ಭಾರಿ ಮಳೆಯಿಂದ ಪಕ್ಕಕ್ಕೆ ವಾಲಿದೆ ಗೌರಮ್ಮ ಲೇ ಔಟ್​ನಲ್ಲಿನ ರಾಜಾಕಾಲುವೆ ಪಕ್ಕದ 3-ಅಂತಸ್ತಿನ ಕಟ್ಟಡ

ಬೆಂಗಳೂರು ಮಹಾನಗರದಲ್ಲಿ ಬಹುಮಹಡಿ ಕಟ್ಟಡಗಳು ವಾಲುವುದು, ಕುಸಿಯುವುದು ಸಾಮಾನ್ಯವಾಗಿ ಬಿಟ್ಚಿದೆ. ವಾರದಲ್ಲಿ ಒಂದೆರಡು ಪ್ರಕರಣಗಳು ವರದಿಯಾಗುತ್ತಿವೆ. ಈ ಅನಾಹುತಗಳಿಗೆ ಅವಾಂತಕಾರಿಯಾಗಿ ಸುರಿಯುವ ಮಳೆ ಒಂದು ಕಾರಣವಾದರೆ ಎರಡಂತಸ್ತು ಕಟ್ಟಡಕ್ಕೆ ಅನುಮತಿ ಪಡೆದು ನಾಲ್ಕು ಅಂತ್ತಸ್ತಿನ ಕಟ್ಟಡ ಕಟ್ಟುವುದು, ಕಳಪೆ ಕಾಮಗಾರಿಗಳೂ ಕಾರಣವಾಗುತ್ತಿವೆ.

ಈ ವಿಡಿಯೋನಲ್ಲಿರುವ ಮನೆಯನ್ನೊಮ್ಮೆ ನೋಡಿ. ನೋಡೋದಿಕ್ಕೆ ಸುಂದರವೆನಿಸುವ ಮೂರು ಅಂತಸ್ತಿನ ಕಟ್ಟಡವಿದು. ನಾಗರಭಾವಿ ಡಿ ಗ್ರೂಪ್ ಗೌರಮ್ಮ ಲೇಔಟ್​ನಲ್ಲಿ ಈ ಮನೆಯಿದೆ. ಇದು ಯಾರಿಗೆ ಸೇರಿದ್ದು ಅನ್ನೋದು ನಮಗೆ ಬೇಡ. ಎಲ್ಲ ಸರಿಯಾಗಿದೆ, ಯಾಕೆ ತೋರಿಸುತ್ತಿದ್ದಾರೆ ಅಂತ ನಿಮಗೆ ಅನಿಸಬಹುದು.

ಅಸಲಿಗೆ ವಿಷಯವೇನೆಂದರೆ, ರವಿವಾರ ಸುರಿದ ಭಾರಿ ಮಳೆಯಿಂದಾಗಿ ಈ ಕಟ್ಟಡದ ಒಂದು ಭಾಗದ ಅಡಿಪಾಯ ಅದುರಿದಂತೆ ಕಾಣುತ್ತಿದೆ. ಹಾಗಾಗೇ ಕಟ್ಟದ ಕೊಂಚ ಪಕ್ಕಕ್ಕೆ ವಾಲಿದೆ ಮತ್ತು ಒಂದು ಭಾಗದಲ್ಲಿ ಬಿರುಕು ಬಿಟ್ಟಿದೆ. ಯಾವುದೇ ಅನಾಹುತ ಸಂಭವಿಸಿಲ್ಲವಾದರೂ ಅಪಾಯ ತಪ್ಪಿದ್ದಲ್ಲ.

ಮತ್ತೊಂದು ಗಮನಿಸಬೇಕಾದ ಅಂಶವೆಂದರೆ, ಈ ಮನೆಯ ಪಕ್ಕದಲ್ಲೇ ರಾಜಾ ಕಾಲುವೆ ಹರಿದು ಹೋಗುತ್ತದೆ. ಕಟ್ಟಡ ಹೆಚ್ಚು ಕಡಿಮೆ ಅದಕ್ಕೆ ಅಂಟಿಕೊಂಡೇ ಇದೆ. ರಾಜಕಾಲುವೆ ಹತ್ತಿರ ಅಥವಾ ಅಂಟಿಕೊಂಡಂತೆ ಕಟ್ಟಡ ನಿರ್ಮಿಸಬಾರದೆನ್ನುವ ನಿಯಮವನ್ನು ಇಲ್ಲಿ ಗಾಳಿಗೆ ತೂರಲಾಗಿದೆ.

ಇದನ್ನೂ ಓದಿ:  ‘ನಾಯಿ ತೆವಳುತ್ತಿದೆ, ಪಾಪ’ ಎಂದವರನ್ನು ಬೇಸ್ತು ಬೀಳಿಸಿದ ಶ್ವಾನ; ಇದಕ್ಕೆ ಆಸ್ಕರ್ ಕೊಡಬೇಕು ಎಂದ ನೆಟ್ಟಿಗರು: ವಿಡಿಯೊ ನೋಡಿ