Temple Tour: ವ್ಯಾಸ ಮತ್ತು ಕಣ್ವ ಮಹರ್ಷಿಗಳಿಂದ ಪೂಜಿಸಲ್ಪಟ್ಟ ಕೆಂಗಲ್ ಹನುಮಂತರಾಯ ಮಂದಿರವಿದು

ರಾಮನಗರ ಜಿಲ್ಲೆಯ ಚನ್ನಪಟ್ಟಣ ತಾಲೂಕಿನ ಸುತ್ತಮುತ್ತ ಅಯ್ಯನ ಗುಡಿ ಅಂದರೆ ಎಲ್ಲರು ನಿಂತ ಸ್ಥಳದಿಂದಲೇ ಕೈ ಎತ್ತಿ ಮುಗಿಯುತ್ತಾರೆ. ಕಾರಣ ಜನರಿಗೆ ಆ ಮಂದಿರದ ಮೇಲೆ, ಅಲ್ಲಿ ಪೂಜಿಸಲ್ಪಡುತ್ತಿರುವ ಶಕ್ತಿಯ ಮೇಲೆ ಅಂತದ್ದೊಂದು ಭಕ್ತಿ ಭಾವವಿದೆ. ಜನಸಾಮಾನ್ಯರಿಗೆ ಅಯ್ಯನ ಗುಡಿ ಅಂದರೆ ಇದು ಯಾವ ಮಂದಿರ ಎನ್ನುವ ಪ್ರಶ್ನೆ ಮೂಡುತ್ತದೆ. ಆದರೆ ಕೆಂಗಲ್ ಅಂದರೆ ಆ ಹನುಮಂತರಾಯನ ಚಿತ್ರಣ ಕಣ್ಮುಂದೆ ಬರುತ್ತದೆ. ಸುಮಾರು 800 ವರ್ಷಗಳ ಇತಿಹಾಸವುಳ್ಳ ಕೆಂಗಲ್ ಹನುಮಂತರಾಯ ವ್ಯಾಸ ಮತ್ತು ಕಣ್ವ ಮಹರ್ಷಿಗಳಿಂದ ಪೂಜೆ ಪಡೆದಿದ್ದಾನೆ. ಸಾಮಾನ್ಯವಾಗಿ ಹನುಮನ ಆಲಯ ದಕ್ಷಿಣ ಅಥವಾ ಪಶ್ಚಿಮಾಭಿಮುಖವಾಗಿ ಇರುವುದು ವಾಡಿಕೆ. ಆದರೆ ಕೆಂಗಲ್​ನಲ್ಲಿ ಮಾತ್ರ ಆಂಜನೇಯ ಉತ್ತರಾಭಿಮುಖವಾಗಿ ನಿಂತಿದ್ದಾನೆ. ಅಷ್ಟೇ ಅಲ್ಲ ಕಾಲ ಕ್ರಮೇಣ ಈಶಾನ್ಯ ದಿಕ್ಕಿನತ್ತ ತಿರುಗುತ್ತಾ ಮಾರುತಿ ಭಕ್ತರನ್ನು ಆಶ್ಚರ್ಯ ಚಕಿತರನ್ನಾಗಿಸಿದ್ದಾನೆ.