ಪ್ಯಾರಾಮೆಡಿಕಲ್ ಕೋರ್ಸ್ ಮಾಡಿದವರಿಗೆ ನೌಕರಿಗಳೇ ಸೃಷ್ಟಿಯಾಗಿಲ್ಲ, ನ್ಯಾಯಕ್ಕಾಗಿ ಮುಖ್ಯಮಂತ್ರಿಗಳ ಮೊರೆಹೊಕ್ಕ ವಂಚಿತರು

ನಮಗೆ ನ್ಯಾಯ ಬೇಕು, ನೌಕರಿ ಬೇಕು ಎಂದು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ (Basavaraj Bommai) ಅವರ ಕಚೇರಿ ಎದುರು ಪ್ರತಿಭಟನೆ ನಡೆಸುತ್ತಿರುವ ಈ ಯುವಕ ಯುವತಿಯರನ್ನು ನೋಡಿ. ಇವರೆಲ್ಲ, ಪ್ಯಾರಾಮೆಡಿಕಲ್ (paramedical) ವ್ಯಾಸಂಗ (ಡಿಪ್ಲೋಮಾ) ಪೂರೈಸಿದ್ದಾರೆ. ಇಲ್ಲಿ ಕಾಣುತ್ತಿರುವರು ಮಾತ್ರ ಅಲ್ಲ, ತಮ್ಮಂತೆ 5,000 ಜನ ಈ ವ್ಯಾಸಂಗ ಮಾಡಿದ್ದಾರೆ ಎಂದು ಇವರು ಹೇಳುತ್ತಾರೆ. ಆದರೆ ಕೋರ್ಸ್ ಮುಗಿಸಿ 7 ವರ್ಷ ಕಳೆದರೂ ಇವರಿಗೆ ನೌಕರಿಗಳಿಲ್ಲ (jobs). ಸಂಬಂಧಪಟ್ಟ ಇಲಾಖೆಗೆ ಎಡತಾಕಿದರೆ, ನೀವು ಮಾಡಿರುವ ಕೋರ್ಸ್​ಗೆ ನೌಕರಿ ಸಿಗುವುದಿಲ್ಲ ಅಂತ ಹೇಳುತ್ತಾರಂತೆ. ನೌಕರಿ ಸಿಗುವುದಿಲ್ಲ ಅಂತಾದರೆ ಯಾವ ಪುರುಷಾರ್ಥಕ್ಕೆ ಪ್ಯಾರಾಮೆಡಿಕಲ್ ಕೋರ್ಸ್ ಆರಂಭಿಸಿದ್ದು ಅಂತ ಅವರು ಪ್ರಶ್ನಿಸುತ್ತಿದ್ದಾರೆ. ಇದೇ ಹಿನ್ನೆಲೆಯಲ್ಲಿ ಅವರು ಶನಿವಾರದಂದ ಮುಖ್ಯಮಂತ್ರಿಗಳನ್ನು ಕಾಣಲು ಬಂದಿದ್ದರು, ನಮಗೆ ನೌಕರಿ ಕೊಡಿ ಇಲ್ಲವೇ ದಯಾಮರಣಕ್ಕೆ (euthanasia ) ಅವಕಾಶ ನೀಡಿ ಎಂದು ಬೊಮ್ಮಾಯಿ ಅವರನ್ನು ಕೇಳಲು ಬಂದಿದ್ದವರಿಗೆ ಪೊಲೀಸರು ಅಡ್ಡಗಟ್ಟಿ ಮುಖ್ಯಮಂತ್ರಿಗಳನ್ನು ಕಾಣಲು ಬಿಟ್ಟಿಲ್ಲ.

ಆಗಲೇ ಯುವಕ-ಯುವತಿಯರು ಗೇಟ್ ಮುಂದೆ ಕೂತು ಪ್ರತಿಭಟನೆ ಆರಂಭಿಸಿದ್ದಾರೆ ಮತ್ತು ನ್ಯಾಯ ಕೊಡಿ ಅಂತ ಘೋಷಣೆ ಕೂಗಲಾರಂಭಿಸಿದ್ದಾರೆ. ಪ್ರಾಯಶಃ ಪ್ರತಿಭಟನೆ ನಡೆಸುತ್ತಿರರುವ ಸುದ್ದಿಯನ್ನು ಪೊಲೀಸರು ಮುಖ್ಯಮಂತ್ರಿಗಳಿಗೆ ತಲುಪಿಸಿದ್ದಾರೆ. ಬೊಮ್ಮಾಯಿ ಅವರು ಯುವಕ-ಯುವತಿರ ಪೈಕಿ ಮೂವರನ್ನು ತಮ್ಮ ನಿವಾಸಕ್ಕೆ ಕರೆತನ್ನಿ ಅಂತ ಸೂಚನೆ ನೀಡಿದ್ದಾರೆ.

ಮುಖ್ಯಮಂತ್ರಿಗಳನ್ನು ಕಾಣಲು ಹೋಗುವ ಮೊದಲು ಯುವಕರು ಮಾಧ್ಯಮದವರೊಂದಿಗೆ ಮಾತಾಡಿದ್ದಾರೆ. ಮುಖ್ಯಮಂತ್ರಿಗಳು ತಮ್ಮ ಬೇಡಿಕೆಗೆ ಸೂಕ್ತವಾಗಿ ಸ್ಪಂದಿಸದಿದ್ದರೆ, ಪ್ರತಿಭಟನೆ ಮುಂದುವರಿಸುವುದಾಗಿ ಅವರು ಹೇಳಿದ್ದಾರೆ.

ಇದನ್ನೂ ಓದಿ:   ಬಾಗಲಕೋಟೆ ಸರ್ಕಾರಿ ಶಾಲೆಯಲ್ಲಿ ನಮಾಜ್ ಮಾಡಿದ ವಿದ್ಯಾರ್ಥಿಗಳು! ವೈರಲ್ ಆದ ವಿಡಿಯೋ ಇಲ್ಲಿದೆ