ಅತಿ ಸೋಮಾರಿಗಳಿಗೆ 90,000 ರೂ. ಬಹುಮಾನ; ಈ ವಿಚಿತ್ರ ಉತ್ಸವದ ಬಗ್ಗೆ ಗೊತ್ತಾ?
Festival of Laziness: ಸೋಮಾರಿತನದ ಉತ್ಸವದಲ್ಲಿ ಭಾಗವಹಿಸುವವರು ಮಲಗಿದಲ್ಲೇ ಮೊಬೈಲ್ ನೋಡುತ್ತಾ, ಆಗಾಗ ನಿದ್ರೆ ಮಾಡುತ್ತಾ ಕಳೆಯುತ್ತಿದ್ದಾರೆ. ಅವರಿಗೆ ದಿನಕ್ಕೆ 3 ಬಾರಿ ಊಟ ನೀಡಲಾಗುತ್ತದೆ. ಪ್ರತಿ 8 ಗಂಟೆಗಳಿಗೊಮ್ಮೆ ವಿಶ್ರಾಂತಿ ಕೊಠಡಿಯ ವಿರಾಮಗಳನ್ನು ಅನುಮತಿಸಲಾಗುತ್ತದೆ.
Updated on: Sep 29, 2023 | 2:43 PM
ಇತ್ತೀಚೆಗಂತೂ ಏನೇನೋ ಸ್ಪರ್ಧೆಗಳು ಶುರುವಾಗಿವೆ. ಆ ಸ್ಪರ್ಧೆಯಲ್ಲಿ ವಿಜೇತರಾದವರಿಗೆ ಬಹುಮಾನ ಕೊಡುವುದು ಸಾಮಾನ್ಯ. ಆದರೆ, ಏನೂ ಮಾಡದೇ ಸುಮ್ಮನೇ ಇರುವವರಿಗೂ ಸ್ಪರ್ಧೆಯೊಂದನ್ನು ಇರಿಸಲಾಗಿದೆ. ಸೋಮಾರಿತನದ ಉತ್ಸವ ಎಂಬ ಹಬ್ಬ ನಡೆಯಲಿದ್ದು, ಇದರಲ್ಲಿ ಅತಿಯಾಗಿ ಸೋಮಾರಿತನ ತೋರಿದವರಿಗೆ ಬರೋಬ್ಬರಿ 90,000 ರೂ. ಬಹುಮಾನ ನೀಡಲಾಗುವುದು. ಏನೂ ಮಾಡದೆ ಸೋಮಾರಿಯಾಗಿರುವುದಕ್ಕೂ ಬಹುಮಾನ ಕೊಡುತ್ತಾರೆಂದರೆ ಖುಷಿಯಾಗದೆ ಇದ್ದೀತೇ?
ಆದರೆ, ಈ ಹಬ್ಬ ಇರುವುದು ಯುರೋಪ್ ಖಂಡದ ಮಾಂಟೆನೆಗ್ರೊದಲ್ಲಿ. ಈ ದೇಶದ ಹೊರಗೆ ವಾಸಿಸುವ ಜನರಿಗೆ ಈ ಉತ್ಸವದಲ್ಲಿ ಪಾಲ್ಗೊಳ್ಳಲು ಅವಕಾಶವಿಲ್ಲ. ಈ ಉತ್ಸವದಲ್ಲಿ ಜಯಶಾಲಿಯಾಗುವ ವ್ಯಕ್ತಿಗೆ ಮಾಂಟೆನೆಗ್ರೋದ ಅತಿ ಸೋಮಾರಿ ಪ್ರಜೆ ಎಂಬ ಬಿರುದು ನೀಡಲಾಗುವುದು. ಇಲ್ಲಿನ ಬ್ರೆಜ್ನಾ ಗ್ರಾಮದಲ್ಲಿ ಆಯೋಜಿಸಲಾದ ಈ ಉತ್ಸವ ಇದೀಗ ದೇಶದ ಗಮನ ಸೆಳೆದಿದೆ.
ಇದನ್ನೂ ಓದಿ: Skin Care: ನಿಮ್ಮ ಚರ್ಮದ ಸೌಂದರ್ಯಕ್ಕೆ ಅತ್ಯುತ್ತಮವಾದ 12 ಆಹಾರಗಳಿವು
ಯಾರು ಕುಳಿತುಕೊಳ್ಳದೆ ಅಥವಾ ನಿಲ್ಲದೆ ಹೆಚ್ಚು ಕಾಲ ಮಲಗಿಕೊಂಡು ಸೋಮಾರಿಯಾಗಿರುತ್ತಾರೆ ಎಂಬುದನ್ನು ನಿರ್ಧರಿಸಲಾಗುತ್ತದೆ. ಆ ಸ್ಪರ್ಧಿಗಳು ಕುಳಿತರೆ ಅಥವಾ ನಿಂತರೆ ಅವರನ್ನು ಸ್ಪರ್ಧೆಯಿಂದ ಅನರ್ಹಗೊಳಿಸಲಾಗುತ್ತದೆ. ಭಾಗವಹಿಸುವವರು ಹಾಸಿಗೆಗಳ ಮೇಲೆ ವಿಶ್ರಾಂತಿ ಪಡೆಯಬೇಕು. ಹಾಗಂತ ಇದು ಒಂದೆರಡು ದಿನದ ಕತೆಯಲ್ಲ. ಕಳೆದ 1 ತಿಂಗಳಿನಿಂದಲೂ ಈ ಸ್ಪರ್ಧೆಯ ಸ್ಪರ್ಧಿಗಳು ಮಲಗಿಕೊಂಡು, ಸೋಮಾರಿತನದಿಂದಲೇ ದಿನ ಕಳೆಯುತ್ತಿದ್ದಾರೆ.
