ಎಲ್ ನಿನೋ ಕಂಟಕ: ಮುಂದಿನ 6 ತಿಂಗಳಲ್ಲಿ 4.5 ಲಕ್ಷ ಮಂದಿ ಸಾವು ಭೀತಿ

ಬೆಂಗಳೂರು, ಸೆ.24: ಜಾಗತಿಕ ಹವಾಮಾನ ಬದಲಾವಣೆಯ ಪರಿಣಾಮವಾಗಿ ಎಲ್ ನಿನೋದಿಂದ ಉಂಟಾಗುವ ಹವಾಮಾನ ವೈಪರೀತ್ಯವು ಕೋಟ್ಯಾಂತರ ಜನರ ಮೇಲೆ ನೇರವಾಗಿ ಪರಿಣಾಮ ಬೀರಲಿದೆ. ಮುಂದಿನ ಆರು ತಿಂಗಳಲ್ಲಿ, ಅಂದರೆ ಸೆಪ್ಟೆಂಬರ್ 2026ರಿಂದ ಫೆಬ್ರವರಿ 2027ರ ಅವಧಿಯಲ್ಲಿ, ವಿಶ್ವದಾದ್ಯಂತ 4.5 ಲಕ್ಷ ಮಂದಿ ಪ್ರಾಣ ಕಳೆದುಕೊಳ್ಳುವ ಆಘಾತಕಾರಿ ಮುನ್ಸೂಚನೆಯನ್ನು ಅಮೆರಿಕಾದ ಕ್ಲೈಮೇಟ್ ಇಂಪ್ಯಾಕ್ಟ್ ಲ್ಯಾಬ್‌ನ ಹೊಸ ಸಂಶೋಧನಾ ವರದಿಯು ಬಿಚ್ಚಿಟ್ಟಿದೆ. ಈ ವರದಿಯ ಪ್ರಕಾರ, ಎಲ್ ನಿನೋ ಪ್ರಭಾವವು ಬಲಗೊಳ್ಳುತ್ತಿದ್ದು, 2027ರವರೆಗೂ ಮುಂದುವರಿಯಲಿದೆ. ಆಫ್ರಿಕಾ ಖಂಡವು ಈ ಪರಿಣಾಮದಿಂದ ತೀವ್ರವಾಗಿ ನಷ್ಟ ಅನುಭವಿಸಲಿದ್ದು, ಸುಮಾರು 66,800 ಉಷ್ಣ ಸಂಬಂಧಿ ಸಾವುಗಳು ಸಂಭವಿಸುವ ಅಂದಾಜಿದೆ. ನೈಜೀರಿಯಾದಲ್ಲಿ 31,400, ಸುಡಾನ್‌ನಲ್ಲಿ 17,500, ಮತ್ತು ಚಾಡ್‌ನಲ್ಲಿ 8,000 ಸಾವುಗಳು ಸಂಭವಿಸಬಹುದು. ಆಗ್ನೇಯ ಏಷ್ಯಾದ ದೇಶಗಳಾದ ಇಂಡೋನೇಷ್ಯಾ, ಫಿಲಿಪೈನ್ಸ್, ವಿಯೆಟ್ನಾಂ, ಥಾಯ್ಲೆಂಡ್ ಮತ್ತು ಕಾಂಬೋಡಿಯಾದಲ್ಲಿ ಒಟ್ಟು ಸುಮಾರು 19,400 ಸಾವುಗಳು ಅಂದಾಜಿಸಲಾಗಿದೆ. ಭಾರತದಲ್ಲಿ, ಎಲ್ ನಿನೋ ಪರಿಣಾಮದಿಂದ ಬರಗಾಲ, ಮಳೆ ಕೊರತೆ ಮತ್ತು ಕೃಷಿ ಬಿಕ್ಕಟ್ಟು ಎದುರಾಗಿದೆ. ಮುಂಬರುವ ತಿಂಗಳುಗಳಲ್ಲಿ ಭಾರತದಲ್ಲಿ ಸುಮಾರು 15,800 ಜನರು ತೀವ್ರ ಉಷ್ಣತೆಯಿಂದ ಬಲಿಯಾಗುವ ಭೀತಿಯಿದೆ ಎಂದು ವರದಿ ಹೇಳಿದೆ. ಹೆಚ್ಚಿದ ತಾಪಮಾನ, ಆಹಾರ ಅಭದ್ರತೆ ಮತ್ತು ಸಾಂಕ್ರಾಮಿಕ ರೋಗಗಳು ಈ ಸಾವುಗಳಿಗೆ ಪ್ರಮುಖ ಕಾರಣಗಳಾಗಿವೆ.

ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