುವ ಚಿತ್ರಗಳು ವೈರಲ್ ಆಗಿವೆ.

ಈ ಚಿತ್ರ ಹೇಗೆ ಗೂಗಲ್ ಮ್ಯಾಪ್​ನಲ್ಲಿ ಕಾಣಿಸಿಕೊಂಡಿದೆ, ಅದಕ್ಕೆ ಕಾರಣವೇನು? ಎಂಬುದು ಬಹುತೇಕರಿಗೆ ಅಚ್ಚರಿ ತಂದಿದೆ. ಮೊದಮೊದಲಿಗೆ ಇದನ್ನು ನೋಡಿದವರು ಬೆಚ್ಚಿಬಿದ್ದಿದ್ದಾರೆ. ನೇವಿ ಯಾರ್ಡ್ ಅತ್ಯಂತ ಸುರಕ್ಷಿತ ಪ್ರದೇಶ. ಕಟ್ಟಡಗಳಿಂದ ಆವೃತವಾಗಿರುವ ಇದರ ಸುತ್ತಮುತ್ತ ಭದ್ರತೆಯೂ ಹೆಚ್ಚಿದೆ. ಹೀಗಿರುವಾಗ ಇಂತಹ ಆಕೃತಿ ಕಾಣಿಸಿಕೊಂಡಿದ್ದು ಹೇಗೆ ಎನ್ನುವುದು ಎಲ್ಲರ ಪ್ರಶ್ನೆ.

ರೆಡ್ಡಿಟ್​ನಲ್ಲಿ ಹಂಚಿಕೊಂಡಿರುವ ಚಿತ್ರಗಳು ವೈರಲ್ ಆಗಿದ್ದು, ಅವು ಇಲ್ಲಿವೆ:

ರೆಡ್ಡಿಟ್​​ನಲ್ಲಿ ವೈರಲ್ ಆಗಿರುವ ಆಕೃತಿ

ರೆಡ್ಡಿಟ್​​ನಲ್ಲಿ ವೈರಲ್ ಆಗಿರುವ ಆಕೃತಿಯ ಫೋಟೋಗಳು

ಈ ಫೋಟೋಗಳ ಅಸಲಿಯತ್ತೇನಿರಬಹುದು?

ಈ ಫೋಟೋಗಳಲ್ಲಿ ಕಂಡುಬಂದಿರುವ ಆಕೃತಿ ಎಲ್ಲರಿಗೂ ಆಶ್ಚರ್ಯ ತಂದಿದೆ. ಇದಕ್ಕೆ ಕಾರಣ ಇನ್ನೂ ಬಹಿರಂಗವಾಗಿಲ್ಲ. ಆದರೆ ಈ ಹಿಂದೆ ಇಂಥದ್ದೇ ಪ್ರಕರಣಗಳನ್ನು ಗಮನಿಸಿಕೊಂಡು ಇದಕ್ಕೆ ಕಾರಣವನ್ನು ಹೇಳಬಹುದು. ಗೂಗಲ್ ಮ್ಯಾಪ್​ನ ಗ್ಲಿಚ್​ನ ಕಾರಣದಿಂದ ಹೀಗಾಗಿದೆ ಎನ್ನುವುದು ಒಂದು ಊಹೆ. ಈ ಹಿಂದೆಯೂ ತಲೆ, ಕಾಲುಗಳಿಲ್ಲದ ವ್ಯಕ್ತಿಯ ಫೋಟೋಗಳು, ಅಥವಾ ದೇಹದ ಭಾಗಗಳು ನಾಪತ್ತೆಯಾಗಿರುವ ಫೋಟೋಗಳು ವೈರಲ್ ಆಗಿದ್ದವು. 2021ರ ಮೇ ಸಂದರ್ಭದಲ್ಲಿ ಕೊವಿಡ್ ಪ್ರಕರಣಗಳು ಹೆಚ್ಚಿದ್ದ ಕಾರಣ, ಸೂಟ್ ಮಾದರಿಯ ದಿರಿಸನ್ನು ಧರಿಸಿ ವ್ಯಕ್ತಿ ಓಡಾಡಿರಬಹುದು. ತಾಂತ್ರಿಕ ಸಮಸ್ಯೆ ಅರ್ಥಾತ್ ಗ್ಲಿಚ್ ಕಾರಣದಿಂದ ಆಕೃತಿಯ ಮಾದರಿಯಲ್ಲಿ ವ್ಯಕ್ತಿ ಗೋಚರವಾಗಿರುವ ಸಾಧ್ಯತೆ ಇದೆ. ಆದರೆ ಈ ಬಗ್ಗೆ ಸ್ಪಷ್ಟೀಕರಣ ಇನ್ನಷ್ಟೇ ಬರಬೇಕಿದೆ.

ಇದನ್ನೂ ಓದಿ: Viral: ಸ್ಕರ್ಟ್ ಧರಿಸಿ ‘ಸಾಮಿ ಸಾಮಿ’ ಹಾಡಿಗೆ ಯುವಕನ ಭರ್ಜರಿ ಡಾನ್ಸ್; ಏನಿದು ಹೊಸ ಟ್ರೆಂಡ್?

ಮದುವೆ ಆದ ಖುಷಿಗೆ ಹೆಂಡತಿಯನ್ನು ಎತ್ತಿಕೊಂಡು ಓಡಾಡಿದ​ ರಣಬೀರ್​ ಕಪೂರ್​: ವಿಡಿಯೋ ವೈರಲ್​