ಈ ಸ್ಪರ್ಧೆಯು ಕಳೆದ 12 ವರ್ಷಗಳಿಂದ ಸಾಂಪ್ರದಾಯಿಕವಾಗಿ ನಡೆದುಕೊಂಡು ಬಂದಿದೆ. ಈ ವರ್ಷ ಆಗಸ್ಟ್ 21ರಂದು ಪ್ರಾರಂಭವಾದ ಈ ವರ್ಷದ ಸ್ಪರ್ಧೆ ಇನ್ನೂ ನಡೆಯುತ್ತಿದೆ. ಆರಂಭಿಕವಾಗಿ ಭಾಗವಹಿಸಿದ 21 ಸ್ಪರ್ಧಿಗಳಲ್ಲಿ 4 ಅತಿ ಸೋಮಾರಿಗಳು ಮಾತ್ರ ಇನ್ನೂ ಈ ಸ್ಪರ್ಧೆಯಲ್ಲಿ ಉಳಿದುಕೊಂಡಿದ್ದಾರೆ. ತಾತ್ಕಾಲಿಕವಾಗಿ ತಮ್ಮ ಕುಟುಂಬ, ಕೆಲಸ ಮತ್ತು ಶೈಕ್ಷಣಿಕ ಜವಾಬ್ದಾರಿಗಳನ್ನು ಬದಿಗಿಟ್ಟು ಈ ಉತ್ಸವದಲ್ಲಿ ಅವರು ಪಾಲ್ಗೊಂಡಿದ್ದಾರೆ. ಈ ಉತ್ಸವದ ವಿಜೇತರು ಅಂದಾಜು ರೂ. 90,000 ನಗದು ಬಹುಮಾನವನ್ನು ಸ್ವೀಕರಿಸುತ್ತಾರೆ.
ಇದನ್ನೂ ಓದಿ: Viral Video: ಗಣೇಶ ವಿಸರ್ಜನೆ ವೇಳೆ ಭರ್ಜರಿ ಸ್ಟೆಪ್ ಹಾಕಿದ ಹೈದರಾಬಾದ್ ಪೊಲೀಸ್; ವಿಡಿಯೋ ವೈರಲ್
ಪರದೆಗಳನ್ನು ಹಾಕಿ ಈ ಸ್ಪರ್ಧಿಗಳಿಗೆ ಕೊಠಡಿ ನಿರ್ಮಿಸಲಾಗಿರುತ್ತದೆ. ಈ ಕೊಠಡಿಯಲ್ಲಿ ಅಲ್ಲಲ್ಲಿ ಬಿದ್ದ ಬಟ್ಟೆಗಳು, ತಟ್ಟೆಯಲ್ಲಿ ಅಳಿದುಳಿದ ಊಟ, ಮುದ್ದೆಯಾಗಿ ಬಿದ್ದ ಹೊದಿಕೆಗಳನ್ನು ನೋಡಬಹುದು. ಈ ಸ್ಪರ್ಧೆಯಲ್ಲಿ ಭಾಗವಹಿಸುವವರು ಮಲಗಿದಲ್ಲೇ ಮೊಬೈಲ್ ನೋಡುತ್ತಾ, ಆಗಾಗ ನಿದ್ರೆ ಮಾಡುತ್ತಾ ಕಳೆಯುತ್ತಿದ್ದಾರೆ. ಅವರಿಗೆ ದಿನಕ್ಕೆ 3 ಬಾರಿ ಊಟ ನೀಡಲಾಗುತ್ತದೆ. ಪ್ರತಿ 8 ಗಂಟೆಗಳಿಗೊಮ್ಮೆ ವಿಶ್ರಾಂತಿ ಕೊಠಡಿಯ ವಿರಾಮಗಳನ್ನು ಅನುಮತಿಸಲಾಗುತ್ತದೆ. ಅವರ ಆರೋಗ್ಯವನ್ನು ಆಗಾಗ ತಪಾಸಣೆ ಮಾಡಲಾಗುತ್ತದೆ. ಈ ಸ್ಪರ್ಧಿಗಳು ನೇರವಾಗಿ ನಿಲ್ಲುವಂತಿಲ್ಲ, ಕುಳಿತುಕೊಳ್ಳುವಂತಿಲ್ಲ. ತಮ್ಮ ಮೊಬೈಲ್ ಫೋನ್‌ಗಳನ್ನು ಬಳಸಬಹುದು, ಪುಸ್ತಕಗಳನ್ನು ಓದಬಹುದು ಮತ್ತು ಯಾರನ್ನಾದರೂ ಕರೆಸಿ ಹರಟೆ ಕೂಡ ಹೊಡೆಯಬಹುದು.
ಇನ್ನಷ್ಟು ವೈರಲ್ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
